Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 24: Yosef Ka Enyɛmimɛi lɛ Ekwɛ

Biblia Mli Sane 24: Yosef Ka Enyɛmimɛi lɛ Ekwɛ

YOSEF miisumɔ ni ele kɛji akɛ enyɛmimɛi onukpai 10 lɛ ayitsoŋ wa ni amɛbɛ mɔbɔnalɛ lolo lo. No hewɔ lɛ ekɛɛ amɛ akɛ: ‘Saralɔi ji nyɛ. Nyɛba koni nyɛbatao nyɛle bɔ ni nyɛaafee nyɛye wɔnɔ.’

Amɛha hetoo akɛ: ‘Dabi, jeee nakai. Hii anɔkwafoi ji wɔ. Nyɛmimɛi ji wɔ fɛɛ. Wɔyi 12. Shi wɔnyɛmi kome bɛ, ni bibioo kwraa lɛ yɛ wɔ tsɛ ŋɔɔ yɛ shia.’

Yosef kwa efee tamɔ eheee amɛ eyeee. Ewo enyɛmi ni atsɛɔ lɛ Simeon lɛ tsuŋ, ni eha mɛi ni eshwɛ lɛ niyenii koni amɛya amɛmaŋ. Shi ekɛɛ amɛ akɛ: ‘Kɛ nyɛmiiba ekoŋŋ lɛ, nyɛkɛ nyɛnyɛmi fioo kwraa lɛ abaa.’

Beni amɛku amɛsɛɛ ni amɛyashɛ Kanaan lɛ, enyɛmimɛi lɛ gba amɛ tsɛ Yakob nibii fɛɛ ni ba lɛ. Yakob ye awerɛho diɛŋtsɛ. Kɛkɛ ni efó akɛ: ‘Yosef bɛ dɔŋŋ, ni agbɛnɛ Simeon hu bɛ dɔŋŋ. Miŋmɛŋ gbɛ ni nyɛkɛ mibinuu fioo Benyamin aya.’ Shi beni amɛniyenii lɛ bɔi tãa lɛ, Yakob ha amɛkɛ Benyamin tee Mizraim koni amɛyahe niyenii.

Kɛkɛ ni Yosef na ni enyɛmimɛi lɛ miiba. Ená miishɛɛ waa beni ena enyɛmi fioo Benyamin lɛ. Shi amɛteŋ mɔ ko mɔ ko leee akɛ nuu ni he hiaa waa nɛɛ ji Yosef. Agbɛnɛ Yosef fee nɔ ko koni ekɛka epapa bii 10 lɛ ekwɛ.

Eha etsuji lɛ kɛ niyenii wo amɛ kotokui lɛ fɛɛ amli obɔbɔ. Shi eha akɛ ejwiɛtɛi kpulu ni esumɔɔ waa lɛ wo Benyamin kotoku lɛ mli ni amɛleee. Beni amɛ fɛɛ amɛshi ni amɛshɛ shɔŋŋ lɛ, Yosef tsu etsuji lɛ kɛnyiɛ amɛsɛɛ. Beni amɛyanina amɛ lɛ, tsuji lɛ bi amɛ akɛ: ‘Mɛni hewɔ nyɛju wɔ nuŋtsɔ lɛ jwiɛtɛi kpulu lɛ?’

Nyɛmimɛi lɛ fɛɛ kɛɛ akɛ: ‘Wɔjuko ekpulu. Kɛ́ nyɛna kpulu lɛ yɛ wɔteŋ mɔ ko dɛŋ lɛ, ha agbe nakai mɔ lɛ.’

No hewɔ lɛ tsuji lɛ kwɛ amɛ kotokui lɛ fɛɛ mli, ni amɛna kpulu lɛ yɛ Benyamin kotoku lɛ mli, taakɛ onaa yɛ biɛ lɛ. Tsuji lɛ kɛɛ: ‘Nyɛ mɛi ni eshwɛ lɛ nyɛyaa, shi Benyamin baafata wɔhe kɛya.’ Mɛni epapa bii 10 lɛ baafee agbɛnɛ?

Amɛ fɛɛ amɛfata Benyamin he kɛku amɛsɛɛ kɛtee Yosef shia lɛ. Yosef kɛɛ enyɛmimɛi lɛ akɛ: ‘Nyɛ fɛɛ nyɛbaanyɛ nyɛya, shi Benyamin baahi biɛ akɛ mitsulɔ.’

Kɛkɛ ni Yuda wie, ni ekɛɛ: ‘Kɛ miku misɛɛ mitee ni gbekɛ lɛ fataaa he lɛ, mipapa baagbo, ejaakɛ esumɔɔ esane waa diɛŋtsɛ. No hewɔ lɛ ofainɛ, ha mahi biɛ akɛ otsulɔ, koni oha gbekɛ lɛ aya shia.’

Yosef miina akɛ enyɛmimɛi lɛ etsake. Amɛjeee yiwalɔi ni enaaa mɔ mɔbɔ dɔŋŋ. Nyɛhaa wɔkwɛa nɔ ni Yosef baafee agbɛnɛ.

1 Mose 42:9-38; 43:1-34; 44:1-34.

Aafolɔ Yosef nyɛmimɛi lɛ anaa


Sanebimɔi

  • Mɛni hewɔ Yosef folɔ enyɛmimɛi lɛ anaa akɛ amɛji saralɔi lɛ?
  • Mɛni hewɔ Yakob ha akɛ ebinuu fioo Benyamin tee Mizraim lɛ?
  • Te fee tɛŋŋ ni Yosef jwiɛtɛi kpulu lɛ yaje Benyamin kotoku lɛ mli lɛ?
  • Mɛni Yuda kɛɛ ebaafee koni eha aŋmɛɛ Benyamin he?
  • Yosef nyɛmimɛi lɛ etsake yɛ mɛɛ gbɛ nɔ?

Sanebimɔi ni fata he

  • Kanemɔ 1 Mose 42:9-38.

    Yosef wiemɔi ni yɔɔ 1 Mose 42:18 lɛ ji kaimɔ nɔ ni sa jogbaŋŋ kɛha mɛi ni akɛ gbɛnaa nii ewo amɛdɛŋ yɛ Yehowa asafo lɛ mli ŋmɛnɛ lɛ yɛ mɛɛ gbɛ nɔ? (Neh. 5:15; 2 Kor. 7:1, 2)

  • Kanemɔ 1 Mose 43:1-34.

    Eyɛ mli akɛ Ruben ji kromɔbi moŋ, shi te fee tɛŋŋ ni Yuda batsɔ enyɛmimɛi lɛ anaawielɔ lɛ? (1 Mose 43:3, 8, 9; 44:14, 18; 1 Kron. 5:2)

    Mɛɛ gbɛ nɔ Yosef tsɔ eka enyɛmimɛi lɛ yɛ faŋŋ mli, ni mɛni hewɔ? (1 Mose 43:33, 34)

  • Kanemɔ 1 Mose 44:1-34.

    Bɔni afee ni Yosef kɛ ehe atee enyɛmimɛi lɛ, ejie ehe kpo etsɔɔ amɛ akɛ eji namɔ? (1 Mose 44:5, 15; 3 Mose 19:26)

    Mɛɛ gbɛ nɔ Yosef nyɛmimɛi lɛ tsɔɔ yɛ akɛ hetsɛ̃ mumɔ ni amɛyɔɔ tsutsu lɛ fɛɛ etã? (1 Mose 44:13, 33, 34)