Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 23: Farao Lamɔi Lɛ

Biblia Mli Sane 23: Farao Lamɔi Lɛ

AFII enyɔ ho, ni Yosef yɛ tsuŋwoohe lɛ lolo. Dãawolɔ lɛ kaiko lɛ. Kɛkɛ ni gbɛkɛ ko lɛ Farao la lamɔi srɔtoi enyɔ ni yɔɔ naakpɛɛ, ni eetao ni ele nɔ ni lamɔi lɛ tsɔɔ. Ani oona bɔ ni ewɔ yɛ jɛmɛ lɛ? Beni je tsɛre lɛ, Farao tsɛ enilelɔi lɛ, ni egba amɛ elamɔi lɛ. Shi amɛnyɛɛɛ amɛtsɔɔ lɛ elamɔi lɛ ashishi.

Yɛ naagbee lɛ, dãawolɔ lɛ kai Yosef agbɛnɛ. Ekɛɛ Farao akɛ: ‘Beni awo mi tsuŋ lɛ, mikɛ nuu ko ni nyɛɔ etsɔɔ lamɔi ashishi kpe yɛ jɛmɛ.’ No hewɔ lɛ, Farao ha ajie Yosef kɛjɛ tsũ lɛ mli amrɔ nɔŋŋ.

Farao kɛɛ Yosef elamɔi lɛ, akɛ: ‘Mina tsinai kpawo ni amɛshwishwii, ni amɛhe yɛ fɛo. Ni mina tsinai kpawo ni amɛtara loo. Ni tsinai ni etara loo lɛ ye nɔ ni eshwishwii lɛ.

Farao miila

‘Yɛ lamɔ ni ji enyɔ ni mila lɛ mli lɛ, mina abele tsei kpawo ni ewo waa yɛ tso kome nɔ. Kɛkɛ ni mina abele tsei kpawo ni nii bɛ nɔ. Ni nɔ ni nii bɛ nɔ, ni efee legelege lɛ mi kpawo ni nii yɔɔ nɔ lɛ.’

Yosef kɛɛ Farao akɛ: ‘Lamɔi enyɔ lɛ tsɔɔ nɔ kome too. Tsinai kpawo ni amɛshwishwii lɛ kɛ abele tsei kpawo ni nii yɔɔ nɔ lɛ tsɔɔ afii kpawo, ni tsinai ni amɛtara loo lɛ kɛ abele tsei kpawo ni nii bɛ nɔ lɛ hu tsɔɔ afii kpawo kroko. Afii kpawo baaba ni niyenii babaoo baaba Mizraim. Ni afii kpawo baaba ni niyenii fioo pɛ baaba.’

No hewɔ lɛ Yosef kɛɛ Farao akɛ: ‘Halamɔ nuu ni le nii waa ni oha ebua niyenii anaa yɛ afii kpakpai kpawo lɛ mli. Kɛkɛ lɛ hɔmɔ egbeŋ gbɔmɛi lɛ yɛ afii kpawo ni ehiii ni baanyiɛ sɛɛ, ní niyenii fioo ko pɛ baaba yɛ mli lɛ mli lɛ.’

Sane lɛ ŋɔɔ Farao naa. Ni ehala Yosef koni ebua niyenii lɛ anaa eto. Yɛ Farao sɛɛ lɛ, Yosef bafee mɔ ni he hiaa fe fɛɛ yɛ Mizraim.

No sɛɛ afii kpaanyɔ, yɛ hɔmɔ be lɛ mli lɛ, Yosef na ni hii komɛi miiba eŋɔɔ. Ani ole mɛi ni amɛji? Enyɛmimɛi hii onukpai 10 lɛ ni! Amɛ papa Yakob tsu amɛ kɛba Mizraim ejaakɛ amɛ niyenii miitã yɛ Kanaan he ni amɛjɛ kɛbaa lɛ. Yosef na enyɛmimɛi lɛ ni eyoo amɛ, shi amɛ lɛ amɛyooo lɛ. Ani ole nɔ hewɔ? Ejaakɛ Yosef eda etsɔ onukpa, ni atade ni ewo lɛ yɛ srɔto.

Yosef kai akɛ beni eji gbekɛ lɛ, ela ni enyɛmimɛi hii lɛ miiba ni amɛbakula shi yɛ ehiɛ amɛbakoto lɛ. Ani okaiɔ akɛ okane nɔ ko tamɔ nakai? No hewɔ lɛ Yosef baana akɛ Nyɔŋmɔ ji mɔ ni tsu lɛ kɛba Mizraim, ni yɛ yiŋtoo kpakpa hewɔ. Mɛni osusuɔ akɛ Yosef fee? Ha wɔkwɛ.

1 Mose 41:1-57; 42:1-8; 50:20.



Sanebimɔi

  • Mɛni ba Farao nɔ gbɛkɛ ko?
  • Yɛ naagbee lɛ mɛni hewɔ dãawolɔ lɛ kai Yosef lɛ?
  • Taakɛ onaa yɛ mfoniri lɛ mli lɛ, mɛɛ lamɔi enyɔ Farao la?
  • Te Yosef tsɔɔ lamɔi lɛ ashishi eha tɛŋŋ?
  • Te fee tɛŋŋ ni Yosef batsɔ mɔ ni he hiaa fe fɛɛ yɛ Mizraim yɛ Farao sɛɛ lɛ?
  • Mɛni hewɔ Yosef nyɛmimɛi lɛ ba Mizraim, ni mɛni hewɔ amɛyɔseee lɛ lɛ?
  • Mɛɛ lamɔ Yosef kai, ni eye ebua lɛ koni enu mɛni shishi?

Sanebimɔi ni fata he

  • Kanemɔ 1 Mose 41:1-57.

    Yɛ mɛɛ gbɛ nɔ Yosef gbala jwɛŋmɔ kɛtee Yehowa nɔ, ni Kristofoi baanyɛ akase enɔkwɛmɔnɔ lɛ ŋmɛnɛ yɛ mɛɛ gbɛ nɔ? (1 Mose 41:16, 25, 28; Mat. 5:16; 1 Pet. 2:12)

    Afii ni baa nii babaoo yɛ Mizraim kɛ hɔmɔ afii ni nyiɛ sɛɛ ba lɛ tsɔɔ srɔtofeemɔ ni kã mumɔŋ shihilɛ ni Yehowa webii yɔɔ mli ŋmɛnɛ lɛ kɛ Kristendom nɔ̃ lɛ teŋ lɛ mli pɛpɛɛpɛ yɛ mɛɛ gbɛ nɔ? (1 Mose 41:29, 30; Amos 8:11, 12)

  • Kanemɔ 1 Mose 42:1-8 kɛ 50:20.

    Ani ejaaa gbɛ akɛ Yehowa jálɔi aaakula shi yɛ gbɔmɔ ko hiɛ yɛ woo kɛ bulɛ ni amɛyɔɔ kɛha gbɛhe ni mɔ lɛ yɔɔ lɛ hewɔ, kɛji ákɛ no ji kusum ni yɔɔ maŋ lɛ mli lɛ? (1 Mose 42:6)