Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 22: Awo Yosef Tsuŋ

Biblia Mli Sane 22: Awo Yosef Tsuŋ

YOSEF eye afii 17 pɛ be mli ni akɛ lɛ tee Mizraim lɛ. Ahɔ̃ɔ lɛ yɛ jɛmɛ aha nuu ko ni atsɛɔ lɛ Potifar. Potifar tsuɔ nii ehaa Mizraim maŋtsɛ ni atsɛɔ lɛ Farao lɛ.

Yosef yɛ tsuŋwoohe

Yosef tsu nii waa eha enuŋtsɔ Potifar. No hewɔ lɛ beni Yosef da lɛ, Potifar fee lɛ eshia lɛ fɛɛ nɔ onukpa. Belɛ, mɛni hewɔ awo Yosef tsuŋ yɛ biɛ mɔ? Ejɛ Potifar ŋa lɛ.

Yosef da ni ebatsɔ nuu ni he yɔɔ fɛo, ni Potifar ŋa lɛ miisumɔ ni ekɛ lɛ awɔ. Shi Yosef le akɛ eji efɔŋ, no hewɔ lɛ efeee nakai. Potifar ŋa lɛ mli fu waa. No hewɔ lɛ beni ewu lɛ ba shia lɛ, emale etsɔɔ lɛ ni ekɛɛ lɛ akɛ: ‘Nakai Yosef gbɔmɔ fɔŋ lɛ bɔ mɔdɛŋ ni ekɛ mi awɔ!’ Potifar hé nɔ ni eŋa lɛ kɛɔ lɛ eye, ni emli fu Yosef waa. No hewɔ lɛ eha ayawo lɛ tsuŋ.

Etsɛɛɛ ni mɔ ni kwɛɔ mɛi ni awo amɛ tsuŋ lɛ anɔ lɛ na akɛ Yosef ji gbɔmɔ kpakpa. No hewɔ lɛ eha ekwɛ mɛi ni awo amɛ tsuŋ lɛ fɛɛ nɔ. Yɛ sɛɛ mli lɛ Farao mli fu edãawolɔ lɛ kɛ ebolooshãlɔ lɛ, ni eha awo amɛ tsuŋ. Gbi ko gbɛkɛ lɛ amɛteŋ mɔ fɛɛ mɔ la lamɔi pɔtɛɛ komɛi, shi amɛnuuu amɛ lamɔi lɛ ashishi. Beni je tsɛre lɛ, Yosef kɛɛ amɛ akɛ: ‘Nyɛgbaa mi nyɛ lamɔi lɛ.’ Ni beni amɛfee nakai lɛ, Nyɔŋmɔ ye ebua Yosef ni etsɔɔ amɛ amɛlamɔi lɛ ashishi.

Yosef kɛɛ dãawolɔ lɛ akɛ: ‘Eshwɛ gbii etɛ ni abaaŋmɛɛ ohe kɛjɛ tsuŋwoohe nɛɛ, ni obaatsɔ Farao dãawolɔ ekoŋŋ.’ No hewɔ lɛ Yosef kɛfata he akɛ: ‘Kɛ oje kpo lɛ, gbaa mihe sane otsɔɔ Farao, ni oye obua mi ni ajie mi kɛjɛ biɛ.’ Shi Yosef kɛɛ abolooshãlɔ lɛ akɛ: ‘Eshwɛ gbii etɛ ni Farao baaha afo oyitso.’

Yɛ gbii etɛ mli lɛ, eba mli pɛpɛɛpɛ, taakɛ Yosef wie lɛ. Farao ha afo abolooshãlɔ lɛ yitso. Ni ajie dãawolɔ lɛ kɛjɛ tsũ lɛŋ ni ebɔi maŋtsɛ lɛ sɔɔmɔ ekoŋŋ. Shi dãawolɔ lɛ hiɛ kpa Yosef nɔ kwraa! Ewieee ehe etsɔɔɔ Farao, ni eha Yosef hi tsuŋwoohe lɛ.

1 Mose 39:1-23; 40:1-23.



Sanebimɔi

  • Afii enyiɛ Yosef eye be ni akɛ lɛ tee Mizraim lɛ, ni mɛni ba be ni eyashɛ jɛmɛ lɛ?
  • Te fee tɛŋŋ ni awo Yosef tsuŋ lɛ?
  • Mɛɛ nitsumɔ akɛha Yosef yɛ tsuŋwoohe lɛ?
  • Mɛni Yosef fee kɛha Farao dãawolɔ lɛ kɛ ebolooshãlɔ lɛ yɛ tsuŋwoohe lɛ?
  • Mɛni ba be ni ajie dãawolɔ lɛ kɛjɛ tsuŋwoohe lɛ?

Sanebimɔi ni fata he

  • Kanemɔ 1 Mose 39:1-23.

    Akɛni mla ko bɛ ni jɛ Nyɔŋmɔ ŋɔɔ ni aŋma afɔ shi ni buɔ gbalafitemɔ fɔ́ yɛ Yosef gbii lɛ amli hewɔ lɛ, mɛni nyɛ enɔ ni ejo foi kɛjɛ Potifar ŋa lɛ he lɛ? (1 Mose 2:24; 20:3; 39:9)

  • Kanemɔ 1 Mose 40:1-23.

    Tsɔɔmɔ dãawolɔ lɛ lamɔ lɛ kɛ shishitsɔɔmɔ ni Yehowa kɛha Yosef lɛ mli kuku. (1 Mose 40:9-13)

    Mɛni ji abolooshãlɔ lɛ lamɔ lɛ, ni mɛni ji eshishitsɔɔmɔ? (1 Mose 40:16-19)

    Tsulɔ anɔkwafo kɛ nilelɔ kuu lɛ ekase su ni Yosef jie lɛ kpo lɛ ŋmɛnɛ yɛ mɛɛ gbɛ nɔ? (1 Mose 40:8; Lala 36:10; Yoh. 17:17; Bɔf. 17:2, 3)

    Yɛ mɛɛ gbɛ nɔ 1 Mose 40:20 lɛ haa wɔnuɔ jwɛŋmɔ ni Kristofoi hiɛ yɛ fɔmɔgbii juji ayeli he lɛ shishi jogbaŋŋ? (Jaj. 7:1; Mar. 6:21-28)

Ekrokromɛi Hu Nɛ

BIBLIA MLI MƐI AHE SAJI

Potifar He sane

Ŋɔɔ Biblia mli mɛi ahe sane nɛɛ kɛkase Yosef nuŋtsɔ Potifar, ni hi Egipt lɛ he saji krokomɛi.