Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 21: Yosef Nyɛmimɛi Hii lɛ Sumɔɔɔ Esane

Biblia Mli Sane 21: Yosef Nyɛmimɛi Hii lɛ Sumɔɔɔ Esane

KWƐ bɔ ni gbekɛ nuu lɛ nii efee mɔbɔ ni enyɛɛɛ nɔ ko kwraa efee. Yosef ni. Enyɛmimɛi hii lɛ ehɔ̃ɔ lɛ amɛha nɛkɛ hii nɛɛ ni miifã gbɛ kɛmiiya Mizraim lɛ. Yosef baatsɔ nyɔŋ yɛ jɛmɛ. Mɛni hewɔ epapa bii lɛ fee efɔŋ nɛkɛ? Ejaakɛ amɛhe tsɛ̃ɔ Yosef.

Yosef nyɛmimɛi lɛ miihɔ̃ɔ lɛ

Amɛ papa Yakob sumɔɔ Yosef sane waa diɛŋtsɛ. Ekeɔ lɛ nii ni ekpɛ atade kakadaŋŋ fɛfɛo ko eha lɛ. Beni enyɛmimɛi onukpai 10 lɛ na bɔ ni Yakob sumɔɔ Yosef sane waa ha lɛ, edɔ amɛ ni amɛhe tsɛ̃ Yosef. Shi nɔ kroko hu yɛ ni haaa amɛsumɔ esane lɛ.

Yosef la lamɔi enyɔ. Enyɛmimɛi hii lɛ kula shi amɛha Yosef yɛ elamɔi enyɔ lɛ fɛɛ mli. Beni Yosef kɛɛ enyɛmimɛi lɛ elamɔi lɛ, amɛhe batsɛ̃ lɛ babaoo moŋ.

Agbɛnɛ gbi ko beni Yosef nyɛmimɛi lɛ kwɛɔ amɛ papa tooi lɛ, Yakob tsu Yosef koni eyasara enyɛmimɛi lɛ ni ekwɛ bɔ ni amɛyɔɔ. Beni Yosef nyɛmimɛi lɛ na akɛ eeba lɛ, amɛteŋ mɛi komɛi kɛɛ: ‘Nyɛhaa wɔgbea lɛ!’ Shi Ruben, ni ji amɛ fɛɛ amɛnyɛmi nukpa lɛ kɛɛ: ‘Dabi, nyɛkafea nakai!’ No hewɔ lɛ, amɛmɔ Yosef ni amɛshɛ lɛ amɛwo nubu ko ni mli egbi mli. Kɛkɛ ni amɛho amɛtara shi koni amɛsusu nɔ ni amɛbaafee lɛ lɛ he.

Nɛkɛ be nɛɛ mli nɔŋŋ ni Ishmaelbii komɛi bashɛ jɛmɛ. Kɛkɛ ni Yuda kɛɛ epapa bii lɛ akɛ: ‘Nyɛhaa wɔhɔ̃ɔa lɛ wɔhaa Ishmaelbii lɛ.’ Ni amɛfee nakai. Amɛhɔ̃ɔ Yosef amɛhe jwiɛtɛi kukuji 20. Kwɛ yiwalɛ nii ni amɛfee!

Mɛni nyɛmimɛi hii nɛɛ baakɛɛ amɛ papa? Amɛgbe too, ni amɛkɛ Yosef atade fɛfɛo lɛ tsɔ too lɛ lá lɛ mli shii abɔ. Kɛkɛ ni amɛkɛ atade lɛ tee shia amɛkɛyatsɔɔ amɛ papa Yakob ni amɛkɛɛ akɛ: ‘Wɔna atade nɛɛ. Kwɛmɔ akɛ, ani jeee Yosef atade lɛ ni lo.’

Yakob na akɛ no ni. Kɛkɛ ni efó ekɛɛ akɛ: ‘Kooloo awuiyelɔ ko egbe Yosef.’ Ni nakai pɛ ji bɔ ni Yosef nyɛmimɛi lɛ sumɔɔ ni amɛ papa asusu. Yakob ye awerɛho babaoo. Ni efó gbii pii. Shi Yosef gboko. Nyɛhaa wɔkwɛa nɔ ni ba enɔ yɛ he ni akɛ lɛ tee lɛ.

1 Mose 37:1-35.



Sanebimɔi

  • Mɛni hewɔ Yosef nyɛmimɛi lɛ sumɔɔɔ esane lɛ, ni mɛni amɛfee?
  • Mɛni Yosef nyɛmimɛi lɛ taoɔ ni amɛfee lɛ, shi mɛni Ruben kɛɛ?
  • Mɛni ba be ni Ishmaelbii jarayelɔi komɛi bashɛ jɛmɛ lɛ?
  • Mɛni Yosef nyɛmimɛi lɛ fee koni amɛha amɛtsɛ ahe aye akɛ Yosef egbo?

Sanebimɔi ni fata he

  • Kanemɔ 1 Mose 37:1-35.

    Te Kristofoi aaafee tɛŋŋ amɛkase Yosef nɔkwɛmɔnɔ lɛ kɛtsɔ nɔ fɔŋ feemɔ ni yɔɔ asafo lɛ mli lɛ he amaniɛ ni amɛaabɔ lɛ nɔ? (1 Mose 37:2; 3 Mose 5:1; 1 Kor. 1:11)

    Mɛni haaa Yosef nyɛmimɛi lɛ asumɔ esane lɛ? (1 Mose 37:11, 18; Abɛi 27:4; Yak. 3:14-16)

    Mɛɛ Yakob nifeemɔ ji nɔ ni afɔɔ feemɔ kɛ́ aaye awerɛho? (1 Mose 37:35)