Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 20: Dina Bote Haomɔ Mli

Biblia Mli Sane 20: Dina Bote Haomɔ Mli

ANI oona mɛi ni Dina yaa eyasara amɛ lɛ? Eeya ni eyasara oblayei ni yɔɔ Kanaan shikpɔŋ lɛ nɔ lɛ ateŋ mɛi komɛi. Ani epapa Yakob baana enɛ he miishɛɛ? Bɔni afee ni onyɛ oha sanebimɔ nɛɛ hetoo lɛ, bɔɔ mɔdɛŋ ni okai nɔ ni Abraham kɛ Isak susu yɛ Kanaan yei lɛ ahe lɛ.

Dina ni miiba ebasara Kanaan oblayei lɛ

Ani Abraham miisumɔ ni ebinuu Isak kɛ Kanaan oblayoo ko ahi shi? Dabi, esumɔɔɔ nakai. Ani Isak kɛ Rebeka miisumɔ ni amɛbinuu Yakob kɛ Kanaan oblayoo ko ahi shi? Dabi, amɛsumɔɔɔ nakai. Ani ole nɔ hewɔ?

Nɔ hewɔ ji akɛ, gbɔmɛi ni yɔɔ Kanaan nɛɛ jáa apasa nyɔŋmɔi. Amɛjeee gbɔmɛi kpakpai ni esa akɛ akɛ amɛ afee wumɛi kɛ ŋamɛi, ni amɛjeee gbɔmɛi kpakpai hu ni esa akɛ akɛ amɛ abɔ naanyo. No hewɔ lɛ wɔyɛ nɔmimaa akɛ Yakob naŋ he miishɛɛ akɛ ebiyoo lɛ kɛ Kanaan oblayei lɛ aaabɔ naanyo.

Ni lɛɛlɛŋ hu akɛ Dina bote haomɔ mli. Ani oona nakai Kanaan nuu ko ni kwɛɔ Dina yɛ mfoniri lɛ mli lɛ? Egbɛi ji Shekem. Gbi ko beni Dina basara amɛ lɛ, Shekem mɔ Dina ekãa naa ni ekɛ lɛ wɔ. Enɛ ehiii kwraa ejaakɛ hii kɛ yei ni amɛbote gbalashihilɛ mli pɛ kɛ amɛhe wɔɔ. Nii ni ehiii ni Shekem fee Dina nɛɛ kɛ haomɔi pii ba.

Beni Dina nyɛmimɛi hii lɛ nu nɔ ni eba lɛ, amɛmli wo la naakpa. Amɛteŋ mɛi enyɔ, Simeon kɛ Levi mli fu aahu akɛ, amɛkɔlɔ klantei ni amɛtee maŋ lɛ mli ni amɛyanina gbɔmɛi lɛ trukaa. Amɛkɛ amɛnyɛmimɛi lɛ gbe Shekem kɛ hii krokomɛi lɛ fɛɛ. Yakob hu mli fu waa yɛ nɔ fɔŋ ni ebihii lɛ fee nɛɛ hewɔ.

Te fee tɛŋŋ ni nɛkɛ haomɔi nɛɛ fɛɛ je shishi? Fɛɛ jɛ Dina ni kɛ gbɔmɛi ni booo Nyɔŋmɔ mlai atoi lɛ bɔ naanyo lɛ hewɔ. Wɔsumɔŋ ni wɔkɛ gbɔmɛi ni tamɔ nakai abɔ naanyo, aloo wɔbaafee nakai?

1 Mose 34:1-31.



Sanebimɔi

  • Mɛni hewɔ Abraham kɛ Isak sumɔɔɔ ni amɛbii lɛ kɛ gbɔmɛi ni yɔɔ Kanaan shikpɔŋ lɛ nɔ lɛ boteɔ gbalashihilɛ mli lɛ?
  • Ani Yakob kpɛlɛ ni ebiyoo lɛ kɛ Kanaan gbekɛbii yei lɛ abɔ naanyo?
  • Namɔ ji nuu ni kwɛɔ Dina yɛ mfoniri lɛ mli lɛ, ni mɛɛ nɔ fɔŋ efee?
  • Mɛni Dina nyɛmimɛi hii Simeon kɛ Levi fee be ni amɛnu nɔ ni eba lɛ he lɛ?
  • Ani Yakob kpɛlɛ nɔ ni Simeon kɛ Levi fee lɛ nɔ?
  • Te fee tɛŋŋ ni weku lɛ mli haomɔi lɛ fɛɛ je shishi?

Sanebimɔi ni fata he

  • Kanemɔ 1 Mose 34:1-31.

    Ani naanyobɔɔ ni tee nɔ yɛ Dina kɛ Kanaan shikpɔŋ lɛ nɔ gbekɛbii yei lɛ ateŋ lɛ ji nɔ ko ni eko bako dã? Tsɔɔmɔ mli. (1 Mose 34:1)

    Mɛni hewɔ Dina blayeiaŋ ni eha afite lɛ he sɔ̃ ko bakã lɛ diɛŋtsɛ enɔ lɛ? (Gal. 6:7)

    Te gbekɛbii ni yɔɔ ŋmɛnɛ lɛ aaafee tɛŋŋ amɛtsɔɔ akɛ, amɛkɛ Dina nɔkwɛmɔnɔ lɛ he kɔkɔbɔɔ lɛ eto amɛtsuii amli lɛ? (Abɛi 13:20; 1 Kor. 15:33; 1 Yoh. 5:19)