Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 19: Yakob Ná Weku ni Da

Biblia Mli Sane 19: Yakob Ná Weku ni Da
Yakob kɛ ebihii lɛ

BO LƐ kwɛmɔ weku ni da nɛɛ. Yakob bihii 12 lɛ nɛ. Ni eyɛ biyei hu. Ani ole ebii lɛ ekomɛi agbɛi? Ha wɔle ekomɛi.

Lea fɔ Ruben, Simeon, Levi kɛ Yuda. Beni Rahel na akɛ efɔɔɔ bii lɛ, edɔ lɛ waa. No hewɔ lɛ ekɛ eweyoo Bilha ha Yakob, ni Bilha fɔ bihii enyɔ, ni ji Dan kɛ Naftali. Kɛkɛ ni Lea hu kɛ eweyoo Zilpa ha Yakob, ni Zilpa fɔ Gad kɛ Asher. Yɛ naagbee lɛ, Lea fɔ bihii enyɔ ekoŋŋ, ni ji Isakar kɛ Zebulon.

Yɛ naagbee lɛ Rahel nyɛ efɔ. Ni etsɛ egbɛi akɛ Yosef. Wɔbaakase Yosef he sane babaoo yɛ sɛɛ mli, ejaakɛ ebafee nuu ni he gbɛi waa. Bihii 11 ni Yakob fɔ amɛ beni ekɛ Rahel papa Laban yɔɔ lɛ nɛ.

Yakob fɔ biyei hu, shi Biblia lɛ tsĩ mɔ kome pɛ gbɛi atã. Egbɛi ji Dina.

Be shɛ ni Yakob kpɛ eyiŋ akɛ ebaashi Laban ni eya Kanaan. No hewɔ lɛ ebua eweku ni da lɛ fɛɛ naa, kɛ etooi kɛ etsinai babaoo lɛ, ni eje gbɛfãa kakadaŋŋ lɛ shishi.

Beni Yakob kɛ eweku lɛ bashɛ Kanaan lɛ sɛɛ fioo lɛ, Rahel fɔ binuu kroko. Eba mli yɛ gbɛfãa be lɛ mli. Efɔmɔ tɔ Rahel waa, ni egbo yɛ beni efɔɔ lɛ mli. Shi gbekɛ nuu abifao lɛ ná hewalɛ. Yakob wo lɛ gbɛi akɛ Benyamin.

Wɔmiisumɔ ni wɔkai Yakob bihii 12 lɛ fɛɛ agbɛi ejaakɛ Israel maŋ muu lɛ fɛɛ jɛ amɛmli. Yɛ anɔkwale mli lɛ, Yakob bihii 10 kɛ Yosef bihii enyɔ agbɛi akɛwo Israel akutsei 12 lɛ. Isak hi wala mli afii babaoo yɛ sɛɛ mli beni afɔ gbekɛbii hii nɛɛ fɛɛ lɛ, ni eka shi faŋŋ akɛ ená miishɛɛ waa akɛ ena nabii hii babaoo. Shi nyɛhaa wɔkwɛa nɔ ni ba enabi yoo Dina nɔ.

1 Mose 29:32-35; 30:1-26; 35:16-19; 37:35.



Sanebimɔi

  • Mɛni ji Yakob bihii ekpaa ni ekɛ eklɛŋklɛŋ ŋa Lea fɔ́ lɛ agbɛi?
  • Namɛi ji bihii enyɔ ni Lea weyoo Zilpa fɔ́ eha Yakob lɛ?
  • Te atsɛ́ɔ bihii enyɔ ni Rahel weyoo Bilha fɔ́ eha Yakob lɛ tɛŋŋ?
  • Namɛi ji bihii enyɔ ni Rahel diɛŋtsɛ fɔ́ amɛ lɛ, shi mɛni ba be ni afɔ́ binuu ni ji enyɔ lɛ?
  • Taakɛ mfoniri lɛ tsɔɔ lɛ, bihii enyiɛ Yakob fɔ́, ni mɛni jɛ amɛmli kɛba?

Sanebimɔi ni fata he

  • Kanemɔ 1 Mose 29:32-35; 30:1-26; kɛ 35:16-19.

    Taakɛ atsɔɔ Yakob bihii 12 lɛ asane lɛ mli lɛ, bei pii lɛ awoɔ blema Hebri gbekɛbii hii agbɛi yɛ mɛɛ gbɛ nɔ?

  • Kanemɔ 1 Mose 37:35.

    Eyɛ mli akɛ atsĩ Dina pɛ gbɛi tã yɛ Biblia lɛ mli moŋ, shi te wɔfeɔ tɛŋŋ wɔleɔ akɛ Yakob fɔ́ biyei babaoo fe ekome lɛ? (1 Mose 37:34, 35)