Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 17: Haaji ní Esoro Amɛ

Biblia Mli Sane 17: Haaji ní Esoro Amɛ
Esau

ESORO gbekɛbii hii enyɔ ni yɔɔ biɛ lɛ kwraa, aloo jeee nakai? Ani ole amɛgbɛi? Gbɔbilɔ lɛ ji Esau, ni gbekɛ nuu ni kwɛɔ tooi lɛ ji Yakob.

Esau kɛ Yakob ji Isak kɛ Rebeka bihii haaji. Isak, ni ji amɛpapa lɛ sumɔɔ Esau sane waa, ejaakɛ eji gbɔbilɔ kpakpa ni ekɛ niyenii baa shia koni weku lɛ aye. Shi Rebeka sumɔɔ Yakob fe lɛ, ejaakɛ eyɛ diŋŋ ni ehe jɔ.

No mli lɛ amɛ nii Abraham yɛ wala mli lolo, ni wɔbaanyɛ wɔna bɔ ni Yakob naa miishɛɛ kɛ́ eewie Yehowa he eetsɔɔ lɛ lɛ. Yɛ naagbee lɛ, Abraham gbo beni eye afii 175, ní haaji lɛ eye afii 15.

Beni Esau ye afii 40 lɛ, ekɛ Kanaan yei enyɔ bote gbalashihilɛ mli. Enɛ ha Isak kɛ Rebeka ye awerɛho waa, ejaakɛ nɛkɛ yei nɛɛ jaaa Yehowa.

Kɛkɛ ni gbi ko lɛ nɔ ko ba ni ha Esau mli fu enyɛmi Yakob waa. Be shɛ ni Isak baajɔɔ ebi nukpa lɛ. Akɛni Esau ye Yakob onukpa hewɔ lɛ, Esau miikpa gbɛ akɛ enine baashɛ nɛkɛ jɔɔmɔ nɛɛ nɔ. Shi no mli lɛ, Esau etsɔ hiɛ ehɔ̃ɔ hegbɛ ni ekɛaaná jɔɔmɔ lɛ eha Yakob. Agbɛnɛ hu, beni afɔ bihii enyɔ lɛ, Nyɔŋmɔ kɛɛ akɛ Yakob nine baashɛ jɔɔmɔ lɛ nɔ. Ni eba mli nakai pɛpɛɛpɛ. Isak kɛ jɔɔmɔ lɛ ha ebi Yakob.

Yakob

Yɛ sɛɛ mli, beni Esau nu enɛ lɛ, emli fu Yakob waa. Emli fu aahu akɛ ekɛɛ ebaagbe Yakob. Beni Rebeka nu enɛ lɛ, egbá enaa waa. No hewɔ lɛ ekɛɛ ewu Isak akɛ: ‘Kɛ́ Yakob hu kɛ Kanaan yei nɛɛ eko hi shi lɛ, ebaafee naagba waa diɛŋtsɛ.’

Kɛkɛ ni Isak tsɛ ebinuu Yakob ni ekɛɛ lɛ akɛ: ‘Okɛ Kanaan yoo ko akabote gbalashihilɛ mli. Shi moŋ yaa onii Betuel we lɛ yɛ Haran. Okɛ ebinuu Laban biyei lɛ eko ahi shi.’

Yakob bo epapa toi, kɛkɛ ni eje egbɛfãa kakadaŋŋ lɛ shishi amrɔ nɔŋŋ kɛtee he ni ewekumɛi lɛ yɔɔ lɛ, yɛ Haran.

1 Mose 25:5-11, 20-34; 26:34, 35; 27:1-46; 28:1-5; Hebribii 12:16, 17.



Sanebimɔi

  • Namɛi ji Esau kɛ Yakob, ni esoro amɛ yɛ mɛɛ gbɛ nɔ?
  • Afii enyiɛ Esau kɛ Yakob eye be ni amɛnii Abraham gbo lɛ?
  • Mɛni Esau fee ni no ha enyɛ kɛ etsɛ ye awerɛho waa lɛ?
  • Mɛni hewɔ Esau mli fu enyɛmi nuu Yakob waa lɛ?
  • Mɛɛ fãmɔ Isak kɛha ebinuu Yakob?

Sanebimɔi ni fata he

  • Kanemɔ 1 Mose 25:5-11, 20-34.

    Mɛni Yehowa gba yɛ Rebeka bihii enyɔ lɛ ahe? (1 Mose 25:23)

    Mɛɛ srɔtofeemɔ kã Yakob kɛ Esau teŋ yɛ su ni amɛjie lɛ kpo yɛ kromɔbi gbɛnaa lɛ he? (1 Mose 25:31-34)

  • Kanemɔ 1 Mose 26:34, 35; 27:1-46; kɛ 28:1-5.

    Hiɛsɔɔ ni Esau bɛ kɛha mumɔŋ nibii lɛ je kpo yɛ mɛɛ gbɛ nɔ? (1 Mose 26:34, 35; 27:46)

    Bɔni afee ni Yakob nine ashɛ Nyɔŋmɔ jɔɔmɔ nɔ lɛ, mɛni Isak kɛɛ lɛ akɛ efee? (1 Mose 28:1-4)

  • Kanemɔ Hebribii 12:16, 17.

    Mɛni Esau nɔkwɛmɔnɔ lɛ jieɔ lɛ kpo yɛ nɔ ni baaba mɛi ni gbeɔ krɔŋkrɔŋ nii ahe guɔ lɛ he?