Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 15: Lot Ŋa lɛ Kwɛ Esɛɛ

Biblia Mli Sane 15: Lot Ŋa lɛ Kwɛ Esɛɛ

LOT kɛ eweku lɛ kɛ Abraham fɛɛ hi Kanaan shikpɔŋ lɛ nɔ. Gbi ko lɛ Abraham kɛɛ Lot akɛ: ‘Shikpɔŋ ni yɔɔ biɛ lɛ edaaa kɛhaaa wɔ kooloi lɛ fɛɛ. Ofainɛ, ha wɔgbála wɔmli. Kɛ otsɔ̃ afãgbɛ lɛ, mi hu matsɔ̃ he kroko.’

Lot kwɛ shikpɔŋ lɛ fɛɛ kɛkpe. Ena shikpɔŋ lɛ fã ko ni yɔɔ fɛo ni nu kɛ jwɛi pii yɔɔ jɛmɛ kɛha ekooloi lɛ. Enɛ yɛ Yordan Kpokpaa lɛ nɔ. No hewɔ lɛ, Lot kɛ eweku lɛ kɛ ekooloi lɛ fã ni amɛyahi jɛmɛ. Yɛ naagbee lɛ amɛyahi Sodom maŋ lɛ mli.

Gbɔmɛi ni yɔɔ Sodom lɛ ehiii kwraa. Enɛ hao Lot waa, ejaakɛ eji gbɔmɔ kpakpa. Enɛ gba Nyɔŋmɔ hu naa. Yɛ naagbee lɛ, Nyɔŋmɔ tsu ŋwɛibɔfoi enyɔ ni amɛyabɔ Lot kɔkɔ akɛ ebaafite Sodom kɛ maŋ ni bɛŋkɛ jɛmɛ ni ji Gomora lɛ yɛ amɛ nɔ fɔŋ feemɔ lɛ hewɔ.

Ŋwɛibɔfoi lɛ kɛɛ Lot akɛ: ‘Feemɔ oya! Ŋɔɔ oŋa kɛ obiyei enyɔ lɛ ni nyɛshi biɛ!’ Lot kɛ eweku lɛ yɛ shɔ̃ɔ fioo yɛ jɛmɛ shimɔ lɛ mli, no hewɔ lɛ ŋwɛibɔfoi lɛ mɔmɔ amɛnine shi ni amɛnyiɛ amɛhiɛ kɛje kpo kɛjɛ maŋ lɛ mli. Kɛkɛ ni ŋwɛibɔfoi lɛ ekome kɛɛ: ‘Nyɛjoa foi ni nyɛherea nyɛyiwala! Nyɛkakwɛa nyɛsɛɛ. Nyɛjoa foi kɛyaa gɔji lɛ anɔ koni nyɛkagboi.’

Lot kɛ ebiyei lɛ bo toi ni amɛjo foi kɛjɛ Sodom. Amɛwaaa shikome po, ni amɛkwɛɛɛ amɛsɛɛ hu. Shi Lot ŋa lɛ booo toi. Beni amɛshi Sodom maŋ lɛ mli ni amɛtee hiɛ saŋŋ lɛ, ewa ni ekwɛ esɛɛ. Kɛkɛ ni Lot ŋa lɛ tsɔ ŋoo kpɔ ni ma shi. Ani oona lɛ yɛ mfoniri lɛ mli?

Wɔbaanyɛ wɔkase nɔ̃ kpakpa ko kɛjɛ enɛ mli. Etsɔɔ ákɛ Nyɔŋmɔ hereɔ mɛi ni boɔ lɛ toi lɛ ayiwala, shi mɛi ni booo lɛ toi lɛ baagboi.

1 Mose 13:5-13; 18:20-33; 19:1-29; Luka 17:28-32; 2 Petro 2:6-8.

Lot miijo foi kɛmiijɛ Sodom


Sanebimɔi

  • Mɛni hewɔ Abraham kɛ Lot gbála mli lɛ?
  • Mɛni hewɔ Lot hala akɛ eesumɔ ni ehi Sodom lɛ?
  • Te Sodombii lɛ asubaŋ yɔɔ ha tɛŋŋ?
  • Mɛɛ kɔkɔ ŋwɛibɔfoi enyɔ bɔ Lot?
  • Mɛni hewɔ Lot ŋa lɛ tsɔ ŋoo kpɔ lɛ?
  • Mɛni wɔbaanyɛ wɔkase yɛ Lot ŋa lɛ he sane lɛ mli?

Sanebimɔi ni fata he

  • Kanemɔ 1 Mose 13:5-13.

    Mɛni wɔbaanyɛ wɔkase kɛjɛ Abraham ŋɔɔ yɛ naagbai ni baa aŋkroaŋkroi ateŋ ni asáa lɛ gbɛfaŋ? (1 Mose 13:8, 9; Rom. 12:10; Fil. 2:3, 4)

  • Kanemɔ 1 Mose 18:20-33.

    Yɛ mɛɛ gbɛ nɔ bɔ ni Yehowa kɛ Abraham ye ha lɛ haa wɔnáa hekɛnɔfɔɔ akɛ Yehowa kɛ Yesu baakojo yɛ jalɛ naa? (1 Mose 18:25, 26; Mat. 25:31-33)

  • Kanemɔ 1 Mose 19:1-29.

    Mɛni Biblia mli sane nɛɛ tsɔɔ yɛ bɔ ni Nyɔŋmɔ susuɔ hii kɛ hii ni kɛ amɛhe feɔ yakayakanii lɛ he ehaa lɛ he? (1 Mose 19:5, 13; 3 Mose 20:13)

    Mɛɛ srɔtofeemɔ wɔnaa yɛ gbi ni Lot kɛ Abraham tsɔ nɔ amɛkpɛlɛ Nyɔŋmɔ gbɛtsɔɔmɔ nɔ lɛ mli, ni mɛni wɔbaanyɛ wɔkase kɛjɛ enɛ mli? (1 Mose 19:15, 16, 19, 20; 22:3)

  • Kanemɔ Luka 17:28-32.

    Mɛɛ sú ko Lot ŋa lɛ hiɛ yɛ heloo gbɛfaŋ nibii ahe yɛ etsui mli, ni enɛ feɔ kɔkɔbɔɔ nɔ̃ kɛhaa wɔ yɛ mɛɛ gbɛ nɔ? (Luka 12:15; 17:31, 32; Mat. 6:19-21, 25)

  • Kanemɔ 2 Petro 2:6-8.

    Mɛni esa akɛ efee wɔsu yɛ jeŋ ni ebɔle wɔ ni leee Nyɔŋmɔ lɛ he, ni wɔkɛkase Lot? (Ezek. 9:4; 1 Yoh. 2:15-17)