Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 13: Abraham—Nyɔŋmɔ Naanyo

Biblia Mli Sane 13: Abraham—Nyɔŋmɔ Naanyo

ATSƐƆ hei ni gbɔmɛi yahi yɛ Nu Afua lɛ sɛɛ lɛ ateŋ ekome gbɛi akɛ Ur. Ebatsɔ maŋ ni he gbɛi waa ni tsũi fɛfɛji pii yɔɔ mli. Shi gbɔmɛi ni yɔɔ jɛmɛ lɛ jaa apasa nyɔŋmɔi. Ni nakai ji bɔ ni amɛfee yɛ Babel hu. Gbɔmɛi ni yɔɔ Ur kɛ Babel lɛ tamɔɔɔ Noa kɛ ebi Shem, ní tee nɔ amɛsɔmɔ Yehowa lɛ.

Yɛ naagbee lɛ, yɛ nu afua lɛ sɛɛ afii 350 lɛ, anɔkwafo Noa gbo. No sɛɛ afii enyɔ pɛ ni afɔ nuu ni onaa yɛ mfoniri nɛɛ mli lɛ. Eji gbɔmɔ krɛdɛɛ ko kɛha Nyɔŋmɔ. Egbɛi ji Abraham. Ekɛ eweku lɛ hi nakai Ur maŋ lɛ mli.

Abraham miikwɛ ŋulamii lɛ

Gbi ko lɛ Yehowa kɛɛ Abraham akɛ: ‘Shi Ur kɛ owekumɛi lɛ, ni oya maŋ ko ni matsɔɔ bo lɛ mli.’ Ani Abraham bo Nyɔŋmɔ toi ni eshi Ur kɛ emli miishɛɛ nibii lɛ fɛɛ? Hɛɛ, efee nakai. Ni akɛni Abraham boɔ Nyɔŋmɔ toi yɛ bei fɛɛ mli lɛ hewɔ ni abale lɛ akɛ Nyɔŋmɔ naanyo lɛ.

Abraham wekumɛi lɛ ekomɛi fata ehe beni eshi Ur lɛ. Etsɛ Tera fata he. Ni ewɔfase Lot hu fata he. Abraham ŋa Sara hu fata he kɛtee. Yɛ be ni sa mli lɛ amɛ fɛɛ amɛbashɛ he ko ni atsɛɔ jɛmɛ akɛ Haran, ni Tera gbo yɛ jɛmɛ. Amɛkɛ Ur teŋ jɛkɛ waa.

Yɛ be ko sɛɛ lɛ, Abraham kɛ eshiabii lɛ shi Haran ni amɛbashɛ shikpɔŋ ni atsɛɔ lɛ Kanaan lɛ nɔ. Jɛmɛ ni Yehowa kɛɛ: ‘Enɛ ji shikpɔŋ ni mikɛbaaha obii lɛ.’ Abraham hi Kanaan yɛ buui amli.

Nyɔŋmɔ je shishi eye ebua Abraham ni no ha ebaná tooi kɛ kooloi krokomɛi babaoo kɛ sɔɔlɔi ohai abɔ. Shi ekɛ Sara bɛ amɛ diɛŋtsɛ amɛbii.

Beni Abraham ye afii 99 lɛ, Yehowa kɛɛ akɛ: ‘Miiwo shi akɛ obaatsɔ tsɛ oha maji babaoo.’ Shi te aaafee tɛŋŋ ni enɛ aaaba mli, akɛni Abraham kɛ Sara egbɔ tsɔ̃ ni amɛnyɛŋ amɛfɔ bi lɛ?

1 Mose 11:27-32; 12:1-7; 17:1-8, 15-17; 18:9-19.



Sanebimɔi

  • Mɛɛ gbɔmɛi nɛkɛ hi Ur maŋtiase lɛ mli lɛ?
  • Namɔ yɔɔ mfoniri lɛ mli lɛ, mɛɛ be af lɛ, ni nɛgbɛ ehi?
  • Mɛni Nyɔŋmɔ kɛɛ Abraham akɛ efee?
  • Mɛni hewɔ atsɛ́ Abraham akɛ Nyɔŋmɔ naanyo lɛ?
  • Namɛi fata Abraham he kɛtee be ni eshi Ur lɛ?
  • Mɛni Nyɔŋmɔ kɛɛ Abraham akɛ efee be ni eyashɛ Kanaan shikpɔŋ lɛ nɔ lɛ?
  • Mɛɛ shiwoo Nyɔŋmɔ kɛha Abraham be ni eye afii 99 lɛ?

Sanebimɔi ni fata he

  • Kanemɔ 1 Mose 11:27-32.

    Mɛɛ wekukpaa kã Abraham kɛ Lot teŋ? (1 Mose 11:27)

    Eyɛ mli akɛ akɛɛ Tera ji mɔ ni kɛ eweku lɛ fa kɛtee Kanaan moŋ, shi te wɔfeɔ tɛŋŋ wɔleɔ akɛ Abraham diɛŋtsɛ moŋ to nakai gbɛjianɔ lɛ, ni mɛni hewɔ efee nakai? (1 Mose 11:31; Bɔf. 7:2-4)

  • Kanemɔ 1 Mose 12:1-7.

    Te Yehowa lɛɛ Abraham kpaŋmɔ lɛ mli eha tɛŋŋ be ni Abraham yashɛ Kanaan shikpɔŋ lɛ nɔ lɛ? (1 Mose 12:7)

  • Kanemɔ 1 Mose 17:1-8, 15-17.

    Mɛɛ gbɛi tsakemɔ Abram nine shɛ nɔ be ni eye afii 99 lɛ, ni mɛni hewɔ? (1 Mose 17:5)

    Mɛɛ wɔsɛɛ be jɔɔmɔi Yehowa kɛwo Sara shi? (1 Mose 17:15, 16)

  • Kanemɔ 1 Mose 18:9-19.

    Mɛɛ gbɛnaa nii aŋmala ashwie shi aha tsɛmɛi yɛ 1 Mose 18:19 lɛ? (5 Mose 6:6, 7; Efe. 6:4)

    Mɛɛ Sara niiashikpamɔ ko tsɔɔ akɛ wɔnyɛŋ wɔkɛ nɔ ko atee Yehowa? (1 Mose 18:12, 15; Lala 44:22)