Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 12: Gbɔmɛi Ma Mɔɔ Agbo Ko

Biblia Mli Sane 12: Gbɔmɛi Ma Mɔɔ Agbo Ko

AFII babaoo ho. Noa bihii lɛ fɔ bii babaoo. Amɛbii lɛ badara ni amɛ hu amɛfɔ bii krokomɛi babaoo. Etsɛɛɛ ni aná gbɔmɛi pii yɛ shikpɔŋ lɛ nɔ.

Gbɔmɛi nɛɛ ateŋ mɔ kome ji Noa nanakaŋsowa, ni atsɛɔ lɛ Nimrod. Eji gbɔmɔ gbonyo, ni egbɔbiɔ gbɔmɛi kɛ kooloi fɛɛ ni egbeɔ amɛ. Nimrod fee ehe maŋtsɛ hu koni eye mɛi krokomɛi anɔ. Nyɔŋmɔ sumɔɔɔ Nimrod sane.

Gbɔmɛi lɛ fɛɛ wieɔ wiemɔ kome yɛ nakai be lɛ mli. Nimrod miisumɔ ni eha amɛ fɛɛ amɛhi he kome koni enyɛ eye amɛnɔ. No hewɔ lɛ ole nɔ ni efee? Ekɛɛ gbɔmɛi lɛ akɛ amɛto maŋ koni amɛma mɔɔ agbo ko yɛ mli. Kwɛmɔ bɔ ni amɛfeɔ ŋtayaai yɛ mfoniri nɛɛ mli lɛ.

Yehowa Nyɔŋmɔ sumɔɔɔ tsũ ni amɛmaa nɛɛ. Nyɔŋmɔ miisumɔ ni gbɔmɛi lɛ agbɛ ashwa ni amɛhi shikpɔŋ lɛ nɔ he fɛɛ he. Shi gbɔmɛi lɛ kɛɛ: ‘Nyɛbaa ko! Nyɛhaa wɔtoa maŋ ni wɔmaa mɔɔ kakadaŋŋ yɛ mli koni eyiteŋ ayashɛ ŋwɛi. Koni wɔkɛhe gbɛi!’ Gbɔmɛi lɛ miitao ni amɛwo amɛ diɛŋtsɛ amɛhiɛ nyam, shi jeee Nyɔŋmɔ.

No hewɔ lɛ Nyɔŋmɔ ha gbɔmɛi lɛ kpa mɔɔ lɛ maa. Ani ole gbɛ ni etsɔ nɔ efee enɛ? Trukaa pɛ kɛkɛ ni eha gbɔmɛi lɛ awiemɔ tsake ni amɛbɔi wiemɔi srɔtoi awiemɔ, shi jeee ekome pɛ dɔŋŋ. Tsumalɔi lɛ nuuu wiemɔi ni amɛwieɔ lɛ shishi dɔŋŋ. Enɛ hewɔ ni atsɛ amɛmaŋ lɛ gbɛi akɛ Babel, aloo Babilon, ni eshishi ji “Futufutu” lɛ.

Agbɛnɛ, gbɔmɛi lɛ bashi Babel ni amɛtee. Gbɔmɛi akuikui ni wieɔ wiemɔ kome lɛ tee ni amɛyahi shi kutuu yɛ shikpɔŋ lɛ nɔ hei krokomɛi.

1 Mose 10:1, 8-10; 11:1-9.

Nitsulɔi ni miima mɔɔ wulu


Sanebimɔi

  • Namɔ ji Nimrod, ni te Nyɔŋmɔ susu ehe ha tɛŋŋ?
  • Mɛni hewɔ gbɔmɛi lɛ feɔ ŋtayaai yɛ mfoniri lɛ mli lɛ?
  • Mɛni hewɔ Yehowa sumɔɔɔ tsũ ni amaa lɛ?
  • Mɛɛ gbɛ nɔ Nyɔŋmɔ tsɔ ni eha akpa mɔɔ lɛ maa?
  • Te atsɛ́ maŋ lɛ gbɛi tɛŋŋ, ni mɛni ji nakai gbɛi lɛ shishinumɔ?
  • Mɛni ba gbɔmɛi lɛ anɔ be ni Nyɔŋmɔ futu amɛwiemɔi lɛ?

Sanebimɔi ni fata he

  • Kanemɔ 1 Mose 10:1, 8-10.

    Mɛni subaŋi komɛi Nimrod jie lɛ kpo, ni mɛɛ kɔkɔbɔɔ enɛ kɛhaa wɔ? (Abɛi 3:31)

  • Kanemɔ 1 Mose 11:1-9.

    Mɛɛ jwɛŋmɔ hɔ mɔɔ ni amaa lɛ sɛɛ, ni mɛni hewɔ nitsumɔ lɛ yeŋ omanye kɔkɔɔkɔ lɛ? (1 Mose 11:4; Abɛi 16:18; Yoh. 5:44)