Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 9: Noa Kpɛ Adeka

Biblia Mli Sane 9: Noa Kpɛ Adeka
Gbɔmɛi miiŋmɔ Noa

NOA yɛ ŋa kɛ bihii etɛ. Ebihii lɛ agbɛi ji Shem, Ham kɛ Yafet. Ni bihii nɛɛ ateŋ mɔ fɛɛ mɔ yɛ ŋa. No hewɔ lɛ, mɛi kpaanyɔ yɔɔ Noa weku lɛ mli.

Agbɛnɛ, Nyɔŋmɔ ha Noa fee nɔ ko ni yɔɔ naakpɛɛ. Ekɛɛ lɛ akɛ ekpɛ adeka agbo ko. Adeka nɛɛ da tamɔ lɛlɛ, shi etamɔ adeka agbo kakadaŋŋ ko. Nyɔŋmɔ kɛɛ lɛ akɛ, ‘Feemɔ lɛ nsɔdoi etɛ, ni ofee tsũi yɛ mli.’ Noa kɛ eweku lɛ, kɛ kooloi lɛ, kɛ niyenii ni amɛ fɛɛ amɛbaaye lɛ baahi tsũi lɛ amli.

Nyɔŋmɔ kɛɛ Noa akɛ ekpɛ adeka lɛ jogbaŋŋ koni nu akabote mli. Nyɔŋmɔ kɛɛ lɛ akɛ: ‘Mikɛ nu afua babaoo ko baaba ni makpata jeŋ muu lɛ fɛɛ hiɛ. Mɔ fɛɛ mɔ ni bɛ adeka lɛ mli lɛ baagbo.’

Noa kɛ ebihii lɛ bo Yehowa toi ni amɛbɔi adeka lɛ kpɛɛ. Shi gbɔmɛi ni eshwɛ lɛ ŋmɔ amɛ aahu. Amɛtee nɔ amɛfee efɔŋ. Amɛteŋ mɔ ko mɔ ko heee Noa eyeee beni ekɛɛ amɛ nɔ ni Nyɔŋmɔ baafee lɛ.

Noa weku lɛ kɛ kooloi kɛ niyenii miiwo adeka lɛ mli

Adeka ni amɛkpɛ lɛ hé be kakadaŋŋ ejaakɛ eda waa. Yɛ naagbee lɛ, yɛ afii babaoo sɛɛ lɛ, amɛgbe naa. Agbɛnɛ, Nyɔŋmɔ kɛɛ Noa akɛ ekɛ kooloi lɛ aba adeka lɛ mli. Nyɔŋmɔ kɛɛ lɛ akɛ ekɛ henɔi lɛ ekomɛi enyɔnyɔ, nuu kɛ yoo fɛɛ awo adeka lɛ mli. Shi kooloi lɛ ekomɛi lɛ, Nyɔŋmɔ kɛɛ Noa ni ekɛ henɔi kpawo kpawo awo mli. Nyɔŋmɔ kɛɛ Noa hu akɛ ekɛ loofɔji srɔtoi lɛ fɛɛ eko aba mli. Noa fee bɔ ni Nyɔŋmɔ kɛɛ lɛ lɛ fɛɛ pɛpɛɛpɛ.

No sɛɛ lɛ, Noa kɛ eweku lɛ hu bote adeka lɛ mli. Kɛkɛ ni Nyɔŋmɔ ŋa shinaa lɛ. Noa kɛ eweku lɛ yɛ adeka lɛ mli ni amɛmiimɛ. Ŋɔɔ lɛ akɛ, ofata amɛhe yɛ adeka lɛ mli, ni oomɛ. Ani nu afua ko baaba lɛlɛŋ taakɛ Nyɔŋmɔ kɛɛ lɛ?

1 Mose 6:9-22; 7:1-9.



Sanebimɔi

  • Mɛi enyiɛ yɔɔ Noa weku lɛ mli, ni mɛni ji ebihii etɛ lɛ agbɛi?
  • Mɛni ni yɔɔ naakpɛɛ waa Nyɔŋmɔ kɛɛ Noa akɛ efee, ni mɛni hewɔ?
  • Te Noa akutsoŋbii lɛ fee amɛnii amɛha tɛŋŋ be ni egba amɛ adeka lɛ he sane lɛ?
  • Mɛni Nyɔŋmɔ kɛɛ Noa akɛ efee yɛ kooloi lɛ ahe?
  • Be ni Nyɔŋmɔ ŋa adeka lɛ shinaa lɛ naa lɛ, mɛni he bahia ni Noa kɛ eweku lɛ afee?

Sanebimɔi ni fata he

  • Kanemɔ 1 Mose 6:9-22.

    Mɛni ha Noa bafee anɔkwa Nyɔŋmɔ lɛ jálɔ ni esoro lɛ kwraa lɛ? (1 Mose 6:9, 22)

    Te Yehowa nuɔ yiwalɛ he ehaa tɛŋŋ, ni te esa akɛ enɛ asa hiɛtserɛjiemɔ ni wɔhalaa lɛ he aha tɛŋŋ? (1 Mose 6:11, 12; Lala 11:5)

    Te wɔɔfee tɛŋŋ wɔkase Noa be ni wɔnine eshɛ gbɛtsɔɔmɔ nɔ kɛtsɔ Yehowa asafo lɛ nɔ lɛ? (1 Mose 6:22; 1 Yoh. 5:3)

  • Kanemɔ 1 Mose 7:1-9.

    Yɛ mɛɛ gbɛ nɔ anɔkwale ni eji akɛ Yehowa bu Noa ni yeee emuu lɛ akɛ jalɔ lɛ woɔ wɔ hewalɛ ŋmɛnɛ? (1 Mose 7:1; Abɛi 10:16; Yes. 26:7)