Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 8: Oblaŋi yɛ Shikpɔŋ lɛ Nɔ

Biblia Mli Sane 8: Oblaŋi yɛ Shikpɔŋ lɛ Nɔ

KƐJI mɔ ko nyiɛ kɛmiiba omasɛi ni ekɛlɛ shɛɔ tsũyiteŋ lɛ, mɛni obaasusu? Nakai mɔ lɛ baanyɛ afee obalaŋ! Be ko lɛ obalaŋi hi shikpɔŋ lɛ nɔ diɛŋtsɛ. Biblia lɛ tsɔɔ akɛ amɛtsɛmɛi ji ŋwɛibɔfoi ni jɛ ŋwɛi. Shi te aaafee tɛŋŋ ni eeeba lɛ nakai hu?

Oblaŋi yiwalɔi

Kaimɔ akɛ, no mli lɛ ŋwɛibɔfo fɔŋ ni ji Satan miifee efɔŋ. Eebɔ mɔdɛŋ ni eha Nyɔŋmɔ bɔfoi lɛ po afee efɔŋ. Be shɛ ni ŋwɛibɔfoi nɛɛ ateŋ mɛi komɛi je shishi akɛ amɛaabo Satan toi. Amɛkpa nitsumɔ ni Nyɔŋmɔ kɛwo amɛdɛŋ yɛ ŋwɛi lɛ tsumɔ. Kɛkɛ ni amɛba shikpɔŋ nɔ ni amɛfee adesai gbɔmɔtsei amɛha amɛhe. Ani ole nɔ hewɔ?

Biblia lɛ kɛɔ akɛ nɛkɛ Nyɔŋmɔ bii nɛɛ na yei ni he yɔɔ fɛo yɛ shikpɔŋ nɔ, ni amɛmiisumɔ ni amɛkɛ amɛ ahi shi. No hewɔ lɛ, amɛba shikpɔŋ nɔ ni amɛkɛ yei nɛɛ babote gbalashihilɛ mli. Biblia lɛ kɛɔ akɛ enɛ ejaaa, ejaakɛ Nyɔŋmɔ fee bɔfoi nɛɛ ni amɛhi ŋwɛi.

Beni ŋwɛibɔfoi lɛ kɛ amɛŋamɛi lɛ fɔ bii lɛ, nɛkɛ bii nɛɛ yɛ srɔto. Shishijee lɛ, amɛtamɔɔɔ mɛi ni esoro amɛ. Shi amɛtee nɔ amɛdara agboi agboi, ni amɛhewalɛ lɛ tee hiɛ aahu kɛbashi be mli ni amɛtsɔmɔ obalaŋi.

Nɛkɛ obalaŋi nɛɛ ehiii kwraa. Ni akɛni amɛdara ni amɛhe wa hewɔ lɛ, amɛyeɔ gbɔmɛi awui. Amɛbɔ mɔdɛŋ ni amɛnyɛ mɔ fɛɛ mɔ nɔ ni amɛfee efɔŋ tamɔ amɛ.

No mli lɛ Henok egbo, shi nuu ko yɛ shikpɔŋ nɔ ni eji gbɔmɔ kpakpa. Nuu nɛɛ gbɛi ji Noa. Efeɔ Nyɔŋmɔ suɔmɔnaa nii be fɛɛ be.

Gbi ko lɛ, Nyɔŋmɔ kɛɛ Noa akɛ be eshɛ ni E-baakpata gbɔmɛi fɔji fɛɛ ahiɛ. Shi Nyɔŋmɔ baahere Noa, kɛ eweku lɛ kɛ kooloi pii ayiwala. Ha wɔkwɛ bɔ ni Nyɔŋmɔ fee enɛ eha.

1 Mose 6:1-8; Yuda 6.



Sanebimɔi

  • Mɛni ba be ni Nyɔŋmɔ ŋwɛibɔfoi lɛ ateŋ mɛi komɛi bo Satan toi lɛ?
  • Mɛni hewɔ ŋwɛibɔfoi lɛ ateŋ mɛi komɛi kpa amɛnitsumɔ yɛ ŋwɛi ni amɛba shikpɔŋ lɛ nɔ lɛ?
  • Mɛni hewɔ ejaaa akɛ ŋwɛibɔfoi lɛ aaaba shikpɔŋ lɛ nɔ ni amɛbafee adesai agbɔmɔtsei amɛha amɛhe lɛ?
  • Mɛni yɔɔ srɔto yɛ ŋwɛibɔfoi lɛ abii lɛ ahe?
  • Taakɛ obaanyɛ ona yɛ mfoniri lɛ mli lɛ, mɛni ŋwɛibɔfoi lɛ abii lɛ fee be ni amɛbatsɔmɔ oblaŋi lɛ?
  • Yɛ Henok sɛɛ lɛ, mɛɛ gbɔmɔ kpakpa ko hi shikpɔŋ lɛ nɔ, ni mɛni hewɔ Nyɔŋmɔ sumɔɔ esane lɛ?

Sanebimɔi ni fata he

  • Kanemɔ 1 Mose 6:1-8.

    Mɛni 1 Mose 6:6 lɛ jieɔ lɛ kpo yɛ bɔ ni wɔjeŋba baanyɛ asa Yehowa henumɔi ahe lɛ he? (Lala 78:40, 41; Abɛi 27:11)

  • Kanemɔ Yuda 6.

    Yɛ mɛɛ gbɛ nɔ ŋwɛibɔfoi ‘ni ehiɛɛɛ amɛ shishijee gbɛhe lɛ mli’ yɛ Noa gbii lɛ amli lɛ ji kaimɔ nɔ̃ kɛha wɔ ŋmɛnɛ? (1 Kor. 3:5-9; 2 Pet. 2:4, 9, 10)