Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 6: Bi Kpakpa, kɛ Bi Fɔŋ

Biblia Mli Sane 6: Bi Kpakpa, kɛ Bi Fɔŋ

AGBƐNƐ, kwɛmɔ Kain kɛ Habel. Amɛ fɛɛ amɛdara. Kain etsɔ okwaafonyo. Eduɔ ŋmaa kɛ aduawai kɛ ŋmɔshi nibii.

Kain kɛ Habel ni miishã afɔlei kɛmiiha Nyɔŋmɔ

Habel etsɔ tookwɛlɔ. Esumɔɔ ni elɛ tooi bibii. Amɛdaraa ni amɛbatsɔmɔɔ tooi agboi, no hewɔ lɛ etsɛɛɛ ni Habel baná tooi babaoo ni ekwɛɔ amɛnɔ.

Gbi ko lɛ Kain kɛ Habel kɛ nikeenii baha Nyɔŋmɔ. Kain kɛ niyenii komɛi ni edũ lɛ eko ba. Ni Habel kɛ etooi lɛ ateŋ nɔ ni ewo fɔ fe fɛɛ ba. Yehowa hiɛ sɔ Habel kɛ enikeenii lɛ. Shi enaaa Kain kɛ enikeenii lɛ he miishɛɛ. Ani ole nɔ hewɔ?

Jeee akɛ Habel nikeenii lɛ hi fe Kain nɔ lɛ kɛkɛ. Nɔ hewɔ ji akɛ, gbɔmɔ kpakpa hu ji Habel. Esumɔɔ Yehowa kɛ enyɛmi lɛ. Shi Kain ehiii; esumɔɔɔ enyɛmi lɛ sane.

No hewɔ lɛ, Nyɔŋmɔ kɛɛ Kain akɛ etsake esubaŋ. Shi Kain booo toi. Emli fu waa ejaakɛ Nyɔŋmɔ sumɔɔ Habel sane waa. No hewɔ lɛ, Kain kɛɛ Habel akɛ, ‘Ha ni wɔya ŋmɔ mli.’ Ni beni amɛ pɛ amɛyɔɔ jɛmɛ lɛ, Kain kɛ nɔ ko tswa enyɛmi Habel. Etswa lɛ waa ni egbo. Ani jeee efɔŋ agbo Kain efee nɛɛ?

Kain ni miijo foi beni egbe Habel sɛɛ lɛ

Eyɛ mli akɛ Habel gbo moŋ, shi Nyɔŋmɔ kaiɔ lɛ lolo. Habel ji gbɔmɔ kpakpa, ni Yehowa hiɛ kpaaa gbɔmɔ ni tamɔ nɛkɛ nɔ. No hewɔ lɛ, gbi ko baaba ni Yehowa Nyɔŋmɔ kɛ Habel baaba wala mli ekoŋŋ. Kɛ́ nakai be lɛ ba lɛ, Habel gboŋ dɔŋŋ. Ebaanyɛ ehi shikpɔŋ nɛɛ nɔ kɛya naanɔ. Ani ebafeŋ miishɛɛ akɛ wɔɔle gbɔmɛi tamɔ Habel?

Shi Nyɔŋmɔ sumɔɔɔ gbɔmɛi ni tamɔ Kain sane. No hewɔ lɛ, beni Kain gbe enyɛmi lɛ sɛɛ lɛ, Nyɔŋmɔ shwie lɛ kɛjɛ eweku lɛ he kɛtee he ko shɔŋŋ, koni ekɛgbala etoi. Beni Kain tee eyahi shikpɔŋ lɛ fã ko nɔ lɛ, ekɛ enyɛmimɛi yei lɛ ateŋ mɔ kome tee, ni ebatsɔ eŋa.

Be ko sɛɛ lɛ Kain kɛ eŋa lɛ bɔi bii afɔmɔ. Adam kɛ Hawa bihii kɛ biyei krokomɛi lɛ hu bote gbalashihilɛ mli, ni amɛ hu amɛfɔ bii. Etsɛɛɛ ni gbɔmɛi ayi bafa yɛ shikpɔŋ lɛ nɔ. Ha wɔkase amɛteŋ mɛi komɛi ahe sane.

1 Mose 4:2-26; 1 Yohane 3:11, 12; Yohane 11:25.



Sanebimɔi

  • Mɛɛ nitsumɔi Kain kɛ Habel tsuɔ?
  • Mɛɛ nikeenii Kain kɛ Habel kɛbaha Yehowa?
  • Mɛni hewɔ Yehowa hiɛ sɔ Habel nikeenii lɛ, ni mɛni hewɔ ehiɛ esɔɔɔ Kain nɔ̃ lɛ?
  • Mɛɛ gbɔmɔ nɛkɛ Kain ji, ni mɛɛ mɔdɛŋ Yehowa bɔ koni ejaje lɛ?
  • Mɛni Kain fee be ni ekɛ enyɛmi nuu lɛ pɛ yɔɔ ŋa lɛ nɔ lɛ?
  • Tsɔɔmɔ nɔ ni ba Kain nɔ lɛ mli be ni egbe enyɛmi lɛ.

Sanebimɔi ni fata he

  • Kanemɔ 1 Mose 4:2-26.

    Te Yehowa tsɔɔ oshara shihilɛ ni Kain yɔɔ mli lɛ mli eha tɛŋŋ? (1 Mose 4:7)

    Te Kain jie su ni yɔɔ etsui mli lɛ kpo eha tɛŋŋ? (1 Mose 4:9)

    Mɛni ji Yehowa susumɔ yɛ lá ni yeɔ bem ni afɔseɔ ashwieɔ shi lɛ he? (1 Mose 4:10; Yes. 26:21)

  • Kanemɔ 1 Yohane 3:11, 12.

    Mɛni hewɔ Kain mli wo la waa lɛ, ni mɛɛ gbɛ nɔ enɛ feɔ kɔkɔbɔɔ nɔ̃ kɛhaa wɔ ŋmɛnɛ? (1 Mose 4:4, 5; Abɛi 14:30; 28:22)

    Mɛɛ gbɛ nɔ Biblia lɛ tsɔɔ yɛ akɛ, kɛji ákɛ wɔ weku lɛ mli bii fɛɛ te shi wo Yehowa po lɛ, wɔbaanyɛ wɔhiɛ emuuyeli mli lolo? (Lala 27:10; Mat. 10:21, 22)

  • Kanemɔ Yohane 11:25.

    Mɛɛ nɔmimaa Yehowa kɛhaa yɛ mɛi ni gboiɔ yɛ jalɛ hewɔ lɛ ahe? (Yoh. 5:24)

Ekrokromɛi Hu Nɛ

Habel—‘Eewie Lolo, Tsɛ Egbo’

Eyɛ mli akɛ Habel he sane fioo ko pɛ yɔɔ Biblia lɛ mli moŋ shi mɛni wɔbaanyɛ wɔkase yɛ lɛ kɛ ehemɔkɛyeli lɛ he?