Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 5: Shihilɛ ni Mli Wa Je Shishi

Biblia Mli Sane 5: Shihilɛ ni Mli Wa Je Shishi

ADAM kɛ Hawa kɛ haomɔi pii kpe yɛ Eden abɔɔ lɛ sɛɛ. Esa akɛ amɛtsu nii waa dani amɛna amɛ niyenii. Ní amɛaana tsei fɛfɛji ni woɔ aduawai lɛ, amɛna ni ŋmei kɛ aŋlɛŋlɛi babaoo ekwɛ̃ kɛbɔle amɛhe. Enɛ ji nɔ ni ba beni Adam kɛ Hawa booo Nyɔŋmɔ toi ni amɛkɛ Lɛ teŋ naanyobɔɔ lɛ fite lɛ.

Adam kɛ ebinuu miitsu nii waa

Shi nɔ ni fe enɛ ji akɛ, Adam kɛ Hawa bɔi gboimɔ. Okaiɔ akɛ Nyɔŋmɔ bɔ amɛ kɔkɔ akɛ kɛ amɛye tso ko nɔ yibii lɛ amɛbaagboi. Amɛbɔi gboimɔ yɛ nakai gbi ni amɛye lɛ nɔ nɔŋŋ. Kwɛ kwashiai ni amɛfee amɛhe akɛ amɛyabooo Nyɔŋmɔ toi!

Afɔ Adam kɛ Hawa bii fɛɛ yɛ be mli ni Nyɔŋmɔ eshwie amɛfɔlɔi lɛ kɛjɛ Eden abɔɔ lɛ mli lɛ sɛɛ. Enɛ tsɔɔ akɛ gbekɛbii lɛ hu baagbɔlɔ ni amɛbaagboi.

Eji Adam kɛ Hawa bo Yehowa toi kulɛ, shihilɛ lɛ baafee nɔ ni miishɛɛ yɔɔ mli kɛha amɛ kɛ amɛbii. Kulɛ amɛ fɛɛ amɛbaanyɛ amɛhi shi kɛya naanɔ yɛ miishɛɛ mli yɛ shikpɔŋ nɔ. Ni kulɛ, mɔ ko egbɔŋ ní hela amɔ lɛ ni egbo.

Nyɔŋmɔ miisumɔ ni gbɔmɛi ahi shi yɛ miishɛɛ mli kɛya naanɔ, ni E-wo shi akɛ gbi ko baaba ni amɛbaahi shi nakai. Jeee akɛ shikpɔŋ muu lɛ fɛɛ baafee fɛo kɛkɛ, shi moŋ gbɔmɛi fɛɛ baaná gbɔmɔtsoŋ hewalɛ. Ni mɛi ni yɔɔ shikpɔŋ nɔ lɛ fɛɛ kɛ amɛhe kɛ Nyɔŋmɔ hu baahi shi akɛ nanemɛi kpakpai.

Hawa kɛ ebii

Shi Hawa jeee Nyɔŋmɔ naanyo dɔŋŋ. No hewɔ lɛ beni efɔ ebii lɛ, etɔ lɛ waa diɛŋtsɛ. Epiŋ babaoo diɛŋtsɛ. Ní ebooo Yehowa toi lɛ ha eye awerɛho babaoo, aloo jeee nakai?

Adam kɛ Hawa fɔ bihii kɛ biyei babaoo. Beni amɛfɔ amɛ klɛŋklɛŋ binuu lɛ, amɛwo lɛ gbɛi akɛ Kain. Amɛwo amɛ binuu ni ji enyɔ lɛ gbɛi akɛ Habel. Mɛni ba amɛnɔ? Ani ole?

1 Mose 3:16-23; 4:1, 2; Kpojiemɔ 21:3, 4.



Sanebimɔi

  • Te shihilɛ lɛ bafee tɛŋŋ kɛha Adam kɛ Hawa yɛ Eden abɔɔ lɛ sɛɛ?
  • Mɛni bɔi Adam kɛ Hawa nɔ baa, ni mɛni hewɔ?
  • Mɛni hewɔ bii ni Adam kɛ Hawa f lɛ baagbɔlɔ ni amɛgboi lɛ?
  • Eji Adam kɛ Hawa bo Yehowa toi kulɛ, te shihilɛ baatamɔ aha kɛha amɛ kɛ amɛbii lɛ tɛŋŋ?
  • Hawa toigbele lɛ ha epiŋ yɛ mɛɛ gbɛ nɔ?
  • Mɛni ji Adam kɛ Hawa klɛŋklɛŋ bihii enyɔ lɛ agbɛi?
  • Namɛi ji bii krokomɛi ni yɔɔ mfoniri lɛ mli lɛ?

Sanebimɔi ni fata he

  • Kanemɔ 1 Mose 3:16-23 kɛ 4:1, 2.

    Shikpɔŋ ni alomɔ lɛ sa Adam shihilɛ he yɛ mɛɛ gbɛ nɔ? (1 Mose 3:17-19; Rom. 8:20, 22)

    Mɛni hewɔ Hawa gbɛi ni eshishinumɔ ji “Hiɛkalɔ” lɛ sa jogbaŋŋ lɛ? (1 Mose 3:20)

    Yɛ mɛɛ gbɛ nɔ Yehowa jie mɔ he susumɔ kpo etsɔɔ Adam kɛ Hawa be ni amɛfee esha lɛ sɛɛ po? (1 Mose 3:7, 21)

  • Kanemɔ Kpojiemɔ 21:3, 4.

    Mɛɛ “tsutsu nii” obaasumɔ ni ajie kɛya?