Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 3: Klɛŋklɛŋ Nuu kɛ Yoo Lɛ

Biblia Mli Sane 3: Klɛŋklɛŋ Nuu kɛ Yoo Lɛ

MƐNI yɔɔ srɔto yɛ mfoniri nɛɛ mli? Hɛɛ, no ji gbɔmɛi ni yɔɔ mli lɛ. Amɛji klɛŋklɛŋ nuu kɛ yoo lɛ. Namɔ fee amɛ? Nyɔŋmɔ. Ani ole egbɛi? Egbɛi ji Yehowa. Ni atsɛ nuu kɛ yoo lɛ akɛ Adam kɛ Hawa.

Adam kɛ Hawa yɛ Eden abɔɔ lɛ mli

Bɔ ni Yehowa Nyɔŋmɔ fee Adam nɛ. Etĩ shikpɔŋ sũ ni ekɛshɔ̃ gbɔmɔtso ni yeɔ emuu, nuu gbɔmɔtso. Kɛkɛ ni emu kɔɔyɔɔ ewo gbɔmɔ lɛ gugɔ mli, kɛkɛ ni Adam ba wala mli.

Yehowa Nyɔŋmɔ yɛ nitsumɔ ko kɛha Adam. Ekɛɛ Adam ni ewo kooloi srɔtoi lɛ fɛɛ agbɛi. Ebaanyɛ eba akɛ, Adam ekwɛ kooloi lɛ yɛ be kakadaŋŋ mli ni no hewɔ lɛ ebaanyɛ eha amɛ gbɛi ni sa amɛ fɛɛ. Beni Adam woɔ kooloi lɛ agbɛi lɛ, kɛkɛ ni ena nɔ ko. Ani ole nɔ ni enɛ ji?

Kooloi lɛ fɛɛ yɛ hefatalɔi. Papa shwuɔi kɛ mami shwuɔi yɛ, ni papa jatai kɛ mami jatai hu yɛ. Shi Adam bɛ mɔ ko ni baafee ehefatalɔ. No hewɔ lɛ, Yehowa ha Adam wɔ vii, kɛkɛ ni ejie eŋmawu wu kome. Yehowa kɛ nɛkɛ ŋmawu nɛɛ fee yoo eha Adam, ni ebatsɔ eŋa.

Kwɛ miishɛɛ ni Adam ná agbɛnɛ! Ni susumɔ bɔ ni Hawa ná miishɛɛ ákɛ akɛ lɛ wo abɔɔ fɛfɛo nɛɛ mli koni ehi jɛmɛ lɛ hu he okwɛ! Agbɛnɛ amɛbaanyɛ amɛfɔ bii ni amɛhi shi yɛ ekomefeemɔ mli yɛ miishɛɛ mli.

Yehowa miisumɔ ni Adam kɛ Hawa ahi shi kɛya naanɔ. Eesumɔ ni amɛfee shikpɔŋ muu lɛ fɛɛ fɛfɛo tamɔ Eden abɔɔ lɛ. Kwɛ miishɛɛ ni Adam kɛ Hawa baaná beni amɛsusu enɛ feemɔ he lɛ! Ani kulɛ obaaná miishɛɛ akɛ oooye obua koni shikpɔŋ lɛ afee abɔɔ fɛfɛo? Shi Adam kɛ Hawa miishɛɛ lɛ sɛɛ etsɛɛɛ. Ha wɔkwɛ nɔ ni ha eba lɛ nakai.

Lala 83:19; 1 Mose 1:26-31; 2:7-25.



Sanebimɔi

  • Mɛɛ srɔtofeemɔ onaa yɛ mfoniri ni yɔɔ Biblia Mli Sane 3 lɛ kɛ nɔ ni yɔɔ Biblia Mli Sane 2 lɛ teŋ?
  • Namɔ fee klɛŋklɛŋ nuu lɛ, ni mɛni ji nuu lɛ gbɛi?
  • Mɛni nitsumɔ Nyɔŋmɔ kɛha Adam akɛ etsu?
  • Mɛni hewɔ Nyɔŋmɔ ha Adam wɔ vii lɛ?
  • Adam kɛ Hawa baanyɛ ahi shi kɛyashi mɛɛ be, ni mɛɛ nitsumɔ Yehowa sumɔɔ ni amɛtsu?

Sanebimɔi ni fata he

  • Kanemɔ Lala 83:19.

    Mɛni ji Nyɔŋmɔ gbɛi, ni mɛɛ gbɛhe ni eko kɛ lɛ yeee egbɔ eyɔɔ yɛ shikpɔŋ lɛ nɔ? (Yer. 16:21; Dan. 4:17)

  • Kanemɔ 1 Mose 1:26-31.

    Mɛni Nyɔŋmɔ bɔ naagbee yɛ gbi ni ji ekpaa lɛ nɔ, ni te adebɔɔ nɛɛ yɔɔ srɔto yɛ kooloi lɛ ahe tɛŋŋ? (1 Mose 1:26)

    Mɛɛ gbɛjianɔ Yehowa to kɛha gbɔmɔ kɛ kooloi fɛɛ? (1 Mose 1:30)

  • Kanemɔ 1 Mose 2:7-25.

    Mɛni fata Adam nitsumɔ akɛ ewo kooloi lɛ agbɛi lɛ he? (1 Mose 2:19)

    Mɛɛ gbɛ nɔ 1 Mose 2:24 lɛ yeɔ ebuaa wɔ koni wɔnu bɔ ni Yehowa susuɔ gbalashihilɛ, mligbalamɔ, kɛ gbalamlitsemɔ he ehaa lɛ shishi? (Mat. 19:4-6, 9)