Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 2: Abɔɔ Fɛfɛo Ko

Biblia Mli Sane 2: Abɔɔ Fɛfɛo Ko

KWƐMƆ shikpɔŋ ni yɔɔ biɛ lɛ! Kwɛ bɔ ni nɔ fɛɛ nɔ yɔɔ fɛo ha! Kwɛmɔ jwɛi lɛ kɛ tsei lɛ, fɔfɔii kɛ kooloi lɛ fɛɛ. Ani obaanyɛ otsɔɔ nɔ ni ji shwuɔi kɛ jatai lɛ?

Kooloi yɛ Eden abɔɔ lɛ mli

Te fee tɛŋŋ ni nɛkɛ abɔɔ fɛfɛo nɛɛ ba? Ha wɔkwɛ bɔ ni Nyɔŋmɔ saa shikpɔŋ lɛ eha wɔ.

Klɛŋklɛŋ lɛ, Nyɔŋmɔ ha jwɛi kwɛ̃ yɛ shikpɔŋ lɛ fɛɛ nɔ. Ni efee kwɛ̃ɛ nii bibii kɛ jwɛi srɔtoi kɛ tsei. Nibii ni kwɛ̃ɔ nɛɛ yeɔ ebuaa ni ehaa shikpɔŋ lɛ nɔ feɔ fɛo. Shi efeɔ babaoo fe nakai. Amɛteŋ babaoo haa wɔ niyenii ni ŋɔɔ jogbaŋŋ hu.

Yɛ sɛɛ mli lɛ, Nyɔŋmɔ fee looi koni amɛsere yɛ nui lɛ amli kɛ loofɔji hu ni amɛfiliki yɛ ŋwɛi. Efee gbeei kɛ alɔntei kɛ okpɔŋɔi; kooloi wuji kɛ kooloi bibii. Mɛɛ kooloi nɛkɛ bɛŋkɛ nyɛ shia lɛ? Ani esaaa akɛ wɔnáa miishɛɛ akɛ Nyɔŋmɔ fee nibii nɛɛ fɛɛ kɛha wɔ?

Yɛ naagbee lɛ, Nyɔŋmɔ je gbɛ esaa shikpɔŋ lɛ he ko fɛfɛo. Etsɛ nɛkɛ he nɛɛ akɛ Eden abɔɔ. Eyeɔ emuu. Nɔ fɛɛ nɔ yɛ fɛo yɛ mli. Ni Nyɔŋmɔ miisumɔ ni shikpɔŋ lɛ fɛɛ nɔ atsɔ tamɔ abɔɔ fɛfɛo ní efee nɛɛ.

Shi kwɛmɔ abɔɔ nɛɛ he mfoniri lɛ ekoŋŋ. Ani ole nɔ ni Nyɔŋmɔ na akɛ ebɛ mli? Ha wɔkwɛ.

1 Mose 1:11-25; 2:8, 9.



Sanebimɔi

  • Mɛɛ gbɛ nɔ Nyɔŋmɔ tsɔ esaa shikpɔŋ lɛ koni efee wɔshia?
  • Tsɔɔmɔ bɔ ni kooloi srɔtoi babaoo ni Nyɔŋmɔ fee lɛ yɔɔ ha lɛ mli. (Kwɛmɔ mfoniri lɛ.)
  • Mɛni hewɔ Eden abɔɔ lɛ yɔɔ fɛo waa lɛ?
  • Mɛni Nyɔŋmɔ taoɔ ni shikpɔŋ muu lɛ fɛɛ atsɔ?

Sanebimɔi ni fata he

  • Kanemɔ 1 Mose 1:11-25.

    Mɛni Nyɔŋmɔ bɔ yɛ adebɔɔ gbi ni ji etɛ lɛ nɔ? (1 Mose 1:12)

    Mɛni ba yɛ adebɔɔ gbi ni ji ejwɛ lɛ nɔ? (1 Mose 1:16)

    Mɛɛ kooloi srɔtoi nɛkɛ Nyɔŋmɔ fee yɛ gbii ni ji enumɔ kɛ ekpaa lɛ nɔ? (1 Mose 1:20, 21, 25)

  • Kanemɔ 1 Mose 2:8, 9.

    Mɛɛ tsei krɛdɛɛi enyɔ Nyɔŋmɔ tɛo yɛ abɔɔ lɛ mli, ni mɛni amɛdamɔ shi kɛha?