Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 10: Nu Afua Kpeteŋkpele Lɛ

Biblia Mli Sane 10: Nu Afua Kpeteŋkpele Lɛ

GBƆMƐI lɛ tee nɔ amɛfee nɔ ni amɛsumɔɔ taakɛ amɛfeɔ daa lɛ, yɛ adeka lɛ sɛɛ. Amɛheee amɛyeee lolo akɛ Nu Afua lɛ baaba. Eeenyɛ efee akɛ amɛŋmɔ waa fe tsutsu lɛ. Shi etsɛɛɛ ni amɛkpa ŋmɔlɔ lɛ.

Nu afua miisu gbɔmɛi kɛ kooloi ni gbeyei emɔmɔ amɛ

Trukaa pɛ kɛkɛ ni nugbɔ bɔi nɛmɔ. Efɔse kɛjɛ ŋwɛi eshwie shi tamɔ ofɔseɔ nu kɛjɛɔ goga mli oshwieɔ shi lɛ. Noa wiemɔ lɛ eba mli! Shi ekpe sɛɛ tsɔ̃ akɛ mɔ ko aaanyɛ abote adeka lɛ mli. Yehowa eŋa shinaa lɛ kpɛŋŋ.

Etsɛɛɛ ni jɔɔi fɛɛ yimɔ kɛ nu. Nu lɛ batsɔ tamɔ faai wuji. Efamɔ tsei ni ekokolo tɛi wuji kɛbɔle shi, ni efee hoo. Gbɔmɛi lɛ she gbeyei. Amɛkwɔ kɛtee gɔji anɔ. Oo, amɛná ni kulɛ amɛbo Noa toi ní amɛbote adeka lɛ mli beni shinaa lɛ naa kã lolo kɛha amɛ lɛ! Shi agbɛnɛ ekpe sɛɛ kwraa tsɔ̃.

Nu lɛ tee nɔ eyi. Nu lɛ nɛ kɛjɛ ŋwɛi eshwie shikpɔŋ nɔ shwaneshwane gbii 40, kɛ nyɔɔŋnyɔɔŋ hu gbii 40. Ebashɛ gɔji lɛ anɔ, ni etsɛɛɛ ni eha gɔji ni kwɔlɔ fe fɛɛ lɛ po anɔ. No hewɔ lɛ, gbɔmɛi kɛ kooloi ni yɔɔ adeka lɛ sɛɛ lɛ fɛɛ gboi taakɛ Nyɔŋmɔ kɛɛ lɛ. Shi mɔ fɛɛ mɔ ni yɔɔ adeka lɛ mli lɛ yi na wala.

Noa kɛ ebihii lɛ etsu nitsumɔ kpakpa yɛ adeka ni amɛkpɛ lɛ hewɔ. Nu lɛ wó adeka lɛ nɔ, ni etɛo nu lɛ hiɛ. Kɛkɛ ni gbi ko, beni nugbɔnɛmɔ lɛ ekpa lɛ, hulu lɛ bɔi tsoo. Mɛni yɔɔ gbeyei nɛkɛ! Nu babaoo tamɔ ŋshɔ pɛ anaa yɛ he fɛɛ he. Ni nɔ pɛ ni anaa ji adeka lɛ ni etɛo nu lɛ hiɛ.

Adeka lɛ tɔɔ nu lɛ hiɛ

Obalaŋi lɛ etee agbɛnɛ. Amɛbɛ ni amɛbaaye gbɔmɛi awui dɔŋŋ. Amɛ fɛɛ amɛgboi, kɛ amɛnyɛmɛi kɛ gbɔmɛi fɔji krokomɛi lɛ fɛɛ. Shi mɛni ba amɛtsɛmɛi lɛ anɔ?

Obalaŋi lɛ atsɛmɛi lɛ jeee gbɔmɛi adesai diɛŋtsɛ tamɔ wɔ. Amɛji ŋwɛibɔfoi ni kɛ gbɔmɛi bahi shikpɔŋ nɔ tamɔ gbɔmɛi. No hewɔ lɛ, beni Nu Afua lɛ ba lɛ, amɛgboiii tamɔ bɔ ni mɛi krokomɛi gboi lɛ. Amɛshi adesa gbɔmɔtsei ní amɛfee amɛha amɛhe lɛ, ni amɛku amɛsɛɛ kɛtee ŋwɛi akɛ bɔfoi. Shi aŋmɛɛɛ amɛ gbɛ ni amɛbafee Nyɔŋmɔ ŋwɛibɔfoi aweku lɛ mli bii dɔŋŋ. No hewɔ lɛ amɛbafee Satan bɔfoi. Atsɛɔ amɛ yɛ Biblia lɛ mli akɛ daimonioi.

Kɛkɛ ni Nyɔŋmɔ ha kɔɔyɔɔ tswa, ni nu afua lɛ bɔi miimɔ. Nyɔji enumɔ sɛɛ lɛ, adeka lɛ yama gɔŋ ko yiteŋ. Gbii pii baho, ni mɛi ni yɔɔ adeka lɛ mli lɛ nyɛ amɛkwɛ agbó lɛ naa ni amɛna gɔji lɛ ayiteaŋ. Nu lɛ tee nɔ emii fiofio.

Kɛkɛ ni Noa ŋmɛɛ loofɔlɔ diŋ ko ni atsɛɔ lɛ kwaakwaalabite he kɛjɛ adeka lɛ mli. Efiliki kɛtee fioo, kɛkɛ ni eku esɛɛ eba, ejaakɛ enaaa he ko ni ebaasɔ̃. Etee nɔ efee nakai aahu, ni be fɛɛ be lɛ ekuɔ esɛɛ ebaa ebasɔ̃ɔ adeka lɛ nɔ.

Okpo

Noa miitao ni ele kɛji akɛ nu lɛ etã yɛ shikpɔŋ lɛ nɔ, no hewɔ lɛ eŋmɛɛ okpo ko he kɛjɛ adeka lɛ mli. Shi okpo lɛ hu ku esɛɛ eba ejaakɛ enaaa he ko ehi. Noa ŋmɛɛ ehe ekoŋŋ nɔ ni ji shii enyɔ, ni ekɛ mutso baa ni ma enaa ba. Kɛkɛ ni Noa na akɛ nu lɛ etã yɛ shikpɔŋ lɛ nɔ. Noa tsu okpo lɛ ekoŋŋ nɔ ni ji shii etɛ, ni yɛ naagbee lɛ eyaná he ko ni egbi ní ebaahi.

Kɛkɛ ni Nyɔŋmɔ kɛ Noa wie. Ekɛɛ lɛ akɛ: ‘Jee kpo kɛjɛ adeka lɛ mli. Okɛ oweku lɛ kɛ kooloi lɛ fɛɛ aje kpo.’ Amɛhi adeka lɛ mli fe afi. No hewɔ lɛ, wɔbaanyɛ wɔfee miishɛɛ ni amɛ fɛɛ amɛbaaná akɛ amɛje kpo ni amɛyɛ wala mli lɛ he mfoniri wɔkwɛ!

1 Mose 7:10-24; 8:1-17; 1 Petro 3:19, 20.



Sanebimɔi

  • Mɛni hewɔ mɔ ko mɔ ko nyɛɛɛ abote adeka lɛ mli be ni nugbɔ lɛ bɔi nɛmɔ lɛ?
  • Gbii enyiɛ Yehowa ha nu lɛ nɛ shwaneshwane kɛ nyɔɔŋnyɔɔŋ fɛɛ, ni nu lɛ mli kwɔ kɛyashɛ nɛgbɛ?
  • Mɛni ba adeka lɛ nɔ be ni nu lɛ bɔi shikpɔŋ lɛ nɔ haa lɛ?
  • Ani oblaŋi lɛ ayi ná wala yɛ Nu Afua lɛ mli, ni mɛni ba oblaŋi lɛ atsɛmɛi lɛ anɔ?
  • Mɛni ba adeka lɛ nɔ yɛ nyɔji enumɔ sɛɛ?
  • Mɛni hewɔ Noa ŋmɛɛ kwãakwãalabite he kɛjɛ adeka lɛ mli lɛ?
  • Te fee tɛŋŋ ni Noa le akɛ nui ni yɔɔ shikpɔŋ lɛ nɔ lɛ eba shi lɛ?
  • Mɛni Nyɔŋmɔ kɛɛ Noa be ni ekɛ eweku lɛ ehi adeka lɛ mli fe afi kome lɛ?

Sanebimɔi ni fata he

  • Kanemɔ 1 Mose 7:10-24.

    Te akpata wala ni yɔɔ shikpɔŋ nɔ lɛ hiɛ butuu aha tɛŋŋ? (1 Mose 7:23)

    Be enyiɛ Nu Afua lɛ hé dani fɛɛ mĩi? (1 Mose 7:24)

  • Kanemɔ 1 Mose 8:1-17.

    Yɛ mɛɛ gbɛ nɔ 1 Mose 8:17 tsɔɔ yɛ akɛ Yehowa shishijee yiŋtoo kɛha shikpɔŋ lɛ tsakeee? (1 Mose 1:22)

  • Kanemɔ 1 Petro 3:19, 20.

    Be ni ŋwɛibɔfoi atuatselɔi lɛ ku amɛsɛɛ kɛtee ŋwɛi lɛ, mɛɛ kojomɔ amɛnine shɛ nɔ? (Yuda 6)

    Noa kɛ eweku lɛ ahe sane lɛ woɔ hekɛnɔfɔɔ ni wɔyɔɔ akɛ Yehowa baanyɛ ahere ewebii ayiwala lɛ mli hewalɛ yɛ mɛɛ gbɛ nɔ? (2 Pet. 2:9)

Ekrokromɛi Hu Nɛ

Noa—Ekɛ Nyɔŋmɔ Nyiɛ

Noa jie hemɔkɛyeli kpele kpo yɛ jeŋ ni yiwalɛ eyi mli obɔ ni yɔɔ dani Nu Afua lɛ ba lɛ mli. Enɛ ji nɔkwɛmɔnɔ kɛhã wɔ. Obaana bɔ ni wɔ fɛɛ wɔnáa enifeemɔi lɛ ahe sɛɛ ŋmɛnɛ.

‘Ekɛ Anɔkwa Nyɔŋmɔ lɛ Nyiɛ’

Mɛɛ naagbai ehe bahia ni Noa kɛ eŋa awu ashi yɛ amɛbii lɛ atsɔsemɔ mli? Yɛ adeka lɛ maa mli lɛ, mɛni amɛfee kɛtsɔɔ akɛ amɛyɛ hemɔkɛyeli?