Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 1: Nyɔŋmɔ Je Shishi Efee Nibii

Biblia Mli Sane 1: Nyɔŋmɔ Je Shishi Efee Nibii

NIBII kpakpai ni wɔyɔɔ lɛ fɛɛ jɛ Nyɔŋmɔ ŋɔɔ. Lɛ efee hulu koni wɔná la yɛ jetsɛremɔ mli, kɛ nyɔɔŋtsere kɛ ŋulamii hu koni wɔná kane gbɛkɛ. Ni Nyɔŋmɔ fee shikpɔŋ lɛ eha wɔ koni wɔhi nɔ.

Shi jeee hulu, nyɔɔŋtsere, ŋulamii kɛ shikpɔŋ lɛ ji klɛŋklɛŋ nii ni Nyɔŋmɔ fee. Ani ole nɔ ni ji klɛŋklɛŋ nii lɛ? Klɛŋklɛŋ lɛ, Nyɔŋmɔ fee mɛi ni tamɔ lɛ diɛŋtsɛ. Wɔnyɛɛɛ wɔna nɛkɛ mɛi nɛɛ, tamɔ bɔ ni wɔnaaa Nyɔŋmɔ lɛ. Atsɛɔ mɛi nɛɛ yɛ Biblia lɛ mli akɛ ŋwɛibɔfoi. Nyɔŋmɔ fee ŋwɛibɔfoi lɛ koni amɛkɛ lɛ ahi ŋwɛi.

Klɛŋklɛŋ ŋwɛibɔfo ni Nyɔŋmɔ fee lɛ yɛ srɔto. Lɛ ji Nyɔŋmɔ klɛŋklɛŋ Bi, ni ekɛ e-Tsɛ tsu nii. Eye ebua Nyɔŋmɔ ni efee nibii krokomɛi fɛɛ. Eye ebua Nyɔŋmɔ ni efee hulu, nyɔɔŋtsere, ŋulamii kɛ wɔshikpɔŋ lɛ hu.

No mli lɛ te shikpɔŋ lɛ yɔɔ tɛŋŋ? Yɛ shishijee mli lɛ, mɔ ko nyɛŋ ahi shikpɔŋ lɛ nɔ. No mli lɛ nu pɛ ji nɔ ni eyi shikpɔŋ lɛ nɔ obɔ. Shi Nyɔŋmɔ miisumɔ ni gbɔmɛi ahi shikpɔŋ lɛ nɔ. No hewɔ lɛ eje shishi esaa nibii kɛha wɔ. Mɛni efee?

Klɛŋklɛŋ lɛ, la ni baakpɛ he miihia shikpɔŋ lɛ. No hewɔ lɛ Nyɔŋmɔ ha la ni jɛ hulu lɛ nɔ lɛ kpɛ eshwie shikpɔŋ lɛ nɔ. Efee koni jenamɔ kɛ jetsɛremɔ fɛɛ ahi shi. Yɛ no sɛɛ lɛ, Nyɔŋmɔ ha shikpɔŋ pue kɛjɛ nui lɛ amli.

Shishijee lɛ, nɔ ko nɔ ko bɛ shikpɔŋ lɛ nɔ. Etamɔ mfoniri ni onaa yɛ biɛ lɛ. Fɔfɔii loo tsei loo kooloi bɛ nɔ. Looi po bɛ nui loo ŋshɔi lɛ amli. Nyɔŋmɔ yɛ nii babaoo ni ebaatsu koni eha shikpɔŋ lɛ afee fɛo diɛŋtsɛ kɛha kooloi kɛ gbɔmɛi ni amɛhi nɔ.

Yeremia 10:12; Kolosebii 1:15-17; 1 Mose 1:1-10.

Shikpɔŋ ni nɔ ko nɔ ko bɛ nɔ


Sanebimɔi

  • Namɔ ŋɔɔ nibii kpakpai fɛɛ jɛ kɛba, ni ani obaanyɛ otsɔɔ nibii nɛɛ eko?
  • Mɛni ji klɛŋklɛŋ nii ni Nyɔŋmɔ fee?
  • Mɛni hewɔ ŋwɛibɔfo ni abɔ lɛ klɛŋklɛŋ lɛ yɔɔ srɔto kwraa lɛ?
  • Te shikpɔŋ lɛ yɔɔ tɛŋŋ kɛjɛ shishijee. (Kwɛmɔ mfoniri lɛ.)
  • Mɛɛ gbɛ nɔ Nyɔŋmɔ tsɔ eje shishi esaa shikpɔŋ lɛ kɛha kooloi kɛ gbɔmɛi?

Sanebimɔi ni fata he

  • Kanemɔ Yeremia 10:12.

    Mɛɛ Nyɔŋmɔ sui anaa kɛtsɔɔ ebɔɔ nii lɛ anɔ? (Yes. 40:26; Rom. 11:33)

  • Kanemɔ Kolosebii 1:15-17.

    Mɛɛ gbɛfaŋnɔ Yesu ná yɛ adebɔɔ mli, ni te esa akɛ enɛ asa bɔ ni wɔsusuɔ ehe wɔhaa lɛ he eha tɛŋŋ? (Kol. 1:15-17)

  • Kanemɔ 1 Mose 1:1-10.

    Nɛgbɛ shikpɔŋ lɛ jɛ kɛba? (1 Mose 1:1)

    Mɛni ba yɛ klɛŋklɛŋ adebɔɔ gbi lɛ nɔ? (1 Mose 1:3-5)

    Tsɔɔmɔ nɔ ni ba yɛ adebɔɔ gbi ni ji enyɔ lɛ nɔ. (1 Mose 1:7, 8)