Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Amɛhemɔkɛyeli Lɛ

 YITSO NYƆŊMA KƐ EJWƐ

Ana Lɛ Mɔbɔ, ni Ekase Nii yɛ Mli

Ana Lɛ Mɔbɔ, ni Ekase Nii yɛ Mli

1. Mɛɛ gbɛfãa kã Yona hiɛ, ni te enuɔ he ehaa tɛŋŋ?

YONA baaná be babaoo kɛjwɛŋ. Gbɛ ni efãa lɛ baahe lɛ nɔ ni fe kilomitai 800, ebaatswa nantu kɛ́ hooo kwraa lɛ nyɔɔŋ kome loo nɔ ni fe nakai. Dani ebaaje shishi lɛ, ebahia ni ehala kɛji ebaasumɔ ni etsɔ gbɛ kuku loo etsɔ gbɛ kakadaŋŋ ni nɔ yɔɔ shweshweeshwe lɛ nɔ koni fiofio lɛ, ekpeleke jɔi ni ekwɔlɔ gɔji babaoo kɛyashɛ he ni eyaa lɛ. Ekolɛ ebaatsɔ Siria Shia Ŋa kplanaa lɛ husui lɛ anaa, ebaafo Eufrate Faa ni lɛɛ lɛ, ni eyatao he ko ekɛ eyitso afɔ̃ yɛ mɛi ni eleee amɛ ni yɔɔ Siria, Mesopotamia, kɛ Ashur maji kɛ akrowai lɛ amli lɛ ateŋ. Beni enyiɛ gbii saŋŋ ni esusu Ninive maŋ ni eyaa mli lɛ he lɛ, egbeyeishemɔ lɛ mli bawa waa.

2. Mɛɛ gbɛ nɔ Yona kase akɛ enyɛŋ ejo enitsumɔ lɛ naa foi kɔkɔɔkɔ?

2 Nɔ kome ni Yona le ji akɛ: Enyɛŋ eku esɛɛ ni ejo nitsumɔ nɛɛ naa foi kɔkɔɔkɔ. Eka nakai feemɔ dã. Taakɛ wɔna yɛ yitso ni tsɔ hiɛ lɛ mli lɛ, Yehowa to etsui shi, ni etsɔ ŋshɔ hiɛ ahum ni naa wa kɛ ŋshɔŋloo wulu ko ni baa Yona yi lɛ nɔ etsɔɔ Yona nii. Gbii etɛ sɛɛ lɛ, ŋshɔŋloo lɛ yashwe Yona efɔ̃ ŋshɔnaa; enɛ ha Yona naa kpɛ ehe, ni ebafee mɔ ko ni feɔ toi, ni baa ehe shi kwraa fe tsutsu lɛ.—Yona, yitsei 1, 2.

3. Mɛɛ su Yehowa jie lɛ kpo etsɔɔ Yona, kɛlɛ mɛɛ sanebimɔi enɛ teɔ lɛ shi?

3 Beni Yehowa fã Yona koni eya Ninive nɔ ni ji shii enyɔ nɔ lɛ, gbalɔ nɛɛ bo toi ni ewo bokagbɛ etere kɛha gbɛfãa kakadaŋŋ lɛ. (Nyɛkanea Yona 3:1-3.) Kɛlɛ, ani Yona eha Yehowa tsɔsemɔ lɛ etsake lɛ  kwraa kɛmɔ shi? Ákɛ nɔkwɛmɔnɔ lɛ, Yehowa ena lɛ mɔbɔ, ebaa eyi koni ekashiu, egbalaaa etoi beni etse atua lɛ, eha lɛ hegbɛ kroko koni eyatsu nitsumɔ nɛɛ. Nibii nɛɛ fɛɛ sɛɛ lɛ, ani Yona kase akɛ ebaajie mɔbɔnalɛ kpo etsɔɔ mɛi krokomɛi? Bei pii lɛ, ebɛ mlɛo kɛha adesai ni yeee emuu lɛ akɛ amɛbaana mɔbɔ. Ha wɔkwɛ nɔ ni wɔbaanyɛ wɔkase kɛjɛ naagba ni Yona kɛkpe nɛɛ mli.

Kojomɔ Sane ko ni Ahere Nɔ bɔ ni Akpaaa Gbɛ

4, 5. Mɛni hewɔ Yehowa tsɛ Ninive akɛ “maŋ kpeteŋkpele” lɛ, ni mɛni no haa wɔleɔ yɛ Yehowa he?

4 Yona eyanaaa Ninive taakɛ Yehowa na lɛ lɛ. Wɔkaneɔ akɛ: “Shi Ninive lɛ, maŋ kpeteŋkpele ni yɛ Nyɔŋmɔ hiɛ.” (Yona 3:3) Yona amaniɛbɔɔ lɛ tsĩ tã shii etɛ sɔŋŋ akɛ Yehowa tsɛ maŋ nɛɛ akɛ “Ninive maŋ kpeteŋkpele lɛ.” (Yona 1:2; 3:2; 4:11) Mɛni hewɔ efee maŋ kpeteŋkpele kɛha Yehowa loo ekã etsui nɔ lɛ?

5 Eji maŋ ni etsɛ waa, ni efata klɛŋklɛŋ maji ni Nimrod to yɛ Nu Afua lɛ sɛɛ lɛ ahe. Eji maŋtiase ni da waa, ni ekã shi faŋŋ akɛ maji babaoo yɛ mli, ni eheɔ mɔ aaafee gbii etɛ nyiɛmɔ kɛjɛ afã  kome kɛyashi afã kroko. (1 Mose 10:11; Yona 3:3) Ninive maŋ lɛ shikamɔ yɛ fɛo pam, esɔlemɔtsui, egbogboi ni nɔ kwɔlɔ ni yɔɔ hewalɛ, kɛ tsũi wuji ni yɔɔ mli lɛ, jeee ni aashwɛ kwraa. Shi jeee nibii nɛɛ ateŋ eko eko kwraa kã Yehowa Nyɔŋmɔ tsui nɔ lɛ. Gbɔmɛi ni yɔɔ mli lɛ ji mɛi ni kã etsui nɔ. No beaŋ lɛ, Ninivebii lɛ ayi fa kwraa fe maji krokomɛi. Yɛ gbɔmɛi lɛ anɔfɔŋfeemɔ lɛ fɛɛ sɛɛ lɛ, Yehowa susu amɛhe. Ebuɔ adesa wala akɛ ejara wa waa, ni ele akɛ mɔ fɛɛ mɔ yɛ nyɛmɔ ni ebaanyɛ ekɛtsake eshihilɛ koni efee jalɛ nii.

Yona na akɛ Ninive ji maŋ wulu ni efɔŋfeemɔ eyi mli tɔ

6. (a) Mɛni hewɔ ekolɛ, beni Yona bote Ninive maŋ lɛ mli lɛ, eshe gbeyei waa lɛ? (Kwɛmɔ shishigbɛ niŋmaa lɛ hu.) (b) Mɛni wɔkaseɔ yɛ Yona he yɛ shiɛmɔ ni eshiɛ lɛ he?

6 Ekolɛ, beni Yona bote Ninive maŋ lɛ mli ni ena emlibii lɛ ayifalɛ ni fe mɛi 120,000 lɛ, eshe gbeyei kwraa fe tsutsu lɛ. * Enyiɛ gbi kome gbɛnyiɛmɔ kɛtsɔmɔ maŋ lɛ mli kɛyashi eshɛ he ko ni mɛi babaoo yɔɔ fe fɛɛ, ekolɛ koni ená he ko kpakpa edamɔ etsa eshiɛmɔ lɛ nɔ. Te ebaafee tɛŋŋ eshiɛ eha gbɔmɛi ni wieɔ wiemɔ kroko lɛ? Ani ekase Ashurbii awiemɔ lɛ? Aloo Yehowa etsɔ naakpɛɛ gbɛ nɔ eha lɛ nyɛmɔ ni ekɛbaawie amɛwiemɔ lɛ? Wɔleee. Ekolɛ Yona shiɛ yɛ emaŋ wiemɔ ni ji Hebri lɛ mli, ni eha mɔ ko tsɔɔ shishi eha Ninivebii lɛ. Ekɔɔɔ he eko gbɛ nɔ ni etsɔ eshiɛ lɛ, nɔ pɛ ni wɔle ji akɛ Yona sane lɛ mli kã shi faŋŋ, ni ákɛ mɛi babaoo ebanyaŋ he; nɔ ni ekɛɛ nɛ: “Biɛ gbii nyɔŋmai ejwɛ sɛɛ lɛ abaabutu Ninive!” (Yona 3:4) Ekɛ ekãa wie, ni etĩ mli shii abɔ. Yɛ enɛ feemɔ mli lɛ, ejie ekãa kɛ hemɔkɛyeli ni sa kadimɔ waa kpo, sui ni he hiaa Kristofoi ŋmɛnɛ fe be fɛɛ ni eho lɛ.

Yona sane lɛ mli kã shi faŋŋ ni ákɛ mɛi babaoo ebanyaŋ he

7, 8. (a) Te Ninivebii lɛ fee amɛnii yɛ Yona sane lɛ he amɛha tɛŋŋ? (b) Mɛni Ninive maŋtsɛ lɛ fee yɛ sane ni Yona shiɛ lɛ he?

7 Ninivebii lɛ babaoo bo Yona sane lɛ toi. Ekolɛ, eyasusu akɛ gbɔmɛi lɛ amli baafu ni amɛbaafee basabasa. Moŋ lɛ, nɔ ko ni ekpaaa gbɛ ba. Gbɔmɛi lɛ bo esane lɛ toi ni amɛhé amɛye! Esane lɛ gbɛ shwã oyayaayai. Etsɛɛɛ kɛkɛ ni maŋ muu lɛ fɛɛ bɔi hiɛkpãtamɔ sane ni Yona shiɛ lɛ he wiemɔ. (Nyɛkanea Yona 3:5.) Shikai atsɛmɛi kɛ ohiafoi, mɛi ni he wa kɛ mɛi ni he waaa, gbekɛbii kɛ onukpai bluublu shwa amɛhe ni amɛtsake amɛtsui. Amɛyeee  nii, ni amɛnuuu nu hu. Etsɛɛɛ kɛkɛ ni sane nɛɛ gbɛɛ yɛ maŋtsɛ lɛ toiiaŋ.

Ehe bahia ni Yona aná ekãa kɛ hemɔkɛyeli koni enyɛ eshiɛ yɛ Ninive

8 Beni maŋtsɛ lɛ nu sane ni Yona shiɛɔ lɛ, lɛ hu etsake etsui. Akɛni eshe Nyɔŋmɔ gbeyei hewɔ lɛ, ete shi kɛjɛ esɛi lɛ nɔ, ni ejie ehebo fɛfɛo lɛ yɛ ehe efɔ̃ shi, ni ebu kpekpe taakɛ emaŋbii lɛ bu lɛ ni eho “etá lamulu mli.” Ni maŋtsɛ lɛ kɛ “enukpai lɛ” loo abladei lɛ ha nifeemɔ nɛɛ batsɔ maŋ akpɔ. Efã akɛ mɔ fɛɛ mɔ, ni shĩa kooloi tete fata he lɛ, abumɔ kpekpe. * Ejɛ heshibaa mli ekpɛlɛ akɛ emaŋbii lɛ yeɔ fɔ, ejaakɛ amɛfee efɔŋ kɛ yiwalɛ nii fɛɛ. Maŋtsɛ lɛ ná hekɛnɔfɔ̃ɔ akɛ ekolɛ, kɛ́ anɔkwa Nyɔŋmɔ lɛ na amɛtsuitsakemɔ lɛ, ebaana amɛ mɔbɔ, ni ewie akɛ: ‘Aleee nɔ̃ Nyɔŋmɔ aaakpale ni eeetsɔ ehe kɛjɛ emlifu ní naa wa lɛ he, ní wɔhiɛ akakpãta.’—Yona 3:6-9.

9. Mɛni mɛi komɛi ewie yɛ Ninivebii lɛ atsuitsakemɔ lɛ he, ni te wɔfeɔ tɛŋŋ wɔleɔ akɛ amɛsane ejaaa lɛ?

9 Mɛi komɛi ewie eshi akɛ tsuitsakemɔ ni tamɔ nakai nyɛŋ aba Ninivebii lɛ ateŋ kɔkɔɔkɔ yɛ be kukuoo ni atsɔɔ lɛ mli. Kɛlɛ, Biblia he nilelɔi komɛi ewie akɛ tsakemɔ ni tamɔ nakai baanyɛ aba tsɔ yɛ nakai blemabii ni amɛkusumii ahewɔ lɛ amɛheɔ nɔ fɛɛ nɔ kwraa kɛkɛ amɛyeɔ oyayaayai lɛ ateŋ. Kɛfata he lɛ, wɔle akɛ mɛi ni wieɔ amɛshiɔ tsuitsakemɔ nɛɛ asane ejaaa, ejaakɛ sɛɛ mli lɛ Yesu Kristo diɛŋtsɛ tsĩ Ninivebii atsuitsakemɔ lɛ tã. (Nyɛkanea Mateo 12:41.) No mli lɛ, Yesu le nɔ ni ewieɔ lɛ, ejaakɛ nakai beaŋ lɛ eyɛ ŋwɛi ni ena nibii fɛɛ ni tee nɔ lɛ. (Yoh. 8:57, 58) Anɔkwale lɛ ji akɛ, esaaa akɛ wɔmuɔ sane naa akɛ gbɔmɛi nyɛŋ atsake kɔkɔɔkɔ—ekɔɔɔ he eko bɔ ni ekolɛ wɔnaa akɛ amɛyitseiaŋ wala ha. Yehowa pɛ baanyɛ ale nɔ ni yɔɔ mɛi atsuiiaŋ.

Srɔtofeemɔ ni Yɔɔ Nyɔŋmɔ Mɔbɔnalɛ kɛ Adesai Akojomɔ ni Yɔɔ Kpɛŋŋ lɛ Teŋ

10, 11. (a) Te Yehowa fee enii yɛ Ninivebii lɛ atsuitsakemɔ lɛ he eha tɛŋŋ? (b) Mɛni hewɔ wɔnyɛŋ wɔkɛɛ akɛ Yehowa kojomɔ ni kulɛ ekɛbaaba Ninivebii lɛ anɔ lɛ ejaaa lɛ?

10 Mɛni Yehowa fee yɛ Ninivebii lɛ atsuitsakemɔ lɛ he? Sɛɛ mli lɛ, Yona ŋma akɛ: “Nyɔŋmɔ na amɛnifeemɔ nii lɛ, akɛ amɛkpale  kɛjɛ amɛgbɛ fɔŋ lɛ nɔ, ni Nyɔŋmɔ shwa ehe yɛ efɔŋ ní ekɛɛ ebaafee amɛ lɛ hewɔ, ni efeee.”—Yona 3:10.

11 Ani enɛ tsɔɔ akɛ Yehowa na akɛ kojomɔ ni ekpɛ mli akɛ ekɛbaaba Ninivebii lɛ anɔ lɛ ejaaa? Dabi. Biblia lɛ tsɔɔ akɛ tɔ̃mɔ ko kwraa bɛ Yehowa kojomɔi lɛ ahe. (Nyɛkanea 5 Mose 32:4.) Yehowa na akɛ ehe ehiaaa ni emli fuɔ Ninivebii lɛ dɔŋŋ. Ekwɛ tsakemɔi ni gbɔmɛi lɛ efee lɛ, ni ena akɛ amɛsaaa toigbalamɔ ni kulɛ ekpɛ mli akɛ ekɛbaaba amɛnɔ lɛ dɔŋŋ. No hewɔ lɛ, Yehowa kpɛ mli akɛ ebaana amɛ mɔbɔ.

12, 13. (a) Mɛɛ gbɛ nɔ Yehowa haa anaa akɛ enuɔ nii ashishi, eyɛ tswãa, ni enaa mɔbɔ? (b) Mɛni hewɔ Yona gbalɛ lɛ jeee amale lɛ?

12 Yehowa jeee Nyɔŋmɔ ni yɔɔ kpɛŋŋ, ni bɛ mlihilɛ ni yitsoŋ wa taakɛ jamɔŋ hiɛnyiɛlɔi atsɔɔmɔi haa mɛi susuɔ akɛ eji lɛ. Nɔ ni tamɔɔɔ nakai lɛ, enuɔ nii ashishi, eyɛ tswãa, ni enaa mɔbɔ. Dani ebaakpɛ mli akɛ ebaagbala efɔŋfeelɔi atoi lɛ, etsuɔ enajiaŋdamɔlɔi ni yɔɔ shikpɔŋ nɔ lɛ koni amɛyabɔ efɔŋfeelɔi lɛ akɔkɔ, ejaakɛ ekã etsui nɔ waa akɛ ebaana akɛ efɔŋfeelɔi etsake amɛtsui kɛ amɛnifeemɔi taakɛ Ninivebii lɛ fee lɛ. (Ezek. 33:11) Yehowa kɛɛ egbalɔ Yeremia akɛ: “Amrɔ ní mawie yɛ jeŋmaŋ ko loo maŋtsɛyelihe ko he, akɛ mibafã lɛ ni majwa lɛ ni mafite lɛ lɛ; kɛji nakai jeŋmaŋ ní miwie ehe lɛ kpale kɛjɛ amɛnɔ̃fɔŋ lɛ he lɛ, mashwa mihe yɛ nɔ̃fɔŋ ní misusu akɛ mafee amɛ lɛ he.”—Yer. 18:7, 8.

Ekã Nyɔŋmɔ tsui nɔ waa akɛ ebaana akɛ efɔŋfeelɔi etsake amɛtsui kɛ amɛnifeemɔi taakɛ Ninivebii lɛ fee lɛ

13 Ani gbalɛ ni Yona gba lɛ ji amale? Dabida; gbalɛ lɛ bɔ mɛi lɛ akɔkɔ. Ninivebii lɛ agbɛ fɔŋ lɛ hewɔ abɔ amɛ kɔkɔ lɛ, shi sɛɛ mli lɛ amɛtsake gbɛ fɔŋ ni amɛkɔ lɛ. Kɛ́ Ninivebii lɛ bɔi amɛnɔfɔŋfeemɔ lɛ ekoŋŋ lɛ, Nyɔŋmɔ kɛ nakai hiɛkpãtamɔ lɛ nɔŋŋ baaba amɛnɔ. Nakai pɛpɛɛpɛ sɛɛ mli lɛ eba lɛ.—Zef. 2:13-15.

14. Te Yona fee enii yɛ mɔbɔ ni Yehowa na Ninive lɛ he eha tɛŋŋ?

14 Te Yona fee enii eha tɛŋŋ beni hiɛkpãtamɔ ni ekpaa gbɛ lɛ eyabaaa yɛ be ni esusu lɛ naa lɛ? Wɔkaneɔ akɛ: “Shi enɛ eŋɔɔɔ Yona naa kwraa, ni emli wo la.” (Yona 4:1) Yona sɔle sɔlemɔ ko oookɛɛ ekɛmiikã Ofe lɛ! Yona nu he akɛ eji ehi shĩa yɛ emaŋ po kulɛ ehi tsɔ. Ewie akɛ kɛjɛ shishijee tɔ̃ɔ lɛ, ele akɛ Yehowa kɛ efɔŋ ko baŋ Ninive nɔ, ni ekɛ no jie enaa akɛ no hewɔ ni mra mli lɛ, ejo foi kɛtee Tarshish lɛ. No sɛɛ lɛ, ebi koni aha egbo, ni ekɛɛ akɛ egbo moŋ kulɛ ehi fe nɔ ni ehiɛ kã.—Nyɛkanea Yona 4:2, 3.

15. (a) Mɛni ekolɛ no ha Yona mli fu aahu akɛ eehe ejwa lɛ? (b) Te Yehowa kɛ egbalɔ ni ehao waa lɛ ye ha tɛŋŋ?

15 No mli lɛ, mɛni gbaa Yona naa? Wɔnyɛŋ wɔle nɔ fɛɛ nɔ ni tee nɔ yɛ Yona jwɛŋmɔŋ, shi wɔle akɛ ejaje hiɛkpãtamɔ eshwie  Ninive nɔ yɛ nakai mɛi lɛ fɛɛ ahiɛ. Amɛhé lɛ amɛye. Shi naa, enaaa akɛ hiɛkpãtamɔ ko miiba amɛnɔ. Ani eshe gbeyei akɛ abaaye ehe fɛo loo abaatsɛ lɛ apasa gbalɔ? Bɔ fɛɛ bɔ ni sane lɛ ji lɛ, enáaa mɛi lɛ atsuitsakemɔ loo Yehowa mɔbɔnalɛ lɛ he miishɛɛ kwraa. Moŋ lɛ, etamɔ nɔ ni sane lɛ dɔlɛ aahu akɛ eehe ejwa, enii fee ehe mɔbɔ, egba enaa waa, ni enu he po akɛ ehe guɔ egbo. Shi ekã shi faŋŋ akɛ, fɛɛ sɛɛ lɛ, Yona Nyɔŋmɔ ni naa mɔbɔ lɛ na nɔ ko kpakpa yɛ gbalɔ ni ehao lɛ mli. Nɔ najiaŋ ni Yehowa baagbala Yona toi yɛ abuuu mɔ su nɛɛ he lɛ, ebi Yona sane ko ni baaha Yona apɛi emli ekwɛ: “Kolɛ omli ni ewo la nɛɛ eja, bɛ?” (Yona 4:4) Ani Yona ha hetoo po? Biblia lɛ ewieee he.

16. Mɛɛ gbɛi anɔ ebaanyɛ eba akɛ mɛi komɛi kɛ Yehowa kpãŋ gbee, ni mɛni wɔbaanyɛ wɔkase yɛ Yona nɔkwɛmɔnɔ lɛ mli?

16 Ewaaa kwraa akɛ wɔbaakojo Yona yɛ su ni ejie lɛ kpo lɛ hewɔ, shi esa akɛ wɔkai akɛ jeee be fɛɛ be adesai ni yeee emuu lɛ kɛ Nyɔŋmɔ kpãa gbee. Mɛi komɛi baasusu akɛ kulɛ esa akɛ Yehowa atsĩ oshara ko naa loo kulɛ esa akɛ ekpãta efɔŋfeelɔi ahiɛ oya nɔŋŋ loo akɛ benɛ po lɛ ekpãta je nɛɛ nibii agbɛjianɔtoo lɛ fɛɛ hiɛ momo. Yona nɔkwɛmɔnɔ lɛ kaiɔ wɔ akɛ, kɛ́ wɔkɛ Yehowa Nyɔŋmɔ kpãaa gbee yɛ nɔ ko he lɛ, be fɛɛ be lɛ, wɔ moŋ esa akɛ wɔtsake wɔsusumɔ—jeee Yehowa.

Bɔ ni Yehowa Tsɔɔ Yona Nii Koni Ena Mɔbɔ

17, 18. (a) Beni Yona shi Ninive lɛ, mɛni efee? (b) Te adedeŋkruma tso ni Yehowa ha ekwɛ̃ yɛ naakpɛɛ gbɛ nɔ lɛ ná Yona nɔ hewalɛ eha tɛŋŋ?

17 Gbalɔ ni mli efu nɛɛ shi Ninive, jeee akɛ eeya emaŋ, moŋ lɛ ewo bokagbɛ etere kɛmiiya he ko ni gɔji komɛi ni nɔ kwɔlɔ yɔɔ lɛ. Efee asese fioo ko, ni eho eta shishi kɛmɛ koni ekwɛ nɔ ni baaba Ninive nɔ. Ekolɛ, ehiɛ kã nɔ lolo akɛ abaakpata Ninive hiɛ. Mɛɛ gbɛ nɔ Yehowa baatsɔ atsɔɔ nuu yitsoŋwalɔ nɛɛ nii koni ena mɔbɔ?

18 Gbɛkɛ mli lɛ, Yehowa ha adedeŋkruma ko kwɛ̃. Beni Yona te shi lɛ, ena tso ni ekwɛ̃ fɛfɛo kɛ ebaji agboi agboi ni haa hɔŋ kwraa fe asese gboogbaa ni efee lɛ. Emii shɛ ehe waa. ‘Yona bɔi nyamɔ naakpa’ yɛ tso lɛ hewɔ, ekolɛ kɛsusumɔ akɛ, bɔ ni tso lɛ kwɛ̃ yɛ naakpɛɛ gbɛ nɔ lɛ ji okadi ni tsɔɔ akɛ Nyɔŋmɔ ejɔɔ lɛ, ni ekpɛlɛɔ enɔ. Kɛlɛ, Yehowa tao koni efee babaoo eha Yona fe ni ebaaha eye ehe kɛkɛ kɛjɛ hulu ni tsoɔ gbaŋgbaŋ lɛ kɛ Yona mli ni efu waa lɛ he. Esumɔ koni eshɛ Yona tsui he. No hewɔ lɛ, Nyɔŋmɔ fee naakpɛɛ nibii krokomɛi hu. Nyɔŋmɔ ha gɔgɔmi baye tso lɛ ni egbe lɛ. No sɛɛ lɛ, eha “boka kɔɔyɔɔ ní mli edɔ la” tswa kɛyashi Yona bɔi bititɔɔ yɛ dɔlɛ lɛ hewɔ. Nuu nɛɛ mumɔ  naa tã, ni shi kome ekoŋŋ lɛ ebi koni Nyɔŋmɔ aha egbo.—Yona 4:6-8.

19, 20. Mɛɛ gbɛ nɔ Yehowa tsɔ ekɛ Yona susu nii ahe yɛ adedeŋkruma tso lɛ he?

19 Yehowa bi Yona shi kome ekoŋŋ kɛji akɛ emli efu yɛ adedeŋkruma tso ni gbo lɛ hewɔ lo. Nɔ najiaŋ ni Yona baashwa ehe lɛ, ejie enaa ekɛɛ: “Eja akɛ mimli awo la kɛyashi gbele mli tete!” Be shɛ agbɛnɛ ni Yehowa baagbala nibii amli etsɔɔ Yona.—Yona 4:9.

Nyɔŋmɔ kɛ adedeŋkruma tso tsu nii kɛtsɔɔ Yona bɔ ni anaa mɔbɔ ahaa

20 Nyɔŋmɔ kɛ Yona susu nii ahe, ni ewie akɛ edɔ gbalɔ lɛ yɛ tso flo ni kwɛ̃ jenamɔ kome lɛ hewɔ, tso ni jeee Yona du loo eha ekwɛ̃ lɛ. Kɛkɛ ni Nyɔŋmɔ mu naa akɛ: “Mi lɛ, Ninive maŋ kpeteŋkpele nɛɛ, ní gbɔmɛi fe akpei-oha-kɛ-nyɔŋmai-enyɔ ni leee amɛninejurɔ kɛ amɛbɛku, kɛ kooloi babaoo hu yɔɔ mli lɛ, sane akadɔ mi, bɛ?”—Yona 4:10, 11. *

21. (a) Mɛɛ nɔkwɛmɔnɔ ko Yehowa kɛtsɔɔ Yona nii? (b) Mɛɛ gbɛ nɔ Yona sane lɛ baanyɛ aye abua wɔ koni wɔkɛ anɔkwayeli apɛi wɔmli?

 21 Ani oonu nɔkwɛmɔnɔ ni Yehowa kɛtsu nii lɛ shishi? Yona gboko deŋme ko kwraa yɛ tso nɛɛ he. Nɔ ni tamɔɔɔ nakai lɛ, Yehowa ji Ninivebii lɛ awala Jɛɛhe, ni lɛ eha amɛhi wala mli aahu taakɛ efeɔ ehaa adebɔɔ nibii fɛɛ ni yɔɔ shikpɔŋ lɛ nɔ lɛ. Te feɔ tɛŋŋ ni Yona susuɔ akɛ nakai tso kome lɛ he yɛ sɛɛnamɔ kwraa fe mɛi 120,000 kɛ amɛkooloi fɛɛ lɛ awala lɛ? Ani jeee ahi aha ŋkome su ni Yona ŋmɛ gbɛ ni ená esusumɔ nɔ hewalɛ lɛ hewɔ eba lɛ nakai lɛ? Ŋto tso lɛ he sɛɛ ni ená lɛ hewɔ ni edɔ lɛ akɛ tso lɛ gbo lɛ. Ani jeee nakai ahi aha ŋkome su lɛ nɔŋŋ, ni ji ehe guɔ ni esumɔɔɔ ni agbe, shi moŋ ayɔse akɛ nɔ ni ewie lɛ eba mli lɛ hewɔ emli fu akɛ akpãtaaa Ninive hiɛ lɛ? Yona sane lɛ baanyɛ aye abua wɔ koni wɔkɛ anɔkwayeli apɛi wɔmli jogbaŋŋ wɔkwɛ. Wɔteŋ namɔ yɔɔ ni sui nɛɛ nyɛŋ aná enɔ hewalɛ? Esa akɛ wɔhiɛ asɔ waa akɛ Yehowa toɔ etsui shi etsɔɔ wɔ nii koni wɔfee mɛi ni foɔ mɛi krokomɛi anɔ̃ mli waa, amɛmusuŋ tsɔ̃ɔ amɛ waa, ni amɛnaa mɔbɔ waa—taakɛ efeɔ lɛ!

22. (a) Mɛɛ gbɛ nɔ ekã shi faŋŋ akɛ nilee gbɛ ni Yehowa tsɔ nɔ etsɔɔ Yona bɔ ni anaa mɔbɔ lɛ ná Yona nɔ hewalɛ? (b) Mɛɛ nɔ ko esa akɛ wɔ fɛɛ wɔkase?

22 Sanebimɔ lɛ ji akɛ, Ani Yona kase nii kɛjɛ niiashikpamɔ nɛɛ mli? Wolo ni Yona gbɛ́i kã nɔ lɛ gbeɔ naa kɛ Yehowa sanebimɔ lɛ ni ahako hetoo, yɛ gbɛ ko nɔ lɛ, sanebimɔ lɛ miibi hetoo. Mɛi komɛi baawie ashi Yona akɛ ehaaa sanebimɔ lɛ hetoo. Shi anɔkwa sane ji akɛ ehetoo lɛ yɛ. Ewolo lɛ diɛŋtsɛ haa sanebimɔ lɛ hetoo. Ole nɔ ko? Odaseyeli yɛ ni tsɔɔ akɛ Yona ji mɔ ni ŋma wolo ni egbɛ́i kã nɔ lɛ. Bo lɛ feemɔ nakai gbalɔ lɛ he mfoniri okwɛ ni eyashɛ emaŋ shweshweeshwe ni eeŋma amaniɛbɔɔ nɛɛ. Nɔ ni wɔbaanyɛ wɔna nɔŋŋ ji nuu onukpa hiɛshikalɔ, ni baa ehe shi, ni ekɛ heshwamɔ kɛ awerɛhoyeli miihoso eyitso beni egbalaa lɛ diɛŋtsɛ etɔ̃mɔi, atua ni etse, kɛ bɔ ni ekɛ kuɛŋtimɔ kpoo akɛ ebaana mɔbɔ lɛ amli lɛ. Eyɛ faŋŋ akɛ, Yona kase nɔ ko ni he hiaa waa kɛjɛ nilee gbɛ ni Yehowa tsɔ nɔ etsɔɔ lɛ nii lɛ mli. Ekase akɛ, esa akɛ ena mɔbɔ. Ani wɔbaafee nakai?—Nyɛkanea Mateo 5:7.

^ kk. 6 Akɔntaabuu tsɔɔ akɛ, no mli lɛ, mɛi aaafee 20,000 kɛmiimɔ 30,000 yɔɔ Samaria, ni ji Israel akutsei nyɔŋma lɛ maŋtsɛyeli lɛ maŋtiase lɛŋ yɛ Yona gbii lɛ amli—kɛ́ aja Ninivebii lɛ ayibɔ lɛ mli ejwɛ lɛ, Samaria naaa emli ekome po. Beni Ninive ná nii waa lɛ, ekolɛ etsɔ maŋtiase wulu fe fɛɛ yɛ je lɛŋ.

^ kk. 8 Ekolɛ, niiamlitsɔɔmɔ nɛɛ baafee srɔto ko kwraa kɛha mɛi komɛi, shi ejeee nɔ ko ni bako dã yɛ blema beaŋ. Hela yinɔsaneŋmalɔ Herodotus wie akɛ blema lɛ, kɛ́ Persianyo asraafonyo ko ni ehe gbɛi waa lɛ gbo lɛ, afeɔ kusumii kɛfoɔ lɛ, ni amɛshĩa kooloi tete hu feɔ eko.

^ kk. 20 Wiemɔ ni Nyɔŋmɔ wie akɛ nakai gbɔmɛi lɛ leee amɛninejurɔ kɛ amɛbɛku lɛ tsɔɔ akɛ, yɛ Nyɔŋmɔ shishitoo mlai lɛ agbɛfaŋ lɛ, abifabii ji amɛ.