Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Amɛhemɔkɛyeli Lɛ

 YITSO ENYƆ

‘Ekɛ Anɔkwa Nyɔŋmɔ lɛ Nyiɛ’

‘Ekɛ Anɔkwa Nyɔŋmɔ lɛ Nyiɛ’

1, 2. Mɛɛ nitsumɔ akɛwo Noa kɛ eweku lɛ dɛŋ, ni mɛɛ naagbai komɛi amɛkɛkpe?

NOA kpã emli tĩaa. Feemɔ ehe mfoniri okwɛ ni eta tso lɛkɛtɛɛ ko nɔ, ehé be fioo kɛjɛ enitsumɔ lɛ mli kɛmiijɔɔ ehe, ni eekwɛ adeka wulu ni ekpɛɔ lɛ. Amã ni edɔ waa lɛ he fũ ehé kɔɔyɔɔ lɛŋ fɛɛ; ni dadei ni akɛtsuɔ tsei lɛ ahe nii lɛ hu agbɛɛmɔi miijije yɛ jɛmɛ. He ni Noa ta lɛ, enyɛɔ enaa ebihii lɛ ni miitsu nii dɛŋdɛŋ yɛ mplaŋi srɔtoi ni akɛmamɔ shi ni akɛkpɛɔ adeka lɛ he. Ebihii lɛ, amɛŋamɛi, kɛ Noa diɛŋtsɛ ŋa fɛɛ kɛ afii nyɔŋmai komɛi egbo deŋme yɛ adekakpɛɛ nitsumɔ nɛɛ he. Amɛgbe adeka lɛ fã ko naa, shi nibii babaoo yɛ ni amɛbaatsu lolo kɛgbe naa kwraa!

2 Mɛi ni yɔɔ kpokpaa lɛ nɔ lɛ susu akɛ Noa kɛ eweku lɛ fɛɛ lɛ, kwashiai ji amɛ loo amɛbɛ yitseiaŋ. Babaoo ni Noa kɛ ebihii lɛ kpɛɔ adeka lɛ, babaoo ni mɛi lɛ ŋmɔɔ amɛ akɛ nu afua ko nyɛŋ aba shikpɔŋ lɛ fɛɛ nɔ kɔkɔɔkɔ ji no. Hiɛkpatamɔ ni baa ni Noa tee nɔ ebɔ amɛ he kɔkɔ lɛ fee amɛ tamɔ nɔ ko ni nyɛŋ aba kɔkɔɔkɔ, loo jwɛŋmɔ bɛ mli kwraa! Amɛnaaa nɔ hewɔ ni esa akɛ nuu nɛɛ kɛ ebe fɛɛ—kɛ eweku lɛ hu nɔ̃—atsu kwashiai anitsumɔ nɛɛ. Kɛlɛ, Yehowa, Noa Nyɔŋmɔ lɛ enaaa Noa akɛ eji kwashia.

3. Mɛɛ shishinumɔ naa Noa kɛ Nyɔŋmɔ nyiɛ?

3 Nyɔŋmɔ Wiemɔ lɛ kɛɔ akɛ: ‘Noa kɛ anɔkwa Nyɔŋmɔ lɛ nyiɛ.’ (Nyɛkanea 1 Mose 6:9.) Mɛni no tsɔɔ? Jeee akɛ Nyɔŋmɔ banyiɛ shikpɔŋ lɛ nɔ loo ákɛ yɛ gbɛ ko nɔ lɛ Noa tee ŋwɛi. Moŋ lɛ, Noa ye e-Nyɔŋmɔ lɛ wiemɔ lɛ nɔ jogbaŋŋ, ni esumɔ lɛ aahu ákɛ etamɔ nɔ ni ekɛ Yehowa fɛɛ nyiɛ tamɔ nanemɛi feɔ lɛ. Afii akpei komɛi asɛɛ lɛ, Biblia lɛ wie yɛ Noa he akɛ: ‘Etsɔ ehemɔkɛyeli nɔ ebu je lɛ fɔ́.’ (Heb. 11:7) Te fee tɛŋŋ etsɔ ehemɔkɛyeli nɔ efee nakai lɛ? Mɛni wɔ, ni wɔyɔɔ ŋmɛnɛ lɛ baanyɛ akase kɛjɛ ehemɔkɛyeli lɛ mli?

Nuu ni Shwamɔ ko Bɛ Ehe yɛ Jeŋ Kɔɔdɔŋ ko Mli

4, 5. Mɛɛ gbɛ nɔ je lɛ shihilɛ ni efite lɛ mli bawo wu yɛ Noa beaŋ?

4 Noa da yɛ jeŋ ko ni jeŋba kpɔtɔ oyayaayai lɛ mli. Gbɔmɛi lɛ ashihilɛ bɔi kpɔtɔmɔ dani afɔ Noa, kɛjɛ enanakaŋsowa Henok, ni lɛ hu eji jalɔ ni kɛ Nyɔŋmɔ nyiɛ lɛ yinɔ tɔ̃ɔ. Henok gba fɔ̃ shi akɛ kojomɔ gbi ko  miiba gbɔmɛi ni amɛjeŋba ekpɔtɔ yɛ no beaŋ je lɛ mli lɛ anɔ. Ni Noa beaŋ nɛɛ, mɛi ajeŋba ekpɔtɔ kwraa. Anɔkwa, yɛ Yehowa hiɛ lɛ, no mli lɛ, nakai je lɛ efite kwraa, ejaakɛ shikpɔŋ lɛ nɔ eyi obɔ kɛ yiwalɛ nifeemɔ. (1 Mose 5:22; 6:11; Yuda 14, 15) Mɛni ha nibii amli wo wu kwraa nakai lɛ?

5 No mli lɛ, shihilɛ ko ni yɔɔ oshara kɛ gbeyei fɛɛ miiya nɔ yɛ Nyɔŋmɔ bii ni ji ŋwɛi bɔfoi lɛ ateŋ. Amɛteŋ mɔ kome ete shi ewo Yehowa momo, ni ebatsɔ Satan Abonsam ejaakɛ efolɔ Nyɔŋmɔ naa ni elaka Adam kɛ Hawa ni amɛfee esha. Noa beaŋ lɛ, bɔfoi krokomɛi te shi amɛwo Yehowa jalɛ nɔyeli lɛ. Amɛshi amɛshihilɛhe ni Nyɔŋmɔ kɛha amɛ yɛ ŋwɛi lɛ kɛba shikpɔŋ lɛ nɔ, ni amɛtsɔmɔ amɛhe gbɔmɛi, ni amɛŋɔ yei fɛfɛji amɛfee amɛŋamɛi. Nakai ŋwɛi bɔfoi henɔwolɔi atuatselɔi lɛ ná adesai anɔ hewalɛ gbonyo.—1 Mose 6:1, 2; Yuda 6, 7.

6. Mɛɛ hewalɛ Oblaŋi agboi lɛ ná yɛ je lɛ shihilɛ lɛ nɔ, ni mɛni Yehowa kpɛ mli akɛ ebaafee?

6 Kɛfata he lɛ, abɔɔɔ ŋwɛi bɔfoi akɛ amɛbote gbalashihilɛ mli; shi bɔfoi nɛɛ batsɔmɔ amɛhe gbɔmɛi, ni amɛkɛ gbɔmɛi abiyei bote gbalashihilɛ mli kɛfɔ bii asaabui, oblaŋi ni he wala tamɔ nɔ ko. Biblia lɛ tsɛ amɛ Oblaŋi agboi, ni Hebri wiemɔ ni atsɔɔ shishi akɛ Oblaŋi agboi lɛ shishi ŋmiiŋmi ji mɛi ni tsirɛɔ mɛi kɛtswiaa shi. Nɛkɛ Oblaŋi agboi ni yitseiaŋ wala gbeyeigbeyei nɛɛ ha nakai beaŋ je lɛ shihilɛ lɛ mli wo wu kwraa. Ebɛ naakpɛɛ mɔ akɛ Bɔlɔ lɛ na akɛ “gbɔmɛi anɔfɔŋfeemɔ fá yɛ shikpɔŋ lɛ nɔ, ni amɛtsuiŋ susumɔi ajwɛŋmɔ fɛɛ lɛ efɔŋ kɛkɛ ji daa nɛɛ.” Yehowa kpɛ mli akɛ yɛ afii 120 mli lɛ, ebaakpata nakai yiwalɛ je lɛ hiɛ.—Nyɛkanea 1 Mose 6:3-5.

7. Mɛɛ naagbai ehe bahia ni Noa kɛ eŋa awu ashi kɛbu amɛbihii lɛ ahe kɛjɛ nibii gbohii ni no mli lɛ eyaa nɔ lɛ ahe?

 7 Bo lɛ kwɛmɔ bɔ ni ebaawa waa akɛ abaafɔ bii koni atsɔse amɛ yɛ nakai je lɛŋ! Kɛlɛ, Noa fee nakai. Ená ŋa kpakpa. Beni Noa eye afii 500 sɛɛ lɛ, eŋa fɔ bihii etɛ eha lɛ, amɛji Shem, Ham, kɛ Yafet. * Ehe bahia ni Noa kɛ eŋa fɛɛ abu amɛbihii lɛ ahe kɛjɛ shihilɛ gbohii ni ebɔle amɛ lɛ ahe. Efɔɔ kaa akɛ kɛ́ gbekɛbii na gbɔmɛi ‘kakalɔi kɛ mɛi ni ehé gbɛ́i’ lɛ, amɛnaa kpɛɔ amɛhe ni amɛsumɔɔ koni amɛbɛŋkɛ amɛ—no hewɔ lɛ gbekɛbii lɛ baasumɔ ni amɛbɛŋkɛ Oblaŋi agboi nɛɛ. Jeee nibii fɛɛ ni kɔɔ mɔdɛŋ ni asaabui lɛ bɔɔ akɛ amɛná gbekɛbii lɛ anɔ hewalɛ lɛ he lɛ anaa Noa kɛ eŋa baanyɛ atsĩ, shi amɛbaanyɛ amɛtsɔse amɛbii lɛ koni amɛle Yehowa Nyɔŋmɔ, mɔ ni hiɔ yiwalɛ nifeemɔi fɛɛ lɛ he anɔkwalei lɛ. Ehe bahia ni amɛye amɛbua amɛbihii lɛ koni amɛyɔse akɛ yiwalɛ nifeemɔi kɛ atuatsemɔi ni yaa nɔ yɛ je lɛ mli lɛ dɔɔ Yehowa waa diɛŋtsɛ.—1 Mose 6:6.

Ehe bahia ni Noa kɛ eŋa fɛɛ abu amɛbii lɛ ahe kɛjɛ shihilɛi gbohii ni ebɔle amɛ lɛ ahe

8. Mɛɛ gbɛ nɔ fɔlɔi ni hiɛ kã shi lɛ baanyɛ akase nɔkwɛmɔnɔ ni Noa kɛ eŋa fee lɛ?

8 Ekã shi faŋŋ akɛ, fɔlɔi ni yɔɔ ŋmɛnɛ lɛ baanu he waa amɛha Noa kɛ eŋa lɛ. Jeŋ ni wɔyɔɔ mli ŋmɛnɛ lɛ hu mli eyi tɔ kɛ atuatsemɔ kɛ yiwalɛ nifeemɔ. Efɔɔ kaa akɛ, oblahii kɛ oblayei akui ni eje amɛŋɛlɛ nɔ lɛ ji mɛi ni yi faa yɛ maŋtiasei amli. Nibii ni gbekɛbii kɛjieɔ amɛhiɛtserɛ lɛ po amli eyi tɔ kɛ yiwalɛ kɛ atuatsemɔ nifeemɔi. Fɔlɔi ni hiɛ kã shi lɛ bɔɔ mɔdɛŋ fɛɛ ni amɛbaanyɛ koni amɛtsĩ nifeemɔi gbohii nɛɛ anaa ni ekaná amɛbii lɛ anɔ hewalɛ. Amɛfeɔ enɛ kɛtsɔ Yehowa, toiŋjɔlɛ Nyɔŋmɔ ni kɛ yiwalɛ nifeemɔi fɛɛ baaba naagbee gbi ko lɛ he nii ni amɛtsɔɔ amɛbii lɛ nɔ. (Lala 11:5; 37:10, 11) Fɔlɔi baanyɛ aye omanye yɛ enɛ feemɔ mli! Noa kɛ eŋa ye omanye. Amɛbihii lɛ badara kɛbatsɔmɔ hii nukpai kpakpai, ni amɛkɛ yei hu ni sumɔɔ ni amɛkɛ Yehowa, anɔkwa Nyɔŋmɔ lɛ aye klɛŋklɛŋ gbɛhe yɛ amɛshihilɛ mli lɛ bote gbalashihilɛ mli.

‘Feemɔ Adeka Oha Ohe’

9, 10. (a) Mɛɛ fãmɔ ni jɛ Yehowa ŋɔɔ tsake Noa shihilɛ kwraa? (b) Mɛni Yehowa ha Noa le yɛ bɔ ni adeka lɛ baaji kɛ yiŋtoo ni yɔɔ sɛɛ lɛ he?

9 Gbi ko lɛ, Noa shihilɛ batsake kwraa. Yehowa ha eyiŋtoo akɛ ekɛ nakai je lɛ baaba naagbee lɛ fee faŋŋ beni ekɛ Noa, nuu ni esumɔɔ esane waa lɛ wieɔ lɛ. Nyɔŋmɔ fã Noa akɛ: “Ŋɔɔ gofertso ofee adeka oha ohe.”—1 Mose 6:14.

10 Adeka nɛɛ jeee meele loo lɛlɛ ko taakɛ mɛi komɛi susuɔ lɛ. Nɔ pɛ ni haa ebafeɔ tamɔ lɛlɛ ji nu hiɛ ni enyɛɔ emaa lɛ. Eji adeka agbo ko kɛkɛ. Yehowa kɛ adeka lɛ kɛlɛ, elɛɛmɔ, ekwɔlɛ, kɛ bɔ ni esa akɛ akpɛ lɛ aha lɛ he gbɛtsɔɔmɔi fitsofitso ha Noa, ni ekɛ gbɛtsɔɔmɔ hu ha lɛ akɛ  ekɛ amã aha adeka lɛ mligbɛ kɛ ehewɔ fɛɛ. Ni ekɛɛ Noa akɛ: “Naa, mikɛ nu afua miiba shikpɔŋ lɛ nɔ . . . Nɔ fɛɛ nɔ ni yɔɔ shikpɔŋ lɛ nɔ aaaplenee.” Kɛlɛ, Yehowa kɛ gbɛtsɔɔmɔ nɛɛ ha Noa akɛ: “Ni ooobote adeka lɛ mli bo kɛ obihii lɛ kɛ oŋa kɛ obihii lɛ aŋamɛi lɛ.” Kɛfata he lɛ, ekɛɛ Noa koni ekɛ kooloi srɔtoi lɛ fɛɛ eko awo adeka lɛ mli. Mɛi ni baahi adeka lɛ mli lɛ pɛ ayi baaná wala!—1 Mose 6:17-20.

Noa kɛ eweku lɛ fee ekome kɛtsu nii kɛye Nyɔŋmɔ famɔi anɔ

11, 12. Mɛɛ nitsumɔ wulu ko akɛwo Noa dɛŋ, ni te efee enii yɛ he eha tɛŋŋ?

11 Jeee nitsumɔ bibioo kwraa kã Noa hiɛ lɛ. Adeka nɛɛ baada diɛŋtsɛ—ekɛlɛ aaafee ninetalɔi 437 (mitai 133), elɛɛmɔ aaafee ninetalɔi 73 (mitai 22), ni ekwɔlɛ hu aaafee ninetalɔi 44 (mitai 13). Eda kwraa fe ŋmɛnɛ beaŋ tso meele wuji fe fɛɛ ni akɛyaa wuo lɛ. Ani Noa jo nitsumɔ lɛ naa foi, ewie naagbai ni ekɛbaakpe lɛ he nyanyaanya, loo etsake gbɛtsɔɔmɔ ni akɛha lɛ lɛ hiɛ bɔni afee ni ená etsumɔ mlɛo? Biblia lɛ ha hetoo akɛ: ‘Bɔ ni Nyɔŋmɔ fã Noa lɛ, nakai pɛpɛɛpɛ efee.’—1 Mose 6:22.

12 Nitsumɔ lɛ hé afii nyɔŋmai komɛi, ekolɛ afii 40 kɛmiimɔ 50. Ehe bahia ni afolɔ tsei ni aloo kɛya, agbala tsei lɛ amli, asaa tsei lɛ ahe, ni atsara. Esa akɛ afee adeka lɛ nsɔɔdoi etɛ, ajara mli babaoo, ni afee shinaa awo he. Ekã shi faŋŋ akɛ, ekolɛ afee samfɛji awo ŋwɛi gbɛ, ni awo eyiteŋ bɔ ni kɛ́ nu shwie nɔ lɛ etaŋ yiteŋ.—1 Mose 6:14-16.

13. Te nitsumɔ ni akɛwo Noa dɛŋ lɛ fã ko, ekolɛ etsumɔ baajara kwraa fe adeka lɛ kpɛɛ, ni te gbɔmɛi lɛ fee amɛnii yɛ he amɛha tɛŋŋ?

13 Beni afii lɛ hoɔ yaa, ni akpɛ adeka lɛ kɛshɛ shɔŋŋ lɛ, ekolɛ Noa tsui baanyɔ emli waa akɛ eweku lɛ yeɔ amɛbuaa lɛ! Nitsumɔ ni akɛwo edɛŋ lɛ fã ko yɛ ni ekolɛ etsumɔ baajara kwraa fe adeka lɛ kpɛɛ. Biblia lɛ kɛɔ wɔ akɛ, Noa “ji jalɛ shiɛlɔ.” (Nyɛkanea 2 Petro 2:5.) No hewɔ lɛ, ebɔ mɔdɛŋ ekɛ ekãa nyiɛ hiɛ kɛbɔ efɔŋfeelɔi ni ekwa Nyɔŋmɔ lɛ kɔkɔ akɛ, aaba abakpãta amɛhiɛ. Te gbɔmɛi lɛ fee amɛnii yɛ kɔkɔbɔɔ lɛ he amɛha tɛŋŋ? Sɛɛ mli lɛ, Yesu Kristo wie nakai be lɛ he, ni ekɛɛ akɛ “amɛhiɛ bɛ amɛhe nɔ.” Ewie akɛ amɛha daa gbi shihilɛ mli nibii—niyeli, ninumɔ, kɛ gbalamlibotemɔ—hé amɛbe fɛɛ aahu ákɛ, amɛbooo Noa toi. (Mat. 24:37-39) Ŋwanejee ko kwraa bɛ he akɛ mɛi babaoo ye Noa kɛ eweku lɛ ahe fɛo; ekolɛ mɛi komɛi po wo ewala he gbeyei ni amɛkɛ basabasafeemɔ te shi amɛwo lɛ. Ekolɛ amɛbɔ mɔdɛŋ po akɛ amɛbaafite adeka ni ekpɛɔ lɛ.

Yɛ odaseyelii ni tsɔɔ akɛ Yehowa miijɔɔ Noa lɛ fɛɛ sɛɛ po lɛ, mɛi ye ehe fɛo ni amɛbooo esane lɛ toi

14. Mɛni wekui ni ji Kristofoi ni yɔɔ ŋmɛnɛ lɛ baanyɛ akase kɛjɛ Noa kɛ eweku lɛ dɛŋ?

14 Kɛlɛ, Noa kɛ eweku lɛ ejooo nitsumɔ lɛ naa foi. Eyɛ mli akɛ mɛi ni hi shi yɛ Noa beaŋ lɛ tiu shihilɛ mli nibii asɛɛ kɛ susumɔ akɛ ehe ehiaaa akɛ akpɛ adeka, eji kwashiai asane ni jwɛŋmɔ bɛ mli hu, shi Noa kɛ eweku lɛ tee nɔ amɛkpɛ adeka lɛ. No hewɔ lɛ, ŋmɛnɛ lɛ wekui ni ji Kristofoi lɛ baanyɛ akase nɔ ko kple kɛjɛ Noa kɛ eweku lɛ hemɔkɛyeli lɛ mli. Ejaakɛ, wɔ hu wɔyɛ be ni Biblia lɛ tsɛɔ lɛ akɛ je nɛŋ nibii agbɛjianɔtoo lɛ “naagbee gbii lɛ” amli. (2 Tim. 3:1) Yesu kɛɛ akɛ wɔbe  nɛɛ baatamɔ Noa beaŋ nɔŋŋ, beni ekpɛɔ adeka lɛ. Kɛ́ mɛi booo Nyɔŋmɔ Maŋtsɛyeli lɛ he sane lɛ toi, ni amɛkɛ hefɛoyeli loo yiwaa po kpee sane lɛ naa lɛ, esa akɛ Kristofoi abɔ mɔdɛŋ amɛkai Noa. Jeee amɛ ji klɛŋklɛŋ bii ni kɛ nakai naagbai lɛ ekpe.

‘Botemɔ Adeka lɛ Mli’

15. Beni Noa heɔ aná afii 600 lɛ, mɛɛ osharai banina lɛ?

15 Afii nyɔŋmai komɛi eho, ni fiofio lɛ aahé agbe adeka lɛ naa. Beni Noa heɔ aná afii 600 lɛ, nɔ̃ nyɔ ehiŋmɛiaŋ. Etsɛ Lamek gbo. * Afii enumɔ sɛɛ lɛ, Lamek tsɛ Metusela, ni ji Noa nii lɛ gbo hu beni eye afii 969—ni lɛ ji gbɔmɔ ni wala sɛɛ tsɛ fe fɛɛ ni Biblia lɛ bɔ he amaniɛ. (1 Mose 5:27) Metusela kɛ Lamek kɛ klɛŋklɛŋ gbɔmɔ Adam fɛɛ lɛ, yinɔ kome mli bii ji amɛ.

16, 17. (a) Beni Noa ye afii 600 lɛ, mɛɛ sane kroko enine shɛ nɔ? (b) Tsɔɔmɔ nibii ni Noa kɛ eweku lɛ na ni amɛhiɛ kpaŋ nɔ.

16 Nakai afi lɛ mli nɔŋŋ lɛ, Yehowa Nyɔŋmɔ kɛɛ wekuyitso Noa sane kroko hu akɛ: “Bo kɛ owe lɛ fɛɛ abote adeka lɛ mli.” Nakai beaŋ nɔŋŋ lɛ, Nyɔŋmɔ kɛɛ Noa akɛ eŋɔ kooloi srɔtoi lɛ fɛɛ eko ewo adeka lɛ mli—nɔ ni he tse ni abaanyɛ akɛshã afɔle, kpawo kpawo, kɛ nɔ ni eshwɛ lɛ enyɔɔnyɔ.—1 Mose 7:1-3.

17 Obaana akɛ enɛ baafee nɔ ko ni hiɛ kpaŋ nɔ kɔkɔɔkɔ. Kɛ́ okwɛ lɛ, onaa kooloi ohai abɔ ni amɛke yuu kɛjɛ shɔŋŋ kɛmiiba—ekomɛi  nyiɛ, ekomɛi miifiliki, ekomɛi miiwamɔ, ekomɛi nyiɛ oyayaayai, ekomɛi nyiɛ shɔ̃ɔ—yɛ henɔi srɔtoi amli. Ehe ehiaaa ni wɔshwieɔ wɔyiŋ akɛ, ‘Ani Noa bɔ mɔdɛŋ ewo kooloi ni hiɛ yɔɔ laŋlaŋ lɛ tsuŋ, ekɛ amɛ shi mple loo enyɛ amɛnɔ ewo adeka lɛŋ he ko?’ Ejaakɛ amaniɛbɔɔ lɛ kɛɔ akɛ, kooloi lɛ diɛŋtsɛ ‘tee Noa ŋɔɔ yɛ adeka lɛ mli.’—1 Mose 7:9.

18, 19. (a) Te esa akɛ wɔsusu saji ni mɛi ni yiŋ etɛɛɛ amɛ yɛ Noa amaniɛbɔɔ lɛ he lɛ teɔ lɛ shi lɛ ahe wɔha tɛŋŋ? (b) Te wɔfeɔ tɛŋŋ wɔleɔ akɛ gbɛ ni Yehowa tsɔ nɔ ebaa ekooloi ni ebɔ lɛ ayi lɛ tsɔɔ akɛ eyɛ nilee?

18 Ekolɛ, mɛi ni yiŋ etɛɛɛ amɛ yɛ sane nɛɛ he lɛ baabi akɛ: ‘Te aaafee tɛŋŋ ni nɔ ko tamɔ nakai aba lɛ? Ni te aaafee tɛŋŋ ni nakai kooloi lɛ fɛɛ aaahi he kome yɛ toiŋjɔlɛ mli lɛ?’ Susumɔ enɛ he okwɛ: Ani jeŋ muu fɛɛ Bɔlɔ lɛ bɛ hewalɛ ni ekɛbaakudɔ kooloi ni ebɔ amɛ lɛ, koni amɛkaye awui ni amɛfee kpoo po kɛ́ ehe bahia lɛ? Kaimɔ akɛ Yehowa ji Nyɔŋmɔ ni bɔ kooloi lɛ. Afii komɛi asɛɛ lɛ, egba Ŋshɔ Tsuru lɛ mli enyɔ, ni eha hulu wa damɔ shi aahu. Ani enyɛŋ eha nibii fɛɛ ni abɔ he amaniɛ yɛ Noa beaŋ lɛ aba? Ebaanyɛ aahu, ni efee nakai hu!

19 Eji anɔkwale akɛ, kulɛ Nyɔŋmɔ baanyɛ atsɔ gbɛ kroko nɔ ebaa kooloi ni ebɔ lɛ ayi. Kɛlɛ, ejɛ nilee mli ekɔ gbɛ ko ni baaha wɔkai nitsumɔ ni ekɛwo adesai adɛŋ yɛ shishijee kwraa akɛ amɛkwɛ nibii fɛɛ ni hiɛ kã yɛ shikpɔŋ lɛ nɔ lɛ anɔ lɛ. (1 Mose 1:28) Ŋmɛnɛ lɛ, fɔlɔi babaoo kɛ Noa sane lɛ tsɔɔ amɛbii lɛ anii akɛ, Yehowa naa gbɔmɛi kɛ kooloi ni ebɔ lɛ akɛ amɛhe hiaa waa.

20. Yɛ naagbee otsi dani Nu Afua lɛ baaba lɛ, mɛni ekolɛ Noa kɛ eweku lɛ kɛ amɛbe tsu?

20 Yehowa kɛɛ Noa akɛ biɛ otsi mli lɛ, Nu Afua lɛ baaba. Ekolɛ,  efee be ni dekã bɛ mli kwraa kɛha weku lɛ. Susumɔ nitsumɔ ni ehe bahia ni atsu lɛ he okwɛ, esa akɛ akwɛ ni kooloi lɛ fɛɛ aya adeka lɛ mli, abua niyenii anaa koni ato he gbɛjianɔ jogbaŋŋ kɛha kooloi lɛ kɛ weku lɛ, koni ato weku lɛ nibii awo adeka lɛ mli. Ekolɛ Noa ŋa kɛ ebihii Shem, Ham, kɛ Yafet ŋamɛi lɛ baasusu bɔ ni amɛbaafee amɛha adeka lɛ mli shihilɛ afee tamɔ shĩa lɛ he.

21, 22. (a) Mɛni hewɔ esaaa akɛ efeɔ wɔ naakpɛɛ akɛ Noa beaŋbii lɛ booo lɛ toi lɛ? (b) Mɛɛ be Noa beaŋbii lɛ kpa Noa kɛ eweku lɛ ahe fɛoyeli?

21 Ni ebeaŋbii lɛ hu? Yɛ odaseyelii ni tsɔɔ akɛ Yehowa miijɔɔ Noa kɛ nitsumɔ ni etsuɔ lɛ fɛɛ sɛɛ po lɛ, gbɔmɛi lɛ ‘ahiɛ baaa amɛhe nɔ.’ Amɛmiikwɛ bɔ ni kooloi lɛ eke yuu kɛmiibote adeka lɛ mli lɛ. Shi esaaa akɛ efeɔ wɔ naakpɛɛ akɛ nɔ ni tee nɔ lɛ shiii amɛ kpu po. Ŋmɛnɛ lɛ, yɛ odaseyelii ni yɔɔ faŋŋ ni tsɔɔ akɛ wɔyɛ nibii agbɛjianɔtoo nɛɛ naagbee gbii lɛ amli lɛ fɛɛ sɛɛ lɛ, mɛi haaa amɛhiɛ ahi amɛhe nɔ. Ni taakɛ bɔfo Petro gba fɔ̃ shi lɛ, hefɛoyelɔi eba kɛ hefɛoyeli, ni amɛyeɔ mɛi ni boɔ Nyɔŋmɔ kɔkɔbɔi atoi lɛ ahe fɛo. (Nyɛkanea 2 Petro 3:3-6.) Nakai nɔŋŋ ekã shi faŋŋ akɛ, mɛi ye Noa kɛ eweku lɛ he fɛo.

22 Mɛɛ be hefɛoyeli lɛ sɛɛ fo? Amaniɛbɔɔ lɛ kɛɔ wɔ akɛ, beni Noa, kɛ eweku lɛ kɛ kooloi lɛ bote adeka lɛ mli nɔŋŋ kɛkɛ ni “Yehowa ŋa eyi.” Kɛ́ no mli lɛ, hefɛoyelɔi lɛ ekomɛi bɛŋkɛ jɛmɛ lɛ, bɔ ni ajɛ ŋwɛi aŋa shinaa lɛ baaha amɛmu shi kɔ̃i. Kɛ́ jeee nakai hu, nugbɔ lɛ ha amɛmu shi kɔ̃i—ejaakɛ nugbɔ lɛ nɛ! Ni nui lɛ nɛ aahu, ni ehé shi yɛ shikpɔŋ lɛ nɔ, ni ekpele je lɛŋ taakɛ Yehowa wie akɛ ebaaba lɛ lɛ pɛpɛɛpɛ.—1 Mose 7:16-21.

23. (a) Te wɔfeɔ tɛŋŋ wɔleɔ akɛ Yehowa náaa efɔŋfeelɔi ni hi shi yɛ Noa beaŋ lɛ agbele he miishɛɛ? (b) Mɛni hewɔ nilee yɔɔ mli akɛ wɔbaakase Noa hemɔkɛyeli lɛ ŋmɛnɛ?

23 Ani Yehowa ná nakai efɔŋfeelɔi lɛ agbele lɛ he miishɛɛ? Kɔkɔɔkɔ! (Ezek. 33:11) Nɔ ni tamɔɔɔ nakai lɛ, ekɛ hegbɛ fɛɛ ni he hiaa lɛ ha amɛ akɛ amɛtsake amɛnifeemɔi lɛ koni amɛfee jalɛ nii. Ani kulɛ amɛbaanyɛ amɛtsake? Bɔ ni Noa hi shi eha lɛ haa nakai sanebimɔ lɛ hetoo. Noa kɛ Yehowa nyiɛ, no ji ebo Nyɔŋmɔ toi yɛ nɔ fɛɛ nɔ mli, ni ekɛtsɔɔ akɛ kulɛ nakai gbɔmɛi lɛ baanyɛ aje hiɛkpatamɔ lɛ mli. Yɛ nakai shishinumɔ naa lɛ, Noa kɛ ehemɔkɛyeli lɛ bu ebeaŋ je lɛ fɔ; eha ana faŋŋ akɛ eyinɔ bii lɛ ji efɔŋfeelɔi ni ekpiliŋ amɛtsui lɛɛlɛŋ. Noa hemɔkɛyeli lɛ tee nɔ ebaa ekɛ eweku lɛ ayi shweshweeshwe. Kɛ́ okase Noa hemɔkɛyeli lɛ, obaanyɛ obaa okɛ mɛi krokomɛi ni osumɔɔ lɛ ayi. Obaanyɛ okɛ Yehowa Nyɔŋmɔ anyiɛ akɛ Onaanyo taakɛ Noa fee lɛ. Ni naanyobɔɔ lɛ baanyɛ ahi shi kɛya naanɔ!

^ kk. 7 Mɛi ni hi shi yɛ nakai beaŋ lɛ awala sɛɛ tsɛɔ kwraa fe wɔ nɔ̃ lɛ ŋmɛnɛ. Ekolɛ, akɛni amɛbɛŋkɛ emuuyeli ni Adam kɛ Hawa ná be ko lɛ hewɔ amɛwala sɛɛ tsɛɔ, ni amɛyɔɔ gbɔmɔtsoŋ hewalɛ nakai lɛ.

^ kk. 15 Lamek wo ebi lɛ gbɛ́i akɛ Noa—ekolɛ eshishi ji “Hejɔɔmɔ” loo “Miishɛjemɔ”—ni egba akɛ Noa baatsu egbɛ́i lɛ he nii, ni ebaanyiɛ adesai ahiɛ kɛje tɔlɛ ni etɔɔ amɛ yɛ shikpɔŋ ni alomɔ lɛ hewɔ lɛ mli. (1 Mose 5:28, 29) Lamek enaaa egbalɛ nɛɛ mlibaa ni egbo. Ekolɛ Noa nyɛmimɛi kɛ enyɛ hiɛ kpãta yɛ Nu Afua lɛ mli.

Ekrokromɛi Hu Nɛ

Abaa Noa kɛ ‘Mɛi Kpawo Krokomɛi Ayi’

Te Noa kɛ eweku lɛ fee tɛŋŋ amɛje jaramɔ be ni adesai enako eko daŋ lɛ mli lɛ?