Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Amɛhemɔkɛyeli Lɛ

 YITSO NYƆŊMA KƐ KPAANYƆ

‘Esusu He yɛ Etsui Mli’

‘Esusu He yɛ Etsui Mli’

1, 2. Tsɔɔmɔ gbɛ ni Maria fãa lɛ, kɛ nɔ hewɔ ni ehe ejɔɔɔ lɛ lɛ.

FEEMƆ shihilɛ nɛɛ he mfoniri okwɛ: Maria he ejɔɔɔ lɛ, ni no hewɔ lɛ, esaa ehe eta teji lɛ nɔ jogbaŋŋ. Ŋmɛlɛtswai abɔ nɛ ni eta teji lɛ nɔ kɛmiifã gbɛ. Yosef nyiɛ ehiɛgbɛ tuuntu yɛ gbɛ lɛ nɔ kɛmiiya Betlehem ni kã amɛhiɛ shɔŋŋ lɛ. Kɛ́ fee lɛ, Maria nuɔ he akɛ abifao lɛ miitsɔmɔ ehe yɛ emusuŋ.

2 Maria fɔmɔ be miihe ashɛ; Biblia lɛ kɛ wiemɔ ni mli kã shi faŋŋ tsɔɔ Maria shihilɛ lɛ mli akɛ, “emusu eda.” (Luka 2:5) Beni gbalashihilɛ mli hefatalɔi nɛɛ hoɔ ŋmɔji srɔtoi lɛ ahe lɛ, ekolɛ okwaafoi ni miihu loo miidu nii, ni naa amɛ lɛ ekomɛi ahiɛ fee amɛ yaa yɛ nɔ hewɔ ni yoo ni yɔɔ shihilɛ tamɔ nɛkɛ mli lɛ fãa gbɛ kakadaŋŋ tamɔ nɛkɛ. Mɛni eha Maria eshi eshĩa yɛ Nazaret kɛyaa he ko shɔŋŋ nɛkɛ?

3. Mɛɛ nitsumɔ Maria nine shɛ nɔ, ni mɛni wɔbaasumɔ ni wɔkase yɛ ehe?

3 Enɛ fɛɛ je shishi yɛ nyɔji komɛi ni tsɔ hiɛ lɛ amli, beni Yudanyo oblayoo nɛɛ nine shɛ nitsumɔ ko ni yɔɔ srɔto kwraa yɛ adesai ayinɔsane mli lɛ nɔ lɛ. No ji ebaafɔ bi ni baatsɔ Mesia, Nyɔŋmɔ Bi lɛ! (Luka 1:35) Beni ehe bahia ni efã gbɛ nɛɛ, no mli lɛ efɔmɔ be ebɛŋkɛ. Yɛ gbɛfãa nɛɛ mli lɛ, Maria kɛ shihilɛi ni ka ehemɔkɛyeli kpe. Ha wɔkwɛ nɔ ni ye ebua lɛ ni etee nɔ ewaje ehemɔkɛyeli lɛ.

Gbɛfãa Kɛmiiya Betlehem

4, 5. (a) Mɛni hewɔ Yosef kɛ Maria fɛɛ yaa Betlehem lɛ? (b) Akpɔ ni Kaisare wo lɛ ha mɛɛ gbalɛ ba mli?

4 Jeee Yosef kɛ Maria pɛ ji mɛi ni fãa gbɛ nɛɛ. Etsɛko tsɔ ni Kaisare Augusto wo akpɔ akɛ akane mɛi, no hewɔ lɛ mɔ fɛɛ mɔ aya emaŋ koni ayakane lɛ. Te Yosef fee enii yɛ enɛ he eha tɛŋŋ? Amaniɛbɔɔ lɛ kɛɔ akɛ: “Kɛkɛ ni Yosef hu jɛ Nazaret maŋ lɛŋ yɛ Galilea ni etee Betlehem ni ji David maŋ lɛŋ yɛ Yudea, ejaakɛ ejɛ David we lɛ kɛ eweku lɛ mli.”—Luka 2:1-4.

5 Jeee heniianaa Kaisare wo akpɔ lɛ yɛ be pɔtɛɛ nɛɛ mli. Gbalɛ ni aŋma afɔ̃ shi aaafee afii 700 dani be nɛɛ shɛ lɛ tsɔɔ akɛ, abaafɔ Mesia lɛ yɛ Betlehem. Shi eba lɛ akɛ maŋ ko yɛ ni atsɛɔ lɛ Betlehem ni kɛ Nazaret teŋ jɛkɛmɔ ji kilomitai 11 pɛ. Kɛlɛ, gbalɛ lɛ tsɔɔ akɛ he tuuntu ni abaafɔ Mesia lɛ yɛ ji “Betlehem Efrata.” (Nyɛkanea Mika 5:1.)  Gbɛfalɔi ni jɛɔ Nazaret ni amɛtsɔɔ Samaria kɛyaa nakai akrowa bibioo lɛ foɔ gbɛ jɛkɛmɔ aaafee kilomitai 130 kɛtsɔmɔɔ gɔji anɔ kɛyaa. Nakai maŋ lɛ ji Betlehem ni afã Yosef akɛ eya lɛ, ejaakɛ jɛmɛ ji he ni Maŋtsɛ David wekumɛi lɛ jɛ—weku nɛɛ nɔŋŋ mli Yosef kɛ eŋa fɛɛ jɛ.

6, 7. (a) Mɛni hewɔ ekolɛ, Maria eyanáaa gbɛfãa kɛmiiya Betlehem lɛ mlɛo kwraa lɛ? (b) Te Yosef ŋa ni Maria batsɔ lɛ ná Maria yiŋkpɛi anɔ hewalɛ eha tɛŋŋ? (Kwɛmɔ shishigbɛ niŋmaa lɛ hu.)

6 Ani Maria baafĩ Yosef yiŋkpɛɛ lɛ sɛɛ koni amɛya ni akane amɛ? Anɔkwa, gbɛfãa nɛɛ baaha etɔ Maria waa. Eeenyɛ efee akɛ amɛfã gbɛ nɛɛ yɛ Gbo beaŋ shishijee gbɛ, beni latsaa be lɛ miihe aba naagbee ni nugbɔ nyɛɔ enɛɔ fiofio lɛ. Kɛfata he lɛ, Betlehem ma gɔŋ ni kwɔ fe mitai 760 nɔ, ni gɔŋ ni kwɔ tamɔ nɛkɛ ni abaakwɔ kɛmu gbɛ ni akɛ gbii pii efã lɛ naa lɛ baafee nɔ ni jaraa waa. Ekolɛ, amɛgbɛfãa lɛ baahé amɛ be kakadaŋŋ fe bɔ ni esa akɛ ehé, ejaakɛ Maria shihilɛ lɛ baabi koni ejɔɔ ehe kpitiokpitio. Kɛ́ eshwɛ fioo ni oblayei ni hiɛ musu lɛ baafɔ lɛ, bei pii lɛ, amɛsumɔɔ koni amɛhi shĩa, he ni amɛwekumɛi kɛ amɛnanemɛi efee klalo yɛ akɛ amɛbaaye amɛbua amɛ kɛ́ amɛbɔi kɔ̃ɔmɔ lɛ. Ŋwanejee ko bɛ he akɛ, ehe bahia ni Maria afee ekãa dani ebaanyɛ efã gbɛ ni tamɔ nɛkɛ.

Gbɛfãa kɛmiiya Betlehem lɛ bɛ mlɛo kwraa

7 Eyɛ mli akɛ Maria náŋ gbɛfãa lɛ mlɛo moŋ, shi nɔ ni Luka ŋma lɛ tsɔɔ akɛ ekɛ Yosef tee. Luka bɔ amaniɛ hu akɛ, no mli lɛ  Maria ni Yosef “etsɛ ehe baa” lɛ ebatsɔ Yosef ‘ŋa.’ (Luka 2:4, 5) Yosef ŋa ni Maria ebatsɔ lɛ baaná Maria yiŋkpɛi anɔ hewalɛ waa. Ebu ewu lɛ akɛ eyitso yɛ Nyɔŋmɔjamɔ saji amli, ni tsɔɔ akɛ ekpɛlɛ nɔ akɛ gbɛhe ni Nyɔŋmɔ kɛha lɛ ji efĩ ewu lɛ yiŋkpɛi asɛɛ kɛye ebua lɛ. * No hewɔ lɛ, ekɛ toiboo kpee sane nɛɛ ni kulɛ ebaanyɛ eka ehemɔkɛyeli nɛɛ naa.

8. (a) Mɛɛ nɔ kroko hu ekolɛ ekanya Maria koni efata Yosef he kɛya Betlehem lɛ? (b) Mɛɛ gbɛ nɔ Maria nɔkwɛmɔnɔ lɛ woɔ anɔkwafoi hewalɛ?

8 Mɛɛ nɔ kroko hu ekolɛ ekanya Maria ni efee toi loo eba ehe shi lɛ? Ani ele gbalɛ ni tsɔɔ akɛ Betlehem ji he ni abaafɔ Mesia lɛ yɛ lɛ he nɔ ko? Biblia lɛ etsɔɔɔ. Shi eeenyɛ efee akɛ ele enɛ, ejaakɛ jamɔŋ hiɛnyiɛlɔi lɛ le anɔkwa sane nɛɛ, ni maŋbii lɛ ateŋ mɛi babaoo po hu le enɛ. (Mat. 2:1-7; Yoh. 7:40-42) Kɛ́ eba lɛ Ŋmalɛi lɛ agbɛfaŋ lɛ, Maria le mli jogbaŋŋ. (Luka 1:46-55) Bɔ fɛɛ bɔ ni sane lɛ ji lɛ, kɛ́ Maria kpɛ eyiŋ akɛ ebaafã gbɛ nɛɛ koni ekɛbo ewu toi jio, ekɛye akpɔ ko ni nɔyeli lɛ ewo lɛ nɔ jio, ekɛha Yehowa diɛŋtsɛ gbalɛ aba mli jio—loo yɛ enɛɛmɛi ateŋ enyɔ loo fɛɛ hewɔ jio lɛ—efee nɔkwɛmɔnɔ ni sa kadimɔ waa. Yehowa hiɛ sɔɔ hii kɛ yei ni baa amɛhe shi ni boɔ lɛ toi lɛ waa diɛŋtsɛ. Maria nɔkwɛmɔnɔ lɛ woɔ  anɔkwafoi ni yɔɔ he fɛɛ he lɛ hewalɛ waa, ejaakɛ yɛ wɔbei nɛɛ amli lɛ, mɛi babaoo ebuuu toiboo akɛ eji su ko ni he hiaa waa.

Kristo Fɔmɔ Lɛ

9, 10. (a) Beni Maria kɛ Yosef bɛŋkɛɔ Betlehem lɛ, mɛni he ekolɛ amɛbaasusu? (b) Mɛni hewɔ Yosef kɛ Maria yato he ni amɛto lɛ?

9 Ekolɛ, Maria mu fuaa beni ena Betlehem klɛŋklɛŋ kwraa yɛ shɔŋŋ lɛ. Beni Maria kɛ Yosef kwɔɔ gɔŋ lɛ, ni amɛtsɔɔ mũ tsei—ni fata tsei ni akpaa amɛnɔ yibii beni afi lɛ miiba naagbee—lɛ ahe kɛhoɔ lɛ, ekolɛ amɛsusu akrowa bibioo nɛɛ yinɔsane he. Taakɛ gbalɔ Mika kɛɛ lɛ, akrowa nɛɛ edaaa bɔ ni abaabu lɛ ashi Yuda maji lɛ anɔ; kɛlɛ, jɛmɛ ji he ni nɔ ni fe afii akpe kɛ sɛɛ ni tsɔ hiɛ lɛ mli lɛ, afɔ Boaz, Naomi, kɛ sɛɛ mli lɛ David yɛ.

10 Maria kɛ Yosef na akɛ mɛi babaoo eba akrowa lɛ. Akɛni mɛi krokomɛi etsɔ hiɛ amɛba koni aŋma amɛgbɛ́i hewɔ lɛ, amɛnáaa gbɛ yɛ gbɔiatoohe lɛ. * Amɛbɛ nɔ ko ni amɛbaafee ákɛ ja amɛye gbɛkɛ lɛ yɛ kooloi atsu mli. Feemɔ bɔ ni Yosef baahao waa aha beni enaa eŋa tsɔɔ piŋmɔ ko ni etsɔko mli dã, ni piŋmɔ lɛ naa bawa waa lɛ he mfoniri okwɛ. Jeee he ni sa akɛ kɔ̃ɔmɔ ata ehe yɛ kwraa nɛ.

11. (a) Mɛni hewɔ yei ni yɔɔ he fɛɛ he lɛ baanyɛ anu Maria shihilɛ lɛ shishi lɛ? (b) Yesu batsɔ “kromɔ bi” yɛ mɛɛ gbɛi anɔ?

11 Yei ni yɔɔ he fɛɛ he lɛ baanyɛ anu Maria shihilɛ lɛ shishi. Aaafee afii 4,000 ni tsɔ hiɛ lɛ, Yehowa gba akɛ yoo fɛɛ yoo baatsɔ piŋmɔ mli kɛ́ ebaafɔ, yɛ esha ni adesai ná akɛ gboshinii lɛ hewɔ. (1 Mose 3:16) Odaseyeli ko bɛ ni tsɔɔ akɛ Maria tsɔɔɔ piŋmɔ ni tamɔ nɛkɛ mli. Luka amaniɛbɔɔ lɛ etsĩii piŋmɔi ni Maria tsɔ mli lɛ atã, nɔ ni ekɛɛ kɛkɛ ji: “Efɔ binuu, ekromɔ bi.” (Luka 2:7) Hɛɛ, “ekromɔ bi” lɛ bashɛ shi—Maria bii ni kɛ́ hooo lɛ amɛyibɔ shɛɔ kpawo lɛ ateŋ klɛŋklɛŋ mɔ. (Mar. 6:3) Shi mɔ nɛɛ baafee srɔto kwraa yɛ amɛteŋ. Jeee akɛ eji Maria kromɔ bi pɛ kɛkɛ, shi eji Yehowa diɛŋtsɛ “bɔɔ nii fɛɛ ateŋ kromɔ bi lɛ,” Nyɔŋmɔ Bi koome lɛ!—Kol. 1:15.

12. Nɛgbɛ Maria kɛ abifao lɛ fɔ̃, ni te shihilɛ ni tee nɔ diɛŋtsɛ lɛ yɔɔ srɔto kwraa yɛ bɔ ni afeɔ Yesu fɔmɔ he shwɛmɔi, nitɛŋmɔi, kɛ ehe nibii krokomɛi ahaa lɛ he tɛŋŋ?

12 Beni efɔ sɛɛ dani Luka amaniɛbɔɔ lɛ kɛ sane ni ale waa nɛɛ fata he akɛ: “Eŋɔ mama ebala ehe, ni eŋɔ lɛ eŋmɛ kooloi aniyenii anɔ̃ mli.” (Luka 2:7) Awoɔ Yesu fɔmɔ lɛ he shwɛmɔi, nitɛŋmɔi, kɛ ehe nibii krokomɛi lɛ ahe fe nine yɛ je lɛŋ fɛɛ. Shi susumɔ nɔ ni tee nɔ diɛŋtsɛ lɛ he okwɛ. Maria ŋɔ abifao lɛ eŋmɛ kooloi aniyenii anɔ̃ mli. Kaimɔ akɛ weku lɛ yato kooloi atsu mli, he ko ni yɛ nakai  beaŋ kɛ amrɔ nɛɛ fɛɛ po lɛ, ebaawa akɛ kɔɔyɔɔ lɛŋ baaje ŋma, loo jɛmɛ baafee falefale lɛ. Anɔkwa, fɔlɔi ko kwraa bɛ ni baahala he ko tamɔ nɛkɛ akɛ afɔ amɛbi yɛ jɛmɛ, ja he ko bɛ! Fɔlɔi babaoo yɛ ni amɛbii ahilɛkɛhamɔ kã amɛtsui nɔ waa. Belɛ kwɛ bɔ ni Maria kɛ Yosef baasumɔ tsɔ akɛ amɛbaaha Nyɔŋmɔ Bi lɛ hilɛkɛhamɔ akã amɛtsui nɔ aha!

13. (a) Mɛɛ gbɛ nɔ Maria kɛ Yosef fee nɔ fɛɛ nɔ ni amɛbaanyɛ yɛ amɛshihilɛ lɛ naa? (b) Mɛɛ gbɛ nɔ fɔlɔi ni hiɛ kã shi ni yɔɔ ŋmɛnɛ lɛ baanyɛ amɛkɛ otii ni Yosef kɛ Maria kɛmamɔ amɛhiɛ lɛ eko amamɔ amɛhiɛ?

13 Shi, amɛhaaa shihilɛ ni esaaa ni amɛyaje mli lɛ awo amɛ mlifu; amɛfee nɔ fɛɛ nɔ ni amɛbaanyɛ yɛ amɛshihilɛ lɛ naa. Ákɛ nɔkwɛmɔnɔ lɛ, kadimɔ akɛ Maria diɛŋtsɛ kwɛ abifao lɛ, eŋɔ mama ebala ehe jogbaŋŋ, no sɛɛ lɛ eŋɔ lɛ eŋmɛ kooloi aniyenii anɔ̃ lɛ mli blɛoo koni ewɔ, ni ekwɛ koni fɛ̃i akaye lɛ ni efee shweshweeshwe hu. Maria haaa shihilɛ ni amɛyɔɔ mli nakai beaŋ lɛ aye etsui, moŋ lɛ ebɔ mɔdɛŋ efee nɔ fɛɛ nɔ ni ebaanyɛ kɛkwɛ ebi lɛ. Maria kɛ Yosef fɛɛ le hu akɛ Nyɔŋmɔ he nilee ni amɛkɛ baatsɔse amɛbi nɛɛ baafee nɔ ni he hiaa fe fɛɛ ni amɛbaanyɛ amɛfee amɛha lɛ. (Nyɛkanea 5 Mose 6:6-8.) Nakai nɔŋŋ ŋmɛnɛ lɛ, fɔlɔi ni hiɛ kã shi lɛ hu haa Nyɔŋmɔ he nilee ni amɛkɛ baatsɔse amɛbii lɛ feɔ nɔ ni he hiaa fe fɛɛ yɛ jeŋ ni abuuu Nyɔŋmɔ sɔɔmɔ akɛ nɔ ko ni he hiaa nɛɛ mli lɛ.

Saramɔ ni Wo Amɛ Hewalɛ

14, 15. (a) Mɛni hewɔ tookwɛlɔi lɛ shwe waa akɛ amɛbaana abifao lɛ? (b) Beni tookwɛlɔi lɛ yana Yesu yɛ kooloi atsu lɛ mli sɛɛ lɛ, mɛni amɛfee?

14 Trukaa lɛ, hoofeemɔ ko batsake dioofeemɔ shihilɛ ni yɔɔ jɛmɛ lɛ. Tookwɛlɔi kɛ miishɛɛ ke yuu kɛbote kooloi atsu lɛ mli koni amɛyakwɛ weku lɛ, titri lɛ abifao lɛ. Hii nɛɛ ená miishɛɛ waa, ni amɛhiɛ efee ŋmɔlɔŋmɔlɔ naakpa. Amɛkɛ oyaiyeli shi he ni amɛkwɛɔ amɛtoi lɛ yɛ gɔji lɛ amasɛi lɛ kɛba. * Amɛgba abifao lɛ fɔlɔi ni hiɛ efee amɛ yaa lɛ niiashikpamɔ ni yɔɔ naakpɛɛ ni amɛná etsɛko tsɔ lɛ. Nakai nyɔɔŋ lɛŋ, beni amɛyɔɔ gɔŋ lɛ masɛi ni amɛshiɔ kpe lɛ, ŋwɛi bɔfo ko bapue trukaa yɛ amɛhiɛ. Yehowa anunyam kpɛ́ kɛbɔle amɛ fɛɛ, ni ŋwɛi bɔfo lɛ kɛɛ amɛ akɛ afɔ Kristo, loo Mesia lɛ, yɛ Betlehem bianɛ. Amɛbaana abifao lɛ ni aŋɔ mama abala ehe ni kã kooloi aniyenii anɔ̃ mli. Kɛkɛ ni nɔ ko ni yɔɔ naakpɛɛ po fe enɛ ba—ŋwɛi bɔfoi ata kple ko bafata bɔfo lɛ he, ni amɛlá kɛjie Nyɔŋmɔ yi!—Luka 2:8-14.

 15 Ebɛ naakpɛɛ mɔ akɛ tookwɛlɔi nɛɛ ahe tswa shi kɛtee Betlehem! Ekolɛ, amɛná miishɛɛ waa beni amɛna gbekɛ ŋmɔŋ lɛ kã kooloi aniyenii anɔ̃ mli taakɛ ŋwɛi bɔfo lɛ kɛɛ amɛ lɛ. Amɛhaaa sanekpakpa nɛɛ ahi amɛ pɛ amɛyiŋ. ‘Amɛjaje sane ni agba amɛ lɛ amɛtsɔɔ. Ni mɛi fɛɛ ni nu lɛ anaa kpɛ amɛhe yɛ nɔ ni tookwɛlɔi lɛ gba amɛ lɛ hewɔ.’ (Luka 2:17, 18) Ekã shi faŋŋ akɛ, jamɔŋ hiɛnyiɛlɔi ni yɔɔ nakai beaŋ lɛ ebuuu tookwɛlɔi. Shi eyɛ faŋŋ akɛ, Yehowa hiɛ sɔ hii anɔkwafoi heshibalɔi nɛɛ waa. Shi te saramɔ nɛɛ sa Maria he eha tɛŋŋ?

Eyɛ faŋŋ akɛ, Yehowa hiɛ sɔ tookwɛlɔi anɔkwafoi heshibalɔi lɛ waa

16. Mɛni Maria fee kɛtsɔɔ akɛ ejwɛŋɔ nii anɔ lɛɛlɛŋ, ni mɛɛ nɔ titri ha enyɛ ewaje ehemɔkɛyeli lɛ?

16 Eyɛ mli akɛ, ekolɛ fɔmɔ mli jaramɔ lɛ ha etɔ Maria moŋ, shi ebo amɛwiemɔi lɛ fɛɛ toi jogbaŋŋ. Efee nɔ ni fe nakai po: “Maria kɛ nɛkɛ wiemɔi nɛɛ fɛɛ to, ni esusuɔ he yɛ etsui mli.” (Luka 2:19) Anɔkwa, oblayoo nɛɛ jwɛŋɔ nii anɔ lɛɛlɛŋ. Ele akɛ sane ni ŋwɛi bɔfo lɛ kɛha lɛ he hiaa waa. Yehowa, e-Nyɔŋmɔ lɛ miisumɔ ni Maria ale mɔ ni ebinuu lɛ ji kɛ bɔ ni ehe hiaa waa ha. No hewɔ lɛ, jeee sane lɛ toi kɛkɛ Maria bo. Ekɛ wiemɔi nɛɛ fɛɛ to etsui mli, koni ejwɛŋ nɔ be kɛ beaŋ yɛ nyɔji kɛ afii ni baaba lɛ amli. Enɛ ji nɔ titri ni ha Maria nyɛ ewaje ehemɔkɛyeli lɛ ewala beaŋ fɛɛ lɛ.—Nyɛkanea Hebribii 11:1.

Maria bo tookwɛlɔi lɛ awiemɔi lɛ fɛɛ toi jogbaŋŋ ni ekɛto etsuiŋ

17. Te wɔbaafee tɛŋŋ wɔkase Maria nɔkwɛmɔnɔ lɛ yɛ nibii ni kɔɔ mumɔŋ anɔkwalei ahe lɛ ahe?

17 Ani obaakase Maria nɔkwɛmɔnɔ lɛ? Yehowa kɛ anɔkwalei babaoo ni he hiaa waa ewo e-Wiemɔ lɛ mli obɔ. Shi anɔkwalei nɛɛ ahe baŋ sɛɛnamɔ kɛhaŋ wɔ, ja wɔsusu he, ni wɔjwɛŋ nɔ. Wɔfeɔ nakai kɛtsɔ Biblia lɛ ni wɔkaneɔ daa lɛ nɔ—jeee akɛ wɔbaakane lɛ tamɔ wolo folo ko kɛkɛ, shi moŋ ákɛ Wolo ni ajɛ Nyɔŋmɔ mumɔ lɛŋ aŋma. (2 Tim. 3:16) No sɛɛ lɛ, taakɛ Maria fee lɛ, esa akɛ wɔkɛ Nyɔŋmɔ daaŋ wiemɔi lɛ ato wɔtsuiiaŋ ni wɔjwɛŋ nɔ jogbaŋŋ. Kɛ́ wɔjwɛŋ nibii ni wɔkaneɔ yɛ Biblia lɛ mli lɛ anɔ, ni wɔsusu gbɛi ni wɔbaanyɛ wɔtsɔ nɔ wɔkɛ Yehowa ŋaawoi atsu nii jogbaŋŋ lɛ ahe lɛ, ebaawaje wɔhemɔkɛyeli lɛ koni emli aya nɔ awa.

Saji Krokomɛi ni Ekɛbaato

18. (a) Beni afɔ Yesu gbii komɛi asɛɛ lɛ, mɛɛ gbɛ nɔ Maria kɛ Yosef tsɔ amɛye Mose Mla lɛ nɔ? (b) Mɛni afɔle ni Yosef kɛ Maria kɛyaha yɛ sɔlemɔwe lɛ tsɔɔ yɛ amɛshika shidaamɔ he?

18 Beni abifao lɛ ná gbii kpaanyɔ lɛ, Maria kɛ Yosef ha afo lɛ  ketia taakɛ Mose Mla lɛ biɔ ni afee lɛ, ni amɛwo lɛ gbɛ́i akɛ Yesu taakɛ afã amɛ lɛ. (Luka 1:31) Beni ená gbii 40 lɛ, amɛkɛ lɛ jɛ Betlehem kɛtee sɔlemɔwe ni yɔɔ Yerusalem, ni kɛ Betlehem teŋ jɛkɛmɔ aaafee kilomitai 10 lɛ; ni amɛkɛ hetsuumɔ afɔle ni Mla lɛ ŋmɛɔ gbɛ akɛ ohiafoi kɛbaha, ni ji kosɛɛ okpoi enyɔ loo shĩa okpoi enyɔ lɛ yaha. Kɛji efee amɛ hiɛgbele akɛ amɛnyɛɛɛ amɛkɛ gwantɛŋ loo kosɛɛ okpoi ni fɔlɔi krokomɛi kɛhaa lɛ ayaha lɛ po lɛ, amɛkɛ hiɛgbele nɛɛ fɛɛ fɔ̃ afã. Shi nɔ ni he hiaa ji akɛ, beni amɛyɔɔ jɛmɛ lɛ awo amɛ hewalɛ waa.—Luka 2:21-24.

19. (a) Mɛɛ gbɛ nɔ Simeon gba Maria saji babaoo koni ekɛto etsui mli? (b) Mɛni Hana fee beni ena Yesu lɛ?

19 Nuu onukpa ko ni atsɛɔ lɛ Simeon lɛ tsi bɛŋkɛ amɛ, ni ekɛɛ Maria saji babaoo koni ekɛto etsui mli. No mli lɛ, awo nuu nɛɛ shi akɛ, ebaana Mesia lɛ dani ebaagbo, ni Yehowa mumɔ krɔŋkrɔŋ lɛ ha ele akɛ abifao Yesu lɛ ji Yiwalaherelɔ ni agba ehe sane afɔ̃ shi lɛ. Simeon bɔ Maria kɔkɔ hu akɛ gbi ko baaba ni ebaapiŋ waa. Ekɛɛ Maria baanu he tamɔ nɔ ni akɛ kakla kakadaŋŋ ko egbu emli. (Luka 2:25-35) Eyɛ mli akɛ, nakai wiemɔi lɛ bɔ lɛ kɔkɔ yɛ jaramɔ shihilɛ ko ni baaba lɛ he moŋ, shi ekolɛ beni jaramɔ bei nɛɛ ba yɛ afii 30 sɛɛ lɛ, no ye ebua Maria ni enyɛ edamɔ naa. Simeon sɛɛ lɛ, gbalɔyoo ko ni atsɛɔ lɛ Hana lɛ na abifao Yesu lɛ, ni ewie ehe etsɔɔ mɛi fɛɛ ni kwɛɔ Yerusalem kpɔ̃mɔ lɛ gbɛ lɛ.—Nyɛkanea Luka 2:36-38.

Maria kɛ Yosef nine shɛ hewalɛwoo kple nɔ yɛ Yehowa sɔlemɔwe ni yɔɔ Yerusalem lɛ

20. Mɛni hewɔ ehi jogbaŋŋ akɛ Yosef kɛ Maria kpɛ amɛyiŋ akɛ amɛkɛ Yesu baaya sɔlemɔwe ni yɔɔ Yerusalem lɛ?

 20 Kwɛ bɔ ni ehi jogbaŋŋ akɛ Yosef kɛ Maria kpɛ amɛyiŋ akɛ amɛkɛ amɛbi lɛ baaya Yehowa sɔlemɔwe ni yɔɔ Yerusalem lɛ! Nɔ ni amɛfee nɛɛ ha amɛbi lɛ je wala beaŋ fɛɛ nifeemɔ ko ni baaha eya Yehowa sɔlemɔwe lɛ daa lɛ shishi. Beni amɛyɔɔ jɛmɛ lɛ, amɛkɛ nɔ ni yɔɔ amɛnyɛmɔ mli fɛɛ lɛ ha Yehowa, ni atsɔɔ amɛ nii, ni awo amɛ hewalɛ. Ŋwanejee ko bɛ he akɛ, beni Maria shiɔ sɔlemɔwe lɛ eyaa lɛ, no mli lɛ ehemɔkɛyeli lɛ mli ewa waa, ni etsuiŋ eyi obɔ kɛ anɔkwalei ni he hiaa ni ebaajwɛŋ nɔ koni ekɛ mɛi krokomɛi agba he sane.

21. Te wɔbaafee tɛŋŋ wɔha wɔhemɔkɛyeli lɛ mli awa waa taakɛ Maria fee lɛ?

21 Kwɛ bɔ ni eyɔɔ fɛo waa akɛ ŋmɛnɛ lɛ, abaana akɛ fɔlɔi miikase nakai nɔkwɛmɔnɔ lɛ. Yɛ Yehowa Odasefoi ateŋ lɛ, fɔlɔi kɛ amɛbii yaa Kristofoi akpeei be fɛɛ be. Fɔlɔi nɛɛ kɛ nɔ ni yɔɔ amɛnyɛmɔ mli fɛɛ lɛ haa, ni amɛwoɔ amɛnyɛmimɛi Kristofoi lɛ hewalɛ yɛ kpeei nɛɛ ashishi. Ni beni amɛshiɔ kpeei nɛɛ ashishi lɛ, awaje amɛ, amɛná miishɛɛ, ni amɛyimɔ obɔbɔ kɛ nibii kpakpai ni amɛbaanyɛ amɛgba mɛi krokomɛi. Kwɛ bɔ ni eyɔɔ miishɛɛ akɛ wɔkɛ amɛ baaya kpeei nɛɛ! Kɛ́ wɔfee nakai lɛ, wɔbaana akɛ wɔhemɔkɛyeli lɛ mli baawa waa taakɛ eba lɛ yɛ Maria gbɛfaŋ lɛ.

^ kk. 7 Kadimɔ srɔtofeemɔ ni yɔɔ gbɛfãa nɛɛ kɛ nɔ ni Maria fã mra mli lɛ teŋ. Nakai amaniɛbɔɔ lɛ kɛɛ akɛ: ‘Maria te shi eyiŋ’ ni eyasara Elisabet. (Luka 1:39) Nakai beaŋ lɛ, akɛni atsɛ Maria he baa shi eboteko gbalashihilɛ mli hewɔ lɛ, ekolɛ efã nakai gbɛ lɛ ni ebiii Yosef gbɛ. Beni amɛbote gbalashihilɛ mli sɛɛ lɛ, atsɔɔ mli akɛ Yosef ji mɔ ni ha amɛfã nakai gbɛ lɛ, shi jeee Maria.

^ kk. 10 Nakai beaŋ lɛ, nɔ ni afɔɔ feemɔ ji akɛ maji lɛ toɔ tsu ko he gbɛjianɔ amɛhaa gbɛfãlɔi koni amɛyato jɛmɛ.

^ kk. 14 Akɛni tookwɛlɔi nɛɛ yɛ ŋa nɔ amɛmiibu amɛtooi ahe hewɔ lɛ, sane nɛɛ maa nɔ mi akɛ Biblia be he akɔntaabuu lɛ ja akɛ: Afɔɔɔ Kristo yɛ Afuabe loo December, be mli ni tookwɛlɔi haa amɛtooi hiɔ shĩa lɛ, shi moŋ afɔ lɛ yɛ Antɔŋ loo October shishijee gbɛ.