Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Amɛhemɔkɛyeli Lɛ

Naamuu

Naamuu

‘Nyɛkɔa mɛi ni tsɔɔ hemɔkɛyeli kɛ tsuishitoo nɔ náa shiwoi lɛ anane.’​—HEBRIBII 6:12.

1, 2. Mɛni hewɔ ehe hiaa waa akɛ wɔbaatswa wɔhemɔkɛyeli lɛ wɔma shi amrɔ nɛɛ nɔŋŋ lɛ? Okɛ nɔkwɛmɔnɔ aha.

HEMƆKƐYELI. Eji wiemɔ kpakpa ko ni damɔ shi kɛha su ko ni asumɔɔ waa. Kɛlɛ, kɛ́ wɔna loo wɔnu nakai wiemɔ lɛ, ebaahi jogbaŋŋ akɛ wɔbaasusu wiemɔ kroko hu he: “Atsu he nii oya nɔŋŋ!” Kɛ́ wɔbɛ hemɔkɛyeli lɛ, esa akɛ wɔhe afee oya kɛtao eko nɔŋŋ. Ni kɛ́ wɔyɛ hemɔkɛyeli hu lɛ, ehe miihia ni wɔkɛ hiɛdɔɔ abu he ni wɔwaje lɛ. Mɛni hewɔ?

2 Ŋɔɔ lɛ akɛ onyiɛ kɛmiifo shia ŋa shwaŋŋ ko. Kumai eye bo waa aahu akɛ onaaa nɔ ni obaafee. Kɛ́ oná nu lɛ eko lɛ, esa akɛ obaa yi jogbaŋŋ kɛjɛ hulu lɛ he. No sɛɛ lɛ, esa akɛ obɔ mɔdɛŋ oná nu lɛ eko owo onu tɔ lɛ mli koni enyɛ ekɛbo ayashɛ he ni oyaa lɛ. Ŋmɛnɛ lɛ, wɔyɛ mumɔŋ shia ŋa ko nɔ, jeŋ ko ni hemɔkɛyeli krɔŋŋ—tamɔ nakai nu lɛ—he esɛ̃ lɛ mli, ni hemɔkɛyeli ni tamɔ nu nɛɛ tãa oyayaayai, ni ebiɔ ni abaa yi ni aná eko afata he koni ekatã. Ebiɔ ni wɔkɛ oyaiyeli atsu wɔhiamɔ nii nɛɛ ahe nii; taakɛ bɔ ni kɛ́ wɔnaaa nu wɔnu lɛ wɔnyɛŋ wɔhi shi lɛ, nakai nɔŋŋ kɛ́ wɔbɛ hemɔkɛyeli lɛ, wɔbaagboi yɛ mumɔŋ.—Rom. 1:17.

3. Mɛni Yehowa kɛha wɔ koni eye ebua wɔ kɛtswa wɔhemɔkɛyeli lɛ wɔma shi, ni mɛɛ nibii enyɔ esa akɛ wɔkai ni wɔfee?

3 Yehowa le bɔ ni hemɔkɛyeli he hiaa wɔ waa ha, ni ele bɔ ni ŋmɛnɛ lɛ ebɛ mlɛo kɛha wɔ akɛ wɔbaatswa wɔhemɔkɛyeli lɛ wɔma shi, koni wɔya nɔ wɔhiɛ mli hu. Ŋwanejee ko bɛ he akɛ, no hewɔ ni eha wɔ mɛi komɛi koni wɔkase amɛnɔkwɛmɔnii lɛ. Yehowa kɛ mumɔ tsirɛ bɔfo Paulo ni eŋma akɛ: ‘Nyɛkɔa mɛi ni tsɔɔ hemɔkɛyeli kɛ tsuishitoo nɔ náa shiwoi lɛ anane.’ (Heb. 6:12) No hewɔ ni Yehowa gbɛjianɔtoo lɛ ewo wɔ hewalɛ koni wɔmia wɔhiɛ waa ni wɔkase hii kɛ yei anɔkwafoi tamɔ mɛi ni wɔsusu amɛhe yɛ wolo nɛɛ mli lɛ ahemɔkɛyeli lɛ. Shi, mɛni esa akɛ wɔfee amrɔ nɛɛ mɔ? Ha wɔkai nibii enyɔ nɛɛ: (1) Esa akɛ wɔya nɔ wɔwaje wɔhemɔkɛyeli lɛ; (2) esa akɛ wɔha wɔhiɛ ahi wɔhiɛnɔkamɔ lɛ nɔ daa.

4. Mɛni Satan efee kɛtsɔɔ akɛ eji hemɔkɛyeli he henyɛlɔ, kɛlɛ mɛni hewɔ esaaa akɛ wɔnijiaŋ jeɔ wui lɛ?

4 Yaa nɔ owaje ohemɔkɛyeli lɛ. Hemɔkɛyeli yɛ henyɛlɔ kpanaku ko, lɛ ji Satan. Jeŋ nɛɛ nɔyelɔ lɛ etsake nibii agbɛjianɔtoo nɛɛ hiɛ, ni eha hemɔkɛyeli ebafee tamɔ nu yɛ shia ŋa ko nɔ. Satan he wa kwraa fe wɔ. Ani esa akɛ wɔnu he akɛ wɔnyɛŋ wɔná hemɔkɛyeli, koni wɔha emli awa? Dabida! Yehowa ji Naanyo ni fe fɛɛ kɛha mɛi ni bɔɔ mɔdɛŋ koni amɛná hemɔkɛyeli krɔŋŋ lɛ. Ewoɔ wɔ shi akɛ, ebaaye ebua wɔ koni wɔte shi wɔwo Abonsam, ni ebaajo wɔnaa foi po! (Yak. 4:7) Kɛ́ wɔheɔ be daa gbi kɛwajeɔ wɔhemɔkɛyeli lɛ, ni wɔtswaa wɔmaa shi hu lɛ, no tsɔɔ akɛ  wɔmiite shi wɔmiiwo Abonsam. Te wɔbaafee tɛŋŋ wɔfee nakai?

5. Mɛɛ gbɛ nɔ hii kɛ yei ni yɔɔ hemɔkɛyeli ni Biblia lɛ wie amɛhe lɛ tsɔ amɛná amɛhemɔkɛyeli lɛ? Tsɔɔmɔ mli.

5 Taakɛ wɔna lɛ, afɔɔɔ hii kɛ yei ni jie hemɔkɛyeli kpo ni atsĩtsĩi amɛ tã yɛ Biblia lɛ mli lɛ akɛ mɛi ni yɔɔ hemɔkɛyeli. Amɛkɛ amɛshihilɛ tsɔɔ akɛ hemɔkɛyeli ji Yehowa mumɔ krɔŋkrɔŋ lɛ yibii lɛ fã ko. (Gal. 5:22, 23) Amɛsɔle amɛbi yelikɛbuamɔ, ni no ha Yehowa tee nɔ ewaje amɛhemɔkɛyeli lɛ. Nyɛhaa wɔfea taakɛ amɛfee lɛ, ni wɔkai akɛ Yehowa kɛ emumɔ lɛ haa mɛi ni biɔ lɛ, ní amɛhiɔ shi yɛ amɛnibimɔ lɛ naa lɛ. (Luka 11:13) Ani nibii krokomɛi hu yɛ ni wɔbaanyɛ wɔfee?

6. Te wɔbaafee tɛŋŋ wɔná Biblia mli amaniɛbɔi ni wɔkaneɔ lɛ ahe sɛɛ jogbaŋŋ lɛ?

6 Wɔsusu mɛi ni hemɔkɛyeli sa kadimɔ waa nɛɛ ateŋ fioo komɛi ahe yɛ wolo nɛɛ mli. Mɛi krokomɛi babaoo hu yɛ! (Nyɛkanea Hebribii 11:32.) Nibii babaoo yɛ ni wɔbaanyɛ wɔle yɛ amɛteŋ mɔ fɛɛ mɔ he—enɛ baabi ni wɔkɛ sɔlemɔ kɛ tsui kpakpa akase amɛhe nii. Kɛ́ wɔkane Biblia mli amaniɛbɔi ni kɔɔ mɛi ni jie hemɔkɛyeli kpo lɛ ahe lɛ hiɛaŋhiɛaŋ ko kɛkɛ lɛ, wɔnyɛŋ wɔtswa wɔ diɛŋtsɛ wɔhemɔkɛyeli wɔma shi. Bɔni afee ni wɔná Biblia mli amaniɛbɔi ni wɔkaneɔ lɛ ahe sɛɛ kɛmɔ shi lɛ, ebaabi ni wɔhé be kɛpɛi nibii ni ba ni ha aŋmala saji lɛ, kɛ shihilɛi ahe ni ekɔɔ lɛ amli. Kɛ́ wɔha ehi wɔjwɛŋmɔŋ be fɛɛ be akɛ nakai hii kɛ yei lɛ hu ji ‘gbɔmɛi tamɔ wɔ nɔŋŋ’ lɛ, wɔbuŋ amɛnɔkwɛmɔnii lɛ akɛ nɔ ko ni aŋmala kɛkɛ. (Yak. 5:17) Kɛ́ wɔkɛ wɔhe wo amɛshihilɛi amli lɛ, wɔbaana bɔ ni ekolɛ amɛnu he amɛha beni amɛkɛ kai kɛ naagbai ni tamɔ wɔnɔ̃ lɛ kpe lɛ.

7-9. (a) Eji hii kɛ yei anɔkwafoi ni awie amɛhe yɛ Biblia lɛ mli lɛ ateŋ mɛi komɛi ná hegbɛ ni wɔná ŋmɛnɛ kɛsɔmɔɔ Yehowa lɛ kulɛ, te amɛbaafee amɛnii amɛha tɛŋŋ? (b) Mɛni hewɔ esa akɛ wɔwaje wɔhemɔkɛyeli lɛ kɛtsɔ wɔyiŋkpɛi kɛ wɔnifeemɔi anɔ lɛ?

7 Kɛfata he lɛ, wɔtsɔɔ wɔyiŋkpɛi kɛ wɔnifeemɔi anɔ wɔwajeɔ wɔhemɔkɛyeli. Ejaakɛ, “hemɔkɛyeli ni nitsumɔi bɛ he lɛ ji hemɔkɛyeli gbonyo.” (Yak. 2:26) Eji atuu nitsumɔ ni Yehowa kɛha wɔ ŋmɛnɛ akɛ wɔtsu lɛ awo hii kɛ yei ni wɔsusu amɛhe nɛɛ adɛŋ kulɛ, kwɛ bɔ ni amɛmii baashɛ amɛhe waa aha!

8 Ákɛ nɔkwɛmɔnɔ lɛ, eji akɛɛ Abraham akɛ ebaanyɛ ekɛ mɛi ni jáa Yehowa ni ato amɛhe gbɛjianɔ lɛ afee ekome kɛjá yɛ Maŋtsɛyeli Asai fɛfɛji amli kɛ kpeei wuji ashishi, hei ni asusuɔ shiwoi ni ‘ena yɛ shɔŋŋ’ ni agbalaa mli hu fitsofitso yɛ lɛ, shi jeee tɛi ni ato kɛfee afɔleshãa latɛi yɛ ŋa nɔ lɛ amli kulɛ, te ebaafee enii eha tɛŋŋ? (Nyɛkanea Hebribii 11:13.) Ni eji beni Elia bɔɔ mɔdɛŋ esɔmɔɔ Yehowa yɛ maŋtsɛ yiwalɔ hemɔkɛyeli kwalɔ lɛ shishi lɛ, akɛɛ lɛ akɛ eyasara mɛi yɛ amɛshĩai amli ni ekɛ saji ni baaha amɛná hiɛnɔkamɔ aha amɛ yɛ toiŋjɔlɛ mli, shi jeee ni eyagbe Baal gbalɔi yiwalɔi lɛ kulɛ, te ebaafee enii eha tɛŋŋ? Kulɛ, ani hii kɛ yei hemɔkɛyeli mlihiɛlɔi ni Biblia lɛ tsĩtsĩi amɛ tã nɛɛ ahe efeŋ oya kɛkpɛlɛŋ nɔ akɛ amɛbaaja Yehowa taakɛ wɔfeɔ ŋmɛnɛ lɛ?

 9 Belɛ, nyɛhaa wɔyaa nɔ wɔwajea wɔhemɔkɛyeli lɛ kɛtsɔ wɔyiŋkpɛi kɛ wɔnifeemɔi anɔ. Nakai ni wɔbaafee lɛ tsɔɔ akɛ, wɔkɛ hii kɛ yei hemɔkɛyeli mlihiɛlɔi ni awie amɛhe yɛ Nyɔŋmɔ Wiemɔ ni ajɛ mumɔŋ aŋma lɛ mli lɛ anɔkwɛmɔnii lɛ miitsu nii. Taakɛ atsĩ tã yɛ wolo nɛɛ Hiɛkpamɔ lɛ mli lɛ, wɔbaanu he oookɛɛ amɛji wɔnanemɛi kpaakpa. Kɛlɛ etsɛŋ, wɔbaana nɛkɛ mɛi nɛɛ kɛ wɔhiŋmɛi, ni wɔkɛ amɛ baafee nanemɛi diɛŋtsɛ.

10. Mɛɛ miishɛɛ wɔbaaná yɛ Paradeiso?

10 Yaa nɔ oha ohiɛ ahi ohiɛnɔkamɔ lɛ nɔ. Hii kɛ yei anɔkwafoi lɛ kɛ amɛhiɛ fɔ̃ɔ hiɛnɔkamɔ ni Nyɔŋmɔ kɛhaa lɛ nɔ, ni no wajeɔ amɛ. Ani ofeɔ nakai? Ákɛ nɔkwɛmɔnɔ lɛ, feemɔ he mfoniri okwɛ miishɛɛ ni obaaná kɛ́ okɛ Nyɔŋmɔ tsuji anɔkwafoi lɛ kpe beni ‘atee jalɔi ashi’ kɛba wala mli ekoŋŋ lɛ. (Nyɛkanea Bɔfoi lɛ Asaji 24:15.) Mɛɛ saji komɛi nɛkɛ obaasumɔ ni obi amɛ?

11, 12. Yɛ jeŋ hee lɛ mli lɛ, mɛɛ saji obaasumɔ ni obi (a) Habel? (b) Noa? (d) Abraham? (e) Rut? (ɛ) Abigail? (f) Ester?

11 Kɛ́ okɛ Habel kpe lɛ, ani obaasumɔ ni obi lɛ bɔ ni no mli lɛ efɔlɔi yɔɔ? Aloo ekolɛ obaabi akɛ: “Ani okɛ nakai bɔfoi ni buɔ gbɛ ni yaa Eden naa lɛ gba sane? Ani amɛjie naa?” Ni kɛ́ okɛ Noa hu kpe lɛ? Ekolɛ obaabi lɛ akɛ: “Ani oshe Oblaŋi Agboi lɛ agbeyei? Te ofee tɛŋŋ okwɛ kooloi lɛ anɔ yɛ nakai afi sɔŋŋ ni nyɛye yɛ adeka lɛ mli lɛ?” Kɛ́ okɛ Abraham kpe lɛ, ekolɛ obaabi lɛ akɛ: “Ani okɛ Shem ná sharamɔ ko? Namɔ tsɔɔ bo Yehowa he nii? Ani ebawa kɛha bo akɛ obaashi Ur?”

12 Nakai nɔŋŋ obaanyɛ osusu saji komɛi ni obaasumɔ ni obi yei anɔkwafoi ni atee amɛshi lɛ ahe. “Rut, mɛni ha obasɔmɔ Yehowa?” “Abigail, ani oshe gbeyei akɛ obaaha Nabal ale bɔ ni oye obua David lɛ?” “Ester, beni amaniɛ ni Biblia lɛ bɔ yɛ okɛ Mordekai he lɛ ba naagbee lɛ, mɛni ba?”

13. (a) Mɛɛ saji komɛi ekolɛ, mɛi ni abaatee amɛ shi lɛ baasumɔ ni amɛbi bo? (b) Te ohiɛnɔkamɔ akɛ okɛ hii kɛ yei anɔkwafoi ni hi shi yɛ blema lɛ baakpe lɛ haa onuɔ he ohaa tɛŋŋ?

13 Ŋwanejee ko bɛ he akɛ, hii kɛ yei anɔkwafoi nɛɛ hu yɛ saji babaoo ni amɛbaasumɔ ni amɛbi bo. Kwɛ bɔ ni ebaafee miishɛɛ akɛ obaagba amɛ bɔ ni nibii tee nɔ eha yɛ naagbee gbii nɛɛ amli, kɛ bɔ ni Yehowa jɔɔ ewebii lɛ yɛ jaramɔ bei lɛ amli lɛ! Ekã shi faŋŋ akɛ, kɛ́ amɛná amɛle bɔ ni Yehowa ha eshiwoi lɛ fɛɛ ba mli lɛ, amɛmii baashɛ amɛhe waa. Yɛ jeŋ hee ni baa lɛ mli lɛ, ehe ebahiaŋ ni wɔfee Nyɔŋmɔ tsuji ni kpɛtɛ ehe ni aŋmala amɛhe saji yɛ Biblia lɛ mli lɛ ahe mfoniri yɛ wɔjwɛŋmɔŋ dɔŋŋ. Amɛkɛ wɔ fɛɛ baahi Paradeiso! No hewɔ lɛ, feemɔ nɔ fɛɛ nɔ ni obaanyɛ bianɛ koni oha mɛi nɛɛ afee mɛi ni yɔɔ diɛŋtsɛ kɛha bo. Yaa nɔ okase amɛhemɔkɛyeli lɛ. Yaa nɔ okɛ amɛ asɔmɔ Yehowa akɛ onanemɛi kpaakpa kɛya naanɔ!