Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Amɛhemɔkɛyeli Lɛ

 YITSO NƐƐHU

Efee Enii yɛ Hiɛshikamɔ Mli

Efee Enii yɛ Hiɛshikamɔ Mli

1-3. (a) Te fee tɛŋŋ ni oshara ko ba Abigail we lɛ nɔ lɛ? (b) Mɛni wɔbaakase yɛ yoo ni sa kadimɔ waa nɛɛ he?

ABIGAIL kwɛ oblanyo lɛ hiɛ ni ena akɛ gbeyei emɔ lɛ. Ŋmiŋmi emɔ lɛ waa—yɛ yiŋtoo kpakpa hewɔ. Oshara ko ni yɔɔ hiɛdɔɔ miiba. Tabilɔi aaafee 400 nyiɛ gbɛ kɛmiiba nakai beaŋ nɔŋŋ, amɛtswa amɛfai shi akɛ amɛbaagbe nuu fɛɛ nuu ni yɔɔ Abigail wu Nabal we lɛ. Mɛni hewɔ?

2 Enɛ fɛɛ jɛ Nabal. Eyajieee bulɛ kpo, ni eye yitsoŋwalɛ sane taakɛ efɔɔ feemɔ lɛ. Shi yɛ shihilɛ nɛɛ mli lɛ, ejɛ mɔ ko ni kulɛ esaaa akɛ ejɛɔ lɛ—tabilɔi anɔkwafoi ni atsɔse amɛ jogbaŋŋ lɛ ahiɛnyiɛlɔ ni asumɔɔ esane waa lɛ ji mɔ ni ejɛ lɛ. Amrɔ nɛɛ Nabal oblahii lɛ eko, ekolɛ etookwɛlɔi lɛ eko eba Abigail ŋɔɔ kɛ hiɛnɔkamɔ akɛ Abigail baatsu shihilɛ lɛ he nɔ ko kɛbaa amɛyi. Shi mɛni po yoo kome baanyɛ afee ashi tabilɔi nɛɛ?

Mɛni po yoo kome baanyɛ afee ashi tabilɔi nɛɛ?

3 Klɛŋklɛŋ kwraa lɛ, ha wɔkase yoo ni sa kadimɔ waa nɛɛ he saji komɛi. Namɔ ji Abigail? Te fee tɛŋŋ ni naagba nɛɛ ba? Ni mɛni wɔbaanyɛ wɔkase kɛjɛ ehemɔkɛyeli he nɔkwɛmɔnɔ lɛ mli?

‘Ehe yɛ Fɛo jogbaŋŋ ni Eyɛ Jwɛŋmɔ Hu’

4. Mɛɛ nuu nɛkɛ Nabal ji?

4 Nabal kɛ Abigail jeee gbalashihilɛ mli hefatalɔi ni sa kɛha amɛhe. Nabal yaná yoo kpakpa ni nɔ bɛ, shi Abigail yaná nuu buulu. Anɔkwa, nuu lɛ hiɛ edɛŋ waa. Enɛ ha ena ehe tsɔ, shi te mɛi krokomɛi naa lɛ amɛhaa tɛŋŋ? Biblia lɛ mli fɛɛ lɛ, akɛ wiemɔ ni naa wa ewieee mɔ ko he tamɔ awie Nabal he lɛ. Egbɛ́i lɛ shishi ji “Buulu” loo “Kwashia.” Ani efɔlɔi ji mɛi ni wo lɛ nakai gbɛ́i lɛ beni afɔ lɛ lɛ, aloo ená gbɛ́i nɛɛ yɛ bɔ ni efeɔ enii ehaa lɛ hewɔ? Bɔ fɛɛ bɔ ni sane lɛ ji lɛ, ehi shi yɛ egbɛ́i lɛ naa. Nabal lɛ “nuu  yiŋshalɔ ni, ni enifeemɔ nii hu ehiii.” Eji nuu yitsoŋwalɔ dãatɔlɔ, asheɔ lɛ gbeyei waa, ni asumɔɔɔ esane.—1 Sam. 25:2, 3, 17, 21, 25.

5, 6. (a) Kɛ́ okwɛ lɛ, mɛɛ sui kpakpai Abigail yɔɔ? (b) Mɛni ekolɛ no ha Abigail kɛ nuu yakagbɔmɔ nɛkɛ hi shi lɛ?

5 Esoro Abigail kwraa yɛ Nabal he. Egbɛ́i lɛ shishi ji “Mitsɛ Ená Ehewɔ Miishɛɛ.” Tsɛmɛi babaoo yɛ ni kɛ́ amɛná biyoo fɛfɛo lɛ amɛmii shɛɔ amɛhe, shi tsɛmɛi ni hiɛ kã shi lɛ kɛ́ amɛyɔse amɛbii amligbɛ hefɛo lɛ, amɛmiishɛɛ lɛ faa babaoo. Bei pii lɛ, mɛi ni akɛ kponɔgbɛ hefɛo duroɔ amɛ lɛ enaaa sɛɛnamɔ ni yɔɔ he akɛ amɛbaajie sui kpakpai tamɔ hiɛshikamɔ, nilee, ekãa, loo hemɔkɛyeli kpo. Abigail bɛ nakai kwraa. Biblia lɛ jieɔ eyi yɛ ehe fɛo kɛ bɔ ni ehiɛ kã shi loo eyɔɔ jwɛŋmɔ lɛ hewɔ.Nyɛkanea 1 Samuel 25:3.

6 Ŋmɛnɛ lɛ, mɛi komɛi baabi amɛhe akɛ, ‘Mɛni hewɔ kwraa yoo hiɛshikalɔ tamɔ nɛkɛ kɛ nuu yakagbɔmɔ nɛɛ hi shi?’ Kaimɔ akɛ yɛ Biblia beaŋ lɛ, gbãlai babaoo lɛ, fɔlɔi ji mɛi ni fee amɛha amɛbii lɛ. Ni kɛ́ jeee nakai po lɛ, ehe bahia ni fɔlɔi akpɛlɛ nɔ dani amɛbi kɛ mɔ ko abote gbãla mli. Ani Abigail fɔlɔi kpɛlɛ gbãla nɛɛ nɔ, loo amɛ po amɛto he gbɛjianɔ akɛni amɛnya nii ni Nabal yɔɔ kɛ gbɛ́i ni ehé lɛ he lɛ hewɔ? Ani ohia ni amɛyeɔ lɛ ji nɔ ni nyɛ amɛnɔ ni amɛfee nakai? Bɔ fɛɛ bɔ ni sane lɛ ji lɛ, Nabal ninámɔ lɛ haaa efee wu ni sa kɛha Abigail.

7. (a) Ŋmɛnɛ lɛ, mɛni esaaa akɛ fɔlɔi feɔ kɛ́ amɛmiisumɔ ni amɛha amɛbii lɛ aná jwɛŋmɔ ni ja yɛ gbalashihilɛ he lɛ? (b) Mɛni Abigail tswa efai shi akɛ ebaafee?

7 Fɔlɔi ni hiɛ kã shi lɛ tsɔseɔ amɛbii lɛ koni amɛná jwɛŋmɔ ni ja yɛ gbalashihilɛ he. Amɛwooo amɛbii lɛ hewalɛ koni amɛbote gbalashihilɛ mli yɛ shika hewɔ, ni amɛnyɛɛɛ amɛbii ni darako lɛ anɔ koni amɛje nyiɛmɔ ni tsɔɔ gbalashihilɛ hiɛ lɛ shishi beni amɛshɛko mɛi ni baanyɛ atsu gbalashihilɛ mli sɔ̃i ahe nii. (1 Kor. 7:36) Kɛlɛ, Abigail nyɛɛɛ atsake ejwɛŋmɔ ejaakɛ ebote gbãla lɛ mli momo. Bɔ fɛɛ bɔ ni sane lɛ ji lɛ, ekɛ Nabal ehi shi akɛ ewu, ni etswa efai shi akɛ ebaafee bɔ fɛɛ bɔ ni ebaanyɛ kɛbaa gbãla lɛ yi, ekɔɔɔ he eko bɔ ni shihilɛ lɛ wa ha.

“Ebolɔ Ewo Amɛ”

8. Namɔ Nabal jɛ lɛ lɛ, ni mɛni hewɔ obaakɛɛ akɛ eji nifeemɔ ni jwɛŋmɔ bɛ mli kwraa lɛ?

8 Nabal ewo Abigail shihilɛ lɛ mli wu fe tsutsu lɛ. Nuu ni ejɛ lɛ lɛ jeee mɔ ko mɔ ko akɛ David. Mɔ nɛɛ ji Yehowa tsulɔ anɔkwafo David, mɔ ni gbalɔ Samuel efɔ lɛ mu akɛ maŋtsɛ ni Nyɔŋmɔ ehala ni baaye Saul sɛɛ lɛ. (1 Sam. 16:1, 2, 11-13) David kɛ etabilɔi 600 lɛ yɛ ŋa lɛ nɔ akɛni eejo foi kɛmiijɛ Maŋtsɛ Saul awuŋayelɔ kɛ mɔgbelɔ lɛ dɛŋ lɛ hewɔ.

9, 10. (a) Mɛɛ shihilɛi amli David kɛ etabilɔi lɛ tsomlo yɛ ŋa lɛ nɔ yɛ? (b) Mɛni hewɔ kulɛ esa akɛ Nabal hiɛ asɔ nibii ni David kɛ etabilɔi lɛ fee lɛ? (Kwɛmɔ kuku 10 lɛ shishigbɛ niŋmaa lɛ hu.)

 9 Nabal hi Maon, shi etsu nii yɛ Karmel ni bɛŋkɛ jɛmɛ lɛ, ni ekolɛ eyɛ shikpɔŋ yɛ jɛmɛ. * Nakai maji lɛ kamɔ hei ni kwɔlɔ ni jwɛifɔ yɔɔ; jɛmɛ hi kɛha tooi alɛɛ, ni Nabal yɛ tooi nɛɛ 3,000 sɔŋŋ. Shi maji nɛɛ ahewɔ fɛɛ kãmɔ shi ni ahuko nɔ. Paran ŋa kplanaa lɛ kã maji nɛɛ wuoyigbɛ. Kɛmiiya bokagbɛ lɛ, obaatsɔmɔ shikpɔji ni kãmɔ shi eflo ni jɔi kɛ bui yɔɔ nɔ lɛ anɔ dani obaashɛ Ŋshɔ ni Egbo lɛ he. Kpokpai nɛɛ anɔ David kɛ emɛi lɛ tsomlo yɛ, ni ŋwanejee ko bɛ he akɛ amɛgbo deŋme kɛtao niyenii, ni amɛkɛ shihilɛi ni mli wawai babaoo hu kpe. Amɛkɛ oblahii ni kwɛɔ niiatsɛ Nabal tooi lɛ anɔ lɛ fɔɔ kpee.

10 Te nakai tabilɔi ni tsuɔ nii waa lɛ kɛ tookwɛlɔi lɛ ye ha tɛŋŋ? Kulɛ ewaaa kɛhaa amɛ akɛ amɛbaamɔmɔ toi lɛ eko be fɛɛ be ni amɛsumɔɔ, shi amɛfeee nɔ ko ni tamɔ nakai. Moŋ lɛ, amɛbu Nabal tooi lɛ kɛ etsuji lɛ ahe. (Nyɛkanea 1 Samuel 25:15, 16.) Tooi kɛ tookwɛlɔi fɛɛ kɛ osharai babaoo kpeɔ. No beaŋ lɛ kooloi awuiyelɔi fa, ni akɛni Israel wuoyigbɛ agbói lɛ hu bɛŋkɛ kpaakpa hewɔ lɛ, julɔi kɛ awuiyelɔi jɛɔ hei krokomɛi batutuaa mɛi. *

11, 12. (a) Mɛni yɔɔ shɛɛ ni David tsu akɛyaha Nabal lɛ mli ni tsɔɔ akɛ David jie bulɛ kɛ hiɛshikamɔ kpo? (b) Mɛɛ naagba yɔɔ gbɛ nɔ ni Nabal tsɔ efee enii yɛ David shɛɛ lɛ he lɛ he?

11 Ekã shi faŋŋ akɛ, ebafeŋ mlɛo akɛ abaalɛ tabilɔi nɛɛ fɛɛ ni yɔɔ ŋa lɛ nɔ lɛ. No ha be ko lɛ, David tsu mɛi nyɔŋma kɛtee Nabal ŋɔɔ koni amɛyabi yelikɛbuamɔ. David hala be ni sa jogbaŋŋ. Nakai beaŋ lɛ, aaku tooi ahe tsɔi, ni mɛi ŋmɛɔ okpɔlɔ ni afeɔ ejurɔ waa. David hala wiemɔi ni sa ni bulɛ yɔɔ he, ni eha atsɔ bulɛ gbɛ nɔ akɛ wiemɔi nɛɛ ha Nabal. David tsɛ ehe po akɛ “obi David,” ni ekolɛ efee nakai kɛtsɔɔ bulɛ ni eyɔɔ kɛha Nabal yɛ afii abɔ ni Nabal eye lɛ hewɔ. Te Nabal fee enii eha tɛŋŋ?—1 Sam. 25:5-8.

12 Egri ewo amɛ! Oblanyo ni atsĩ etã yɛ shishijee gbɛ lɛ bɔ Abigail amaniɛ akɛ ‘Nabal giri ni ebolɔ ewo amɛ.’ Kpɛkpɛilɔ Nabal kɛ bolɔmɔ wie akɛ eŋɔŋ eboloo, enu kɛ eloo ni egbe lɛ ehaŋ David kɛ ewebii lɛ. Ebɔ David ahora po akɛ mɔ ko ni he ehiaaa, ni ekɛ lɛ to tsulɔ ni ejo foi eshi enuŋtsɔ he. Jwɛŋmɔ ni Nabal hiɛ yɛ David he lɛ tamɔ nɔ ni Saul ni nyɛɔ David lɛ hu ná lɛ nɔŋŋ. Saul kɛ Nabal fɛɛ  enaaa David taakɛ Yehowa naa lɛ lɛ. Nyɔŋmɔ sumɔ David, ni enaaa lɛ akɛ atuatselɔ, shi moŋ ena lɛ akɛ Israel wɔsɛɛ maŋtsɛ.—1 Sam. 25:10, 11, 14.

13. (a) Klɛŋklɛŋ be ni David nu Nabal jɛmɔ lɛ he lɛ, mɛni efee? (b) Mɛni shishitoo mla ni yɔɔ Yakobo 1:20 lɛ tsɔɔ wɔ yɛ bɔ ni David fee enii eha lɛ he?

13 Beni tsuji lɛ yabɔ David nɔ ni ba lɛ, emli fu waa. Kɛkɛ ni efã amɛ akɛ: “Nyɛteŋ mɔ fɛɛ mɔ aŋmɔ eklante!” David fee klalo kɛha ta, ni enyiɛ etabilɔi 400 lɛ ahiɛ kɛtee tutuamɔ. David kã kitã akɛ ebaabule hii fɛɛ ni yɔɔ Nabal we lɛ ashishi. (1 Sam. 25:12, 13, 21, 22) Eja gbɛ akɛ David mli afu, shi gbɛ ni etsɔ nɔ ejie lɛ kpo lɛ ejaaa. Biblia lɛ kɛɔ akɛ: “Gbɔmɔ mlifu tsuuu Nyɔŋmɔ jalɛ nii.” (Yak. 1:20, Ga Biblia hee) Te Abigail baafee tɛŋŋ ehere ewe lɛ mɔ?

‘Aaajɔɔ Onilee Loo Ohiɛshikamɔ Lɛ’

14. (a) Mɛɛ shishinumɔ naa Abigail je shishi efee nɔ ko koni ekɛjaje Nabal tɔmɔ ni yɔɔ hiɛdɔɔ lɛ? (b) Mɛni wɔbaanyɛ wɔkase yɛ srɔtofeemɔ ni kã Nabal kɛ Abigail teŋ lɛ mli? (Kwɛmɔ shishigbɛ niŋmaa lɛ hu.)

14 Yɛ gbɛ ko nɔ lɛ, wɔna nɔ ni Abigail etsɔ hiɛ efee koni ekɛjaje tɔ̃mɔ ni yɔɔ hiɛdɔɔ nɛɛ. Abigail tamɔɔɔ ewu Nabal, etsɔɔ akɛ eesumɔ ni ebo toi. Tsulɔ lɛ eyabɔɔɔ Nabal amaniɛ, shi eyakɛɛ Abigail yɛ Nabal he akɛ: “Lɛ lɛ yakagbɔmɔ ji lɛ, ni ehiii lɛ wiemɔ kɛ tsɔɔmɔ po.” * (1 Sam. 25:17) Dɔlɛ sane ji akɛ, Nabal naa ehe tsɔ, no hewɔ lɛ esumɔɔɔ ni eboɔ mɔ ko toi. Nakai nɔŋŋ ŋmɛnɛ lɛ, nakai henɔwomɔ su lɛ ebu waa. Shi oblanyo lɛ le akɛ Abigail bɛ nakai, ni no hewɔ ni enyɛ ekɛ naagba nɛɛ yafɔ̃ ehiɛ lɛ.

Abigail tamɔɔɔ ewu Nabal, etsɔɔ akɛ eesumɔ ni ebo toi

15, 16. (a) Mɛɛ gbɛ nɔ Abigail kɛ enifeemɔ tsɔɔ yɛ akɛ etamɔ yoo kpakpa ni awie ehe yɛ Abɛi awolo lɛ mli lɛ? (b) Mɛni hewɔ gbɛ ni Abigail kɔ lɛ etsɔɔɔ akɛ ete shi ewo ewu lɛ yitsoyeli gbɛhe lɛ?

15 Abigail jwɛŋ sane lɛ he, ni etsu he nii oya. Wɔkaneɔ akɛ: “Kɛkɛ ni Abigail he fee oyá.” Shii ejwɛ sɔŋŋ ni wɔnaa ákɛ akɛ wiemɔ ni ji “he fee oya” lɛ etsu nii yɛ amaniɛbɔɔ nɛɛ mli kɛkɔ yoo nɛɛ he. Ebua niyenii anaa eyake David kɛ emɛi lɛ. Aboloo, wein, too gwantɛŋi, mamu, weinyibii ni egbĩ, kɛ agbamii fata nibii ni ekɛtee lɛ ahe. Eyɛ faŋŋ akɛ Abigail le enibii fɛɛ ni yɔɔ eshĩa lɛ fitsofitso, ni etsuɔ sɔ̃i ni kã enɔ yɛ shĩa lɛ ahe nii taakɛ yoo kpakpa ni awie ehe yɛ Abɛi awolo lɛ mli lɛ feɔ lɛ pɛpɛɛpɛ. (Abɛi 31:10-31) Ekɛ nibii lɛ tsu etsuji lɛ ekomɛi kɛtsɔ hiɛ, no sɛɛ dani  ekome enyiɛ sɛɛ. Wɔkaneɔ akɛ: “Shi ewu Nabal lɛ, ekɛɛɛ lɛ nɔ ko.”—1 Sam. 25:18, 19.

16 Ani enɛ tsɔɔ akɛ Abigail te shi ewo yitsoyeli gbɛhe lɛ? Dabi; ha ehi ojwɛŋmɔŋ akɛ Nabal eye yiwalɛ sane eshi Yehowa tsulɔ ni efɔ lɛ mu lɛ, ni eji nifeemɔ ni baanyɛ aha akpãta Nabal we lɛŋ bii lɛ babaoo ni efeko nɔ ko lɛ ahiɛ. Kɛ́ Abigail efeee shihilɛ nɛɛ he nɔ ko lɛ, ani abuŋ lɛ akɛ eyeɔ fɔ tamɔ ewu lɛ nɔŋŋ? Yɛ shihilɛ nɛɛ mli lɛ, eha ehe shi ni ebaa ehaa Nyɔŋmɔ lɛ he bahia lɛ kwraa fe ehe shi ni ebaa ehaa ewu lɛ.

17, 18. Mɛɛ gbɛ nɔ Abigail tsɔ eyanina David, mɛni ekɛɛ lɛ, ni mɛni ha ewiemɔi lɛ ta David tsuiŋ lɛ?

17 Etsɛɛɛ kɛkɛ ni Abigail yanina David kɛ ewebii lɛ. Shi kome ekoŋŋ lɛ ehe fee oya kɛyi shi kɛjɛ eteji lɛ nɔ, ni ekɛ ehiɛ bu shi yɛ David hiɛ, ni ekoto lɛ. (1 Sam. 25:20, 23) Kɛkɛ ni efɔse etsuiŋ saji fɛɛ eshwie David hiɛ kɛkpa lɛ fai koni ena lɛ, kɛ ewu, kɛ ewe lɛ fɛɛ mɔbɔ. Mɛni ha ewiemɔi lɛ ta David tsuiŋ lɛ?

‘Ofainɛ, ha onyɔŋ yoo awie yɛ otoiiaŋ’

18 Eŋɔ tɔ̃mɔ lɛ efɔ̃ enɔ, ni ekpa David fai koni ekɛ ehe ake lɛ. Egba mli kpoo ekɛɛ akɛ yakagbɔmɔ ji ewu lɛ, ni nakai egbɛ́i lɛ shishi tsɔɔ, ni ekolɛ ewie enɛ kɛtsɔɔ akɛ esaaa akɛ David bɔɔ ehe ahora yɛ ewu lɛ hewɔ. Ewie kɛtsɔɔ akɛ eyɛ hekɛnɔfɔ̃ɔ akɛ David ji Yehowa najiaŋdamɔlɔ, ni eyɔse hu akɛ “Yehowa tai lɛ” David wuɔ lɛ. Abigail tsɔɔ hu akɛ, ele Yehowa shiwoo ni kɔɔ David kɛ maŋtsɛyeli lɛ he lɛ ejaakɛ ewie akɛ: ‘Yehowa baawo bo lumɔ yɛ Israel nɔ.’ Agbɛnɛ hu ekɛɛ David akɛ ekafee nɔ ko ni baaha eye la yi sɔ̃ loo nɔ ko ni wɔsɛɛ ko lɛ ebaatsɔ “pampi kɛ tsɔne” eha lɛ—ekã shi faŋŋ akɛ eewie David henilee ni baagba enaa lɛ he. (Nyɛkanea 1 Samuel 25:24-31.) Wiemɔi ni sa ni taa mɔ tsuiŋ waa nɛ!

19. Te David fee enii yɛ Abigail wiemɔ lɛ he eha tɛŋŋ, ni mɛni hewɔ ejie eyi lɛ?

19 Mɛni David fee? Ehé nibii ni Abigail kɛba lɛ, ni ekɛɛ akɛ: “Aaajɔɔ Yehowa, Israel Nyɔŋmɔ lɛ, mɔ ni tsuo ni okɛ mi bakpe ŋmɛnɛ nɛɛ; ni aaajɔɔ onilee [loo ohiɛshikamɔ] nɛɛ, ni aaajɔɔ bo diɛŋtsɛ akɛ ŋmɛnɛ otsĩ minaa ni mikaye lá ko yi sɔ̃.” David jie Abigail yi yɛ ekãa ni efee ni ekɛlɛ bakpe lɛ hewɔ, ni ekpɛlɛ nɔ hu akɛ etsĩ enaa koni ekaye la yi sɔ̃. Ekɛɛ lɛ akɛ: “Yaa owe yɛ hejɔlɛ mli,” ni ekɛ heshibaa wie kɛfata he akɛ: “Mibo ogbee toi.”—1 Sam. 25:32-35.

‘Naa, Onyɔŋ Yoo Ji Mi’

20, 21. (a) Kɛ́ okwɛ lɛ mɛni sa yijiemɔ waa yɛ bɔ ni Abigail jɛ esuɔmɔ mli eku esɛɛ kɛtee ewu ŋɔɔ lɛ he? (b) Mɛɛ gbɛ nɔ Abigail tsɔ ejie ekãa kɛ hiɛshikamɔ kpo yɛ be ni ehala ekɛ Nabal yawie lɛ mli?

20 Beni Abigail shi sɛɛ lɛ, etee nɔ esusu nakai kpee lɛ he aahu;  ni ehiɛ kpaŋ bɔ ni esoro David, nuu anɔkwafo mlihilɔ lɛ kwraa yɛ nakai ewu yiwalɔ odoŋkpo ni ekɛhi shi lɛ he. Shi Abigail haaa susumɔi nɛɛ ahé ejwɛŋmɔ fɛɛ. Wɔkaneɔ akɛ: ‘Sɛɛ mli lɛ Abigail ba Nabal ŋɔɔ.’ Hɛɛ, eku esɛɛ etee ewu lɛ ŋɔɔ kɛ faishitswaa akɛ ebaaya nɔ ejɛ enyɛmɔ fɛɛ mli etsu esɔ̃ akɛ ŋa lɛ he nii. Esa akɛ eha Nabal ale nibii ni ekɛyake David kɛ emɛi lɛ. Eyɛ hegbɛ akɛ eleɔ. Agbɛnɛ hu lɛ, ehe miihia ni Abigail aha Nabal ale oshara ni kulɛ ebaa, shi aku naa lɛ—dani Nabal anu he yɛ he kroko, ni Nabal hiɛ gbo. Shi amrɔ nɛɛ enyɛɛɛ ekɛɛ lɛ. No mli lɛ Nabal eŋmɛ okpɔlɔ yɛ ewe lɛ tamɔ maŋtsɛ ko, ni etɔ dãa kpɔtɔɔ.—1 Sam. 25:36.

Abigail fee ekãa ni ebɔ Nabal nɔ ni efee kɛbaa Nabal yi

21 Abigail jie ekãa kɛ hiɛshikamɔ kpo ekoŋŋ, ni emɛ kɛyashi enɔ jetsɛremɔ leebi beni dãa lɛ etserɛ yɛ ehiɛ. Akɛni dãa lɛ etserɛ yɛ Nabal hiɛ hewɔ lɛ ebaabo Abigail toi, kɛlɛ etsui nɔ baanyɛ awo waa hu. Fɛɛ mli lɛ, Abigail bɛŋkɛ lɛ ni egba lɛ sane tso muu lɛ fɛɛ. Ŋwanejee ko bɛ he akɛ ekpa gbɛ akɛ emli baafu, ni ekolɛ ebaafee basabasa. Moŋ lɛ, eta shi kɛkɛ ni etsiii ehe.—1 Sam. 25:37.

22. Mɛni ba Nabal nɔ, ni mɛni wɔbaanyɛ wɔkase yɛ niseniianii loo yiwalɛ nifeemɔi fɛɛ ni yaa nɔ yɛ wekui amli lɛ ahe?

22 Mɛni no mli lɛ egbaa nuu lɛ naa? “Etsui gbo tum yɛ emli, ni efee shikpilikpii tamɔ tɛ.” Ekolɛ strok henɔ ko ji nɔ ni mɔ lɛ lɛ. Kɛlɛ aaafee gbii nyɔŋma sɛɛ lɛ egbo—ni jeee hela lɛ pɛ ni mɔ lɛ lɛ hewɔ. Amaniɛbɔɔ lɛ kɛɛ akɛ: “Yehowa tswa Nabal nɔ̃, ni egbo.” (1 Sam. 25:38) Gbe ni Yehowa gbe Nabal lɛ ha Abigail ye ehe kɛjɛ gbalashihilɛ ni sũ etsui aahu nɛɛ mli. Yehowa kɛ ehe wooo saji amli koni ekpãta mɛi ahiɛ yɛ naakpɛɛ gbɛ nɔ ŋmɛnɛ moŋ, shi enɛ ji kaimɔnɔ ni sa jogbaŋŋ ni tsɔɔ akɛ Yehowa naa niseniianii loo yiwalɛ nifeemɔi fɛɛ ni yaa nɔ yɛ wekui amli lɛ. Yɛ lɛ diɛŋtsɛ ebe ni sa mli lɛ, ebaatsu sane lɛ he nii yɛ jalɛ naa.—Nyɛkanea Luka 8:17.

23. Mɛɛ jɔɔmɔ kroko Abigail ná, ni mɛni efee kɛtsɔɔ akɛ David ŋa ni ebaatsɔ lɛ tsakeko lɛ?

23 Beni Abigail eye ehe kɛjɛ gbãla gbonyo lɛ mli sɛɛ lɛ, jɔɔmɔ kroko hu miimɛ lɛ. Beni David ná le akɛ Nabal egbo sɛɛ lɛ, etsu etsuji koni amɛyabi Abigail suɔmɔ amɛha lɛ. Abigail to he akɛ: ‘Naa, onyɔŋ yoo ji tsulɔ ni baafɔ mi-nuŋtsɔ tsuji lɛ anaji ahe.’ Eyɛ faŋ akɛ eeba ebatsɔ David ŋa moŋ, shi ekã he ebaa ehe shi; ekɛ ehe ha po akɛ ebaasɔmɔ  David tsuji lɛ! Wɔkaneɔ ekoŋŋ akɛ ehe fee oya, shi be nɛɛ mli lɛ, koni eya David ŋɔɔ.—1 Sam. 25:39-42.

24. Mɛɛ naagbai Abigail kɛkpe yɛ shihilɛ hee ni eyaje mli lɛ mli, shi te ewu kɛ e-Nyɔŋmɔ lɛ na lɛ ha tɛŋŋ?

24 Enɛ jeee adesa ko ni atãa naagbee; jeee be fɛɛ be Abigail baaná ekɛ David shihilɛ lɛ mlɛo. No mli lɛ, David yɛ ŋa ko ni atsɛɔ lɛ Ahinoam, ni eyɛ mli akɛ Nyɔŋmɔ kpɛlɛ yoo fe ekome kɛshihilɛ nɔ moŋ, shi eyɛ faŋŋ akɛ enɛ kɛ naagbai ba yei anɔkwafoi ni hi shi yɛ nakai beaŋ lɛ anɔ. No mli lɛ, David nako ebatsɔ maŋtsɛ; ekɛ naagbai kɛ shihilɛi ni mli wawai ni esa akɛ eye nɔ baakpe dani ebaanyɛ esɔmɔ Yehowa akɛ maŋtsɛ. Shi be fɛɛ ni Abigail kɛ David hi shi lɛ, eye ebua lɛ, ni sɛɛ mli lɛ efɔ binuu eha lɛ. Ebayɔse akɛ eyɛ wu ni sumɔɔ lɛ waa ni buɔ ehe hu. Be ko po ni mɛi baŋɔ lɛ nom lɛ, David tee eyakpɔ̃ lɛ! (1 Sam. 30:1-19) Enɛ tsɔɔ akɛ David kase Yehowa Nyɔŋmɔ, mɔ ni sumɔɔ yei anɔkwafoi hiɛshikalɔi ni yɔɔ ekãa lɛ asane waa, ni amɛsane kã etsui nɔ hu lɛ.

^ kk. 9 Enɛ jeee Karmel Gɔŋ ni ale waa ni yɔɔ kooyigbɛ shɔŋŋ, he ni sɛɛ mli lɛ gbalɔ Elia kɛ Baal gbalɔi lɛ yakpe kɛtao saji anaa yɛ lɛ. (Kwɛmɔ Yitso 10 lɛ.) Karmel nɛɛ ji maŋ ko ni kɛ wuoyigbɛ ŋa lɛ jeɔ husu.

^ kk. 10 Eeenyɛ efee akɛ David nu he akɛ shikpɔŋtsɛmɛi lɛ kɛ amɛtooi lɛ ahe ni ebuɔ lɛ ji sɔɔmɔ ni ekɛmiiha Yehowa Nyɔŋmɔ. No beaŋ lɛ, Yehowa yiŋtoo kɛha Abraham, Isak, kɛ Yakob seshi lɛ ji akɛ amɛhi nakai shikpɔŋ lɛ nɔ. No hewɔ lɛ, nakai shikpɔŋ lɛ he ni abuɔ yɛ julɔi kɛ awuiyelɔi ahewɔ lɛ bafeɔ sɔɔmɔ krɔŋŋ henɔ ko.

^ kk. 14 Wiemɔ ni oblanyo lɛ kɛtsu nii lɛ shishi ji “belial bi (sɛɛnamɔ bɛ he).” Kɛ́ Biblia shishitsɔɔmɔi komɛi miitsɔɔ sane nɛɛ shishi lɛ, amɛkɛ fataa he akɛ Nabal ji nuu ko “ni booo mɔ ko toi” kɛkɛ lɛ amɛmu naa akɛ “sɛɛnamɔ bɛ he akɛ akɛ lɛ baawie.”