Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Amɛhemɔkɛyeli Lɛ

 YITSO KOME

‘Eewie Lolo, Tsɛ Egbo’

‘Eewie Lolo, Tsɛ Egbo’

1. Mɛni tsĩ Adam kɛ Hawa weku lɛ gbɛ koni amɛkanyɛ amɛbote Eden abɔɔ lɛ mli, ni mɛni ji nɔ titri ni kã Habel tsui nɔ?

HABEL kwɛ etooku ni miiye nii kpoo yɛ gɔji lɛ anɔ lɛ. Kɛkɛ ni ekolɛ ekwɛ nii kɛteke etooi lɛ kɛtee he ko shɔŋŋ akɛ ebaana lalilɛi ŋmɛoo ko lo. Ele akɛ lalilɛi klante ko ni foɔ ehe yɛ jɛmɛ, ekpaaa ehe foo, ni etsĩ gbɛ ni yaa Eden abɔɔ lɛ mli lɛ naa. Be ko ni eho lɛ, jɛmɛ efɔlɔi yɔɔ, shi amrɔ nɛɛ ni Habel kwɛɔ jɛmɛ nɛɛ, efɔlɔi lɛ jio, bii lɛ jio, amɛteŋ mɔ ko nyɛɛɛ jɛmɛ amɛya. Feemɔ Habel he mfoniri okwɛ; naa lɛ ni edamɔ shi ni ewo ehiɛ nɔ eeshwie eyiŋ yɛ e-Bɔlɔ lɛ he, ni shwane kɔɔyɔɔ ŋmaii ko miitswa eyitsɔi kɛmiiya kɛmiiba. Ani abaanyɛ atsa gbɛ ni ebakã adesai kɛ Nyɔŋmɔ teŋ lɛ? No pɛ ji nɔ ni kã Habel tsui nɔ.

2-4. Mɛɛ gbɛ nɔ Habel kɛwɔ wieɔ ŋmɛnɛ?

2 Habel kɛ bo miiwie ŋmɛnɛ. Ani oonu egbee? Ekolɛ, obaakɛɛ akɛ enɛ nyɛŋ aba lɛ nakai kɔkɔɔkɔ. Nɔ hewɔ ji akɛ, Adam bi ni ji enyɔ nɔ nɛɛ gbo jeeŋmɔ nɛ. Ewui tsɔ sũ aaafee afii 6,000 sɔŋŋ nɛ. Biblia lɛ haa wɔleɔ yɛ gbohii lɛ ahe akɛ: “Amɛleee nɔ ko nɔ ko.” (Jaj. 9:5, 10) Kɛfata he lɛ, aŋmako Habel naa wiemɔ kome flo po yɛ Biblia lɛ mli. No hewɔ lɛ, te eba lɛ tɛŋŋ ni ewieɔ etsɔɔ wɔ lɛ mɔ?

3 Akɛ mumɔ tsirɛ bɔfo Paulo ni ewie Habel he akɛ: “No nɔŋŋ ekɛwieɔ lolo, tsɛ egbo.” (Nyɛkanea Hebribii 11:4.) Mɛni nɔ Habel tsɔɔ ekɛ wɔ wieɔ? Kɛtsɔ hemɔkɛyeli nɔ. Habel ji adesai ateŋ mɔ klɛŋklɛŋ ni ná su ni nɔ bɛ nɛɛ. Ejie hemɔkɛyeli kpo jogbaŋŋ aahu ákɛ enɔkwɛmɔnɔ lɛ hiɛ kã lolo, ni eji nɔ ko ni sa jogbaŋŋ ni wɔbaanyɛ wɔkase ŋmɛnɛ. Kɛ́ wɔkase nii kɛjɛ ehemɔkɛyeli lɛ mli, ni wɔfee wɔnii taakɛ efee lɛ, belɛ no tsɔɔ akɛ Habel nifeemɔ lɛ kɛ wɔ miiwie diɛŋtsɛ yɛ gbɛ ni mɔɔ shi nɔ.

4 Eyɛ mli akɛ awieee Habel he babaoo yɛ Biblia lɛ mli moŋ, shi mɛni wɔbaanyɛ wɔkase yɛ lɛ, kɛ ehemɔkɛyeli lɛ he? Ha wɔkwɛ.

Beni Edaa yɛ “Jeŋ Shishitoo” Be lɛ Mli

5. Mɛni ji wiemɔ ni Yesu wie akɛ Habel hi shi yɛ “jeŋ shishitoo” be lɛ mli lɛ shishi? (Kwɛmɔ shishigbɛ niŋmaa lɛ hu.)

5 Beni abɔ klɛŋklɛŋ adesai enyɔ lɛ sɛɛ etsɛɛɛ kɛkɛ ni afɔ Habel. Yesu wie Habel he yɛ sɛɛ mli akɛ ehi shi yɛ “jeŋ shishitoo” be lɛ mli. (Nyɛkanea Luka 11:50, 51.) Ekã shi faŋŋ akɛ no mli lɛ, jeŋ ni Yesu wieɔ he lɛ kɔɔ adesai ni yɔɔ hiɛnɔkamɔ akɛ abaakpɔ̃ amɛ kɛjɛ esha mli lɛ ahe. Eyɛ mli akɛ Habel ji adesa ni ji ejwɛ nɔ ni ba shihilɛ mli moŋ,  shi etamɔ nɔ ni lɛ ji mɔ klɛŋklɛŋ ni Nyɔŋmɔ na akɛ abaanyɛ akpɔ̃. * Eyɛ faŋŋ akɛ mɛi ateŋ ni Habel da yɛ lɛ asubaŋ ehiii.

6. Mɛɛ fɔlɔi nɛkɛ Habel ná?

6 Eyɛ mli akɛ no mli lɛ, adesai aje lɛ je shishi etsɛko moŋ, shi eba lɛ akɛ amɛkɛ shihilɛ ni yɔɔ mɔbɔ akpe. Ŋwanejee ko bɛ he akɛ no mli lɛ, Habel fɔlɔi ni ji Adam kɛ Hawa ahe yɛ fɛo pam, ni amɛyɛ gbɔmɔtsoŋ hewalɛ jogbaŋŋ. Shi no mli lɛ, amɛtɔ̃ tɔ̃mɔ kple, ni amɛle nakai. Be ko ni eho lɛ amɛye emuu, ni amɛle akɛ amɛbaahi shi kɛya naanɔ. Kɛkɛ ni amɛtse Yehowa Nyɔŋmɔ hiɛ atua, ni ashwie amɛ kɛjɛ amɛ-Paradeiso shĩa ni yɔɔ Eden abɔɔ lɛ mli lɛ mli. Akɛni amɛkɛ nibii ni amɛ diɛŋtsɛ amɛsumɔɔ lɛ ye klɛŋklɛŋ gbɛhe—amɛshwiei po ahiamɔnii—hewɔ lɛ, emuuyeli kɛ naanɔ wala ŋmɛɛ amɛ.—1 Mose 2:15–3:24.

7, 8. Mɛni Hawa wie beni afɔ Kain lɛ, ni mɛni ekolɛ eyasusu?

7 Beni atswa Adam kɛ Hawa naneshishi tu kɛje abɔɔ lɛ mli lɛ, amɛyanáaa shihilɛ lɛ mlɛo kwraa yɛ abɔɔ lɛ sɛɛ. Kɛlɛ, beni amɛfɔ amɛ-klɛŋklɛŋ bi lɛ, amɛwo lɛ gbɛ́i akɛ Kain, loo “Nɔ ko ni Afee,” ni Hawa kɛɛ akɛ: ‘Miná binuu yɛ Yehowa yelikɛbuamɔ naa.’ Nɔ ni Hawa wie nɛɛ tsɔɔ akɛ ekolɛ, sane ni Yehowa wie yɛ abɔɔ lɛ mli lɛ yɛ ejwɛŋmɔ mli; no ji akɛ yoo ko baawo shwie loo ebaaná ‘seshi’ ní baakpãta mɔ fɔŋ ni laka Adam kɛ Hawa ni eha amɛgba afã lɛ hiɛ. (1 Mose 3:15; 4:1) Ani Hawa yasusu akɛ lɛ ji yoo ni atsĩ etã yɛ gbalɛ lɛ mli lɛ, ni ákɛ Kain ji shiwoo ‘seshi’ lɛ?

 8 Kɛ́ nakai eyasusu lɛ, no lɛ elaka ehe kwraa. Kɛfata he lɛ, kɛ́ Adam kɛ Hawa dũ nakai susumɔ lɛ amɛwo Kain mli beni edaa lɛ, no lɛ amɛbɔ Kain ní lɛ hu eyeee emuu lɛ ablo waa diɛŋtsɛ. Fee sɛɛ lɛ, Hawa fɔ binuu ni ji enyɔ nɔ, shi wɔnaaa nɔ ko ni tsɔɔ ákɛ akɛ miishɛɛ wie efɔmɔ lɛ he taakɛ afee yɛ Kain fɔmɔ lɛ he lɛ. Amɛwo lɛ gbɛ́i akɛ Habel, ni eshishi ji “Kɔɔyɔɔ,” loo “Yaka nɔ.” (1 Mose 4:2) Ani nakai gbɛ́i ni amɛkɛwo lɛ lɛ tsɔɔ akɛ amɛyakpaaa nɔ ko kpakpa gbɛ yɛ Habel dɛŋ, oookɛɛ amɛyɛ hiɛnɔkamɔ kwraa yɛ Kain mli fe Habel? Nakai ni jio, jeee nakai ni jio, amɛ pɛ amɛle.

9. Mɛni fɔlɔi ni yɔɔ ŋmɛnɛ lɛ baanyɛ akase kɛjɛ klɛŋklɛŋ fɔlɔi lɛ adɛŋ?

9 Fɔlɔi ni yɔɔ ŋmɛnɛ lɛ baanyɛ akase nibii babaoo kɛjɛ klɛŋklɛŋ fɔlɔi nɛɛ adɛŋ. Ani obaatsɔ owiemɔi kɛ onifeemɔi anɔ odũ henɔwomɔ, ŋkomeŋfa, kɛ sui gbohii krokomɛi owo obii lɛ amli? Aloo obaaye obua obii lɛ koni amɛsumɔ Yehowa Nyɔŋmɔ, ní amɛbɔ mɔdɛŋ amɛkɛ lɛ abɔ naanyo? Dɔlɛ sane ji akɛ klɛŋklɛŋ fɔlɔi lɛ eyanyɛɛɛ amɛsɔ̃ nɛɛ he nii amɛtsu. Kɛlɛ, no mli lɛ, hiɛnɔkamɔ yɛ kɛha amɛshwiei lɛ.

Mɛni Ha Habel Ná Hemɔkɛyeli?

10, 11. Mɛɛ nitsumɔ Kain kɛ Habel tsu, ni mɛɛ su Habel ná?

10 Eeenyɛ eba akɛ beni oblahii enyɔ nɛɛ daa lɛ, Adam tsɔse amɛ koni amɛle nitsumɔ ni ehe baahia ni amɛtsu kɛkwɛ weku lɛ. Kain kɔ okwaayeli; Habel kɔ tookwɛmɔ.

11 Kɛlɛ, Habel fee nɔ ko ni he hiaa kwraa fe nakai. Beni be shwieɔ mli lɛ, Habel hemɔkɛyeli lɛ mli bawa—su kpakpa ní sɛɛ mli lɛ Paulo wie he lɛ. Bo lɛ susumɔ he okwɛ! No mli lɛ, adesa ko bɛ ni Habel baakwɛ enɔkwɛmɔnɔ lɛ nɔ. Belɛ, te eba lɛ tɛŋŋ ni hemɔkɛyeli ni eyɔɔ yɛ Yehowa Nyɔŋmɔ mli lɛ mli bawa lɛ? Ha wɔsusu nibii etɛ komɛi ni ekolɛ enyɛ eye ebua Habel ni ehemɔkɛyeli lɛ mli bawa lɛ he.

12, 13. Mɛɛ gbɛ nɔ ekolɛ, Yehowa adebɔɔ nii ni Habel kwɛ lɛ ye ebua lɛ koni ehemɔkɛyeli lɛ mli awa?

12 Yehowa adebɔɔ nii. Eji anɔkwale akɛ Yehowa elomɔ shikpɔŋ lɛ, eha ewoɔ ŋmei kɛ aŋlɛŋlɛ, ni enɛ haaa okwaayeli afee mlɛo. Kɛlɛ, shikpɔŋ lɛ ba nii bɔ ni Habel weku lɛ náa eko kɛkwɛɔ amɛhe. Shi alomɔɔɔ kooloi lɛ, ní filikilɔi kɛ loi fata he lɛ; ni alomɔɔɔ gɔji, kpaakpoi, fai, kɛ ŋshɔi lɛ; nakai nɔŋŋ hu alomɔɔɔ atatui, oblɔtu, hulu, nyɔɔŋtsere, kɛ ŋulamii lɛ. He fɛɛ he ni Habel kwɛɔ lɛ, enaa odaseyelii ni tsɔɔ akɛ Yehowa Nyɔŋmɔ, mɔ ni bɔ nibii fɛɛ lɛ yɛ suɔmɔ ni nɔ bɛ, kɛ nilee, ni emli hi hu. (Nyɛkanea Romabii 1:20.) Ŋwanejee ko kwraa bɛ he akɛ, beni Habel jwɛŋ nibii ni Nyɔŋmɔ ebɔ kɛ Nyɔŋmɔ sui lɛ anɔ lɛ, ehemɔkɛyeli lɛ mli bawa waa diɛŋtsɛ.

Habel tsɔ adebɔɔ nɔ ená hemɔkɛyeli yɛ Bɔlɔ ni yɔɔ suɔmɔ lɛ mli

13 Ekã shi faŋŋ akɛ, Habel hé be kɛsusu Yehowa Nyɔŋmɔ he.  Feemɔ Habel he mfoniri okwɛ ni eekwɛ etooku lɛ. Tookwɛlɔ nitsumɔ biɔ nyiɛmɔ babaoo. Ekpalaa kooloi ni he jɔ nɛɛ kɛkwɔlɔɔ gɔji, kɛtsɔmɔɔ jɔɔi amli, kɛfoɔ fai—fɛɛ lɛ ekɛmiitao jwɛi fɔ, nubui ni hi fe fɛɛ, kɛ hejɔɔmɔhei kpakpai kɛha toi lɛ. Nyɔŋmɔ adebɔɔ nibii lɛ fɛɛ ateŋ lɛ, etamɔ nɔ ni gwaŋtɛŋ ji kooloo ni yelikɛbuamɔ he hiaa amɛ waa, oookɛɛ aje gbɛ afee amɛ koni gbɔmɔ akpala amɛ loo etsɔɔ amɛ gbɛ ni ebu amɛ he. Ani Habel nu he akɛ lɛ hu Mɔ ko ni le nii kwraa fe adesa, ni eyɔɔ hewalɛ hu fe adesa lɛ gbɛtsɔɔmɔ, hebuu kɛ yelikɛbuamɔ he miihia lɛ? Ŋwanejee ko bɛ he akɛ etsĩ nibii tamɔ nakai atã yɛ esɔlemɔ mli, ni no ha ehemɔkɛyeli lɛ tee nɔ emli wa.

14, 15. Mɛɛ nibii babaoo Yehowa shiwoi lɛ ha Habel ná ni ebaajwɛŋ nɔ?

14 Yehowa shiwoi. Ekolɛ, Adam kɛ Hawa gba amɛbihii lɛ nibii ni ba ni ha ashwie amɛ kɛjɛ Eden abɔɔ lɛ mli lɛ. No hewɔ lɛ, Habel ná nibii babaoo ni ebaajwɛŋ nɔ.

15 Yehowa wie akɛ alomɔ shikpɔŋ lɛ. Ekã shi faŋŋ akɛ, Habel na ŋmei kɛ aŋlɛŋlɛ lɛ akɛ eji nakai wiemɔi lɛ amlibaa. Yehowa gba hu akɛ, Hawa baaná hejaramɔ yɛ hɔŋɔɔ kɛ bifɔmɔ mli. Ŋwanejee ko bɛ he akɛ beni afɔɔ Habel nyɛmimɛi lɛ, eyɔse akɛ nakai wiemɔi lɛ hu eba mli anɔkwale. Yehowa tsɔ hiɛ ena akɛ Hawa baanu he akɛ esa akɛ ewu lɛ asumɔ lɛ ni esusu ehe, ni Hawa baafee enɛ kɛteke nɔ, ni Adam hu baaye eŋa lɛ nɔ. Habel na mɔbɔ sane nɛɛ mlibaa yɛ enyɛ kɛ etsɛ teŋ. Fɛɛ mli lɛ, Habel na akɛ abaanyɛ akɛ he afɔ̃ Yehowa wiemɔ lɛ nɔ kwraa kɛmɔ shi. No hewɔ lɛ, Habel ná yiŋtoi kpakpai ni ebaanyɛ edamɔ nɔ ekɛ ehe afɔ̃ Nyɔŋmɔ shiwoo ni kɔɔ ‘seshi’ ni baajaje nibii ni tɔ̃tɔ̃ yɛ Eden abɔɔ lɛ mli lɛ he lɛ nɔ.—1 Mose 3:15-19.

16, 17. Mɛni ekolɛ Habel kase yɛ kerubim lɛ ahe?

16 Yehowa tsuji. Adesai ni hi shi yɛ Habel beaŋ lɛ eyafeee hemɔkɛyeli he nɔkwɛmɔnɔ kpakpa ní ebaanyɛ ekase, kɛlɛ, jeee adesai pɛ ji mɛi ni no mli lɛ Nyɔŋmɔ ebɔ ni Habel baanyɛ akase amɛhemɔkɛyeli lɛ. Beni atswa Adam kɛ Hawa naneshishi tu kɛshi abɔɔ lɛ mli lɛ, Yehowa kwɛ koni amɛ jio, amɛbii lɛ jio, mɔ ko kwraa akanyɛ ebote nakai  shikpɔŋ nɔ Paradeiso lɛ mli. Yehowa ŋɔ lalilɛi klante ni tsɔmɔɔ ehe kɛ kerubim hu, ni ji bɔfoi ni hiɛ gbɛhei ni nɔ kwɔlɔ eto trom lɛ naa.—Nyɛkanea 1 Mose 3:24.

17 Feemɔ bɔ ni Habel baanu he eha beni eji gbekɛ, ni ekwɛɔ kerubim nɛɛ he mfoniri okwɛ. Akɛni amɛjie amɛhe kpo akɛ gbɔmɛi hewɔ lɛ, Habel baanyɛ ana akɛ amɛji mɛi ni he wala. Ni nakai “klante” ni yaa nɔ etsoɔ, ni tsɔmɔɔ ehe lɛ hu haa mɔ naa kpɛɔ ehe naakpa. Beni Habel daa lɛ, ani be ko shɛ ní ena akɛ kerubim nɛɛ anitsumɔ eje amɛtsine, ni amɛshi amɛgbɛhe lɛ? Dabida. Beni gbii hoɔ kɛboteɔ afii amli, ni afii hu kuɔ bɔɔ he lɛ, nakai bɔɔnii hewalɔi ni nyɛɔ amɛsusuɔ nii ahe, ni amɛkpɛɔ amɛyiŋ lɛ shiii nitsumɔ ni akɛwo amɛdɛŋ lɛ kɔkɔɔkɔ. Enɛ ha Habel ná le akɛ, Yehowa Nyɔŋmɔ yɛ tsuji ni feɔ jalɛ nii ni yeɔ lɛ anɔkwa. Habel na anɔkwa ni ayeɔ Yehowa kɛ toi ni afeɔ ahaa lɛ lɛ yɛ kerubim nɛɛ ahe, nɔ ko ni enaaa yɛ eweku lɛ mli. Ekã shi faŋŋ akɛ, bɔfoi nɛɛ anɔkwɛmɔnɔ lɛ waje ehemɔkɛyeli.

Habel wala shihilɛ mli fɛɛ lɛ, ena akɛ kerubim nɛɛ, ni ji Yehowa tsuji lɛ ye Yehowa anɔkwa ni amɛbo lɛ toi

18. Mɛɛ nibii wɔyɔɔ ŋmɛnɛ ni wɔbaanyɛ wɔdamɔ nɔ wɔtswa wɔhemɔkɛyeli lɛ wɔma shi?

18 Kɛ́ Habel jwɛŋ nibii fɛɛ ni Yehowa etsɔ edebɔɔ nii, eshiwoi kɛ etsuji ni ji ŋwɛi bɔfoi lɛ anɔkwɛmɔnii lɛ anɔ ejie kpo etsɔɔ lɛ lɛ anɔ lɛ, enaa akɛ no yaa nɔ ewajeɔ ehemɔkɛyeli lɛ. Ani enɛ etsɔɔɔ faŋŋ akɛ wɔbaanyɛ wɔkase nibii babaoo kɛjɛ enɔkwɛmɔnɔ lɛ mli? Oblahii kɛ oblayei titri amii baashɛ amɛhe waa akɛ amɛaale akɛ amɛbaanyɛ amɛná anɔkwa hemɔkɛyeli yɛ Yehowa Nyɔŋmɔ mli, ekɔɔɔ he eko nɔ ni amɛweku mli bii lɛ feɔ. Akɛni adebɔɔ nibii ni yɔɔ naakpɛɛ babaoo ebɔle wɔ, ni wɔyɔɔ Biblia muu lɛ fɛɛ, kɛ adesai babaoo hu ni amɛjieɔ  hemɔkɛyeli krɔŋŋ kpo lɛ hewɔ lɛ, wɔyɛ nibii babaoo ŋmɛnɛ ni wɔbaanyɛ wɔdamɔ nɔ wɔtswa wɔhemɔkɛyeli lɛ wɔma shi.

Nɔ Hewɔ ni Nyɔŋmɔ Hiɛ Sɔ Habel Afɔle lɛ Jogbaŋŋ Lɛ

19. Beni be shwie mli lɛ, mɛɛ anɔkwale ko ni nɔ bɛ kwraa Habel bayɔse?

19 Beni Habel hemɔkɛyeli yɛ Yehowa mli lɛ yaa nɔ edaa lɛ, etao gbɛ nɔ ni ebaatsɔ ejie nakai hemɔkɛyeli lɛ kpo yɛ enifeemɔ mli. Kɛlɛ, mɛni po adesa ni bɛ nɔ ko mli lɛ baanyɛ aŋɔha jeŋ muu fɛɛ Bɔlɔ lɛ? Eyɛ faŋŋ akɛ, adesai adɛŋ nikeenii loo yelikɛbuamɔ ko he ehiaaa Nyɔŋmɔ. Beni be shwie mli lɛ, Habel bayɔse anɔkwale ko ni nɔ bɛ kwraa: No kɛkɛ ji, kɛ́ ekɛ enii ni eyɔɔ lɛ amli nɔ ni hi fe fɛɛ ke Yehowa lɛ—ni ekɛ jwɛŋmɔ ni ja jogbaŋŋ fee nakai lɛ—eŋwɛi Tsɛ ni yɔɔ suɔmɔ lɛ hiɛ baasɔ waa.

Habel jɛ hemɔkɛyeli mli ekɛ efɔle lɛ ha; Kain efeee nakai

20, 21. Mɛɛ afɔle Kain kɛ Habel shã amɛha Yehowa, ni te Yehowa fee enii yɛ he eha tɛŋŋ?

20 Habel kpɛ mli akɛ ekɛ etooi lɛ eko baashã afɔle eha Yehowa. Ehala tooi lɛ ateŋ nɔ ni hi fe fɛɛ, ni ji kromɔ bii lɛ, kɛ tooi lɛ heei ni esusuɔ akɛ nomɛi sa jogbaŋŋ lɛ. Nakai beaŋ nɔŋŋ lɛ, Kain hu tao akɛ ená Nyɔŋmɔ dɛŋ jɔɔmɔ kɛ ehiɛ duromɔ, no hewɔ lɛ, lɛ hu esaa eŋmɔshi nibii lɛ ekomɛi kɛha afɔleshãa. Shi, jwɛŋmɔ ni ehiɛ yɛ afɔleshãa lɛ he lɛ tamɔɔɔ Habel nɔ lɛ. Srɔtofeemɔ lɛ baje kpo faŋŋ beni nyɛmimɛi nɛɛ kɛ amɛfɔlei lɛ haa lɛ.

21 Eeenyɛ efee akɛ Adam bihii enyɔ lɛ fɛɛ kɛ afɔleshãa latɛ kɛ la tsu nii beni amɛshãa afɔle lɛ, ekolɛ yɛ kerubim, ni no beaŋ lɛ amɛ pɛ amɛji Yehowa najiaŋdamɔlɔi yɛ shikpɔŋ lɛ nɔ lɛ ahiɛ. Yehowa ha ana esusumɔ yɛ afɔleshãai nɛɛ ahe. Wɔkaneɔ akɛ: “Yehowa hiɛ sɔ Habel kɛ efɔle lɛ.” (1 Mose 4:4) Biblia lɛ etsɔɔɔ gbɛ nɔ ni Nyɔŋmɔ tsɔ ejie ehiɛsɔɔ lɛ kpo.

22, 23. Mɛni ha Yehowa hiɛ sɔ Habel afɔle lɛ?

22 Mɛni hewɔ Nyɔŋmɔ kpɛlɛ Habel afɔle lɛ nɔ lɛ? Ani afɔleshãa lɛ diɛŋtsɛ hewɔ? Habel kɛ kooloo ni hiɛ kã ni wala yɔɔ emli ha, ni efɔse ela ni ji ewala diɛŋtsɛ lɛ eshwie shi. Ani Habel yɔse bɔ ni afɔleshãa ni tamɔ nɛkɛ lɛ he hiaa waa ha lɛ? Afii ohai abɔ komɛi yɛ Habel gbele sɛɛ lɛ, Nyɔŋmɔ ha akɛ toobi ni kpa ko bɛ ehe lɛ afɔleshãa lɛ damɔ shi kɛha afɔle ni Lɛ diɛŋtsɛ e-Bi ni kpa ko bɛ ehe, ni ji “Nyɔŋmɔ toobi” ni efeko efɔŋ ko lɛ la ni abaafɔse ashwie shi lɛ. (Yoh. 1:29; 2 Mose 12:5-7) Kɛlɛ, Habel leee bɔ ni Yehowa kɛ afɔleshãai tsu nii sɛɛ mli lɛ he nɔ ko loo enuuu shishi.

23 Nɔ ni wɔle pɛ kɛkɛ ji enɛ: Habel kɛ nii ni eyɔɔ lɛ amli nɔ ni hi fe fɛɛ lɛ ha. Jeee afɔle lɛ pɛ kɛkɛ Yehowa hiɛ sɔ, shi ehiɛ sɔ Habel diɛŋtsɛ hu. Suɔmɔ ni Habel ná kɛha Yehowa kɛ hemɔkɛyeli krɔŋŋ ni ená yɛ emli lɛ tsirɛ lɛ ni efee nakai.

24. (a) Mɛni hewɔ wɔkɛɔ akɛ jeee nibii ni Kain kɛbashã afɔle lɛ ji nɔ ni ehiii lɛ? (b) Kɛbashi ŋmɛnɛ lɛ, mɛɛ gbɛ nɔ mɛi babaoo feɔ amɛnii tamɔ Kain?

 24 Kain nɔ lɛ bɛ lɛ nakai. Yehowa ‘hiɛ esɔɔɔ Kain kɛ efɔle lɛ.’ (1 Mose 4:5) Jeee akɛ Kain afɔle lɛ esaaa; Mla ni Nyɔŋmɔ wo yɛ sɛɛ mli lɛ bi koni akɛ ŋmɔshi nibii ashã afɔle. (3 Mose 6:14, 15) Shi Biblia lɛ wie Kain he akɛ, “lɛ diɛŋtsɛ enitsumɔi lɛ efɔji ni.” (Nyɛkanea 1 Yohane 3:12.) Taakɛ eji yɛ mɛi babaoo agbɛfaŋ ŋmɛnɛ lɛ, Kain susu akɛ na ni abaana yɛ kpo nɔ gbɛ akɛ etuu ehe eha Nyɔŋmɔ lɛ kɛkɛ fa. Enifeemɔ ha ana faŋŋ akɛ ebɛ hemɔkɛyeli krɔŋŋ kɛ suɔmɔ kɛha Yehowa.

25, 26. Mɛɛ kɔkɔ Yehowa bɔ Kain, kɛlɛ mɛni Kain yafee?

25 Beni Kain na akɛ Yehowa hiɛ esɔɔɔ lɛ lɛ, ani ebɔ mɔdɛŋ akɛ ebaakase Habel nɔkwɛmɔnɔ lɛ? Kɔkɔɔkɔ! Kain mli wo la naakpa ewo enyɛmi lɛ. Yehowa na nɔ ni yaa nɔ yɛ Kain tsui mli lɛ, ni eto etsui shi ebɔ mɔdɛŋ akɛ ekɛ Kain asusu nii ahe. Yehowa bɔ Kain kɔkɔ akɛ gbɛ ni ekɔ lɛ baaha efee esha ni yɔɔ hiɛdɔɔ, ni E-ha ele nɔ ni esa akɛ efee koni ‘ehiɛ aba nyam,’ kɛ́ Kain baabo toi kɛkɛ ni etsake gbɛ ni ekɔ lɛ.—1 Mose 4:6, 7.

26 Kain kpoo Nyɔŋmɔ kɔkɔbɔɔ lɛ. Ni ekɛɛ enyɛmi fioo ni heɔ lɛ eyeɔ lɛ koni ekɛ lɛ ayashara shi yɛ ŋa lɛ nɔ. Beni amɛyɔɔ ŋa lɛ nɔ lɛ, etswa Habel nɔ̃ ni egbe lɛ. (1 Mose 4:8) Yɛ gbɛ ko nɔ lɛ, Habel bafee mɔ klɛŋklɛŋ ni gbo yiwalɛ gbele yɛ Nyɔŋmɔ jamɔ hewɔ, lɛ ji klɛŋklɛŋ la odasefonyo. Tsɛ egbo moŋ, shi ehe saji lɛ gboko.

27. (a) Mɛni hewɔ wɔyɔɔ nɔmimaa akɛ Habel fata mɛi ni abaatee amɛ shi lɛ ahe lɛ? (b) Mɛni esa akɛ ofee koni ona nɔmimaa akɛ okɛ Habel baakpe gbi ko lɛ?

27 Yɛ shishinumɔ ko naa lɛ, Habel la lɛ bolɔ etsɛ Yehowa Nyɔŋmɔ kɛha oweletɔɔ, loo jalɛsaneyeli. Ni Nyɔŋmɔ kwɛ ni atsu jalɛsaneyeli he nii, no ji agbala Kain, yitsoŋwalɔ lɛ toi yɛ yiwalɛ nii ni efee lɛ hewɔ. (1 Mose 4:9-12) Nɔ ni fe fɛɛ lɛ, Habel hemɔkɛyeli he sane ni aŋma afɔ̃ shi lɛ kɛwɔ wieɔ ŋmɛnɛ. Afii abɔ ni ekɛhi shi—aaafee afii 100 lɛ yɛ kuku tsɔ kɛha adesai ni hi shi yɛ nakai beaŋ lɛ, shi Habel kɛ afii nɛɛ tsu nii jogbaŋŋ kɛsa Nyɔŋmɔ hiɛ. Egbo be mli ni eyɔɔ hekɛnɔfɔ̃ɔ akɛ eŋwɛi Tsɛ, ni ji Yehowa lɛ sumɔɔ esane ni ekpɛlɛɔ enɔ. (Heb. 11:4) Belɛ, wɔbaanyɛ wɔná hekɛnɔfɔ̃ɔ akɛ, eyɛ Yehowa kaimɔ ni bɛ naagbee lɛ mli kɛmiimɛ koni atee lɛ shi kɛba shikpɔŋ nɔ paradeiso lɛ mli. (Yoh. 5:28, 29) Ani okɛ lɛ baakpe yɛ jɛmɛ? Obaanyɛ okɛ lɛ akpe kɛji otswa ofai shi akɛ obaabo Habel toi beni ewieɔ lɛ, koni okase ehemɔkɛyeli ni nɔ bɛ lɛ.

^ kk. 5 Wiemɔ ni ji “jeŋ shishitoo” lɛ tsɔɔ seshi ni afɔɔ, no hewɔ lɛ ekɔɔ be ni adesa wo shwie yɛ shishijee mli lɛ he. Shi mɛni hewɔ Yesu kɛ “jeŋ shishitoo” lɛ to Habel he shi jeee Kain, ni ji klɛŋklɛŋ adesa ni afɔ lɛ lɛ he lɛ? Kain yiŋkpɛi kɛ nibii ni efee lɛ tsɔɔ akɛ eje gbɛ etse Yehowa Nyɔŋmɔ hiɛ atua. Taakɛ eji yɛ Kain fɔlɔi agbɛfaŋ lɛ, etamɔ nɔ ni lɛ hu gbohiiashitee kɛ kpɔ̃mɔ baabɔ lɛ.