Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Tsɔɔmɔ Obii lɛ Anii

 NIKASEMƆ 13

Timoteo Miisumɔ ni Eye Ebua Mɛi

Timoteo Miisumɔ ni Eye Ebua Mɛi

Timoteo ji oblanyo ko ni ná he miishɛɛ akɛ ebaaye ebua mɛi. Efã gbɛ kɛtee hei pii koni eyaye ebua mɛi. Enɛ hewɔ lɛ, etsu nibii pii yɛ eshihilɛ mli. Bɛ obaasumɔ ni ole ehe sane?

Timoteo mami kɛ enaa tsɔɔ lɛ Yehowa he nii

Timoteo da yɛ maŋ ko ni atsɛɔ lɛ Listra lɛ mli. Beni edako kwraa lɛ, enaa ni atsɛɔ lɛ Loise kɛ emami ni atsɛɔ lɛ Eunike lɛ bɔi lɛ nibii ni kɔɔ Yehowa he lɛ tsɔɔmɔ. Beni Timoteo daa lɛ, ená he miishɛɛ akɛ ebaaye ebua mɛi krokomɛi koni amɛkase Yehowa he nii.

Beni Timoteo kã he eji oblanyo lɛ, Paulo bi lɛ kɛji ebaasumɔ ni efata ehe ni amɛyashiɛ yɛ hei krokomɛi. Timoteo ha hetoo akɛ: ‘Hɛɛ, masumɔ!’ Efee klalo akɛ ebaaya ni eyaye ebua mɛi krokomɛi.

 Timoteo kɛ Paulo fã gbɛ kɛtee maŋ ko ni atsɛɔ lɛ Tesalonika, ni yɔɔ Makedonia lɛ. Amɛnyiɛ gbɛ kakadaŋŋ ni amɛkwɔ lɛlɛ hu dani amɛyashɛ jɛmɛ. Beni amɛyashɛ lɛ, amɛtsɔɔ mɛi babaoo Yehowa he nii. Shi mɛi komɛi amli fũ ni amɛka akɛ amɛbaaye amɛ awui. No hewɔ lɛ, ehe bahia ni Paulo kɛ Timoteo ashi jɛmɛ ni amɛyashiɛ yɛ hei krokomɛi.

Timoteo ná miishɛɛ waa yɛ eshihilɛ mli

Nyɔji komɛi asɛɛ lɛ, Paulo kɛɛ Timoteo akɛ eku esɛɛ eya Tesalonika ni eyakwɛ akɛ te nyɛmimɛi lɛ yɔɔ tɛŋŋ. Esa akɛ Timoteo aná ekãa dani ebaanyɛ eya nakai maŋ ni mli yɔɔ oshara lɛ mli ekoŋŋ! Shi Timoteo tee, ejaakɛ eejwɛŋ nyɛmimɛi ni yɔɔ jɛmɛ lɛ ahe waa. Beni eku esɛɛ eba Paulo ŋɔɔ lɛ, ekɛ amaniɛbɔɔ kpakpa ba. Nyɛmimɛi ni yɔɔ Tesalonika lɛ miiya amɛhiɛ waa!

Timoteo kɛ Paulo tsu nii afii babaoo. Be ko lɛ, Paulo ŋma akɛ Timoteo ji mɔ ni sa fe fɛɛ ni ebaanyɛ etsu ni eyaye ebua asafoi lɛ. Timoteo sumɔɔ Yehowa ni esumɔɔ mɛi.

Ani osumɔɔ mɛi, ni oyɛ he miishɛɛ akɛ obaaye obua amɛ ni amɛkase Yehowa he nii?— Kɛ́ nakai ni lɛ, obaaná miishɛɛ waa, ni obaatsu nibii babaoo yɛ oshihilɛ mli tamɔ bɔ ni Timoteo fee lɛ pɛpɛɛpɛ!