Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Tsɔɔmɔ Obii lɛ Anii

 NIKASEMƆ 10

Yesu Bo Yehowa kɛ Efɔlɔi Atoi Be Fɛɛ Be

Yesu Bo Yehowa kɛ Efɔlɔi Atoi Be Fɛɛ Be

Ani bei komɛi lɛ ewa kɛha bo akɛ obaabo ofɔlɔi atoi?Hɛɛ, bei komɛi lɛ ewa. Ani ole akɛ Yesu bo Yehowa kɛ efɔlɔi atoi?Enɔkwɛmɔnɔ lɛ baanyɛ aye abua bo ni obo ofɔlɔi atoi yɛ bei ni nakai feemɔ wa lɛ po mli. Ha wɔkase enɛ he nii babaoo.

Yesu kɛ e-Tsɛ Yehowa hi ŋwɛi dani eba shikpɔŋ lɛ nɔ. Shi Yesu ná fɔlɔi yɛ shikpɔŋ lɛ nɔ hu. Epapa gbɛ́i ji Yosef, ni atsɛɔ emami Maria. Ani ole bɔ ni fee ni amɛbatsɔ efɔlɔi?

Yehowa jie Yesu wala kɛjɛ ŋwɛi ni ekɛbawo Maria musu mli koni anyɛ afɔ Yesu ni ebahi shikpɔŋ lɛ nɔ. Enɛ ji nɔ ko ni yɔɔ naakpɛɛ waa! Yesu da yɛ Maria musu mli tamɔ bɔ ni gbekɛ ko daa yɛ emami musu mli lɛ nɔŋŋ. No sɛɛ aaafee nyɔji nɛɛhu lɛ, afɔ Yesu. Nɛkɛ ji bɔ ni fee ni Maria kɛ ewu Yosef batsɔ Yesu fɔlɔi yɛ shikpɔŋ lɛ nɔ.

Beni Yesu eye afii 12 pɛ lɛ, efee nɔ ko ni tsɔɔ akɛ esumɔɔ Yehowa ni ji e-Tsɛ lɛ waa. Yesu fee enɛ beni ekɛ eweku lɛ fã gbɛ kakadaŋŋ kɛtee Yerusalem koni amɛyaye Hehoo lɛ. Beni amɛkuɔ amɛsɛɛ lɛ, Yosef kɛ Maria enaaa Yesu. Ani ole he ni no mli lɛ Yesu yɔɔ?

Mɛni hewɔ Yesu tee sɔlemɔwe lɛ?

Yosef kɛ Maria kɛ oyaiyeli ku amɛsɛɛ kɛtee Yerusalem ni amɛbɔi Yesu taomɔ. Amɛtao lɛ yɛ he fɛɛ he shi amɛnaaa lɛ, ni enɛ ha amɛhao waa. Shi gbii etɛ sɛɛ lɛ, amɛyana lɛ yɛ sɔlemɔwe lɛ! Ani ole nɔ hewɔ ni Yesu tee sɔlemɔwe lɛ?Etee sɔlemɔwe lɛ ejaakɛ ebaanyɛ ekase Yehowa, ni ji e-Tsɛ lɛ, he nii yɛ jɛmɛ. Yesu sumɔɔ Yehowa waa, ni eesumɔ ni ele bɔ ni eeefee esa ehiɛ. Beni Yesu da ni ebatsɔ onukpa po lɛ, ebo Yehowa toi be fɛɛ be. Yesu fee toiboo be ni nakai feemɔ wa kɛha lɛ ní ebaabi ni ena nɔ po lɛ. Ani Yesu bo Yosef kɛ Maria hu toi?Hɛɛ, Biblia lɛ kɛɔ akɛ ebo amɛtoi.

Mɛni okaseɔ kɛjɛɔ Yesu nɔkwɛmɔnɔ lɛ mli?Esa akɛ obo ofɔlɔi atoi, yɛ bei ni nakai feemɔ wa lɛ po amli. Bɛ obaafee nakai?

KANEMƆ YƐ OBIBLIA LƐ MLI