Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Tsɔɔmɔ Obii lɛ Anii

 NIKASEMƆ 7

Ani Bei Komɛi lɛ Onuɔ he akɛ Ohe Efee Shoo ni Ooshe Gbeyei?

Ani Bei Komɛi lɛ Onuɔ he akɛ Ohe Efee Shoo ni Ooshe Gbeyei?

Kwɛmɔ gbekɛ ni yɔɔ mfoniri lɛ mli lɛ. Etamɔ nɔ ni ehe efee shoo ni eeshe gbeyei, aloo jeee nakai? Ani onu he nakai pɛŋ?​— Mɔ fɛɛ mɔ nuɔ he nakai bei komɛi. Biblia lɛ gbaa wɔ Yehowa nanemɛi komɛi ni amɛ hu amɛnu he akɛ amɛhe efee shoo ni amɛmiishe gbeyei lɛ ahe sane. Amɛteŋ mɔ kome ji Elia. Ha wɔkase ehe sane.

Yezebel miitao ni egbe Elia

Elia hi Israel. Egbele sɛɛ kwraa dani afɔ Yesu. No mli lɛ, Ahab ni ji Israel maŋtsɛ lɛ jaaa Yehowa, anɔkwa Nyɔŋmɔ lɛ. Ahab kɛ eŋa Yezebel jaa apasa nyɔŋmɔ ni atsɛɔ lɛ Baal lɛ. No hewɔ lɛ, Israelbii lɛ ateŋ mɛi babaoo hu bɔi Baal jamɔ. Maŋnyɛ Yezebel yitsoŋ wa waa ni eesumɔ ni egbe mɛi fɛɛ ni jaa Yehowa lɛ, ni Elia hu fata mɛi nɛɛ ahe! Ole nɔ ni Elia fee?​—

Elia jo foi! Etee shia ŋa lɛ nɔ he ko shɔŋŋ ni eyatee ehe yɛ tɛkplo ko mli.  Kɛ́ okwɛ lɛ, mɛni hewɔ efee nakai?​— Hɛɛ, eeshe gbeyei. Kulɛ esaaa ni Elia sheɔ gbeyei. Mɛni hewɔ? Ejaakɛ ele akɛ Yehowa baanyɛ aye abua lɛ. Yehowa eha Elia ena ehewalɛ lɛ pɛŋ. Be ko lɛ, Yehowa ha Elia sɔlemɔ hetoo kɛtsɔ la ni eha ejɛ ŋwɛi kɛba lɛ nɔ. No hewɔ lɛ, Yehowa baanyɛ eye ebua Elia ekoŋŋ!

Mɛɛ gbɛ nɔ Yehowa ye ebua Elia?

Beni Elia yɔɔ tɛkplo lɛ mli lɛ, Yehowa kɛ lɛ wie ni ebi lɛ akɛ: ‘Mɛni ofeɔ yɛ biɛ?’ Elia ha hetoo akɛ: ‘Mi pɛ ji mɔ ni eshwɛ ni jaa bo lolo. Eshwɛ mi kome pɛ, ni miishe gbeyei akɛ abaagbe mi.’ Elia susu akɛ agbe mɛi krokomɛi ni jaa Yehowa lɛ fɛɛ. Shi Yehowa kɛɛ Elia akɛ: ‘Dabi, jeee okome pɛ eshwɛ. Mɛi 7,000 yɛ ni miija mi lolo. Feemɔ ekãa. Miyɛ nitsumɔ babaoo kɛha bo!’ Kɛ́ okwɛ lɛ, ani Elia mii baashɛ ehe beni enu sane nɛɛ?​—

Mɛni obaanyɛ okase yɛ nɔ ni ba Elia nɔ lɛ mli?​— Esaaa akɛ onuɔ he akɛ ohe efee shoo ni osheɔ gbeyei kɔkɔɔkɔ. Oyɛ nanemɛi ni sumɔɔ Yehowa ni sumɔɔ bo. Agbɛnɛ hu, Yehowa yɛ hewalɛ babaoo, ni ebaaye ebua bo daa! Ani le ni oná ole akɛ ohe efeko shoo lɛ haaa omii ashɛ ohe?​—

KANEMƆ YƐ OBIBLIA LƐ MLI