Zakaria 6:1-15

  • Ninaa 8: Shwiilii ejwɛ (1-8)

  • Tso Ni Etsɛ̃ lɛ baatsɔ maŋtsɛ kɛ osɔfo (9-15)

6  Ni miwó mihiɛ nɔ mikwɛ ekoŋŋ, ni mina shwiilii ejwɛ ni jɛ gɔji enyɔ ateŋ miiba, ni gɔji lɛ, akɔɔble gɔji ni.  Klɛŋklɛŋ shwiili lɛ, okpɔŋɔi tsuji yɔɔ he, ni shwiili ni ji enyɔ lɛ, okpɔŋɔi diji yɔɔ he.+  Shwiili ni ji etɛ lɛ, okpɔŋɔi yɛji yɔɔ he, ni shwiili ni ji ejwɛ lɛ, okpɔŋɔi ni he yɔɔ turuntarai kɛ nɔ ni he yɔɔ tutuŋtafei* yɔɔ he.+  Mibi ŋwɛibɔfo lɛ ni kɛ mi wieɔ lɛ akɛ: “Minuŋtsɔ, mɛni ji enɛɛmɛi?”  Ŋwɛibɔfo lɛ hã mi hetoo akɛ: “Enɛɛmɛi ji ŋwɛi mumɔi ejwɛ+ lɛ ni eje kpo kɛmiiya, be ni amɛyadamɔ shikpɔŋ muu lɛ fɛɛ Nuŋtsɔ lɛ hiɛ sɛɛ lɛ.+  Nɔ* ni okpɔŋɔi diji yɔɔ he lɛ eje kpo kɛmiiya kooyigbɛ shikpɔŋ lɛ nɔ;+ okpɔŋɔi yɛji lɛ eje kpo kɛmiiya ŋshɔ lɛ sɛɛgbɛ; ni okpɔŋɔi ni he yɔɔ turuntarai lɛ eje kpo kɛmiiya wuoyigbɛ shikpɔŋ lɛ nɔ.  Ni okpɔŋɔi ni he yɔɔ tutuŋtafei* lɛ efee klalo akɛ amɛbaayakpa shikpɔŋ lɛ nɔ.” Kɛkɛ ni ekɛɛ: “Nyɛyaa, nyɛyakpaa shikpɔŋ lɛ nɔ.” Ni amɛyabɔi shikpɔŋ lɛ nɔ kpaa.  Kɛkɛ ni ebo etsɛ mi, ni ekɛɛ: “Naa, okpɔŋɔi ni eje kpo kɛmiiya kooyigbɛ shikpɔŋ lɛ nɔ lɛ ehã Yehowa mumɔ lɛ ejɔɔ ehe yɛ kooyigbɛ shikpɔŋ lɛ nɔ.”  Yehowa kɛɛ mi ekoŋŋ akɛ: 10  “Hemɔ nɔ ni Heldai kɛ Tobia kɛ Yedaia kɛjɛ mɛi ni yɔɔ nomŋɔɔ mli lɛ aŋɔɔ kɛba lɛ yɛ amɛdɛŋ; ni nakai gbi lɛ nɔ lɛ, okɛ mɛi nɛɛ ni ejɛ Babilon amɛba lɛ fɛɛ aya Yosia, Zefania binuu lɛ shĩa lɛ. 11  Ŋɔɔ jwiɛtɛi kɛ shika tsuru, ní okɛfee akekere,* ní okɛbu Osɔfonukpa Yoshua,+ Yehozadak binuu lɛ yitso. 12  Ní okɛɛ lɛ akɛ,“‘Nɔ ni Yehowa, taiatsɛ lɛ, kɛɛ nɛ: “Naa nuu ni atsɛɔ lɛ Tso Ni Etsɛ̃ lɛ.+ Ebaatsɛ̃ kɛjɛ lɛ diɛŋtsɛ egbɛhe lɛ, ni ebaama Yehowa sɔlemɔ shĩa lɛ.+ 13  Lɛ ji mɔ ni baama Yehowa sɔlemɔ shĩa lɛ, ni lɛ ji mɔ ni baaŋɔ agbojee lɛ. Ebaata emaŋtsɛ sɛi lɛ nɔ eye nɔ, ni ebaaye osɔfo hu yɛ emaŋtsɛ sɛi lɛ nɔ,+ ni gbeekpamɔ baahi egbɛnai enyɔ lɛ fɛɛ ateŋ.* 14  Ni akekere* lɛ baatsɔ kaimɔ nɔ ni akɛkaiɔ Helem kɛ Tobia kɛ Yedaia+ kɛ Hen, Zefania binuu lɛ, yɛ Yehowa sɔlemɔ shĩa lɛ. 15  Ni mɛi ni yɔɔ shɔŋŋ lɛ baaba amɛbawa kɛma Yehowa sɔlemɔ shĩa lɛ.” Ni nyɛbaaná nyɛle akɛ, Yehowa, taiatsɛ lɛ, ji mɔ ni tsu mi nyɛŋɔɔ. Ni ebaaba mli—kɛji nyɛbo Yehowa, nyɛ-Nyɔŋmɔ lɛ, gbee toi.’”

Shishigbɛ Niŋmaa

Ni ji, nɔ ni kɔlai bibiibibii komɛi tara amɛhe fɛɛ.
Ni ji, shwiili lɛ.
Ni ji, nɔ ni kɔlai bibiibibii komɛi tara amɛhe fɛɛ.
Loo “akekere kpeteŋkpele.”
Ni tsɔɔ akɛ, gbeekpamɔ baahi egbɛnai akɛ nɔyelɔ kɛ osɔfo lɛ teŋ.
Loo “akekere kpeteŋkpele.”