Zakaria 5:1-11
5 Miwó mihiɛ nɔ mikwɛ ekoŋŋ, ni mina wolokpo ko ni miifiliki.
2 Ebi mi akɛ: “Mɛni onaa lɛ?”
Mihã hetoo akɛ: “Miina wolokpo ko ni miifiliki, ni ekɛlɛ ji ninetalɔi* 20, ni elɛɛmɔ ji ninetalɔi 10.”
3 Ni ekɛɛ mi akɛ: “Enɛ ji loomɔ ni miije kpo kɛmiiya shikpɔŋ muu lɛ fɛɛ nɔ lɛ, ejaakɛ mɔ fɛɛ mɔ ni juɔ lɛ,+ tamɔ bɔ ni aŋma yɛ wolokpo lɛ afã kome lɛ, agbalako etoi; ni mɔ fɛɛ mɔ ni kãa kitã lɛ,+ tamɔ bɔ ni aŋma yɛ wolokpo lɛ afã kroko lɛ, lɛ hu agbalako etoi.
4 ‘Mitsu lɛ kɛtee,’ Yehowa, taiatsɛ lɛ kɛɛ, ‘ni ebaayabote julɔ lɛ shĩa lɛ mli, kɛ mɔ ni kɛ migbɛ́i kãa amale kitã lɛ shĩa lɛ mli; ni ebaahi nakai shĩa lɛ mli, ni ebaakpãtã shĩa lɛ kɛ emli tsei lɛ kɛ emli tɛi lɛ fɛɛ ahiɛ.’”
5 Kɛkɛ ni ŋwɛibɔfo lɛ ni kɛ mi wieɔ lɛ ba ni ebakɛɛ mi akɛ: “Ofainɛ, wó ohiɛ nɔ, ní okwɛ nɔ ni eje kpo kɛyaa lɛ.”
6 No hewɔ lɛ, mibi akɛ: “Mɛni ni?”
Ehã hetoo akɛ: “Enɛ ji efa susumɔnɔ* ni jeɔ kpo kɛyaa lɛ.” Ekɛɛ kɛfata he akɛ: “Nɛkɛ ji bɔ ni amɛsu yɔɔ yɛ shikpɔŋ muu lɛ fɛɛ nɔ.”
7 Ni mina akɛ awó enaanɔ kokloo ni akɛ sumui fee lɛ nɔ, ni yoo ko ta shi yɛ susumɔnɔ lɛ mli.
8 No hewɔ lɛ, ekɛɛ: “Mɔ nɛ ji Efɔŋfeemɔ lɛ.” Kɛkɛ ni enyɛ yoo lɛ nɔ ewo efa susumɔnɔ lɛ mli ekoŋŋ, no sɛɛ lɛ, enyɛ sumui naanɔ ni tsii lɛ nɔ kɛbu naa.
9 Kɛkɛ ni miwó mihiɛ nɔ mikwɛ, ni mina yei enyɔ miiba, ni amɛmiifiliki yɛ kɔɔyɔɔ lɛ mli. Amɛyɛ fiji tamɔ klitso fiji. Ni amɛwó susumɔnɔ lɛ nɔ kɛtee shikpɔŋ lɛ kɛ ŋwɛi teŋ.
10 No hewɔ lɛ, mibi ŋwɛibɔfo lɛ ni kɛ mi wieɔ lɛ akɛ: “Nɛgbɛ amɛkɛ efa susumɔnɔ lɛ yaa?”
11 Ehã hetoo akɛ: “Amɛkɛmiiya Shinear*+ shikpɔŋ lɛ nɔ koni amɛyama shĩa amɛhã yoo lɛ; ni kɛ́ ama agbe naa lɛ, amɛkɛ lɛ baawo jɛmɛ yɛ eshihilɛhe ni sa lɛ.”
Shishigbɛ Niŋmaa
^ Ninetalɔ kome feɔ sɛntimitai 44.5 (iŋtsii 17.5). Kwɛmɔ Saji Krokomɛi B14 lɛ.
^ Hebri sht. ŋm., “efa lɛ,” yɛ biɛ lɛ, etsɔɔ tsɛnsi loo kɛntɛŋ ko ni akɛsusuɔ nii efa kome. Efa kome feɔ litai 22 (kwat 20). Kwɛmɔ Saji Krokomɛi B14 lɛ.
^ Ni ji, Babilonia.
