Zakaria 4:1-14

  • Ninaa 5: Kanetso kɛ oliv tsei enyɔ (1-14)

    • ‘Jeee hewalɛ naa, shi moŋ, mimumɔ lɛ naa’ (6)

    • Kaagbe gbi ni nibii je shishi bibiibibii lɛ he guɔ (10)

4  Ŋwɛibɔfo lɛ ni kɛ mi wieɔ lɛ ku esɛɛ kɛba ni ebatsĩɛ mi, tamɔ atsĩɛɔ mɔ kɛjɛɔ wɔ mli lɛ.  Ni ebi mi akɛ: “Mɛni onaa lɛ?” No hewɔ lɛ, mikɛɛ: “Naa! miina kanetso ni akɛ shika tsuru sɔŋŋ fee,+ ní tsɛnsi ko ma eyiteŋ. Kanei kpawo yɛ he,+ hɛɛ, kpawo, ni kanei lɛ ni yɔɔ eyiteŋ lɛ yɛ dadei* kpawo ní mu tsɔɔ mli.  Ni oliv tsei enyɔ mamɔ emasɛi,+ ekome yɛ tsɛnsi lɛ ninejurɔ nɔ, ni ekome hu yɛ ebɛku nɔ.”  Kɛkɛ ni mibi ŋwɛibɔfo lɛ ni kɛ mi wieɔ lɛ akɛ: “Minuŋtsɔ, mɛni nibii nɛɛ damɔ shi kɛhã?”  No hewɔ lɛ, ŋwɛibɔfo lɛ ni kɛ mi wieɔ lɛ bi mi akɛ: “Ani oleee nɔ ni nibii nɛɛ damɔ shi kɛhã?” Mihã hetoo akɛ: “Minuŋtsɔ, dabi.”  Kɛkɛ ni ekɛɛ mi akɛ: “Yehowa wiemɔ ni ekɛhã Zerubabel lɛ nɛ: ‘“Jeee asraafoi anyɛmɔ naa, ni jeee hewalɛ naa hu,+ shi moŋ, mimumɔ lɛ naa,”+ Yehowa, taiatsɛ lɛ kɛɛ.  Namɔ ji bo, bo gɔŋ kpeteŋkpele? Obaatsɔ shikpɔŋ ni kã shi tɛtrɛɛ*+ yɛ Zerubabel+ hiɛ. Ni ekɛ yiteŋ tɛ* lɛ baaje kpo kɛba be ni aabɔ oshe akɛ: “Eyɛ fɛo waa! Eyɛ fɛo waa!”’”  Yehowa kɛɛ mi ekoŋŋ akɛ:  “Zerubabel niji to shĩa nɛɛ shishi,+ ni lɛ nɔŋŋ eniji baagbe naa.+ Ni nyɛbaaná nyɛle akɛ, Yehowa, taiatsɛ lɛ, ji mɔ ni tsu mi nyɛŋɔɔ lɛ. 10  Shi namɔ gbeɔ gbi ni nibii je shishi bibiibibii lɛ he guɔ?*+ Ejaakɛ amɛbaanya, ni amɛbaana plomo* lɛ yɛ Zerubabel dɛŋ. Hiŋmɛii kpawo nɛɛ ji Yehowa hiŋmɛii ni kpaa shikpɔŋ muu lɛ fɛɛ nɔ lɛ.”+ 11  Ni mibi lɛ akɛ: “Mɛni oliv tsei enyɔ nɛɛ ni mamɔ kanetso lɛ ninejurɔ kɛ ebɛku nɔ lɛ damɔ shi kɛhã?”+ 12  Mibi lɛ nɔ ni ji shii enyɔ nɔ akɛ: “Mɛni oliv tsei lɛ aniji* enyɔ lɛ ni fɔseɔ mu ni kɔla tamɔ shika tsuru kɛtsɔɔ shika tsuru paipii enyɔ lɛ amli lɛ damɔ shi kɛhã?” 13  No hewɔ lɛ, ebi mi akɛ: “Ani oleee nɔ ni enɛɛmɛi damɔ shi kɛhã?” Mihã hetoo akɛ: “Minuŋtsɔ, dabi.” 14  Kɛkɛ ni ekɛɛ: “Enɛɛmɛi ji mɛi enyɔ ni afɔ amɛ mu ni damɔ shikpɔŋ muu lɛ fɛɛ Nuŋtsɔ lɛ masɛi lɛ.”+

Shishigbɛ Niŋmaa

Loo “paipii.”
Loo “shikpɔŋ kplanaa.”
Loo “gbogbo yiteŋ tɛ.”
Loo “namɔ gbeɔ nibii bibii agbi lɛ he guɔ?”
Hebri sht. ŋm., “tɛ lɛ, sanyaa lɛ.” Plomo ji kpãa ko kɛ enaa dade ní akɛkwɛɔ akɛ nɔ ko ma shi jaŋŋ lo.
Ni ji, tsei lɛ aniji ni yibii yɔɔ nɔ lɛ.