Zakaria 1:1-21

  • Abi ni amɛku amɛsɛɛ kɛba Yehowa ŋɔɔ (1-6)

    • ‘Nyɛkua nyɛsɛɛ kɛbaa miŋɔɔ, ni mi hu maku misɛɛ kɛba nyɛŋɔɔ’ (3)

  • Ninaa 1: Okpɔŋɔnɔtaralɔi yɛ mirto tsei lɛ ateŋ (7-17)

    • “Yehowa baashɛje Zion mii ekoŋŋ” (17)

  • Ninaa 2: Akolontoi ejwɛ kɛ ŋaa nitsulɔi ejwɛ (18-21)

1  Dario nɔyeli afi ni ji enyɔ lɛ mli nyɔɔŋ ni ji kpaanyɔ lɛ nɔ lɛ,+ Yehowa kɛɛ gbalɔ Zakaria,*+ ni ji Ido binuu Berekia binuu lɛ akɛ:  “Yehowa mli wo la waa ewo nyɛtsɛmɛi lɛ.+  “Kɛɛmɔ amɛ akɛ, ‘Nɔ ni Yehowa, taiatsɛ lɛ, kɛɛ nɛ: “‘Nyɛkua nyɛsɛɛ kɛbaa miŋɔɔ,’ Yehowa, taiatsɛ lɛ kɛɛ, ‘ni mi hu maku misɛɛ kɛba nyɛŋɔɔ,’+ Yehowa, taiatsɛ lɛ kɛɛ.”’  “‘Nyɛkafea nyɛnii tamɔ nyɛtsɛmɛi lɛ, mɛi ni tsutsu gbalɔi lɛ kɛɛ amɛ akɛ: “Nɔ ni Yehowa, taiatsɛ lɛ, kɛɛ nɛ, ‘Nyɛfainɛ, nyɛjea* nyɛgbɛi fɔji lɛ anɔ kɛ nyɛnifeemɔi fɔji lɛ ahe’ lɛ.”’+ “‘Shi amɛnuuu, ni amɛbooo mi toi hu,’+ Yehowa kɛɛ.  “‘Nɛgbɛ nyɛtsɛmɛi lɛ yɔɔ amrɔ nɛɛ? Ni gbalɔi lɛ, ani amɛhi shi kɛtee naanɔ?  Kɛ̃lɛ, miwiemɔi kɛ mifamɔi ni mikɛhã mitsuji gbalɔi lɛ ba mli yɛ nyɛtsɛmɛi lɛ anɔ, aloo jeee nakai?’+ No hewɔ lɛ, amɛku amɛsɛɛ kɛba miŋɔɔ, ni amɛkɛɛ: ‘Yehowa, taiatsɛ lɛ, kɛ wɔ eye yɛ wɔgbɛi kɛ wɔnifeemɔi lɛ anaa, tamɔ bɔ ni ekpɛ mli akɛ ebaafee lɛ pɛpɛɛpɛ.’”+  Dario nɔyeli afi ni ji enyɔ lɛ mli,+ yɛ nyɔɔŋ ni ji 11, ni ji Shebat* nyɔɔŋ lɛ nɔ gbi ni ji 24 lɛ nɔ lɛ, Yehowa kɛɛ gbalɔ Zakaria, ni ji Ido binuu Berekia binuu lɛ akɛ:  “Mina ninaa ko nyɔɔŋ. Ni mina nuu ko ta okpɔŋɔ tsuru nɔ, ni ewa edamɔ shi yɛ mirto tsei ni yɔɔ jɔɔ voo lɛ mli lɛ ateŋ; ni okpɔŋɔi tsuji kɛ okpɔŋɔi braun* kɛ okpɔŋɔi yɛji yɛ esɛɛ.”  No hewɔ lɛ, mikɛɛ akɛ: “Minuŋtsɔ, namɛi nɛ?” Ŋwɛibɔfo lɛ ni kɛ mi wieɔ lɛ hã mi hetoo akɛ: “Matsɔɔ bo mɛi ni amɛji.” 10  Kɛkɛ ni nuu lɛ ni damɔ mirto tsei lɛ ateŋ lɛ kɛɛ akɛ: “Mɛnɛɛmɛi ji mɛi ni Yehowa etsu ní amɛyakpa shikpɔŋ lɛ nɔ lɛ.” 11  Ni amɛkɛɛ Yehowa bɔfo lɛ ni damɔ mirto tsei lɛ ateŋ lɛ akɛ: “Wɔyakpa shikpɔŋ lɛ nɔ, ni naa! shikpɔŋ muu lɛ fɛɛ kã shi diŋŋ, ni ehe ejɔ lɛ.”+ 12  No hewɔ lɛ, Yehowa bɔfo lɛ kɛɛ: “Ao, Yehowa taiatsɛ, mɛɛ beyinɔ nɔŋŋ obaatsĩ omɔbɔnalɛ lɛ naa owo Yerusalem kɛ Yuda maji lɛ+ ní omli ewo la ewo amɛ nɛkɛ afii 70 nɛɛ kɛyashi?”+ 13  Yehowa kɛ naajɔlɛ kɛ miishɛjemɔ wiemɔi hã ŋwɛibɔfo lɛ ni kɛ mi wieɔ lɛ hetoo. 14  Kɛkɛ ni ŋwɛibɔfo lɛ ni kɛ mi wieɔ lɛ kɛɛ mi akɛ: “Boo akɛ, ‘Nɔ ni Yehowa, taiatsɛ lɛ, kɛɛ nɛ: “Mihiɛ edɔ yɛ Yerusalem kɛ Zion he waa diɛŋtsɛ.+ 15  Mimli efu jeŋmaji ni he ejɔ amɛ lɛ waa diɛŋtsɛ,+ ejaakɛ mimli fu fioo kɛkɛ,+ shi amɛ lɛ, amɛhã amanehulu lɛ mli wo wu.”’+ 16  “No hewɔ lɛ, nɔ ni Yehowa kɛɛ nɛ: ‘“Mikɛ mɔbɔnalɛ baaku misɛɛ kɛba Yerusalem,+ ni abaama mi diɛŋtsɛ mishĩa lɛ yɛ emli,”+ Yehowa, taiatsɛ lɛ kɛɛ, “ni abaakpã susumɔ kpãa mli yɛ Yerusalem nɔ.”’+ 17  “Boo shi kome ekoŋŋ, ní okɛɛ akɛ, ‘Nɔ ni Yehowa, taiatsɛ lɛ, kɛɛ nɛ: “Mimaji lɛ amli baayimɔ kɛteke nɔ kɛ nibii kpakpai; ni Yehowa baashɛje Zion mii ekoŋŋ,+ ni ebaahala Yerusalem ekoŋŋ.”’”+ 18  Ni miwó mihiɛ nɔ mikwɛ, ni mina akolontoi ejwɛ.+ 19  No hewɔ lɛ, mibi ŋwɛibɔfo lɛ ni kɛ mi wieɔ lɛ akɛ: “Mɛni ji enɛɛmɛi?” Ehã hetoo akɛ: “Enɛɛmɛi ji akolontoi ni gbɛ Yuda+ kɛ Israel+ kɛ Yerusalem+ shwã lɛ.” 20  Ni Yehowa hã mina ŋaa nitsulɔi ejwɛ. 21  Mibi akɛ: “Mɛni mɛnɛɛmɛi baa amɛbafee?” Ekɛɛ akɛ: “Enɛɛmɛi ji akolontoi ni gbɛ Yuda shwã, bɔ ni mɔ ko mɔ ko nyɛɛɛ eyitso nɔ ewó lɛ. Mɛnɛɛmɛi hu baabawo amɛhe gbeyei, ni amɛbaashɛrɛ jeŋmaji ni wó amɛkolontoi anɔ amɛshi Yuda shikpɔŋ lɛ, bɔ ni afee ni amɛkɛgbɛ amɛ amɛshwã lɛ akolontoi lɛ amɛshwie shi.”

Shishigbɛ Niŋmaa

Eshishi ji, “Yehowa Ekai.”
Loo “nyɛkua nyɛsɛɛ kɛjea.”
Loo “asara su.”