Yoshua 6:1-27

  • Yeriko gbogbo lɛ gbee shi (1-21)

  • Abaa Rahab kɛ eweku lɛ yi (22-27)

6  Agbɛnɛ, aŋa Yeriko naa kpɛŋŋ yɛ Israelbii lɛ ahewɔ; mɔ ko mɔ ko ejeee kpo, ni mɔ ko mɔ ko baaa mli hu.+  Ni Yehowa kɛɛ Yoshua akɛ: “Naa, mikɛ Yeriko kɛ emaŋtsɛ lɛ kɛ etawulɔi kãkãlɔi lɛ ewo odɛŋ.+  Nyɛ hii fɛɛ ni nyɛyaa ta lɛ, nyɛnyiɛa kɛbɔlea maŋ lɛ, nyɛbɔlea lɛ shi kome. Nyɛfea nakai gbii ekpaa.  Hã osɔfoi kpawo ahiɛ tɛtɛrɛmantɛrɛi* kpawo kɛnyiɛ Adeka lɛ hiɛ. Shi gbi ni ji kpawo lɛ nɔ lɛ, nyɛbɔlea maŋ lɛ shii kpawo, ni osɔfoi lɛ akpã tɛtɛrɛmantɛrɛi* lɛ.+  Kɛ́ akpã tɛtɛrɛmantɛrɛ* lɛ—kɛ́ nyɛnu tɛtɛrɛmantɛrɛ* lɛ gbɛɛmɔ* lɛ nɔŋŋ lɛ—maŋ lɛ fɛɛ abɔ oshe. Kɛkɛ lɛ, maŋ lɛ gbogbo lɛ baagbee shi shwɛtɛɛ,+ ni gbɔmɛi lɛ abote mli,* mɔ fɛɛ mɔ aya ehiɛ tɛ̃ɛ.”  No hewɔ lɛ, Yoshua, Nun binuu lɛ, tsɛ osɔfoi lɛ ni ekɛɛ amɛ akɛ: “Nyɛwóa kpaŋmɔ adeka lɛ, ni osɔfoi kpawo ahiɛ tɛtɛrɛmantɛrɛi* kpawo kɛnyiɛ Yehowa Adeka lɛ hiɛ.”+  Ni ekɛɛ maŋ lɛ akɛ: “Nyɛfãa nyɛyaa ni nyɛyabɔlea maŋ lɛ, ni asraafoi ni ewula amɛhe+ lɛ anyiɛ Yehowa Adeka lɛ hiɛ.”  Ni tamɔ bɔ ni Yoshua kɛ maŋ lɛ wie lɛ, osɔfoi kpawo ní hiɛ tɛtɛrɛmantɛrɛi* kpawo yɛ Yehowa hiɛ lɛ yi hiɛ ni amɛkpã tɛtɛrɛmantɛrɛi* lɛ, ni Yehowa kpaŋmɔ adeka lɛ nyiɛ amɛsɛɛ.  Ni asraafoi ni ewula amɛhe lɛ yi osɔfoi ni kpãa tɛtɛrɛmantɛrɛi* lɛ ahiɛ, ni asraafoi ni nyiɛɔ sɛɛ lɛ nyiɛ Adeka lɛ sɛɛ be mli ni ayaa nɔ akpãa tɛtɛrɛmantɛrɛi* lɛ. 10  No mli lɛ, Yoshua efã maŋ lɛ akɛ: “Nyɛkabɔa oshe, ni nyɛkahãa anua nyɛgbee hu. Wiemɔ kome folo po akaje nyɛnaa kɛyashi gbi nɔ ni makɛɛ nyɛ akɛ, ‘Nyɛbɔa oshe!’ No dani nyɛbɔ oshe.” 11  Ehã akɛ Yehowa Adeka lɛ bɔle maŋ lɛ, akɛbɔle maŋ lɛ shi kome, ni no sɛɛ lɛ, amɛku amɛsɛɛ kɛba nsara lɛ mli ni amɛbawɔ jɛmɛ. 12  Enɔ leebi lɛ, Yoshua te shi mra, ni osɔfoi lɛ wó Yehowa Adeka lɛ,+ 13  ni osɔfoi kpawo ní hiɛ tɛtɛrɛmantɛrɛi* kpawo nyiɛ Yehowa Adeka lɛ hiɛ, ni amɛtee nɔ amɛkpã tɛtɛrɛmantɛrɛi* lɛ. Asraafoi ni ewula amɛhe lɛ nyiɛ amɛhiɛ, ni asraafoi ni nyiɛɔ sɛɛ lɛ hu nyiɛ Yehowa Adeka lɛ sɛɛ, be mli ni ayaa nɔ akpãa tɛtɛrɛmantɛrɛi* lɛ. 14  Amɛnyiɛ kɛbɔle maŋ lɛ shi kome yɛ gbi ni ji enyɔ lɛ nɔ, ni no sɛɛ lɛ, amɛku amɛsɛɛ kɛba nsara lɛ mli. Nakai amɛfee gbii ekpaa.+ 15  Gbi ni ji kpawo lɛ nɔ lɛ, amɛte shi mra be ni je bɔi tsɛremɔ nɔŋŋ, ni amɛnyiɛ kɛbɔle maŋ lɛ tamɔ bɔ ni amɛfeɔ daa lɛ shii kpawo. Nakai gbi lɛ pɛ amɛbɔle maŋ lɛ shii kpawo.+ 16  Ni nɔ ni ji shi kpawo lɛ nɔ lɛ, osɔfoi lɛ kpã tɛtɛrɛmantɛrɛi* lɛ, ni Yoshua kɛɛ maŋ lɛ akɛ: “Nyɛbɔa oshe,+ ejaakɛ Yehowa kɛ maŋ lɛ ehã nyɛ! 17  Nyɛtua maŋ lɛ kɛ nɔ fɛɛ nɔ ni yɔɔ mli lɛ nyɛhãa hiɛkpatamɔ;+ Yehowa nɔ ji fɛɛ. Rahab,+ ni ji ashawo yoo lɛ pɛ ahi wala mli, lɛ kɛ mɛi fɛɛ ni kɛ lɛ yɔɔ shĩa lɛ mli lɛ, ejaakɛ eŋɔ mɛi ni wɔtsu lɛ etee.+ 18  Shi nyɛtsia nyɛhe kɛjea nibii ni atu ahã hiɛkpatamɔ lɛ ahe,+ koni nyɛkashwe nɔ ko ni atu ahã hiɛkpatamɔ, ní nyɛŋɔ,+ ní no hã Israel nsara lɛ hu batsɔ nɔ ko ni atu ahã hiɛkpatamɔ, ní no kɛ amanehulu* ba enɔ.+ 19  Shi jwiɛtɛi kɛ shika tsuru kɛ akɔɔble nibii kɛ dade nibii lɛ fɛɛ lɛ, nibii ni yɔɔ krɔŋkrɔŋ kɛhã Yehowa ni.+ Akɛyawo Yehowa jwetritoohe lɛ.”+ 20  Kɛkɛ ni gbɔmɛi lɛ bɔ oshe be ni akpã tɛtɛrɛmantɛrɛi* lɛ.+ Be ni gbɔmɛi lɛ nu tɛtɛrɛmantɛrɛ* lɛ gbɛɛmɔ ní amɛbɔ oshe waa nɔŋŋ lɛ, gbogbo lɛ gbee shi shwɛtɛɛ.+ No sɛɛ lɛ, gbɔmɛi lɛ bote maŋ lɛ mli, mɔ fɛɛ mɔ tee ehiɛ tɛ̃ɛ, ni amɛŋɔ maŋ lɛ. 21  Amɛkɛ klante kpãtã nɔ fɛɛ nɔ ni yɔɔ maŋ lɛ mli lɛ hiɛ, hii kɛ yei kɛ gbekɛbii kɛ onukpai kɛ tsinai kɛ toi kɛ tejii.+ 22  Yoshua kɛɛ hii enyɔ lɛ ní yakpá shikpɔŋ lɛ shi lɛ akɛ: “Nyɛyaa ashawo yoo lɛ shĩa lɛ, ní nyɛyaŋɔa yoo lɛ kɛ emɛi fɛɛ kɛjea kpo, tamɔ bɔ ni nyɛkã lɛ kitã lɛ pɛpɛɛpɛ.”+ 23  No hewɔ lɛ, oblahii ni yakpá shikpɔŋ lɛ shi lɛ tee maŋ lɛ mli ni amɛyaŋɔ Rahab kɛ epapa kɛ emami kɛ enyɛmimɛi hii kɛ emɛi fɛɛ kɛje kpo; hɛɛ, amɛkɛ eweku muu lɛ fɛɛ je kpo,+ ni amɛkɛ amɛ ba he ko yɛ Israel nsara lɛ sɛɛ shweshweeshwe. 24  Kɛkɛ ni amɛkɛ la shã maŋ lɛ kɛ nɔ fɛɛ nɔ ni yɔɔ mli lɛ. Shi jwiɛtɛi kɛ shika tsuru kɛ akɔɔble nibii kɛ dade nibii lɛ, amɛkɛyawo Yehowa shĩa lɛ jwetritoohe lɛ.+ 25  Rahab, ni ji ashawo yoo lɛ, kɛ epapa shĩabii lɛ kɛ emɛi lɛ fɛɛ kɛkɛ ayi Yoshua baa;+ ni yoo lɛ ehi Israel kɛbashi ŋmɛnɛ,+ ejaakɛ eŋɔ mɛi ni Yoshua tsu ní amɛyakpá Yeriko shi lɛ etee.+ 26  Nakai be lɛ mli lɛ, Yoshua kã kitã nɛɛ akɛ: “Mɔ fɛɛ mɔ ni baaka akɛ ebaato Yeriko maŋ nɛɛ ekoŋŋ lɛ, alomɔ lɛ yɛ Yehowa hiɛ. Kɛ́ etswa maŋ lɛ faneshi lɛ, ekromɔbi baagbo, ni kɛ́ etara enaa agbói lɛ, enakutsoŋbi baagbo.”+ 27  No hewɔ lɛ, Yehowa kɛ Yoshua hi shi,+ ni ehe gbɛ́i yɛ shikpɔŋ lɛ nɔ fɛɛ.+

Shishigbɛ Niŋmaa

Hebri sht. ŋm., “gwantɛŋhii akolontoi.”
Hebri sht. ŋm., “akolontoi.”
Hebri sht. ŋm., “gwantɛŋnuu akolonto.”
Hebri sht. ŋm., “akolonto.”
Loo “gbɛɛmɔ ni sɛɛ tsɛɔ.”
Loo “gbɔmɛi lɛ akwɔ kɛbote mli.”
Hebri sht. ŋm., “gwantɛŋhii akolontoi.”
Hebri sht. ŋm., “gwantɛŋhii akolontoi.”
Hebri sht. ŋm., “gwantɛŋhii akolontoi.”
Hebri sht. ŋm., “akolontoi.”
Hebri sht. ŋm., “akolontoi.”
Hebri sht. ŋm., “gwantɛŋhii akolontoi.”
Hebri sht. ŋm., “akolontoi.”
Hebri sht. ŋm., “akolontoi.”
Hebri sht. ŋm., “akolontoi.”
Loo “haomɔ; musu.”
Hebri sht. ŋm., “akolontoi.”
Hebri sht. ŋm., “akolonto.”