Yoshua 2:1-24

  • Yoshua tsu shikpálɔi enyɔ kɛtee Yeriko (1-3)

  • Rahab ŋɔ shikpálɔi lɛ etee (4-7)

  • Amɛwo Rahab shi (8-21a)

    • Kpãa tsuru ni batsɔ okadi lɛ (18)

  • Shikpálɔi lɛ ku amɛsɛɛ kɛtee Yoshua ŋɔɔ (21b-24)

2  Ni Yoshua, Nun binuu lɛ, tsu hii enyɔ nigii kɛjɛ Shitim+ akɛ shikpálɔi. Ekɛɛ amɛ akɛ: “Nyɛyaa nyɛyakpáa shikpɔŋ lɛ shi, titri lɛ, Yeriko.” No hewɔ lɛ amɛtee, ni amɛyashɛ ashawo yoo ko ni atsɛɔ lɛ Rahab+ lɛ shĩa, ni amɛhi jɛmɛ.  Ayakɛɛ Yeriko maŋtsɛ lɛ akɛ: “Naa! Hii komɛi ni ji Israelbii eba biɛ gbɛkɛ nɛɛ koni amɛbakpá shikpɔŋ lɛ shi.”  Kɛkɛ ni Yeriko maŋtsɛ lɛ tsu ayakɛɛ Rahab akɛ: “Jiemɔ hii lɛ ni ba biɛ ní amɛyɔɔ oshĩa lɛ kɛba, ejaakɛ amɛba koni amɛbakpá shikpɔŋ muu lɛ fɛɛ shi.”  Shi yoo lɛ ŋɔ hii enyɔ lɛ ni ekɛ amɛ yatee. Ni ekɛɛ: “Lɛɛlɛŋ, hii lɛ ba miŋɔɔ, shi mileee he ni amɛjɛ.  Ni be ni je na ni eshwɛ fioo ni abaaŋa maŋ lɛ agbó lɛ, hii lɛ je kpo. Mileee he ni hii lɛ tee, shi kɛji nyɛtiu amɛ oya nɔŋŋ lɛ, nyɛbaayanina amɛ.”  (Shi no mli lɛ, ekɛ amɛ ekwɔ kɛtee tsũ lɛ yiteŋ, ni ekɛ amɛ eyatee yɛ flaks* tsei komɛi ni ato ashwie tsũ lɛ yiteŋ lɛ ateŋ.)  No hewɔ lɛ, maŋtsɛ lɛ hii lɛ kɛ amɛhiɛ tsɔɔ Yordan lɛ naa gbɛ hei ni afoɔ faa lɛ yɛ+ lɛ kɛtiu amɛ, ni be ni hii ni tiuɔ amɛ lɛ je kpo nɔŋŋ lɛ, aŋa maŋ lɛ agbó lɛ.  Dani hii lɛ baakamɔ shi amɛwɔ lɛ, yoo lɛ kwɔ kɛtee amɛŋɔɔ yɛ tsũ lɛ yiteŋ.  Ekɛɛ amɛ akɛ: “Mile akɛ Yehowa kɛ shikpɔŋ lɛ baahã nyɛ,+ ni nyɛhe ŋmiŋmi emɔmɔ wɔ.+ Nyɛhewɔ lɛ, shikpɔŋ lɛ nɔ bii lɛ fɛɛ atsui efã,+ 10  ejaakɛ wɔnu bɔ ni Yehowa hã Ŋshɔ Tsuru lɛ mli nui lɛ gbi yɛ nyɛhiɛ be ni nyɛshi Ejipt lɛ,+ kɛ nɔ ni nyɛfee Amorbii lɛ amaŋtsɛmɛi enyɔ, ni ji Sihon+ kɛ Og,+ mɛi ni nyɛkpãtã amɛhiɛ yɛ Yordan lɛ sɛɛ* lɛ. 11  Be ni wɔnu lɛ, wɔtsui fã,* ni nyɛhewɔ lɛ, ekãa bɛ mɔ ko mɔ ko mli dɔŋŋ,* ejaakɛ Yehowa, nyɛ-Nyɔŋmɔ lɛ, lɛ ji Nyɔŋmɔ yɛ ŋwɛi shɔŋŋ kɛ agbɛnɛ hu, yɛ shikpɔŋ ni yɔɔ shishi lɛ nɔ.+ 12  No hewɔ lɛ agbɛnɛ, miikpa nyɛ fai, nyɛkɛ Yehowa akãa mi kitã akɛ, akɛni mijie mlihilɛ* kpo mitsɔɔ nyɛ hewɔ lɛ, nyɛ hu nyɛbaajie mlihilɛ* kpo nyɛtsɔɔ mipapa shĩabii lɛ; ni nyɛhãa mi okadi ko ni tsɔɔ akɛ nyɛbaaye nyɛwiemɔ nɔ.* 13  Nyɛbaa mipapa kɛ mimami kɛ minyɛmimɛi hii kɛ minyɛmimɛi yei kɛ amɛmɛi fɛɛ awala yi, ni nyɛherea wɔ* kɛjea gbele mli.”+ 14  Kɛkɛ ni hii lɛ kɛɛ yoo lɛ akɛ: “Wɔkɛ wɔwala baahã yɛ nyɛwala najiaŋ!* Kɛji nyɛhãaa mɔ ko mɔ ko ale nɔ ni wɔba tsumɔ yɛ biɛ lɛ he sane lɛ, no lɛ, kɛ́ Yehowa kɛ shikpɔŋ lɛ hã wɔ lɛ, wɔ hu wɔbaajie mlihilɛ* kɛ anɔkwayeli kpo wɔtsɔɔ bo.” 15  Enɛ sɛɛ lɛ, yoo lɛ kɛ kpãa shiu amɛ kɛtsɔ samfɛlɛ lɛ mli kɛyi shi, ejaakɛ eshĩa lɛ ma maŋ lɛ gbogbo lɛ nɔ. Anɔkwa, gbogbo lɛ nɔ eyɔɔ.+ 16  Ni yoo lɛ kɛɛ amɛ akɛ: “Nyɛyaa gɔji lɛ anɔ ni nyɛyatea nyɛhe yɛ jɛmɛ gbii etɛ, koni mɛi ni tiuɔ nyɛ lɛ akana nyɛ. No sɛɛ lɛ, kɛ́ mɛi ni tiuɔ nyɛ lɛ ku amɛsɛɛ amɛba lɛ, nyɛbaanyɛ nyɛyi gbɛ nyɛya.” 17  Hii lɛ kɛɛ yoo lɛ akɛ: “Wɔbaaye kitã nɛɛ ni ohã wɔkã lɛ nɔ+ 18  shi, ja kɛ́ wɔba shikpɔŋ lɛ nɔ lɛ, okɛ kpãa tsuru nɛɛ fi samfɛlɛ ni oshiu wɔ kɛtsɔ mli kɛyi shi lɛ naa. Buamɔ opapa kɛ omami kɛ onyɛmimɛi kɛ opapa shĩabii lɛ fɛɛ anaa kɛba oŋɔɔ yɛ shĩa lɛ mli.+ 19  Kɛkɛ lɛ, kɛ́ mɔ ko tsɔ oshĩa lɛ shinai lɛ amli kɛje kpo kɛtee kpo lɛ nɔ lɛ, no lɛ, lɛ diɛŋtsɛ elá abua eyiteŋ, ni wɔ lɛ, wɔyeŋ fɔ. Shi mɔ fɛɛ mɔ ni yɔɔ oŋɔɔ yɛ shĩa lɛ mli lɛ, kɛ́ nɔ ko ba enɔ* lɛ, no lɛ, elá abua wɔyiteŋ. 20  Shi kɛ́ ohã ale nɔ ni wɔba tsumɔ yɛ biɛ lɛ he sane ko lɛ,+ no lɛ, wɔyeŋ fɔ yɛ kitã ni ohã wɔkã bo lɛ mli.” 21  Yoo lɛ hã hetoo akɛ: “Bɔ ni nyɛwie lɛ, aba mli nakai.” Kɛkɛ ni ewo amɛ gbɛ, ni amɛyi mli amɛtee. No sɛɛ lɛ, ekɛ kpãa tsuru lɛ fi samfɛlɛ lɛ naa. 22  No hewɔ lɛ, amɛshi ni amɛtee gɔji lɛ anɔ ni amɛyahi jɛmɛ gbii etɛ, kɛyashi mɛi ni tiuɔ amɛ lɛ ku amɛsɛɛ. Mɛi ni tiuɔ amɛ lɛ tao amɛ yɛ gbɛi lɛ eko fɛɛ eko nɔ, shi amɛnaaa amɛ. 23  Kɛkɛ ni hii enyɔ lɛ kpeleke shi kɛjɛ gɔji lɛ anɔ, ni amɛfo faa lɛ, ni amɛba Yoshua, Nun binuu lɛ ŋɔɔ. Amɛbagba lɛ nibii fɛɛ ni ba amɛnɔ lɛ. 24  Ni amɛkɛɛ Yoshua akɛ: “Yehowa etu shikpɔŋ muu lɛ fɛɛ ewo wɔdɛŋ.+ Anɔkwa, shikpɔŋ lɛ nɔ bii lɛ fɛɛ atsui efã yɛ wɔhewɔ.”+

Shishigbɛ Niŋmaa

Flaks ji tso ko ní aduɔ kɛjɛ blema tɔ̃ɔ ní akɛ emli kpãi lɛ feɔ klala (linen).
Ni ji, Yordan lɛ bokãgbɛ.
Hebri sht. ŋm., “wɔtsui sere.”
Hebri sht. ŋm., “mumɔ baaa nuu ko nuu ko mli dɔŋŋ.”
Loo “suɔmɔ ni tsakeee.”
Loo “suɔmɔ ni tsakeee.”
Loo “okadi ni abaanyɛ akɛ hiɛ afɔ̃ nɔ.”
Loo “wɔsusumai.”
Loo “Wɔsusumai baagboi yɛ nyɛnajiaŋ.”
Loo “suɔmɔ ni tsakeee.”
Loo “kɛ́ nine ko ta ehe.”