Yoshua 14:1-15

  • Bɔ ni aja shikpɔŋ ni kã Yordan lɛ anaigbɛ lɛ ahã (1-5)

  • Akɛ Hebron hã Kaleb akɛ egboshinii (6-15)

14  Agbɛnɛ, nɔ ni Israelbii lɛ ŋɔ akɛ gboshinii yɛ Kanaan shikpɔŋ lɛ nɔ, ní osɔfo Eleazar kɛ Nun binuu Yoshua kɛ Israel wekui lɛ atsɛmɛi ashĩai lɛ anɔ onukpai lɛ kɛhã amɛ koni etsɔ amɛnɔ lɛ nɛ.+  Afɔ̃ oshiki kɛja amɛgboshinii lɛ ahã amɛ,+ tamɔ bɔ ni Yehowa tsɔ Mose nɔ efã ni akɛhã wekui nɛɛhu kɛ fã lɛ.+  Mose kɛ wekui enyɔ kɛ fã lɛ agboshinii lɛ ehã amɛ momo yɛ Yordan lɛ sɛɛ,*+ shi Levibii lɛ, ehãaa amɛ gboshinii ko yɛ amɛteŋ.+  Abu Yosef seshibii lɛ akɛ wekui enyɔ,+ ni ji Manase kɛ Efraim;+ ni amɛhãaa Levibii lɛ gbɛfaŋnɔ ko yɛ shikpɔŋ lɛ nɔ, ja maji+ ni amɛbaahi mli kɛ amɛhe shikpɔji ni kooloi yeɔ nii yɛ nɔ, kɛhã kooloi ni amɛlɛɔ lɛ kɛ amɛnibii lɛ kɛkɛ.+  No hewɔ lɛ, Israelbii lɛ ja shikpɔŋ lɛ, tamɔ bɔ ni Yehowa fã Mose lɛ pɛpɛɛpɛ.  Ni Yuda hii lɛ tsi amɛbɛŋkɛ Yoshua yɛ Gilgal,+ ni Kaleb,+ ni ji Keniznyo Yefune binuu lɛ, kɛɛ lɛ akɛ: “Bo diɛŋtsɛ ole nɔ ni Yehowa kɛɛ+ Mose, anɔkwa Nyɔŋmɔ lɛ gbɔmɔ lɛ,+ yɛ ohe kɛ mi hu mihe yɛ Kadesh-barnea+ lɛ jogbaŋŋ.  Be ni Yehowa tsulɔ Mose tsu mi kɛjɛ Kadesh-barnea koni miyakpá shikpɔŋ lɛ shi lɛ,+ no mli lɛ miye afii 40, ni miku misɛɛ mibabɔ amaniɛ ní mishiuuu nɔ ko nɔ.*+  Eyɛ mli akɛ minyɛmimɛi ni kɛ mi tee* lɛ hã maŋbii lɛ atsui fã* moŋ, shi mi lɛ, minyiɛ Yehowa, mi-Nyɔŋmɔ lɛ, sɛɛ kɛ mitsui fɛɛ.*+  Mose kã kitã yɛ nakai gbi lɛ nɔ ekɛɛ: ‘Shikpɔŋ ni onane eyanyiɛ nɔ lɛ baatsɔ gboshinii ni kã shi daa kɛhã bo kɛ obihii, ejaakɛ onyiɛ Yehowa, mi-Nyɔŋmɔ lɛ, sɛɛ kɛ otsui fɛɛ.’+ 10  Agbɛnɛ, tamɔ bɔ ni ewo shi lɛ,+ Yehowa ebaa miwala yi+ nɛkɛ afii 45 nɛɛ, kɛjɛ be ni Yehowa wo Mose shi be ni Israel nyiɛ ŋa lɛ nɔ lɛ;+ naa, miyɛ lolo kɛbashi ŋmɛnɛ, ni miye afii 85. 11  Ni ŋmɛnɛ lɛ, miyɛ hewalɛ tamɔ gbi ni Mose tsu mi lɛ nɔŋŋ. Hewalɛ ni miyɔɔ nakai be lɛ mli lɛ, nakai hewalɛ lɛ nɔŋŋ miyɔɔ amrɔ nɛɛ ní mikɛbaawu ta ní mikɛbaatsu nibii krokomɛi hu. 12  No hewɔ lɛ, okɛ gɔji nɛɛ ni Yehowa wo mi he shi nakai gbi lɛ ahã mi. Eyɛ mli akɛ nakai gbi lɛ onu akɛ Anakbii yɛ jɛmɛ,+ ni maji wuji ni atswa gbogboi awo amɛhe hu yɛ jɛmɛ+ moŋ, shi bɔ fɛɛ bɔ ni fee lɛ,* Yehowa baafata mihe,+ ni mashwie amɛ,* tamɔ bɔ ni Yehowa wo shi lɛ pɛpɛɛpɛ.”+ 13  No hewɔ lɛ, Yoshua jɔɔ Kaleb, Yefune binuu lɛ, ni ekɛ Hebron hã lɛ akɛ gboshinii.+ 14  No hewɔ ni Hebron tsɔ Kaleb, ni ji Keniznyo Yefune binuu lɛ nɔ akɛ egboshinii kɛbashi ŋmɛnɛ lɛ, ejaakɛ enyiɛ Yehowa, Israel Nyɔŋmɔ lɛ, sɛɛ kɛ etsui fɛɛ.+ 15  Tsutsu lɛ, atsɛɔ Hebron akɛ Kiriat-arba+ (Arba ji Anakbii lɛ ateŋ gbɔmɔ wulu lɛ). Ni tai lɛ asɛɛ fo yɛ shikpɔŋ lɛ nɔ.+

Shishigbɛ Niŋmaa

Ni ji, Yordan lɛ bokãgbɛ.
Hebri sht. ŋm., “miku misɛɛ mikɛ wiemɔ ba, bɔ ni yɔɔ mitsui naa lɛ pɛpɛɛpɛ.”
Loo “kɛ mi kwɔ kɛtee.”
Hebri sht. ŋm., “hã maŋbii lɛ atsui sere.”
Hebri sht. ŋm., “kɛwula shi; kɛmɔ shi.”
Loo “shi miina akɛ.”
Loo “mashɔ̃ amɛshikpɔŋ lɛ yɛ amɛdɛŋ.”