Nɔ Ni Yohane Ŋma 9:1-41

  • Yesu tsa nuu ko ni afɔ lɛ shwilafo (1-12)

  • Farisifoi lɛ bibii nuu ko ni atsa lɛ lɛ saji (13-34)

  • Nɔ hewɔ ni Farisifoi lɛ ji shwilafoi (35-41)

9  Be ni ehoɔ lɛ, ena nuu ko ni eshwila kɛjɛ efɔmɔ mli.  Ni ekaselɔi lɛ bi lɛ akɛ: “Rabi,+ namɔ fee esha, nuu nɛɛ loo efɔlɔi, hewɔ ni afɔ lɛ shwilafo lɛ?”  Yesu hã hetoo akɛ: “Nuu nɛɛ loo efɔlɔi lɛ efeko esha, shi moŋ eba lɛ nakai koni ajie Nyɔŋmɔ nitsumɔi lɛ akpo yɛ egbɛfaŋ.+  Be ni je etsɛre nɛɛ, esa akɛ wɔtsu mɔ ni tsu mi lɛ nitsumɔi;+ je baana, ni mɔ ko mɔ ko nyɛŋ nii atsu.  Gbii abɔ ni miyɔɔ je lɛ mli nɛɛ, miji je lɛ la lɛ.”+  Be ni ewie nibii nɛɛ egbe naa lɛ, etsɛ̃ lajɔ̃ efɔ̃ shikpɔŋ ni ekɛ lajɔ̃ lɛ kpɔtɔ sũ, ni ekɛ sũ ni ekpɔtɔ lɛ kpa nuu lɛ hiŋmɛii anɔ+  ni ekɛɛ lɛ akɛ: “Yaafɔ yɛ Siloam (eshishi ji, ‘Atsu Kɛtee’ ) kpaakpo lɛ mli.” Ni etee eyafɔ, ni eku esɛɛ eba ni eena nii.+  Kɛkɛ ni ekutsoŋbii lɛ kɛ mɛi ni be ko ni eho lɛ amɛnaa lɛ akɛ eeba nii lɛ bɔi kɛɛmɔ akɛ: “Ani jeee nuu nɛɛ ni kulɛ etaa shi ebaa nii lɛ?”  Mɛi komɛi kɛɛ akɛ: “Lɛ ni.” Mɛi krokomɛi hu kɛɛ akɛ: “Dabi, eje lɛ kɛkɛ.” Nuu lɛ tee nɔ ekɛɛ akɛ: “Mi ni.” 10  No hewɔ lɛ, amɛbi lɛ akɛ: “Belɛ, te fee tɛŋŋ ni ohiŋmɛii gbele lɛ?” 11  Ehã hetoo akɛ: “Nuu ko ni atsɛɔ lɛ Yesu lɛ kpɔtɔ sũ ni ekɛkpa mihiŋmɛii anɔ ni ekɛɛ mi akɛ, ‘Yaa Siloam ni oyafɔ.’+ No hewɔ lɛ, mitee ni miyafɔ, ni mina nii.” 12  Kɛkɛ ni amɛkɛɛ lɛ akɛ: “Nɛgbɛ nakai nuu lɛ yɔɔ?” Ekɛɛ: “Mileee.” 13  Amɛkɛ nuu ni be ko ni eho lɛ eshwila lɛ tee Farisifoi lɛ aŋɔɔ. 14  Shi gbi ni Yesu kpɔtɔ sũ ni ekɛgbele nuu lɛ hiŋmɛii lɛ,+ Hejɔɔmɔ Gbi ni.+ 15  No hewɔ lɛ, be nɛɛ mli lɛ, Farisifoi lɛ hu bɔi nuu lɛ bimɔ bɔ ni fee ni ena nii. Ekɛɛ amɛ akɛ: “Ekɛ sũ ni akpɔtɔ kpa mihiŋmɛii anɔ, ni miyafɔ, ni mina nii.” 16  Kɛkɛ ni Farisifoi lɛ ateŋ mɛi komɛi bɔi kɛɛmɔ akɛ: “Nuu nɛɛ jɛɛɛ Nyɔŋmɔ ŋɔɔ ejaakɛ eyeee Hejɔɔmɔ Gbi lɛ.”+ Mɛi krokomɛi kɛɛ akɛ: “Te aaafee tɛŋŋ ni eshafeelɔ ko aaafee okadii ni tamɔ nɛkɛ lɛ?”+ Ni amɛmli gbála.+ 17  Ni amɛsaa amɛkɛɛ nuu shwilafo lɛ akɛ: “Akɛni egbele ohiŋmɛii hewɔ lɛ, namɔ osusuɔ akɛ eji?” Nuu lɛ kɛɛ akɛ: “Gbalɔ ji lɛ.” 18  Shi Yudafoi lɛ heee amɛyeee akɛ kulɛ shwilafo ji lɛ ni enaa nii agbɛnɛ lɛ, kɛyashi amɛyatsɛ nuu ni amrɔ nɛɛ enaa nii lɛ fɔlɔi kɛba. 19  Ni amɛbi amɛ akɛ: “Ani nyɛbi lɛ ni nyɛkɛɔ akɛ afɔ lɛ shwilafo lɛ nɛ? No hewɔ lɛ, te fee tɛŋŋ ni amrɔ nɛɛ enaa nii lɛ?” 20  Efɔlɔi lɛ hã hetoo akɛ: “Wɔle akɛ wɔbi lɛ nɛ, ni akɛ afɔ lɛ shwilafo. 21  Shi bɔ ni fee ni amrɔ nɛɛ enaa nii lɛ, wɔleee; ni mɔ ni gbele ehiŋmɛii lɛ hu, wɔleee. Nyɛbia lɛ. Eda. Nyɛhãa ewiea ehãa lɛ diɛŋtsɛ ehe.” 22  Efɔlɔi lɛ wie nibii nɛɛ ejaakɛ amɛmiishe Yudafoi lɛ gbeyei,+ ejaakɛ Yudafoi lɛ ekpaŋ momo akɛ, kɛ́ mɔ ko jaje etsɔɔ akɛ Yesu ji Kristo lɛ, esa akɛ ashwie nakai mɔ lɛ kɛje kpeehe* lɛ.*+ 23  Enɛ hewɔ ni efɔlɔi lɛ kɛɛ akɛ: “Eda. Nyɛbia lɛ” lɛ. 24  No hewɔ lɛ, amɛtsɛ nuu ni kulɛ eji shwilafo lɛ nɔ ni ji shii enyɔ nɔ, ni amɛkɛɛ lɛ akɛ: “Okɛ anunyam ahã Nyɔŋmɔ; wɔle akɛ nuu nɛɛ eshafeelɔ ji lɛ.” 25  Ehã hetoo akɛ: “Kɛ́ eshafeelɔ ji lɛ lɛ, mi lɛ, mileee. Nɔ kome mile, no ji akɛ kulɛ shwilafo ji mi, shi amrɔ nɛɛ miina nii.” 26  Kɛkɛ ni amɛkɛɛ lɛ akɛ: “Mɛni efee bo? Te efee tɛŋŋ ni egbele ohiŋmɛii lɛ?” 27  Ehã amɛ hetoo akɛ: “Mikɛɛ nyɛ momo, shi nyɛbooo toi. Mɛni hewɔ nyɛtaoɔ nyɛnu ekoŋŋ lɛ? Ani nyɛ hu nyɛmiitao nyɛtsɔ ekaselɔi?” 28  Kɛkɛ ni amɛye ehe fɛo amɛkɛɛ: “Bo moŋ ji nakai nuu lɛ kaselɔ, shi wɔ lɛ Mose kaselɔi ji wɔ. 29  Wɔle akɛ Nyɔŋmɔ kɛ Mose wie, shi nuu nɛɛ, wɔleee he ni ejɛ.” 30  Nuu lɛ hã amɛ hetoo ekɛɛ: “Sane nɛɛ miifee mi naakpɛɛ waa, nyɛleee he ni ejɛ, ni kɛ̃lɛ egbele mihiŋmɛii. 31  Wɔle akɛ Nyɔŋmɔ booo eshafeelɔi toi,+ shi kɛ́ mɔ ko sheɔ Nyɔŋmɔ gbeyei ni efeɔ esuɔmɔnaa nii lɛ, eboɔ mɔ nɛɛ toi.+ 32  Kɛjɛ blema tɔ̃ɔ lɛ, anuko akɛ mɔ ko egbele mɔ ko ni afɔ lɛ shwilafo hiŋmɛii dã. 33  Eji nuu nɛɛ jɛɛɛ Nyɔŋmɔ ŋɔɔ kulɛ, enyɛŋ nɔ ko kwraa efee.”+ 34  Amɛhã lɛ hetoo akɛ: “Bo lɛ, esha mli kwraa afɔ bo yɛ, ni bo moŋ otsɔɔ wɔ nii?” Ni amɛshwie lɛ kɛje jɛmɛ!+ 35  Yesu nu akɛ amɛshwie lɛ, ni be ni ena lɛ lɛ, ekɛɛ akɛ: “Ani oná hemɔkɛyeli yɛ gbɔmɔ Bi lɛ mli?” 36  Nuu lɛ hã hetoo akɛ: “Onukpa, namɔ ni, koni maná hemɔkɛyeli yɛ emli?” 37  Yesu kɛɛ lɛ akɛ: “Ona lɛ, ni anɔkwa, lɛ ji mɔ ni kɛ bo wieɔ lɛ.” 38  Ni ekɛɛ lɛ akɛ: “Nuŋtsɔ, miná hemɔkɛyeli yɛ emli.” Ni ekula shi ekɛ woo hã lɛ. 39  Ni Yesu kɛɛ: “Kojomɔ nɛɛ hewɔ miba je nɛɛ mli, no ji akɛ, koni mɛi ni enaaa nii lɛ ana nii+ ni mɛi ni naa nii lɛ atsɔmɔ shwilafoi.”+ 40  Farisifoi lɛ ateŋ mɛi ni kɛ lɛ yɔɔ jɛmɛ lɛ nu nibii nɛɛ, ni amɛbi lɛ akɛ: “Ani wɔ hu shwilafoi ji wɔ?” 41  Yesu kɛɛ amɛ akɛ: “Eji shwilafoi ji nyɛ kulɛ, esha bɛ nyɛhe. Shi amrɔ nɛɛ ni nyɛmiikɛɛ akɛ, ‘Wɔmiina nii’ lɛ, nyɛhe esha lɛ eka nyɛhe.”+

Shishigbɛ Niŋmaa

Hei ni Yudafoi lɛ buaa amɛhe naa yɛ ní amɛsɔleɔ ní amɛkaneɔ ŋmalɛi.
Kɛ́ ashwie mɔ ko kɛje kpeehe lɛ, etsɔɔ akɛ Yudafoi lɛ kɛ lɛ efo tako mli.