Nɔ Ni Yohane Ŋma 15:1-27

  • Anɔkwa wain tso lɛ he nɔkwɛmɔnɔ lɛ (1-10)

  • Awo kitã akɛ ajie suɔmɔ ni tamɔ Kristo nɔ lɛ kpo (11-17)

    • ‘Suɔmɔ ko bɛ ni da fe enɛ’ (13)

  • Je lɛ nyɛɔ Yesu kaselɔi lɛ (18-27)

15  “Miji anɔkwa wain tso lɛ, ni mi-Tsɛ ji okwaafonyo lɛ.  Mihe nine fɛɛ nine ni wooo yibii lɛ, efolɔɔ eshwieɔ, ni eko fɛɛ eko ni woɔ yibii lɛ, efolɔɔ he* koni ewo yibii fe tsutsu lɛ.+  Nyɛhe etse momo yɛ wiemɔ ni mikɛ nyɛ wie lɛ hewɔ.+  Nyɛkɛ mi afea ekome, ni mi hu mikɛ nyɛ afee ekome. Bɔ ni tso nine diɛŋtsɛ nyɛŋ awo yibii, akɛ ja ema wain tso lɛ he lɛ, nakai nɔŋŋ nyɛ hu nyɛnyɛŋ, akɛ ja nyɛtee nɔ nyɛkɛ mi efee ekome.+  Miji wain tso lɛ; nyɛji niji lɛ. Mɔ fɛɛ mɔ ni yaa nɔ ekɛ mi feɔ ekome, ni mi hu mikɛ lɛ feɔ ekome lɛ, lɛ ewoɔ yibii babaoo;+ ejaakɛ kɛjeee mi ni lɛ, nyɛnyɛŋ nɔ ko kwraa nyɛfee.  Kɛ́ mɔ ko eyaaa nɔ ekɛ mi efeee ekome lɛ, ashɛɔ lɛ afɔ̃ɔ tamɔ tso nine, ni egbiɔ. Ni mɛi buaa niji nɛɛ anaa ni amɛshɛrɛɔ amɛshwieɔ la mli, ni niji lɛ shãa.  Kɛ́ nyɛtee nɔ nyɛkɛ mi fee ekome ni miwiemɔi lɛ hi nyɛmli lɛ, nyɛbia nɔ fɛɛ nɔ ni nyɛtaoɔ ni ebaaba mli ehã nyɛ.+  Enɛ ji nɔ ni woɔ mi-Tsɛ hiɛ nyam, akɛ nyɛya nɔ nyɛwo yibii babaoo ni nyɛhã ana hu akɛ nyɛji mikaselɔi.+  Bɔ ni Tsɛ lɛ sumɔɔ mi lɛ,+ nakai mi hu misumɔɔ nyɛ; nyɛhia misuɔmɔ lɛ mli. 10  Kɛji nyɛye mikitãi lɛ anɔ lɛ, nyɛbaahi misuɔmɔ lɛ mli, tamɔ bɔ ni mi hu miyeɔ Tsɛ lɛ kitãi lɛ anɔ ni mihiɔ esuɔmɔ lɛ mli lɛ. 11  “Miwie nibii nɛɛ mitsɔɔ nyɛ koni mimiishɛɛ lɛ ahi nyɛmli, ni nyɛmiishɛɛ lɛ ayi obɔ.+ 12  Enɛ ji mikitã lɛ, akɛ nyɛsumɔsumɔa nyɛhe tamɔ bɔ ni misumɔɔ nyɛ lɛ.+ 13  Mɔ ko bɛ suɔmɔ ni da fe enɛ, akɛ mɔ kɛ ewala* baafɔ̃ shi ehã enanemɛi.+ 14  Kɛ́ nyɛfee nibii ni miwoɔ nyɛ he kitã lɛ, no lɛ minanemɛi ji nyɛ.+ 15  Mitsɛɛɛ nyɛ nyɔji dɔŋŋ, ejaakɛ nyɔŋ leee nɔ ni enuŋtsɔ feɔ. Shi miitsɛ nyɛ nanemɛi, ejaakɛ nibii fɛɛ ni minu yɛ mi-Tsɛ naa lɛ, mihã nyɛle. 16  Jeee nyɛ nyɛhala mi, shi mi moŋ mihala nyɛ, ni mihole nyɛ koni nyɛya ni nyɛyawo yibii, ni akɛ, nyɛyibii lɛ aya nɔ ahi shi, koni nɔ fɛɛ nɔ ni nyɛbaabi Tsɛ lɛ yɛ migbɛ́i mli lɛ, ekɛhã nyɛ.+ 17  “Nibii nɛɛ miwoɔ nyɛ he kitã koni nyɛsumɔsumɔa nyɛhe.+ 18  Kɛ́ je lɛ nyɛɔ nyɛ lɛ, nyɛle akɛ mi tsutsu enyɛ dani enyɛɔ nyɛ lɛ.+ 19  Eji nyɛfata je lɛ he kulɛ, je lɛ baadɔ lɛ diɛŋtsɛ enii ahe. Shi akɛni nyɛfataaa je lɛ he,+ shi mi moŋ mihala nyɛ kɛjɛ je lɛ mli lɛ, no hewɔ ni je lɛ nyɛɔ nyɛ lɛ.+ 20  Nyɛhãa wiemɔ ni mikɛ nyɛ wie lɛ ahia nyɛjwɛŋmɔ mli akɛ: Nyɔŋ nɔ kwɔɔɔ fe enuŋtsɔ. Kɛ́ amɛwa mi yi lɛ, amɛbaawa nyɛ hu nyɛ yi;+ kɛ́ amɛye miwiemɔ lɛ nɔ lɛ, amɛbaaye nyɛ hu nyɛnɔ lɛ nɔ. 21  Shi migbɛ́i lɛ hewɔ lɛ, amɛbaafee nibii nɛɛ fɛɛ amɛshi nyɛ, ejaakɛ amɛleee mɔ ni tsu mi lɛ.+ 22  Eji mibaaa ni mikɛ amɛ abawie kulɛ, esha bɛ amɛhe.+ Shi amrɔ nɛɛ, amɛbɛ amɛhe esha lɛ he naajiemɔ ko.+ 23  Mɔ fɛɛ mɔ ni nyɛɔ mi lɛ, enyɛɔ mi-Tsɛ hu.+ 24  Eji mitsuko nitsumɔi ni mɔ ko mɔ ko tsuko eko dã yɛ amɛteŋ kulɛ, esha bɛ amɛhe;+ shi amrɔ nɛɛ, amɛna mi ni amɛnyɛɔ mi kɛ mi-Tsɛ fɛɛ hu. 25  Shi enɛ ba lɛ nakai bɔ ni afee ni wiemɔ lɛ ni aŋma yɛ amɛ-Mla lɛ mli akɛ: ‘Amɛnyɛ mi be ni mifeko amɛ nɔ ko’ lɛ aná aba mli.+ 26  Kɛ́ yelikɛbualɔ* lɛ ni matsu lɛ nyɛŋɔɔ kɛjɛ Tsɛ lɛ ŋɔɔ, anɔkwale lɛ mumɔ lɛ,+ ni jɛɔ Tsɛ lɛ ŋɔɔ lɛ ba lɛ, lɛ ebaaye mihe odase;+ 27  ni nyɛ hu, nyɛbaaye odase,+ ejaakɛ nyɛkɛ mi ehi shi kɛjɛ shishijee lɛ.

Shishigbɛ Niŋmaa

Greek sht. ŋm., “ehãa ehe tseɔ.”
Loo “esusuma.”
Loo “miishɛjelɔ.” Yɛ biɛ lɛ, aawie mumɔ krɔŋkrɔŋ lɛ he tamɔ nɔ ni mumɔ krɔŋkrɔŋ lɛ hiɛ gbɔmɔ su.