Yoel 2:1-32

  • Yehowa gbi lɛ kɛ esraafoi babaoo lɛ (1-11)

  • Abi ni amɛku amɛsɛɛ kɛba Yehowa ŋɔɔ (12-17)

    • “Nyɛgbálaa nyɛtsuii” (13)

  • Hetoo ni Yehowa hã emaŋ lɛ (18-32)

    • “Mafɔse mimumɔ lɛ” (28)

    • Naakpɛɛ nii yɛ ŋwɛi kɛ shikpɔŋ lɛ nɔ (30)

    • Abaahere mɛi ni boɔ tsɛɔ Yehowa gbɛ́i lɛ ayiwala (32)

2  “Nyɛkpãa tɛtɛrɛmantɛrɛ* yɛ Zion!+ Nyɛbɔa ta oshe yɛ migɔŋ krɔŋkrɔŋ lɛ nɔ. Shikpɔŋ lɛ nɔ bii lɛ fɛɛ ahe akpokpo,Ejaakɛ Yehowa gbi lɛ miiba!+ Ebɛŋkɛ!   Eji duŋ kɛ oblɔtu gbi,+Atatui kɛ oblɔtu kpii gbi,+Etamɔ leebi maŋkpa la ni gbɛɔ shwãa gɔji anɔ. Maŋ ko yɛ ni emli bii fa babaoo ni amɛhe wa;+Maŋ ko ni tamɔ nakai bako dã,Ni eko hu baŋ dɔŋŋKɛmiiya yinɔi fɛɛ amli.   La kpãtãa nii ahiɛ yɛ amɛhiɛ,Ni lalilɛi kpãtãa nii ahiɛ yɛ amɛsɛɛ.+ Shikpɔŋ ni kã amɛhiɛgbɛ lɛ tamɔ Eden abɔɔ lɛ,+Shi amɛsɛɛgbɛ lɛ, ŋa kpataa ni,Ni nɔ ko nɔ ko nyɛŋ aje amɛdɛŋ.   Kɛ́ ona amɛ lɛ, amɛtamɔ okpɔŋɔi,Ni amɛjoɔ foi tamɔ ta okpɔŋɔi.+   Kɛ́ amɛmiitumɔ kɛmiiba yɛ gɔji lɛ anɔ lɛ, gbɛɛmɔ ni anuɔ lɛ tamɔ shwiilii agbɛɛmɔ,+Etamɔ bɔ ni kɛ́ la ni miitso grigri miishã ŋmaa* tsei lɛ egbɛɔ lɛ. Amɛtamɔ maŋ ní he wa ní amɛbua amɛhe naa kɛhã ta.+   Amɛhewɔ lɛ, majimaji baahao. Gbeyei baamɔ mɔ fɛɛ mɔ.   Amɛfãa tamɔ tawulɔi,Amɛkwɔɔ gbogbo tamɔ asraafoi.Mɔ fɛɛ mɔ nyiɛɔ egbɛ nɔ,Ni amɛgbaaa afã kɛjeee amɛgbɛi anɔ.   Amɛteŋ mɔ ko mɔ ko tsiii enyɛmi;Mɔ fɛɛ mɔ fãa kɛnyiɛɔ egbɛ nɔ tɛ̃ɛ. Kɛ́ tawuu nii hã amɛteŋ mɛi komɛi gbee shi lɛ,Mɛi krokomɛi lɛ ejeee amɛgbɛi anɔ.   Amɛshaa foi kɛyaa maŋ lɛ mli, amɛjoɔ foi kɛnyiɛɔ gbogbo nɔ. Amɛkwɔɔ tsũi, amɛtsɔmɔɔ samfɛji amli kɛboteɔ mli tamɔ julɔ. 10  Shikpɔŋ hosoɔ ni ŋwɛi kpokpoɔ bliblibli yɛ amɛhiɛ. Hulu kɛ nyɔŋtsere woɔ duŋ,+Ni ŋulamii lɛ hu kpaa kpɛmɔ. 11  Yehowa baawó egbee nɔ yɛ esraafoi lɛ ahiɛ,+ ejaakɛ esraafoi lɛ ayi fa babaoo diɛŋtsɛ.+ Ejaakɛ mɔ ni tsuɔ ewiemɔ* lɛ he nii lɛ he wa;Ejaakɛ Yehowa gbi lɛ, gbi wulu ni, ni eyɛ gbeyei waa.+ Namɔ baanyɛ naa adamɔ?”+ 12  “Kɛ̃lɛ, amrɔ nɛɛ po,” Yehowa kɛɛ, “nyɛkua nyɛsɛɛ kɛbaa miŋɔɔ kɛ nyɛtsui fɛɛ,+Kɛ ŋmaahilɛ+ kɛ yaafo kɛ yarawoo. 13  Nyɛgbálaa nyɛtsuii,+ shi jeee nyɛtadei,+Ni nyɛkua nyɛsɛɛ kɛbaa Yehowa, nyɛ-Nyɔŋmɔ lɛ ŋɔɔ,Ejaakɛ musuŋtsɔlɔ* kɛ mɔbɔnalɔ ji lɛ, emli fuuu mra+ ni esuɔmɔ ni tsakeee lɛ fa babaoo,+Ni ebaatsake ejwɛŋmɔ* yɛ amanehulu lɛ he. 14  Namɔ aaale kɛji eeekpale, ni eeetsake ejwɛŋmɔ*+Ni eeejɔɔ nyɛ,*Koni nyɛkɛ ŋmaa afɔle kɛ dãa afɔle ahã Yehowa, nyɛ-Nyɔŋmɔ lɛ? 15  Nyɛkpãa tɛtɛrɛmantɛrɛ* yɛ Zion! Nyɛshiɛa akɛ ahi ŋmaa;* nyɛtsɛa henaabuamɔ krɔŋkrɔŋ.+ 16  Nyɛbuaa mɛi lɛ anaa; nyɛfea asafo lɛ krɔŋkrɔŋ.+ Nyɛbuaa hiimeji lɛ* anaa; nyɛbuaa gbekɛbii kɛ abifabii ni miiye fufɔ lɛ anaa.+ Ayemforo wu lɛ aje kpo kɛjɛ esɛɛtsu lɛ mli, ní ayemforo lɛ hu aje kpo kɛjɛ eyemforo tsũ lɛ mli. 17  Osɔfoi lɛ, ni ji Yehowa sɔɔlɔi lɛ afóYɛ ablanaa lɛ kɛ afɔleshaa latɛ lɛ teŋ,+ ní amɛkɛɛ akɛ: ‘Ao Yehowa, naa omaŋ lɛ mɔbɔ;Kaahã ogboshinii lɛ tsɔ nyaŋemɔ nii,Kaahã jeŋmaji lɛ ye amɛnɔ. Mɛni hewɔ esa akɛ majimaji lɛ akɛɛ akɛ, “Nɛgbɛ amɛ-Nyɔŋmɔ lɛ yɔɔ?”’+ 18  No lɛ, Yehowa hiɛ baadɔ yɛ eshikpɔŋ lɛ he,Ni emusuŋ baatsɔ lɛ yɛ emaŋ lɛ hewɔ.+ 19  Ni Yehowa baakɛɛ emaŋ lɛ akɛ: ‘Naa, miihã nyɛ ŋmaa kɛ wain hee kɛ mu,Ni nyɛbaaye nii nyɛtɔrɔ jogbaŋŋ;+Mihãŋ abɔ nyɛ ahora yɛ jeŋmaji lɛ ateŋ dɔŋŋ.+ 20  Mashwie kooyigbɛnyo lɛ kɛje nyɛhe kɛya shɔŋŋ;Magbɛ lɛ mashwã shikpɔŋ gbiŋ ni akɛfeee nɔ ko nɔ,Mawó esraafoi ni nyiɛ hiɛ lɛ mawo bokãgbɛ ŋshɔ* lɛ naa gbɛ,Ni mawó esraafoi ni nyiɛ sɛɛ lɛ hu mawo anaigbɛ ŋshɔ* lɛ naa gbɛ. Ehe fu lɛ baate shi,Hɛɛ, ehe fu ni naa wa lɛ baaya nɔ ate shi kɛya ŋwɛi;+Ejaakɛ Nyɔŋmɔ baafee nibii wuji.’ 21  Bo shikpɔŋ, kaashe gbeyei. Omii ashɛ ohe ní onya, ejaakɛ Yehowa baafee nibii wuji. 22  Nyɛ ŋa mli kooloi, nyɛkashea gbeyei,Ejaakɛ ŋa nɔ jwɛi lɛ baafee frɔ̃frɔ̃,+Ni tsei lɛ baawo yibii;+Agbami tso kɛ wain tso baawo yibii babaoo.+ 23  Nyɛ Zionbii,* nyɛmii ashɛa nyɛhe ní nyɛnyaa yɛ Yehowa, nyɛ-Nyɔŋmɔ lɛ mli;+Ejaakɛ ebaahã mra mli nugbɔ* anɛ bɔ ni sa ahã nyɛ,Ebaahã nu ashwie shi ahã nyɛ,Ebaahã mra mli nugbɔ kɛ sɛɛkpee nugbɔ* anɛ ahã nyɛ tamɔ tsutsu lɛ.+ 24  Ŋmaagbeemɔhei lɛ baayimɔ obɔbɔ kɛ ŋmaa kpakpa,Ni bui ni aŋaa wain yɛ mli kɛ bui ni aŋaa oliv yɛ mli lɛ baayimɔ kɛ wain hee kɛ mu kɛteke nɔ.+ 25  Ni nibii ni baalabii* ni keɔ yuu kɛbaa,Baalabii ni bɛ fiji, baalabii ni yeɔ nii ni amɛtɔrɔɔɔ, kɛ baalabii* ni yeɔ nii hwaŋhwaŋ lɛ eye yɛ afii ni eho lɛ amli lɛ, mato nyɛ najiaŋ.Mi, mitsu misraafoi babaoo nɛɛ kɛba nyɛteŋ.+ 26  Anɔkwa, nyɛbaaye nii nyɛbaatɔrɔ,+Ni nyɛbaajie Yehowa, nyɛ-Nyɔŋmɔ lɛ,+Mɔ ni efee naakpɛɛ nii ehã nyɛ lɛ gbɛ́i lɛ yi;Ahãŋ mimaŋ lɛ hiɛ agbo dɔŋŋ.+ 27  Ni nyɛbaaná nyɛle akɛ miyɛ Israel teŋ+Ni akɛ, miji Yehowa, nyɛ-Nyɔŋmɔ lɛ+—mɔ ko bɛ misɛɛ dɔŋŋ! Ahãŋ mimaŋ lɛ hiɛ agbo dɔŋŋ. 28  No sɛɛ lɛ, mafɔse mimumɔ lɛ mashwie+ heloo srɔtoi fɛɛ nɔ,Ni nyɛbihii kɛ nyɛbiyei lɛ baagba,Onukpai ni yɔɔ nyɛteŋ lɛ baala lamɔi,Ni nyɛblahii lɛ baana ninai.+ 29  Ni minyɔji hii kɛ minyɔji yei lɛ po,Mafɔse mimumɔ lɛ mashwie amɛnɔ yɛ nakai gbii lɛ amli. 30  Ni mahã ana naakpɛɛ nii* yɛ ŋwɛi kɛ shikpɔŋ lɛ nɔ,Lá kɛ la kɛ lasu kpɔŋŋ ni miite shi.*+ 31  Hulu baatsɔ duŋ ni nyɔɔŋtsere baatsɔ lá+Dani Yehowa gbi wulu ni yɔɔ gbeyei lɛ baaba.+ 32  Ni mɔ fɛɛ mɔ ni boɔ tsɛɔ Yehowa gbɛ́i lɛ, abaahere eyiwala;+Ejaakɛ, tamɔ bɔ ni Yehowa ekɛɛ lɛ, mɛi komɛi baaje mli sɔkee yɛ Zion Gɔŋ lɛ nɔ kɛ Yerusalem,+Abaabaa mɛi ní Yehowa tsɛɔ lɛ ayi.”

Shishigbɛ Niŋmaa

Hebri sht. ŋm., “akolonto.”
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Ni ji, Nyɔŋmɔ wiemɔ.
Loo “drolɔ.”
Loo “ebaashwa ehe.”
Loo “ebaashwa ehe.”
Hebri sht. ŋm., “ebaashi jɔɔmɔ yɛ sɛɛ.”
Hebri sht. ŋm., “akolonto.”
Hebri sht. ŋm., “Nyɛfea ŋmaahilɛ krɔŋkrɔŋ.”
Loo “onukpai lɛ.”
Ni ji, Ŋshɔ Ni Egbo lɛ.
Ni ji, Mediterenia Ŋshɔ.
Hebri sht. ŋm., “Nyɛ Zion bihii.”
Yɛ Biblia lɛ mli lɛ, “mra mli nugbɔ” ji nugbɔnɛmɔ ni jeɔ shishi aaafee October teŋgbɛ.
Yɛ Biblia lɛ mli lɛ, “sɛɛkpee nugbɔ” ji nugbɔnɛmɔ ni jeɔ shishi aaafee April teŋgbɛ.
Baalabi ji agã henɔ ko.
Akɛ Hebri wiemɔi srɔtoi tsu nii yɛ biɛ kɛhã baalabii henɔi ejwɛ.
Loo “okadii.”
Loo “lasu kpɔŋŋkpɔŋŋ ni miitetee shi.”