Yesaia 46:1-13
46 Bel ebu shi,+ Nebo ekoto shi.
Akɛ amɛmagai lɛ eshwie kooloi, nitsumɔ kooloi anɔ,+Tamɔ jatsui ni akɛshwie kooloi ni egbɔjɔ anɔ.
2 Amɛ fɛɛ amɛkoto shi ni amɛbumɔ shi;Amɛnyɛɛɛ amɛjie jatsui* lɛ,Ni amɛ diɛŋtsɛ hu aŋɔ amɛ nom.*
3 “Yakob shĩa, kɛ nyɛ mɛi fɛɛ ni eshwɛ yɛ Israel shĩa lɛ, nyɛboa mi toi,+Nyɛ mɛi ni miye mibua nyɛ kɛjɛ nyɛfɔmɔ mli, ni mihiɛ nyɛ kɛjɛ musu mli.+
4 Kɛyashi nyɛgbɔlɛ mli lɛ, mi nɔŋŋ ni;+Kɛyashi nyɛyiteŋ baaje waŋ lɛ, maya nɔ mahiɛ nyɛmli.
Tamɔ bɔ ni mifeɔ lɛ, matere nyɛ, mahiɛ nyɛmli, ni majie nyɛ.+
5 Namɔ nyɛbaakɛɛ etamɔ mi loo ekɛ mi yeɔ egbɔ?+Namɔ he nyɛkɛ mi baato koni wɔje wɔhe?+
6 Mɛi komɛi yɛ ni fɔteɔ shika tsuru babaoo kɛjɛɔ amɛshika kotoku mli amɛshwieɔ shi;Amɛŋmɛɔ jwiɛtɛi lɛ yɛ nsɛnii amli.
Amɛbɔɔ dade sɔ̃lɔ apaa, ni ekɛfeɔ nyɔŋmɔ.+
Ni amɛkulaa shi, ni amɛjáa lɛ.*+
7 Amɛwóɔ amɛfɔ̃ɔ amɛkɔɔji anɔ;+Amɛtereɔ ni amɛkɛyamaa egbɛhe, ni emaa jɛmɛ nɔŋŋ.
Etsiii ehe kɛjeee egbɛhe lɛ.+
Amɛfóɔ amɛtsɛɔ lɛ, shi ehereee amɛ nɔ;Enyɛɛɛ ejie mɔ ko mɔ ko kɛje haomɔ mli.+
8 Nyɛkaia enɛ, ni nyɛfea ekãa.
Nyɛkɛtoa nyɛtsui mli, nyɛ nɔtɔlɔi.
9 Nyɛkaia klɛŋklɛŋ nibii ni jɛ blema lɛ,Akɛ miji Nyɔŋmɔ,* ni mɔ ko mɔ ko bɛ dɔŋŋ.
Miji Nyɔŋmɔ, ni mɔ ko mɔ ko tamɔɔɔ mi.+
10 Mi mijɛɔ shishijee migbaa nibii ni baaba yɛ naagbee,Ni mijɛɔ blema mijajeɔ nibii ni anako afee lɛ.+
Miikɛɛ akɛ, ‘Miyiŋkpɛɛ* lɛ baama shi,+Ni mafee nɔ fɛɛ nɔ ni misumɔɔ.’+
11 Miitsɛ loofɔlɔ ko ni gbɔbiɔ kɛmiijɛ hulushiteehe,*+Miitsɛ nuu ko kɛmiijɛ shikpɔŋ ko ni yɔɔ shɔŋŋ nɔ; ebaatsu miyiŋkpɛɛ* lɛ he nii.+
Mi miwie, ni mi nɔŋŋ mahã eba mli.
Mi mito miyiŋ, ni mafee hu.+
12 Nyɛ mɛi ni nyɛtsui esa,* nyɛboa mi toi,Nyɛ mɛi ni nyɛkɛ jalɛ nifeemɔ teŋ ejekɛ waa.
13 Mihã mijalɛ nifeemɔ lɛ ebɛŋkɛ;Ebɛ shɔŋŋ,Ni etsɛŋ ni miyiwalaheremɔ lɛ baaba.+
Mikɛ miyiwalaheremɔ lɛ baahã yɛ Zion, mikɛ minunyam lɛ hu baahã Israel.”+
Shishigbɛ Niŋmaa
^ Ni ji, amagai ni akɛshwie kooloi lɛ anɔ lɛ.
^ Loo “Ni aŋɔ amɛsusumai hu nom.”
^ Hebri sht. ŋm., “amɛkotoɔ lɛ.”
^ Loo “Nyɔŋmɔ Hewalɔ.”
^ Loo “Miyiŋtoo.”
^ Loo “bokã.”
^ Loo “miyiŋtoo.”
^ Hebri sht. ŋm., “wa.”
