Yesaia 41:1-29
41 “Nyɛ ŋshɔkpɔi, nyɛfea diŋŋ ni nyɛboa mi toi;*Jeŋmaji lɛ aná hewalɛ ekoŋŋ.
Amɛba miŋɔɔ ni amɛbawie.+
Nyɛhãa wɔkpea kɛtaoa saji anaa.*
2 Namɔ etee mɔ ko shi kɛjɛ hulushiteehe,*+Ni etsɛ lɛ yɛ jalɛ mli kɛba enaji anaa,*Koni ekɛ jeŋmaji awo edɛŋNi ehã eye maŋtsɛmɛi anɔ?+
Namɔ hãa amɛtsɔmɔɔ mulu yɛ eklante lɛ naa,Tamɔ ŋmaa* tsei ni kɔɔyɔɔ eloo kɛtee yɛ egãi lɛ naa?
3 Etiuɔ amɛ, ni ehoɔ ni nɔ ko etsĩii enaaKɛyatsɔɔ nanegbɛi ni enaji tsɔko nɔ pɛŋ lɛ anɔ.
4 Namɔ tsu enɛ, ni efee enɛ?Namɔ tsɛ yinɔi lɛ kɛjɛ shishijee lɛ?
Mi, Yehowa, miji Klɛŋklɛŋ Mɔ lɛ;+Ni mitsakeŋ miwoŋ sɛɛkpeebii lɛ hu.”+
5 Ŋshɔkpɔi lɛ ena, ni amɛtsui efã.
Shikpɔŋ lɛ naagbeehei lɛ bɔi kpokpomɔ.
Amɛmiitsi amɛmiibɛŋkɛ ni amɛmiiba hiɛ.
6 Mɔ fɛɛ mɔ yeɔ ebuaa ehe gbɔmɔNi ekɛɔ enyɛmi nuu akɛ: “Feemɔ ekãa.”
7 No hewɔ lɛ, ŋaalɔ lɛ woɔ dade sɔ̃lɔ lɛ hewalɛ;+Mɔ ni kɛ hamlɛ jajeɔ nii ahiɛ lɛWoɔ mɔ ni kɛ hamlɛ tswiaa nii anɔ yɛ sɔŋmɛtɛ* nɔ lɛ hewalɛ.
Ekɛɔ yɛ nɔ ni asɔ̃ɔ lɛ he akɛ: “Ehi jogbaŋŋ.”
Kɛkɛ lɛ, akɛ plɛkoobii ekala lɛ koni ekagbee shi.
8 “Shi bo Israel, mitsulɔ ji bo,+Bo Yakob, ni ji mɔ ni mihala lɛ,+Minaanyo Abraham seshi* lɛ,+
9 Bo, mɔ ni miŋɔ bo yɛ shikpɔŋ lɛ naagbeehei lɛ,+Bo, mɔ ni mitsɛ kɛjɛ shikpɔŋ lɛ nɔ hei ni yɔɔ shɔŋŋshɔŋŋ lɛ.
Mikɛɛ bo akɛ, ‘Mitsulɔ ji bo;+Mihala bo; mikwako bo.+
10 Kaashe gbeyei, ejaakɛ mikɛ bo yɛ.+
Kaaye otsui, ejaakɛ miji o-Nyɔŋmɔ lɛ,+
Mawaje bo, anɔkwa, maye mabua bo,+Lɛɛlɛŋ, mikɛ mijalɛ ninejurɔ lɛ baahiɛ omli kpɛŋŋ.’
11 Naa! Mɛi fɛɛ ni mli efu bo lɛ ahiɛ baagboi ni amɛhiɛ baashwie shi.+
Mɛi ni kɛ bo nɔɔ lɛ, abaaba amɛ shi kwraa ni amɛhiɛ baakpãtã.+
12 Obaatao mɛi ni kɛ bo ená lɛ, shi onaŋ amɛ;Mɛi ni kɛ bo wuɔ lɛ baatsɔmɔ tamɔ nɔ ko ni bɛ shihilɛ mli, nɔ ko folo ko kɛkɛ.+
13 Ejaakɛ mi, Yehowa, o-Nyɔŋmɔ lɛ, mihiɛ oninejurɔ mli,Mi mɔ ni kɛɔ bo akɛ, ‘Kaashe gbeyei. Maye mabua bo’ lɛ.+
14 Bo gɔgɔmi* Yakob, kaashe gbeyei,+Nyɛ Israel hii, maye mabua bo,” Yehowa, o-Kpɔ̃lɔ lɛ,+ Israel Mɔ Krɔŋkrɔŋ lɛ kɛɛ.
15 “Naa! Mifee bo ŋmaagbeemɔ shwiili,+Ŋmaagbeemɔ shwiili hee kɛ enaa nyanyɔji ni naa ba.
Obaanyiɛ gɔji lɛ anɔ ni obaajwara amɛNi obaahã gɔŋkpɔi lɛ atsɔ tamɔ ŋmaa he totoi.
16 Obaasha amɛmli,Ni kɔɔyɔɔ lɛ baaloo amɛ kɛya;Kɔɔyɔɔ ni naa wa baagbɛ amɛ eshwã.
Obaanya yɛ Yehowa hewɔ,+Ni obaashwã yɛ Israel Mɔ Krɔŋkrɔŋ lɛ hewɔ.”+
17 “Mɛi ni nii yɔɔ mɔbɔ lɛ kɛ ohiafoi lɛ miitao nu, shi eko bɛ.
Kumai ehã amɛlilɛi nɔ egbi.+
Mi, Yehowa, mahã amɛ hetoo.+
Mi, Israel Nyɔŋmɔ lɛ, mikwaŋ amɛ.+
18 Mahã fai aho yɛ gɔŋkpɔi kpatai anɔ+Ni nuhiŋmɛii hu baatue yɛ shikpɔji ni kã shi shwaŋŋ lɛ anɔ.*+
Mahã ŋa nɔ atsɔ kpaakpoNi nuhiŋmɛii baayi shikpɔŋ ni nu bɛ nɔ lɛ nɔ.+
19 Madu tseneduru tso yɛ ŋa kpataa nɔ,Kɛ akasia tso, kɛ mirto tso, kɛ paini tso.+
Madu junipa tso yɛ ŋa kpataa nɔ,Ekɛ lamulu tso, kɛ kipro tso fɛɛ baakwɛ̃,+
20 Koni mɛi fɛɛ ana ni amɛleNi amɛbo toi jogbaŋŋ ni amɛnu shishiAkɛ Yehowa nine ni fee enɛ,Akɛ Israel Mɔ Krɔŋkrɔŋ lɛ ni bɔ.”+
21 Yehowa kɛɛ, “Nyɛkɛ nyɛsane lɛ abaa,”
Yakob maŋtsɛ lɛ kɛɛ, “Nyɛtsɔa nyɛsane lɛ naa.”
22 “Nyɛkɛ odaseyeli abaa ni nyɛkɛa wɔ nibii ni baaba.
Nyɛkɛa wɔ blema* nibii lɛ,Koni wɔjwɛŋ nɔ,* ni wɔna nɔ ni baajɛ mli aba.
Loo nyɛkɛa wɔ nibii ni baaba lɛ.+
23 Nyɛkɛa wɔ nɔ ni baaba wɔsɛɛ,Koni wɔná wɔle akɛ nyɔŋmɔi ji nyɛ.+
Hɛɛ, nyɛfea nɔ ko, ekpakpa jio, efɔŋ jio,Koni kɛ́ wɔna lɛ, wɔnaa akpɛ wɔhe.+
24 Naa! Nɔ ko ni bɛ shihilɛ mli ji nyɛ,Ni nibii ni nyɛfee lɛ, sɛɛnamɔ kome folo po bɛ amɛhe.+
Mɔ fɛɛ mɔ ni halaa nyɛ lɛ, abuuu lɛ ahãaa nɔ ko nɔ ko.+
25 Mitee mɔ ko shi kɛjɛ kooyigbɛ, ni ebaaba,+Mɔ ko ni jɛ hulushiteehe*+ lɛ ni baatsɛ migbɛ́i.
Ebaanaanaa nɔyelɔi* lɛ anɔ oookɛɛ sũ ji amɛ,+Ebaanaanaa amɛnɔ tamɔ gbɛshɔ̃lɔ naanaa sũ ni efɔ nɔ lɛ.
26 Namɔ wie enɛ kɛjɛ shishijee koni ehã wɔle,Loo kɛjɛ blema beiaŋ, koni wɔkɛɛ akɛ, ‘Esane ja’?+
Anɔkwa, mɔ ko mɔ ko etswaaa he adafi!
Mɔ ko mɔ ko ewieee he!
Mɔ ko mɔ ko nuuu nɔ ko kɛjɛɛɛ nyɛnaa!”+
27 Miji mɔ klɛŋklɛŋ ni kɛɛ Zion akɛ: “Naa! Amɛ nɛ!”+
Ni matsu mɔ ko ni hiɛ sane kpakpa kɛya Yerusalem.+
28 Shi mitee nɔ mikwɛ, ni minaaa mɔ ko;Mɔ kome folo po bɛ amɛteŋ ni baawo ŋaa.
Ni mitee nɔ mibi amɛ koni amɛhã hetoo.
29 Naa! Amɛ fɛɛ lɛ, nibii ni bɛ shihilɛ mli ji amɛ.
Amɛnitsumɔi lɛ, sɛɛnamɔ kome folo po bɛ he.
Amɛdade amagai lɛ hu, kɔɔyɔɔ kɛ nibii ni sɛɛnamɔ bɛ amɛhe ni.+
Shishigbɛ Niŋmaa
^ Loo “Wɔ fɛɛ wɔkpe ni wɔkojo.”
^ Loo “nyɛfea diŋŋ yɛ mihiɛ.”
^ Loo “kɛjɛ bokãgbɛ.”
^ Ni tsɔɔ akɛ, koni ebasɔmɔ lɛ.
^ Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
^ Blɔfo mli lɛ, atsɛɔ lɛ anvil.
^ Hebri sht. ŋm., “dumɔwu.”
^ Ni tsɔɔ akɛ, enyɛɛɛ efã ehe, ni ebɛ yelikɛbualɔ.
^ Loo “yɛ jɔi lɛ amli.”
^ Loo “Koni wɔkɛ wɔtsui aya nɔ.”
^ Hebri sht. ŋm., “klɛŋklɛŋ.”
^ Loo “jɛ bokãgbɛ.”
^ Loo “nɔkwɛlɔi.”
