Yesaia 1:1-31

  • Tsɛ ko kɛ ebii atuatselɔi (1-9)

  • Yehowa nyɛɔ jamɔ ni ajáa lɛ kɛkɛ ni jeee kɛ tsui (10-17)

  • “Nyɛbaa ni wɔsaa wɔteŋ” (18-20)

  • Abaatswa Zion ekoŋŋ akɛ maŋ ni yeɔ anɔkwa (21-31)

1  Ninaa ni Amoz binuu Yesaia*+ na yɛ Yuda kɛ Yerusalem he yɛ Yuda maŋtsɛmɛi+ Uzia,+ kɛ Yotam,+ kɛ Ahaz,+ kɛ Hezekia+ gbii lɛ amli lɛ nɛ:   Bo ŋwɛi, bo toi, bo shikpɔŋ,+ bo toi jogbaŋŋ,Ejaakɛ mi, Yehowa miiwie akɛ: “Mikwɛ bii* ni mitsɔse amɛ,+Shi amɛtse mihiɛ atua.+   Tsina po le mɔ ni hé lɛ,Ni teji hu le nɔ ni enuŋtsɔ kɛhã lɛ koni eye nii yɛ mli;Shi Israel leee mi,*+Ni mi diɛŋtsɛ mimaŋ lɛ nuuu nii ashishi.”   Kpoo hã jeŋmaŋ ni feɔ esha lɛ,+Maŋ ni amɛtɔmɔ tsii yɛ amɛnɔ lɛ,Mɛi fɔji aseshibii, bii ni efite! Amɛje Yehowa sɛɛ;+Amɛbuuu Israel Mɔ Krɔŋkrɔŋ lɛ;Amɛtsɔ amɛsɛɛ amɛhã lɛ.   Ni nyɛyaa nɔ nyɛtseɔ atua nɛɛ, nyɛnɛgbɛ ma abaagba ekoŋŋ?+ Yitso muu lɛ fɛɛ bɛ hewalɛ,Ni hela emɔ tsui muu lɛ fɛɛ.+   Hela emɔ gbɔmɔtso muu lɛ fɛɛ, kɛjɛ naneshi aahu kɛyashi yiteŋ.Faji kɛ hei ni ekpɔlɔkpɔlɔi kɛ faji ni miiho lá sɔŋŋ —Anyɛmɔko, ni afimɔko nɔ, ni akɛ mu hu etoko nɔ.+   Oshikpɔŋ lɛ kã shi amaŋfɔ. Akɛ la eshã omaji lɛ. Gbɔi fiteɔ oshikpɔŋ lɛ yɛ ohiɛ.+ Etsɔ tamɔ shikpɔŋ ni akɛfeee nɔ ko ni gbɔi ekpãtã hiɛ.+   Ashi Zion biyoo lɛ tamɔ agba yɛ wain ŋmɔ mli,Tamɔ agba yɛ kɔkumba ŋmɔ mli,Tamɔ maŋ ni awo he ka.+   Kɛjeee Yehowa, taiatsɛ lɛ, ni hã eshwɛ mɛi fioo ko kɛhã wɔ kulɛ,Benɛ wɔtsɔ tamɔ Sodom,Ni wɔfee tamɔ Gomora.+ 10  Nyɛ Sodom+ nɔyelɔi ni yitseiaŋ wala, nyɛboa Yehowa toi. Nyɛ Gomorabii,+ nyɛboa wɔ-Nyɔŋmɔ lɛ mla* lɛ toi jogbaŋŋ. 11  “Mɛni nyɛfɔlei babaoo lɛ feɔ hãa mi?”+ Yehowa kɛɛ. “Gwantɛŋhii+ ni nyɛkɛshãa shãa afɔlei nyɛhãa mi lɛ kɛ kooloi ni eshwishwii afɔ+ lɛ eje mitsine,Ni mináaa tsinahii*+ kɛ gwantɛŋbii kɛ abotiai+ alá+ lɛ he miishɛɛ. 12  Mihiɛ ni nyɛbapueɔ yɛ daa nɛɛ kwraa lɛ,+Namɔ ekɛɛ nyɛ akɛNyɛbanaanaa mikpoi lɛ anɔ?+ 13  Nyɛkɛ ŋmaa* afɔlei ni sɛɛnamɔ bɛ he lɛ akabaa dɔŋŋ. Nyɛtsofa-kɛ-ŋma lɛ miije fu miiwo mi.+ Nyɛyeɔ nyɔɔŋtsere hei,+ kɛ hejɔɔmɔ gbii,+ ni nyɛtsɛɔ kpeei+ moŋ,Shi minyaaa nyɛhenaabuamɔ krɔŋkrɔŋ lɛ he yɛ majik+ ni nyɛkɛtsuɔ nii lɛ hewɔ. 14  Miihi* nyɔɔŋtsere hei kɛ gbii juji ni nyɛyeɔ lɛ. Amɛtsɔmɔ jatsui amɛhã mi;Etɔ mi kɛ amɛteremɔ. 15  Ni kɛ́ nyɛgbɛ nyɛniji amli lɛ,Mikɛ mihiɛ teɔ nyɛ.+ Nyɛsɔleɔ babaoo moŋ,+Shi mibooo nyɛ toi;+Lá ewu nyɛniji ahe fɛɛ.+ 16  Nyɛjua nyɛhe, nyɛhãa nyɛhe atsea;+Nyɛjiea nyɛnifeemɔi fɔji lɛ kɛjea mihiɛ;Nyɛkpaa efɔŋfeemɔ.+ 17  Nyɛkasea ekpakpafeemɔ, nyɛtaoa jalɛsaneyeli sɛɛ gbɛ,+Nyɛjajea yiwalɔ,Nyɛyea gbekɛ ni bɛ tsɛ lɛ* sane nyɛhãa lɛ,Ni nyɛtsua yoo okulafo sane he nii nyɛhãa lɛ.”+ 18  “Agbɛnɛ, nyɛbaa ni wɔsaa wɔteŋ,” Yehowa kɛɛ.+ “Kɛ́ nyɛhe eshai lɛ tsuɔ tamɔ lá po,Amɛbaayɛ tamɔ snoo;+Kɛ́ amɛtsuɔ tamɔ kɔɔjaŋ lɛ,Amɛbaatsɔ tamɔ too hetsɔi yɛŋ. 19  Kɛ́ nyɛjɛ nyɛsuɔmɔ mli nyɛbo toi lɛ,Nyɛbaaye shikpɔŋ lɛ nɔ nibii kpakpai lɛ.+ 20  Shi kɛ́ nyɛkpɛlɛɛɛ ni nyɛtse atua lɛ,No lɛ, klante baakpãtã nyɛhiɛ,+Ejaakɛ Yehowa naabu ewie.” 21  Te fee tɛŋŋ ni maŋ ni yeɔ anɔkwa+ lɛ etsɔ ashawo nɛɛ?+ No mli lɛ, eyi obɔ kɛ jalɛsaneyeli;+Jalɛ nifeemɔi hu hi shi yɛ emli,+Shi amrɔ nɛɛ, gbɔmɔgbelɔi moŋ ebahi emli.+ 22  Ojwiɛtɛi lɛ etsɔ jwiɛtɛifei,+Ni akɛ nu efutu obiɛr* lɛ mli. 23  Olumɛi lɛ akuɛŋ ti, ni julɔi ji amɛnanemɛi.+ Amɛteŋ mɔ fɛɛ mɔ sumɔɔ nyɔɔŋnii, ni amɛdiɔ nikeenii sɛɛ.+ Amɛyeee jalɛ sane amɛhãaa mɔ ni bɛ tsɛ lɛ,*Ni yoo okulafo sane shɛɛɛ amɛhiɛ.+ 24  No hewɔ lɛ, nɔ ni mi, anɔkwa Nuŋtsɔ lɛ, Yehowa, taiatsɛ lɛ,Israel Hewalɔ lɛ kɛɛ nɛ: “Ahãa! Majie mihenyɛlɔi lɛ kɛje mihe,Ni matɔ mihe owele yɛ mihenyɛlɔi lɛ anɔ.+ 25  Matsɔ minine kɛba onɔ,Masere odadefei* lɛ yɛ ohe tamɔ akɛ lamulu feɔ lɛ,Ni majie omli muji lɛ fɛɛ.+ 26  Mikɛ okojolɔi lɛ baaku sɛɛ aba ekoŋŋ tamɔ eji klɛŋklɛŋ lɛKɛ oŋaawolɔi lɛ hu tamɔ eji yɛ shishijee lɛ.+ No sɛɛ lɛ, abaatsɛ bo Jalɛ Nifeemɔ Maŋ, Anɔkwayeli Maŋ.+ 27  Zion lɛ, jalɛsaneyeli baakpɔ̃ lɛ,+Ni ewebii ni kuɔ amɛsɛɛ kɛbaa lɛ, jalɛ nifeemɔi baakpɔ̃ amɛ. 28  Abaakpãtã atuatselɔi kɛ eshafeelɔi fɛɛ ahiɛ shi kome,+Ni mɛi ni jeɔ Yehowa sɛɛ lɛ ahiɛ baakpãtã.+ 29  Ejaakɛ amɛhiɛ baagboi yɛ tsei wuji lɛ ni nyɛshweɔ lɛ hewɔ,+Ni nyɛhiɛ baashwie shi yɛ abɔi* ni nyɛhala lɛ hewɔ.+ 30  Ejaakɛ nyɛbaatsɔ tamɔ tso agbo ni enɔ bai miigbi,+Kɛ abɔɔ ni náaa nu. 31  Nuu ni he wa lɛ baatsɔ tamɔ odonti kpãa,Ni enitsumɔi hu baatsɔ tamɔ la kpɛmɔ;Fɛɛ baahere ni ebaashã,Ni mɔ ko mɔ ko bɛ ni baagbe.”

Shishigbɛ Niŋmaa

Eshishi ji, “Yehowa Yiwalaheremɔ.”
Hebri sht. ŋm., “bihii.”
Loo “leee enuŋtsɔ.”
Loo “gbɛtsɔɔmɔ.”
Loo “tsina oblahii.”
Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
Loo “Misusuma miihi.”
Loo “Nyɛyea awusã.”
Loo “owiiti biɛr.”
Loo “amɛhãaa awusã lɛ.”
Dadefei ji dade nibii ni asere lɛ amli muji ni baa nɔ ni asere lɛ hiɛ.
Eeenyɛ efee akɛ aawie tsei kɛ abɔi ni akɛjáa amagai lɛ ahe.