Yeremia 6:1-30
6 Nyɛ Benyaminbii, nyɛjoa foi kɛjea Yerusalem ni nyɛyabaa abo.
Nyɛkpãa tɛtɛrɛmantɛrɛ*+ lɛ yɛ Tekoa;+Nyɛkɛ la afea okadi yɛ Bet-hakerem!
Ejaakɛ sane fɔŋ, amanehulu kpele miijɛ kooyigbɛ kɛmiiba.+
2 Zion biyoo lɛ tamɔ yoo ni he yɔɔ fɛo kɛ akɔnɔ.+
3 Tookwɛlɔi lɛ kɛ amɛtookui lɛ baaba.
Amɛbaafee amɛmama tsũi lɛ kɛbaabɔle ehe fɛɛ,+Mɔ fɛɛ mɔ baahã etoi ni ekwɛɔ lɛ aye nii.+
4 “Nyɛsaa nyɛhe ni nyɛyawua* nyɛshia lɛ!
Nyɛtea shi, ni nyɛhãa wɔyatutuaa lɛ shwane fintiŋŋ!”
“Kpoo hã wɔ, ejaakɛ je miina,Ejaakɛ gbɛkɛnaashi hɔɔŋ lɛ miilɛɛ shi!”
5 “Nyɛtea shi, ni nyɛhãa wɔyatutuaa lɛ nyɔɔŋNi wɔkpãtã emɔji ni atswa gbogboi awo amɛhe lɛ ahiɛ.”+
6 Ejaakɛ nɔ ni Yehowa, taiatsɛ lɛ kɛɛ nɛ:
“Nyɛfolɔa tsei ni nyɛtswaa kpoku nyɛwoa Yerusalem he.+
Yerusalem ji maŋ ni abaahã ebu ehe akɔntaa lɛ;Anaaa nɔ ko yɛ emli fe yiwaa sɔŋŋ kɛkɛ.+
7 Bɔ ni bu ni akɛtoɔ nu hãa nu mli jɔɔ lɛ,Nakai Yerusalem hãa enifɔjianii lɛ feɔ tamɔ nu ni mli ejɔ.
Anuɔ yiwalɛ kɛ hiɛkpatamɔ he yɛ emli;+Hela kɛ haomɔ yɛ mihiɛ be fɛɛ be.
8 Bo Yerusalem, kwɛmɔ ni ahi, kɛjeee nakai lɛ ohe baafee mi taŋ* ni matsi mihe kɛje ohe;+Mahã otsɔ amaŋfɔ, shikpɔŋ ni mɔ ko mɔ ko ehiii nɔ.”+
9 Nɔ ni Yehowa, taiatsɛ lɛ kɛɛ nɛ:
“Amɛbaaye Israelbii ni eshwɛ lɛ kpɛkpɛo tamɔ ayeɔ wain yibii ni eshwɛ yɛ wain tso nɔ kpɛkpɛo lɛ.
Kpã onine mli ekoŋŋ tamɔ mɔ ni miitse wain yibii yɛ wain tsei anɔ.”
10 “Namɔ mawie matsɔɔ ni mabɔ lɛ kɔkɔ?
Namɔ baabo toi?
Naa! Amɛtoii etsimɔ,* no hewɔ lɛ amɛnyɛɛɛ sane toi amɛbo.+
Naa! Yehowa wiemɔ lɛ etsɔ nɔ ko ni amɛnyaŋeɔ;+Amɛnáaa he miishɛɛ.
11 No hewɔ lɛ, Yehowa mlifu lɛ eyi mimli obɔ,Ni minyɛɛɛ naa matsĩ dɔŋŋ.”*+
“Fɔsemɔ oshwie gbekɛ ni nyiɛ gbɛjegbɛ lɛ nɔ lɛ nɔ,+Fɔsemɔ oshwie oblahii ni ebua amɛhe naa lɛ anɔ.
Abaaŋɔ amɛ fɛɛ nom kɛya, nuu kɛ eŋa,Mɛi ni egbɔlɔ kɛ mɛi ni egbɔlɔ kotokoto.*+
12 Akɛ amɛshĩai lɛ baahã mɛi krokomɛi,Amɛŋmɔji kɛ amɛŋamɛi hu nakai nɔŋŋ.+
Ejaakɛ makpã minine mli mashi mɛi ni yɔɔ shikpɔŋ lɛ nɔ lɛ,” Yehowa kɛɛ.
13 “Ejaakɛ kɛjɛ mɔ bibioo fe fɛɛ nɔ kɛyashi mɔ wulu fe fɛɛ nɔ lɛ, amɛteŋ mɔ fɛɛ mɔ miitiu sɛɛnamɔ gbonyo sɛɛ;+Kɛjɛ gbalɔ nɔ kɛyashi osɔfo nɔ lɛ, amɛteŋ mɔ fɛɛ mɔ miilaka* enyɛmi.+
14 Ni amɛbɔɔ mɔdɛŋ akɛ amɛbaatsa mimaŋ lɛ pilamɔ* lɛ eko kɛ eko* amɛkɛɔ akɛ,‘Toiŋjɔlɛ yɛ! Toiŋjɔlɛ yɛ!’
Be mli ni toiŋjɔlɛ ko bɛ.+
15 Ani amɛhiɛ gboɔ yɛ nyaŋemɔ nii ni amɛfee lɛ he?
Amɛhiɛ gbooo kwraa!
Amɛleee nɔ ni ji hiɛgbele po!+
No hewɔ lɛ, amɛbaanyɔ yɛ mɛi ni enyɔnyɔi lɛ ateŋ.
Kɛ́ migbala amɛtoi lɛ amɛbaatɛrɛ,” Yehowa kɛɛ.
16 Nɔ ni Yehowa kɛɛ nɛ:
“Nyɛdamɔa gbɛntai lɛ anɔ ni nyɛkwɛa.
Nyɛbia blema gbɛjegbɛi lɛ ahe sane,Nyɛbia he ni gbɛ kpakpa lɛ kã, ni nyɛnyiɛa nɔ,+Koni nyɛná hejɔlɛ.”*
Shi amɛkɛɔ akɛ: “Wɔnyiɛɛɛ nɔ.”+
17 “Ni mito bulɔi+ ni kɛɔ akɛ,‘Nyɛboa tɛtɛrɛmantɛrɛ* lɛ gbɛɛmɔ toi jogbaŋŋ!’”+
Shi amɛkɛɔ akɛ: “Wɔbooo toi.”+
18 “No hewɔ lɛ, nyɛ jeŋmaji, nyɛboa toi!
Ni bo gwabɔɔ, ná oleNɔ ni baaba amɛnɔ.
19 Bo shikpɔŋ, bo toi!
Mikɛ sane fɔŋ miiba maŋ nɛɛ nɔ+
Akɛ amɛ diɛŋtsɛ amɛŋaatsɔi lɛ amli yibii,Ejaakɛ amɛboko miwiemɔi lɛ atoiNi amɛkpoo mimla* lɛ.”
20 “Mɛɛ sɛɛnamɔ yɔɔ frankinsɛnsi ni nyɛkɛjɛɔ Sheba kɛbaaKɛ kalamo* ni nyɛkɛjɛɔ shikpɔŋ ni yɔɔ shɔŋŋ nɔ kɛbaa lɛ he kɛhã mi?
Minyaaa nyɛshãa afɔlei lɛ ahe,Ni mináaa afɔlei ni nyɛshãa lɛ ahe miishɛɛ.”+
21 No hewɔ lɛ, nɔ ni Yehowa kɛɛ nɛ:
“Naa mikɛ tɛmɔ nii baato maŋ nɛɛ hiɛ,Ni ebaahã amɛtɛrɛ,Tsɛmɛi kɛ bihii fɛɛ,Mɔ kɛ ehe gbɔmɔ fɛɛ,Ni amɛ fɛɛ amɛhiɛ baakpãtã.”+
22 Nɔ ni Yehowa kɛɛ nɛ:
“Naa! Maŋ ko jɛ kooyigbɛ shikpɔŋ lɛ nɔ kɛmiiba,Ni abaatsĩɛ jeŋmaŋ kpele ko hiɛ kɛjɛ shikpɔŋ lɛ hei ni yɔɔ shɔŋŋshɔŋŋ lɛ kɛba.+
23 Amɛbaahiɛ gãi kɛ akpɔlɔ.
Amɛyitsoŋ wa ni amɛnaaa mɔbɔ.
Amɛgbee tamɔ ŋshɔ gbɛɛmɔ,*Ni amɛtaraa okpɔŋɔi anɔ.+
Ao Zion biyoo, amɛgbá ta amɛwo bo tamɔ tawulɔi.”
24 Wɔnu enɛ he sane.
Wɔnijiaŋ eje wui;+Wɔhao,Wɔmiikɛ̃mɔ tamɔ yoo ni miifɔ.+
25 Kaaje kpo kɛtee ŋa lɛ nɔ,Ni kaanyiɛ gbɛ lɛ nɔ hu,Ejaakɛ henyɛlɔ lɛ hiɛ klante;He fɛɛ he efee gbeyei.
26 Bo mimaŋ biyoo,Bu kpekpe+ ni okoklo shi yɛ lamulu mli.
Ye awerɛho tamɔ ayeɔ bi koome ni egbo he awerɛho, ni awoɔ yara waa yɛ ehewɔ lɛ,+Ejaakɛ hiɛkpatalɔ lɛ baaba onɔ trukaa.+
27 “Mifee bo* mɔ ni tsuɔ shika tsuru* he yɛ mimaŋbii lɛ ateŋ,Mɔ ni taoɔ nii amli jogbaŋŋ;Kwɛmɔ amɛ ni otao amɛgbɛ lɛ mli.
28 Amɛ fɛɛ lɛ, amɛji mɛi ni kuɛŋ ti fe fɛɛ,+Amɛwieɔ mɛi ahe efɔŋ kɛkpaa shi.+
Amɛtamɔ akɔɔble kɛ dade;Amɛ fɛɛ amɛfite.
29 Ahuu afoto* lɛ aahu ni eshã.
Nɔ ni amɛjie kɛje amɛla lɛ mli ji sumui.
Mɔ kɛ hiɛdɔɔ tsuɔ nii ahe waa efolo,+Ni ajieko mɛi fɔji lɛ yɛ amɛteŋ.+
30 Abaatsɛ amɛ jwiɛtɛi ni akwa,Ejaakɛ Yehowa ekwa amɛ.”+
Shishigbɛ Niŋmaa
^ Hebri sht. ŋm., “akolonto.”
^ Hebri sht. ŋm., “Nyɛfea ta krɔŋkrɔŋ.”
^ Loo “misusuma taŋ.”
^ Hebri sht. ŋm., “Afoko amɛtoii ketia.”
^ Loo “Ni etɔ mi kɛ enaatsĩi.”
^ Hebri sht. ŋm., “mɛi ni eye gbii pii.”
^ Loo “miishishiu.”
^ Loo “kuumɔ.”
^ Loo “hiɛaŋhiɛaŋ.”
^ Loo “Koni nyɛná hejɔɔmɔ nyɛhã nyɛsusumai lɛ.”
^ Hebri sht. ŋm., “akolonto.”
^ Loo “migbɛtsɔɔmɔ.”
^ Eji tso ko ni jeɔ ŋma. Aleee bɔ ni eji jogbaŋŋ.
^ Loo “hũumɔ.”
^ Ni ji, Yeremia.
^ Loo “jwiɛtɛi.”
^ Eji tsɔne ko ni dade sɔlɔi kɛhuɔ la.
