Yeremia 52:1-34
52 Be ni Zedekia+ batsɔ maŋtsɛ lɛ, no mli lɛ, eye afii 21, ni eye nɔ afii 11 yɛ Yerusalem. Emami gbɛ́i ji Hamutal,+ Yeremia ni jɛ Libna lɛ biyoo lɛ.
2 Etee nɔ efee efɔŋ yɛ Yehowa hiɛ, tamɔ bɔ ni Yehoiakim fee lɛ pɛpɛɛpɛ.+
3 Yehowa mlifu lɛ hewɔ enɛɛmɛi fɛɛ ba lɛ nakai yɛ Yerusalem kɛ Yuda nɔ, kɛyashi ejie amɛ kɛje ehiɛ.+ Ni Zedekia tse Babilon maŋtsɛ lɛ hiɛ atua.+
4 Yɛ Zedekia nɔyeli afi ni ji nɛɛhu lɛ nɔ, yɛ nyɔɔŋ ni ji nyɔŋma lɛ nɔ gbi ni ji nyɔŋma lɛ nɔ lɛ, Babilon maŋtsɛ Nebukadnezar* kɛ esraafoi lɛ fɛɛ ba koni amɛkɛ Yerusalem abawu. Amɛbɔ nsara amɛwo maŋ lɛ he ni amɛtswa kpoku kɛbɔle he fɛɛ.+
5 Ni ewo maŋ lɛ he ka kɛyashi Maŋtsɛ Zedekia nɔyeli afi ni ji 11 lɛ nɔ.
6 Yɛ nyɔɔŋ ni ji ejwɛ lɛ nɔ gbi ni ji nɛɛhu lɛ nɔ lɛ,+ hɔmɔ lɛ naa bawa yɛ maŋ lɛ mli, ni shikpɔŋ lɛ nɔ bii lɛ náaa niyenii amɛye.+
7 Agbɛnɛ, ajwa maŋ lɛ gbogbo lɛ awo mli, ni asraafoi lɛ fɛɛ jo foi nyɔɔŋ kɛtsɔ agbó ni yɔɔ gbogboi enyɔ lɛ ateŋ, ni bɛŋkɛ maŋtsɛ lɛ abɔɔ lɛ mli lɛ, no mli lɛ, Kaldeabii lɛ ebɔle maŋ lɛ; ni amɛtsɔ Araba lɛ gbɛ lɛ nɔ kɛtee.+
8 Shi Kaldeabii lɛ asraafoi lɛ tiu Zedekia,+ ni amɛyanina maŋtsɛ lɛ yɛ Yeriko ŋa kpataa lɛ nɔ, ni esraafoi lɛ fɛɛ gbɛ amɛshwã kɛje ehe.
9 Kɛkɛ ni amɛmɔ maŋtsɛ lɛ, ni amɛkɛ lɛ kwɔ kɛba Babilon maŋtsɛ lɛ ŋɔɔ yɛ Ribla, yɛ Hamat shikpɔŋ lɛ nɔ, ni ekojo lɛ.
10 Ni Babilon maŋtsɛ lɛ gbe Zedekia bihii lɛ yɛ Zedekia hiɛ, ni egbe Yuda lumɛi lɛ fɛɛ hu yɛ jɛmɛ yɛ Ribla.
11 Kɛkɛ ni Babilon maŋtsɛ lɛ shwila Zedekia hiŋmɛii,+ ni ewo lɛ akɔɔble gboklɛi, ni ekɛ lɛ tee Babilon, ni ewo lɛ tsuŋ kɛyashi gbi ni Zedekia gbo.
12 Yɛ Maŋtsɛ Nebukadnezar,* Babilon maŋtsɛ lɛ nɔyeli afi ni ji 19 lɛ nɔ, yɛ nyɔɔŋ ni ji enumɔ lɛ nɔ gbi ni ji nyɔŋma lɛ nɔ lɛ, Nebuzaradan, bulɔi lɛ anɔkwɛlɔ lɛ, ni ji Babilon maŋtsɛ lɛ sɔɔlɔ lɛ, bote Yerusalem.+
13 Eshã Yehowa shĩa lɛ,+ kɛ maŋtsɛ shĩa lɛ, kɛ shĩai fɛɛ ni yɔɔ Yerusalem lɛ; ni eshã shĩa wulu fɛɛ shĩa wulu hu.
14 Ni Kaldeabii lɛ asraafoi lɛ fɛɛ ni kɛ bulɔi lɛ anɔkwɛlɔ lɛ ba lɛ, kumɔ gbogboi ni bɔle Yerusalem he lɛ amɛshwie shi.+
15 Nebuzaradan, bulɔi lɛ anɔkwɛlɔ lɛ ŋɔ mɛi ni bɛ yelikɛbualɔ lɛ ateŋ mɛi komɛi, kɛ mɛi fɛɛ ni shwɛ yɛ Yerusalem lɛ nom kɛtee. Eŋɔ mɛi ni tse amɛhe ni amɛkɛ amɛhe yahã Babilon maŋtsɛ lɛ, kɛ ŋaalɔi ni shwɛ lɛ fɛɛ hu nom kɛtee.+
16 Shi Nebuzaradan, bulɔi lɛ anɔkwɛlɔ lɛ shi shikpɔŋ lɛ nɔ bii ni yeɔ ohia futaa lɛ ateŋ mɛi komɛi yɛ sɛɛ koni amɛsɔmɔ akɛ waintromsaalɔi kɛ okwaafoi ni anyɛɔ amɛnɔ kɛhã nitsumɔ.+
17 Ni Kaldeabii lɛ kumɔ akɔɔble akulashiŋi+ lɛ ni yɔɔ Yehowa shĩa lɛ, kɛ akɔɔble nu shwiilii+ lɛ, kɛ akɔɔble nu taŋki ni atsɛɔ lɛ Ŋshɔ+ lɛ ni mamɔ Yehowa shĩa lɛ dukuduku, ni amɛkɛ akɔɔble lɛ fɛɛ tee Babilon.+
18 Agbɛnɛ hu, amɛloo lamululoomɔnii lɛ, kɛ sofii lɛ, kɛ lagbeenii lɛ, kɛ tsɛnsii+ lɛ, kɛ kɔɔpoi+ lɛ, kɛ nibii krokomɛi ni akɛ akɔɔble fee ni akɛtsu nii yɛ sɔlemɔ shĩa lɛ fɛɛ kɛtee.
19 Bulɔi lɛ anɔkwɛlɔ lɛ loo okpolui+ lɛ, kɛ lajeenii lɛ, kɛ tsɛnsii lɛ, kɛ lamululoomɔnii lɛ, kɛ kanetsei+ lɛ, kɛ kɔɔpoi lɛ, kɛ tsɛnsii ni akɛ shika tsuru krɔŋŋ kɛ jwiɛtɛi krɔŋŋ fee lɛ.+
20 Shi akulashiŋi enyɔ lɛ, Ŋshɔ lɛ, kɛ tsinahii 12 ni akɛ akɔɔble fee+ ni yɔɔ Ŋshɔ lɛ shishi lɛ, kɛ nu shwiilii ni Maŋtsɛ Solomon fee ewo Yehowa shĩa lɛ, anyɛɛɛ aŋmɛ akɔɔble ni ekɛfee nibii nɛɛ fɛɛ lɛ tsiimɔ.
21 Shi akulashiŋi lɛ, eko fɛɛ eko kwɔlɛ ji ninetalɔi* 18, ni kɛ́ okɛ susumɔ kpãa bɔle akulashiŋi lɛ eko fɛɛ eko he kɛkpe lɛ, efeɔ ninetalɔi 12;+ ni etilɛ tamɔ ninewaobii* ejwɛ ni akɛtsa, ni bu kã mli.
22 Ni akɛ akɔɔble efee akekere kɛma nɔ; ni akekere lɛ ekome kwɔlɛ ji ninetalɔi enumɔ;+ ni akɔɔble akɛfee yaa lɛ kɛ pomegranet aduawai ni bɔle akekere lɛ he lɛ. Akulashiŋ ni ji enyɔ lɛ hu tamɔ nakai nɔŋŋ, ni nakai nɔŋŋ pomegranet aduawai lɛ hu ji.
23 Ni pomegranet aduawai 96 yɛ he; pomegranet aduawai ni yɔɔ yaa lɛ he lɛ fɛɛ feɔ 100.+
24 Bulɔi lɛ anɔkwɛlɔ lɛ ŋɔ osɔfonukpa Seraia,+ kɛ Zefania,+ osɔfonukpa sɛɛkwɛlɔ lɛ, kɛ shinaanaakwɛlɔi etɛ lɛ hu nom kɛtee.+
25 Ni eŋɔ maŋtsɛ shĩa onukpa kome ni kwɛɔ asraafoi lɛ anɔ, kɛ maŋtsɛ lɛ he gbɔmɛi kpawo ni ana yɛ maŋ lɛ mli, kɛ agbɛnɛ hu tatsɛ lɛ woloŋmalɔ lɛ, ni ji mɔ ni buaa shikpɔŋ lɛ nɔ bii lɛ anaa kɛhã ta lɛ, kɛ shikpɔŋ lɛ nɔ hii 60 ni ana yɛ maŋ lɛ mli lɛ hu nom kɛje maŋ lɛ mli kɛtee.
26 Nebuzaradan, bulɔi lɛ anɔkwɛlɔ lɛ ŋɔ amɛ, ni ekɛ amɛ tee Babilon maŋtsɛ lɛ ŋɔɔ yɛ Ribla.
27 Babilon maŋtsɛ lɛ tswia amɛ nii ni egbe amɛ yɛ Ribla+ yɛ Hamat shikpɔŋ lɛ nɔ. No hewɔ lɛ, nɛkɛ ji bɔ ni fee ni aŋɔ Yuda nom kɛje eshikpɔŋ lɛ nɔ kɛtee.+
28 Mɛi ni Nebukadnezar* ŋɔ amɛ nom kɛtee lɛ nɛ: yɛ enɔyeli afi ni ji kpawo lɛ mli lɛ, eŋɔ Yudafoi 3,023 nom kɛtee.+
29 Yɛ Nebukadnezar* nɔyeli afi ni ji 18 lɛ mli lɛ,+ aŋɔ mɛi* 832 nom kɛje Yerusalem kɛtee.
30 Yɛ Nebukadnezar* nɔyeli afi ni ji 23 lɛ mli lɛ, Nebuzaradan, bulɔi lɛ anɔkwɛlɔ lɛ ŋɔ Yudafoi nom kɛtee, mɛi* 745.+
Mɛi ni aŋɔ amɛ nom kɛtee lɛ fɛɛ feɔ mɛi* 4,600.
31 Ni yɛ Yuda maŋtsɛ Yehoiakin+ nomŋɔɔ afi ni ji 37 lɛ nɔ, yɛ nyɔɔŋ ni ji 12 lɛ nɔ gbi ni ji 25 lɛ nɔ lɛ, Babilon maŋtsɛ Evil-merodak jie Yuda maŋtsɛ Yehoiakin* yɛ tsuŋwoo mli yɛ afi ni ebatsɔ maŋtsɛ lɛ nɔ.+
32 Ekɛ lɛ wie yɛ naajɔlɛ naa ni ewó enɔ fe maŋtsɛmɛi krokomɛi fɛɛ ni kɛ lɛ yɔɔ Babilon lɛ.*
33 No hewɔ lɛ, Yehoiakin jie tsuŋwoohe atade lɛ, ni ewala gbii abɔ fɛɛ lɛ, ekɛ lɛ yeɔ nii daa.
34 Ni gbi fɛɛ gbi lɛ, Babilon maŋtsɛ lɛ hãa lɛ niyenii ni ato ni ahã lɛ lɛ, ni efee nakai ehã lɛ ewala gbii abɔ fɛɛ, kɛyashi gbi ni egbo.
Shishigbɛ Niŋmaa
^ Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
^ Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
^ Ninetalɔ kome feɔ sɛntimitai 44.5 (iŋtsii 17.5). Kwɛmɔ Saji Krokomɛi B14 lɛ.
^ Wao lɛɛmɔ kome feɔ sɛntimitai 1.85 (iŋtsi 0.73). Kwɛmɔ Saji Krokomɛi B14 lɛ.
^ Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
^ Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
^ Loo “susumai.”
^ Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
^ Loo “susumai.”
^ Loo “susumai.”
^ Hebri sht. ŋm., “wó Yuda maŋtsɛ Yehoiakin yitso nɔ.”
^ Loo “ewó emaŋtsɛ sɛi lɛ nɔ fe maŋtsɛmɛi krokomɛi fɛɛ ni kɛ lɛ yɔɔ Babilon lɛ amaŋtsɛ sɛii lɛ.”
