Yeremia 38:1-28

  • Ashɛ Yeremia afɔ̃ bu ni akɛtoɔ nu mli (1-6)

  • Ebed-melek yajie Yeremia (7-13)

  • Yeremia wo Zedekia hewalɛ koni ekɛ ehe ayahã Babilon (14-28)

38  Shefatia, Matan binuu lɛ, kɛ Gedalia, Pashur binuu lɛ, kɛ Yukal,+ Shelemia binuu lɛ, kɛ Pashur,+ Malkia binuu lɛ, nu wiemɔi ni Yeremia wie etsɔɔ maŋbii lɛ fɛɛ akɛ:  “Nɔ ni Yehowa kɛɛ nɛ, ‘Mɔ ni baaya nɔ ahi maŋ nɛɛ mli lɛ, klante, kɛ hɔmɔ, kɛ tsɛŋemɔ hela ni gbeɔ mɔ baagbe lɛ.+ Shi mɔ ni kɛ ehe baayahã Kaldeabii* lɛ ebaaya nɔ ehi shi, ni ta mli nii ni ebaaná ji ewala,* ni eyi baaná wala.’+  Nɔ ni Yehowa kɛɛ nɛ, ‘Bɔ fɛɛ bɔ ni fee lɛ, akɛ maŋ nɛɛ baawo Babilon maŋtsɛ lɛ asraafoi lɛ adɛŋ, ni ebaaŋɔ maŋ lɛ.’”+  Lumɛi lɛ kɛɛ maŋtsɛ lɛ akɛ: “Ofainɛ, hã agbe nuu nɛɛ,+ ejaakɛ eehã asraafoi ni eshwɛ yɛ maŋ lɛ mli lɛ, kɛ maŋbii lɛ fɛɛ anijiaŋ miije wui kɛ wiemɔi ni ewieɔ etsɔɔ amɛ lɛ. Ejaakɛ nuu nɛɛ taooo maŋbii nɛɛ toiŋjɔlɛ, moŋ lɛ eetao ni sane fɔŋ aba amɛnɔ.”  Maŋtsɛ Zedekia here nɔ akɛ: “Naa! Eyɛ nyɛdɛŋ, ejaakɛ maŋtsɛ lɛ nyɛŋ afee nɔ ko kɛtsĩ nyɛnaa.”  No hewɔ lɛ, amɛmɔ Yeremia ni amɛshɛ lɛ amɛfɔ̃ Malkia, maŋtsɛ lɛ binuu lɛ bu ni akɛtoɔ nu ni yɔɔ Bulɔi Akpo+ lɛ nɔ lɛ mli. Amɛkɛ kpãi shiu Yeremia amɛwo mli. No mli lɛ, nu bɛ bu ni akɛtoɔ nu lɛ mli, ŋmɔtɔ sɔŋŋ yɔɔ mli, ni Yeremia bɔi fũu yɛ ŋmɔtɔ lɛ mli.  Ebed-melek,+ Etiopianyo lɛ, ni ji maŋtsɛ shĩa lɛ onukpai lɛ ateŋ mɔ kome lɛ, nu akɛ, akɛ Yeremia ewo bu ni akɛtoɔ nu lɛ mli. No mli lɛ, maŋtsɛ lɛ ta Benyamin Agbó+ lɛ mli,  no hewɔ lɛ, Ebed-melek je kpo kɛjɛ maŋtsɛ lɛ shĩa lɛ mli ni ekɛ maŋtsɛ lɛ yawie akɛ:  “Ao minuŋtsɔ maŋtsɛ, nɔ ni hii nɛɛ efee gbalɔ Yeremia lɛ, efɔŋ ni! Amɛshɛ lɛ amɛfɔ̃ bu ni akɛtoɔ nu lɛ mli, ni hɔmɔ lɛ hewɔ lɛ ebaagbo yɛ jɛmɛ, ejaakɛ blodo etã yɛ maŋ lɛ mli.”+ 10  Kɛkɛ ni maŋtsɛ lɛ fã Ebed-melek, Etiopianyo lɛ akɛ: “Ŋɔɔ hii 30 kɛjɛ biɛ ofata ohe, ni oyajie gbalɔ Yeremia kɛje bu ni akɛtoɔ nu lɛ mli dani egbo.” 11  No hewɔ lɛ, Ebed-melek ŋɔ hii lɛ efata ehe ni etee maŋtsɛ lɛ shĩa yɛ tsũ ni yɔɔ jwetritoohe+ lɛ shishi lɛ mli, ni amɛyakɔlɔ mamashwɛi komɛi kɛ atadei komɛi ni etserɛ yɛ jɛmɛ, ni amɛkɛ kpãi shiu nibii nɛɛ amɛhã Yeremia yɛ bu ni akɛtoɔ nu lɛ mli. 12  Kɛkɛ ni Ebed-melek, Etiopianyo lɛ kɛɛ Yeremia akɛ: “Ofainɛ, okɛ mamashwɛi lɛ kɛ atadei ni etserɛ lɛ awo oŋaashi kɛ kpãi lɛ ateŋ.” Yeremia fee nakai, 13  ni amɛkɛ kpãi lɛ shá Yeremia ni amɛjie lɛ kɛje bu ni akɛtoɔ nu lɛ mli. Ni Yeremia tee nɔ ehi Bulɔi Akpo+ lɛ nɔ. 14  Maŋtsɛ Zedekia tsu ni ayatsɛ gbalɔ Yeremia kɛba eŋɔɔ yɛ he ni ji etɛ nɔ ni atsɔɔ kɛboteɔ Yehowa shĩa lɛ mli lɛ naa, ni maŋtsɛ lɛ kɛɛ Yeremia akɛ: “Miyɛ nɔ ko ni miitao mabi bo. Okɛ nɔ ko nɔ ko akatee mi.” 15  Kɛkɛ ni Yeremia kɛɛ Zedekia akɛ: “Kɛ́ mikɛɛ bo lɛ, obaagbe mi kɛ̃. Ni kɛ́ miwo bo ŋaa hu lɛ, oboŋ mi toi.” 16  No hewɔ lɛ, Maŋtsɛ Zedekia kã Yeremia kitã yɛ teemɔŋ akɛ: “Gbii abɔ ni Yehowa, mɔ ni hã wɔ wala nɛɛ* hiɛ kã nɛɛ, migbeŋ bo, ni mikɛ bo woŋ hii nɛɛ ni miitao ashɔ̃ owala yɛ odɛŋ nɛɛ* adɛŋ.” 17  Kɛkɛ ni Yeremia kɛɛ Zedekia akɛ: “Nɔ ni Yehowa, Nyɔŋmɔ taiatsɛ lɛ, Israel Nyɔŋmɔ lɛ kɛɛ nɛ, ‘Kɛ́ okɛ ohe yahã Babilon maŋtsɛ lɛ lumɛi lɛ,* akpãtãŋ owala hiɛ,* ni akɛ la eshãŋ maŋ nɛɛ, ni akpãtãŋ bo kɛ oshĩabii lɛ ahiɛ.+ 18  Shi kɛ́ okɛ ohe eyahãaa Babilon maŋtsɛ lɛ lumɛi lɛ,* akɛ maŋ nɛɛ baawo Kaldeabii lɛ adɛŋ, ni amɛkɛ la baashã maŋ lɛ,+ ni ojeŋ amɛdɛŋ.’”+ 19  Kɛkɛ ni Maŋtsɛ Zedekia kɛɛ Yeremia akɛ: “Miishe Yudafoi ni eyafata Kaldeabii lɛ ahe lɛ gbeyei, ejaakɛ kɛ́ akɛ mi wo amɛdɛŋ lɛ, amɛbaawa mi yi.”* 20  Shi Yeremia kɛɛ akɛ: “Akɛ bo woŋ amɛdɛŋ. Ofainɛ bo Yehowa gbee toi yɛ nɔ ni mikɛɔ bo lɛ mli, ni ebaahi ehã bo, ni obaaya nɔ ohi shi.* 21  Shi kɛ́ okɛ ohe eyahãaa amɛ lɛ,* nɔ ni Yehowa ejie kpo etsɔɔ mi nɛ: 22  Naa! Yei fɛɛ ni eshwɛ yɛ Yuda maŋtsɛ lɛ shĩa lɛ, akɛ amɛ miije kpo kɛmiiya Babilon maŋtsɛ lɛ lumɛi lɛ aŋɔɔ,+ ni amɛmiikɛɛ akɛ,‘Hii ni okɛ ohiɛ fɔ̃ɔ amɛnɔ lɛ elaka bo ni amɛye onɔ kunim.+ Amɛhã onane efũ yɛ ŋmɔtɔ lɛ mli. Amɛtsɔ amɛhe amɛtee.’ 23  Amɛkɛ oŋamɛi lɛ kɛ obii lɛ fɛɛ miiba Kaldeabii lɛ aŋɔɔ, ni ojeŋ amɛdɛŋ, shi moŋ, Babilon maŋtsɛ lɛ baamɔ bo,+ ni akɛ la baashã maŋ nɛɛ yɛ ohewɔ.”+ 24  Kɛkɛ ni Zedekia kɛɛ Yeremia akɛ: “Kaahã mɔ ko mɔ ko le nibii nɛɛ koni okagbo. 25  Ni kɛ́ lumɛi lɛ nu akɛ mikɛ bo ewie, ni amɛba oŋɔɔ ni amɛkɛɛ bo akɛ, ‘Ofainɛ, kɛɛmɔ wɔ nɔ ni okɛɛ maŋtsɛ lɛ. Okɛ nɔ kɔ nɔ ko akatee wɔ, ni wɔgbeŋ bo.+ Mɛni maŋtsɛ lɛ kɛɛ bo?’ 26  Kɛɛmɔ amɛ akɛ, ‘Mikpa maŋtsɛ lɛ fai akɛ ekɛ mi akahã kɛku sɛɛ kɛtee Yehonatan shĩa lɛ ni miyagbo yɛ jɛmɛ.’”+ 27  Sɛɛ mli lɛ, lumɛi lɛ fɛɛ ba Yeremia ŋɔɔ ni amɛbabi lɛ sane. Ekɛɛ amɛ nɔ fɛɛ nɔ ni maŋtsɛ lɛ fã lɛ akɛ ekɛɛ lɛ. No hewɔ lɛ, amɛkɛɛɛ lɛ nɔ ko dɔŋŋ, ejaakɛ mɔ ko mɔ ko nuko sanegbaa lɛ. 28  Yeremia hi Bulɔi Akpo lɛ nɔ kɛyashi gbi ni aŋɔ Yerusalem;+ eyɛ jɛmɛ lolo be ni aŋɔ Yerusalem lɛ.+

Shishigbɛ Niŋmaa

Hebri sht. ŋm., “mɔ ni baaje kpo kɛya Kaldeabii lɛ aŋɔɔ.”
Loo “esusuma.”
Loo “mɔ ni fee susuma nɛɛ ehã wɔ lɛ.”
Loo “ni taoɔ osusuma lɛ.”
Hebri sht. ŋm., “oje kpo otee Babilon maŋtsɛ lɛ lumɛi lɛ aŋɔɔ lɛ.”
Loo “osusuma baaya nɔ ahi shi.”
Hebri sht. ŋm., “kɛ́ ojeee kpo oyaaa Babilon maŋtsɛ lɛ lumɛi lɛ aŋɔɔ lɛ.”
Loo “amɛkɛ mi baaye dɛŋdɛŋ.”
Loo “osusuma baaya nɔ ahi shi.”
Hebri sht. ŋm., “ojeee kpo ni oya amɛŋɔɔ lɛ.”