Yeremia 37:1-21

  • Kaldeabii lɛ shi kɛtee be kukuoo ko pɛ (1-10)

  • Awo Yeremia tsuŋ (11-16)

  • Zedekia kɛ Yeremia kpe (17-21)

    • Ahã Yeremia blodo (21)

37  Ni Maŋtsɛ Zedekia,+ Yosia binuu lɛ, bɔi maŋtsɛyeli yɛ Konia,*+ Yehoiakim binuu lɛ najiaŋ, ejaakɛ Babilon maŋtsɛ Nebukadnezar* wó lɛ maŋtsɛ yɛ Yuda shikpɔŋ lɛ nɔ.+  Shi lɛ kɛ etsuji lɛ, kɛ shikpɔŋ lɛ nɔ bii lɛ booo Yehowa wiemɔi ni etsɔ gbalɔ Yeremia nɔ ewie lɛ atoi.  Ni Maŋtsɛ Zedekia tsu Yehukal,+ Shelemia binuu lɛ, kɛ Zefania,+ Maaseia binuu lɛ, ni ji osɔfo lɛ kɛtee gbalɔ Yeremia ŋɔɔ akɛ: “Ofainɛ sɔlemɔ ohã Yehowa, wɔ-Nyɔŋmɔ lɛ ohã wɔ.”  Yeremia yaa ebaa yɛ maŋbii lɛ ateŋ, ejaakɛ no mli lɛ, awoko lɛ tsuŋ.+  No mli lɛ, Farao asraafoi lɛ efã ta kɛjɛ Ejipt amɛmiiba,+ ni Kaldeabii ni ewo Yerusalem he ka lɛ nu amɛhe. No hewɔ lɛ, amɛje Yerusalem he amɛtee.+  Kɛkɛ ni Yehowa kɛɛ gbalɔ Yeremia akɛ:  “Nɔ ni Yehowa, Israel Nyɔŋmɔ lɛ kɛɛ nɛ, ‘Nyɛyakɛa Yuda maŋtsɛ lɛ, mɔ ni tsu nyɛ miŋɔɔ koni nyɛbabi mi nii lɛ akɛ: “Naa! Farao asraafoi lɛ ni miiba koni amɛbaye amɛbua nyɛ lɛ baaku amɛsɛɛ kɛya amɛshikpɔŋ ni ji Ejipt lɛ nɔ.+  Ni Kaldeabii lɛ baaku amɛsɛɛ amɛba, ni amɛbawu amɛshi maŋ nɛɛ, ni amɛbaaŋɔ maŋ lɛ, ni amɛkɛ la baashã maŋ lɛ.”+  Nɔ ni Yehowa kɛɛ nɛ, “Nyɛkalakaa nyɛ diɛŋtsɛ nyɛhe* nyɛkɛa akɛ, ‘Bɔ fɛɛ bɔ ni fee lɛ Kaldeabii lɛ baaje wɔhe amɛya,’ ejaakɛ amɛyaŋ. 10  Kɛ́ nyɛtswia Kaldeabii asraafoi lɛ ni wuɔ amɛshiɔ nyɛ lɛ fɛɛ anii ni eshwɛ amɛteŋ mɛi ni epila lɛ pɛ po lɛ, amɛbaate shi kɛjɛ amɛmama tsũi lɛ amli ni amɛkɛ la baashã maŋ nɛɛ.”’”+ 11  Be ni Kaldeabii asraafoi lɛ je Yerusalem he amɛtee yɛ Farao asraafoi lɛ ahewɔ lɛ,+ 12  Yeremia yi mli kɛjɛ Yerusalem akɛ eeya Benyamin shikpɔŋ lɛ nɔ+ eyahe egbɛfaŋnɔ yɛ jɛmɛ yɛ emaŋbii lɛ ateŋ. 13  Shi be ni eshɛ Benyamin Agbó lɛ naa lɛ, bulɔi lɛ anɔkwɛlɔ lɛ ni atsɛɔ lɛ Iriya, ni ji Hanania binuu Shelemia binuu lɛ mɔ gbalɔ Yeremia ni ekɛɛ akɛ: “Oojo foi kɛmiiya Kaldeabii lɛ aŋɔɔ!” 14  Shi Yeremia kɛɛ akɛ: “Ebɛ mli! Mijooo foi kɛyaaa Kaldeabii lɛ aŋɔɔ.” Shi ebooo lɛ toi. Hewɔ lɛ, Iriya mɔ Yeremia, ni ekɛ lɛ tee lumɛi lɛ aŋɔɔ. 15  Lumɛi lɛ mli wo la waa amɛwo Yeremia,+ ni amɛyi lɛ, ni amɛwo lɛ tsuŋ*+ yɛ Yehonatan, woloŋmalɔ lɛ shĩa lɛ ni akɛfee tsuŋwoohe lɛ mli. 16  Akɛ Yeremia wo gboklɛfoi abu* lɛ mli tsũi ni yɔɔ shikpɔŋ shishi lɛ eko mli, ni ehi jɛmɛ gbii babaoo. 17  Kɛkɛ ni Maŋtsɛ Zedekia tsu ayatsɛ lɛ kɛba, ni maŋtsɛ lɛ bi lɛ saji yɛ teemɔŋ yɛ emaŋtsɛ shĩa lɛ.+ Ebi lɛ akɛ, “Ani wiemɔ ko ejɛ Yehowa ŋɔɔ eba oŋɔɔ?” Yeremia kɛɛ akɛ, “Hɛɛ, eko yɛ!” ni etsa nɔ akɛ, “Akɛ bo baawo Babilon maŋtsɛ lɛ dɛŋ!”+ 18  Yeremia saa ekɛɛ Maŋtsɛ Zedekia akɛ: “Mɛɛ esha mifee bo, kɛ otsuji lɛ, kɛ maŋ nɛɛ hewɔ ni nyɛwo mi tsuŋ lɛ? 19  Ni nyɛgbalɔi lɛ ni gba amɛhã nyɛ akɛ, ‘Babilon maŋtsɛ lɛ baŋ ni ebatutua nyɛ kɛ shikpɔŋ nɛɛ’ lɛ, nɛgbɛ amɛyɔɔ?+ 20  Agbɛnɛ, ofainɛ, bo toi, Ao minuŋtsɔ maŋtsɛ. Ofainɛ, bo fai ni mikpaa bo koni ona mi mɔbɔ lɛ toi. Kaahã akɛ mi ku sɛɛ kɛtee Yehonatan,+ woloŋmalɔ lɛ, shĩa lɛ dɔŋŋ, kɛjeee nakai lɛ magbo yɛ jɛmɛ.”+ 21  No hewɔ lɛ, Maŋtsɛ Zedekia fã ni awo Yeremia tsuŋ yɛ Bulɔi Akpo+ lɛ nɔ, ni akɛ blodo kokloo jɛɔ nishãlɔi lɛ agbɛjegbɛ lɛ nɔ akɛbahãa lɛ daa gbi+ aahu kɛyashi blodo fɛɛ tã yɛ maŋ lɛ mli.+ Ni Yeremia tee nɔ ehi Bulɔi Akpo lɛ nɔ.

Shishigbɛ Niŋmaa

Atsɛɔ lɛ hu akɛ Yehoiakin kɛ Yekonia.
Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
Loo “nyɛsusumai.”
Hebri sht. ŋm., “amɛkɛ lɛ wo gboklɛi lɛ ashĩa lɛ mli.”
Hebri sht. ŋm., “bu ni akɛtoɔ nu lɛ shĩa.”