Yeremia 3:1-25
3 Mɛi biɔ akɛ: “Kɛ́ nuu ko shwie eŋa, ni yoo lɛ tee ni eyatsɔ nuu kroko ŋa lɛ, ani esa akɛ nuu lɛ ayaŋɔ yoo lɛ ekoŋŋ?”
Ani abuleko shikpɔŋ lɛ kwraa?+
“Ohɔ̃ɔ ohe ohã mɛi babaoo,+Ani esa akɛ oku osɛɛ kɛba miŋɔɔ agbɛnɛ?” Yehowa kɛɛ.
2 “Holemɔ ohiŋmɛii anɔ kɛya gɔŋkpɔi kpatai lɛ anɔ ni okwɛ.
Nɛgbɛ akɛ bo wɔko basabasa yɛ?
Otaa gbɛjegbɛi lɛ ahe omɛɔ amɛ,Tamɔ Arabianyo yɛ ŋa lɛ nɔ.
Oyaa nɔ okɛ oshawofeemɔ lɛ kɛ onifɔjianii lɛBuleɔ shikpɔŋ lɛ.+
3 No hewɔ lɛ, atsĩ nugbɔnɛmɔ naa,+Ni nugbɔ enɛɛɛ yɛ sɛɛkpee nugbɔnɛmɔ beiaŋ.*
Ohiɛ* tamɔ ŋa ni feɔ ashawo hiɛ;Ohiɛ gbooo.+
4 Shi amrɔ nɛɛ oobo ootsɛ mi akɛ,‘Mitsɛ, bo ji miblayeiaŋ naanyo!+
5 Ani esa akɛ mɔ ko mli afu kɛya naanɔ?Ani esa akɛ mɔ ko abɛ mɔ awo emli be fɛɛ be?’
Nakai okɛɔ,Shi oyaa nɔ ofeɔ efɔŋ fɛɛ efɔŋ ni obaanyɛ ofee lɛ.”+
6 Maŋtsɛ Yosia gbii lɛ amli lɛ,+ Yehowa kɛɛ mi akɛ: “‘Ani ona nɔ ni Israel ni yeee anɔkwa lɛ efee lɛ? Ekwɔ kɛtee gɔŋ fɛɛ gɔŋ ni kwɔ nɔ kɛ tso fɛɛ tso ni ebu kusuu shishi koni eyahɔ̃ɔ ehe yɛ jɛmɛ.+
7 Be ni efee nibii nɛɛ fɛɛ sɛɛ po lɛ, mitee nɔ mikɛɛ lɛ koni eku esɛɛ kɛba miŋɔɔ,+ shi ekuuu esɛɛ; ni Yuda tee nɔ ekwɛ enyɛmi yoo ni yeee anɔkwa lɛ.+
8 Be ni mina enɛ lɛ, mihã Israel ni yeee anɔkwa lɛ gbalatsemɔ* wolo+ ni mishwie lɛ ejaakɛ efite gbãla.+ Shi Yuda ni ji enyɛmi yoo ni yeee anɔkwa lɛ sheee gbeyei; lɛ hu etee eyahɔ̃ɔ ehe.+
9 Ebuuu eshawofeemɔ lɛ akɛ nɔ ko, ni etee nɔ ebule shikpɔŋ lɛ ni ekɛ tɛi kɛ tsei fite gbãla.+
10 Enɛ fɛɛ sɛɛ lɛ, enyɛmi yoo Yuda ni yeee anɔkwa lɛ ekuuu esɛɛ kɛbaaa miŋɔɔ kɛ etsui fɛɛ, shi moŋ, ekwa efee nakai,’ Yehowa kɛɛ.”
11 Ni Yehowa kɛɛ mi akɛ: “Israel ni yeee anɔkwa lɛ etsɔɔ akɛ jalɔ ji lɛ* fe Yuda ni yeee anɔkwa lɛ.+
12 Yaa ni oyajaje wiemɔi nɛɛ otsɔɔ kooyi akɛ:+
“‘“Bo atuatselɔ Israel, kuu osɛɛ,” Yehowa kɛɛ.’+ ‘“Mituŋ mihiɛ miwoŋ nyɛ,+ ejaakɛ anɔkwafo ji mi,” Yehowa kɛɛ.’ ‘“Mimli fuŋ kɛyaŋ naanɔ.
13 Kpɛlɛmɔ otɔmɔ lɛ nɔ kɛkɛ, ejaakɛ otse Yehowa, o-Nyɔŋmɔ lɛ, hiɛ atua. Oyaa nɔ oŋmɛɔ ohe ohãa* gbɔi* yɛ tso fɛɛ tso ni ebu kusuu shishi, shi obooo migbee toi,” Yehowa kɛɛ.’”
14 “Nyɛ bii* atuatselɔi, nyɛkua nyɛsɛɛ,” Yehowa kɛɛ. “Ejaakɛ mitsɔ nyɛnuŋtsɔ* lɛɛlɛŋ; ni maŋɔ nyɛ, mɔ kome kɛbaajɛ maŋ mli kɛ mɛi enyɔ kɛbaajɛ weku mli, ni mikɛ nyɛ baaba Zion.+
15 Ni mahã nyɛ mi diɛŋtsɛ mitsuinaa tookwɛlɔi,+ ni amɛkɛ nilee kɛ sɛɛyoomɔ baalɛ nyɛ.
16 Nakai gbii lɛ amli lɛ, nyɛyi baafa ni nyɛbaawo yibii yɛ shikpɔŋ lɛ nɔ,” Yehowa kɛɛ.+ “Amɛkɛŋ dɔŋŋ akɛ, ‘Yehowa kpaŋmɔ adeka lɛ!’ Ebaŋ tsui mli, ni akaiŋ, ni ataoŋ hu, ni afeŋ eko dɔŋŋ.
17 Nakai be lɛ mli lɛ, amɛbaatsɛ Yerusalem akɛ Yehowa maŋtsɛ sɛi;+ ni abaabua jeŋmaji lɛ fɛɛ anaa kɛba Yehowa gbɛ́i lɛ he yɛ Yerusalem,+ ni amɛkpiliŋ amɛtsui kɛyanyiɛŋ amɛ diɛŋtsɛ amɛtsui fɔŋ lɛ sɛɛ dɔŋŋ.”
18 “Nakai gbii lɛ amli lɛ, Yuda shĩa lɛ kɛ Israel shĩa+ lɛ baafee ekome kɛnyiɛ, ni amɛbaafee ekome kɛshi kooyi shikpɔŋ lɛ nɔ kɛba shikpɔŋ ni mikɛhã nyɛtsɛmɛi lɛ akɛ gboshinii lɛ nɔ.+
19 Ni misusu yɛ miyiŋ akɛ, ‘Kwɛ bɔ ni mikɛ bo to bii* lɛ ateŋ ni mihã bo shikpɔŋ kpakpa, gboshinii ni yɔɔ fɛo fe fɛɛ yɛ jeŋmaji lɛ ateŋ!’*+ Misusu hu akɛ obaatsɛ mi, ‘Mi-Tsɛ!’ ni okpaŋ misɛɛnyiɛmɔ.
20 ‘Lɛɛlɛŋ, bo Israel shĩa, bɔ ni ŋa ni yeee anɔkwa shĩɔ ewu lɛ, nakai nyɛ hu nyɛyeee mi anɔkwa,’+ Yehowa kɛɛ.”
21 Aanu gbee ko yɛ gɔŋkpɔi kpatai lɛ anɔ,Israelbii lɛ miifó ni amɛmiikpa fai,Ejaakɛ amɛkɔ̃dɔ̃ amɛgbɛ lɛ;Amɛhiɛ ekpa Yehowa, amɛ-Nyɔŋmɔ lɛ nɔ.+
22 “Nyɛ bii* atuatselɔi, nyɛkua nyɛsɛɛ.
Matsa nyɛtuatsemɔ lɛ.”+
“Naa wɔ! Wɔba oŋɔɔ,Ejaakɛ, bo Yehowa, bo ji wɔ-Nyɔŋmɔ.+
23 Lɛɛlɛŋ, gɔŋkpɔi lɛ kɛ gɔji lɛ anɔ hoofeemɔ lɛ, amale ni.+
Lɛɛlɛŋ, Israel yiwalaheremɔ lɛ yɛ Yehowa, wɔ-Nyɔŋmɔ lɛ mli.+
24 Shi hiɛgbele nii* lɛ ekpãtã deŋme ni wɔtsɛmɛi lɛ gbo kɛjɛ amɛgbekɛbiiashi lɛ hiɛ,+Amɛtookui lɛ kɛ amɛtsinai lɛ,Amɛbihii lɛ kɛ amɛbiyei lɛ.
25 Nyɛhãa wɔkamɔa shi yɛ wɔhiɛgbele lɛ mli,Ni wɔhiɛshishwiemɔ lɛ aha wɔnɔ,Ejaakɛ wɔfee esha wɔshi Yehowa, wɔ-Nyɔŋmɔ lɛ,+Wɔ kɛ wɔtsɛmɛi lɛ fɛɛ, kɛjɛ wɔgbekɛbiiashi kɛbashi ŋmɛnɛ,+Ni wɔbooo Yehowa, wɔ-Nyɔŋmɔ lɛ gbee toi.”
Shishigbɛ Niŋmaa
^ Yɛ Israel lɛ, be nɛɛ bafeɔ April teŋgbɛ be ni eshwɛ fioo ni nugbɔnɛmɔ sɛɛ baafo.
^ Hebri sht. ŋm., “Ohiɛnaa.”
^ Loo “shwiemɔ.”
^ Loo “esusuma.”
^ Hebri sht. ŋm., “Ojaa ogbɛi ohãa.”
^ Loo “nyɔŋmɔi krokomɛi.”
^ Hebri sht. ŋm., “bihii.”
^ Shishitsɔɔmɔi komɛi kɛɔ akɛ, “nyɛwu.”
^ Hebri sht. ŋm., “jeŋmaji lɛ asraafoi lɛ agboshinii ni yɔɔ fɛo fe fɛɛ.”
^ Hebri sht. ŋm., “bihii.”
^ Hebri sht. ŋm., “bihii.”
^ Loo “nyɔŋmɔ ni hiɛ gbooo nii.”
