Yeremia 25:1-38

  • Yehowa kɛ jeŋmaji lɛ ená (1-38)

    • Jeŋmaji lɛ baasɔmɔ Babilon afii 70 (11)

    • Nyɔŋmɔ kɔɔpoo ni mlifu wain yɔɔ mli (15)

    • Sane fɔŋ jɛ jeŋmaŋ kome nɔ kɛmiiya jeŋmaŋ kroko nɔ (32)

    • Mɛi ni Yehowa baagbe (33)

25  Wiemɔ ni ba Yeremia ŋɔɔ ni kɔɔ Yudabii lɛ fɛɛ ahe yɛ Yehoiakim,+ Yosia binuu lɛ, ni ji Yuda maŋtsɛ lɛ nɔyeli afi ni ji ejwɛ lɛ mli lɛ nɛ; nakai afi lɛ nɔŋŋ ji Babilon maŋtsɛ Nebukadnezar* nɔyeli lɛ klɛŋklɛŋ afi.  Nɔ ni gbalɔ Yeremia wie yɛ Yudabii lɛ fɛɛ kɛ mɛi fɛɛ ni yɔɔ Yerusalem lɛ ahe* lɛ nɛ:  “Kɛjɛ Yosia, Amon binuu lɛ, ni ji Yuda maŋtsɛ lɛ nɔyeli afi ni ji 13 lɛ nɔ+ kɛbashi ŋmɛnɛ gbi nɛɛ, nɛkɛ afii 23 nɛɛ mli lɛ, Yehowa wiemɔ lɛ baa miŋɔɔ, ni mikɛ nyɛ wieɔ daa kɛ daa,* shi nyɛbooo toi.+  Ni Yehowa tsuɔ etsuji ni ji gbalɔi lɛ fɛɛ kɛbaa nyɛŋɔɔ, etsuɔ amɛ daa kɛ daa,* shi nyɛbooo toi, ni nyɛbaaa nyɛtoi shi koni nyɛnu hu.+  Amɛkɛɔ akɛ, ‘Nyɛfainɛ, nyɛkua nyɛsɛɛ, nyɛteŋ mɔ fɛɛ mɔ akua esɛɛ kɛjea egbɛi fɔji lɛ anɔ kɛ enifeemɔi fɔji lɛ ahe;+ kɛ́ nyɛfee nakai lɛ, nyɛbaaya nɔ nyɛhi shi be kplaŋŋ yɛ shikpɔŋ ni Yehowa kɛhã nyɛ kɛ nyɛtsɛmɛi lɛ kɛjɛ blema tɔ̃ɔ lɛ nɔ.  Nyɛkanyiɛa nyɔŋmɔi krokomɛi asɛɛ, ni nyɛsɔmɔ amɛ, ni nyɛkoto amɛ ni nyɛkɛ nyɛninenaa nitsumɔ lɛ wo mimli la; kɛjeee nakai lɛ mikɛ sane fɔŋ baaba nyɛnɔ.’  “‘Shi nyɛbooo mi toi,’ Yehowa kɛɛ. ‘Nyɛkɛ nyɛninenaa nitsumɔ lɛ wo mimli la moŋ ni nyɛkɛye nyɛhe awui.’+  “No hewɔ lɛ, nɔ ni Yehowa, taiatsɛ lɛ kɛɛ nɛ, ‘“Akɛni nyɛbooo miwiemɔi lɛ atoi hewɔ lɛ,  miitsu ni ayaŋɔ kooyigbɛ wekui lɛ fɛɛ kɛba,”+ Yehowa kɛɛ, “miitsu ni ayaŋɔ Babilon maŋtsɛ Nebukadnezar,* mitsulɔ lɛ, kɛba,+ ni mahã amɛte shi amɛwo shikpɔŋ nɛɛ,+ kɛ mɛi ni yɔɔ nɔ lɛ, kɛ jeŋmaji nɛɛ fɛɛ ni bɔle he lɛ.+ Makpãtã amɛhiɛ ni mahã amɛtsɔ nɔ ko ni hãa mɔ he jɔ̃ɔ ehe kɛ nɔ ko ni hãa mɔ boɔ tsia* kɛ naanɔ amaŋfɔ. 10  Mahã miishɛɛ kɛ nyamɔ gbee, kɛ ayemforo wu gbee, kɛ ayemforo gbee,+ kɛ wiɛtɛ gbɛɛmɔ kɛ kane kpɛmɔ sɛɛ afo.+ 11  Ni abaahã shikpɔŋ nɛɛ nɔ atsɔ koikoi ni ebaatsɔ nɔ ko ni hãa mɔ he jɔ̃ɔ ehe, ni jeŋmaji nɛɛ baasɔmɔ Babilon maŋtsɛ lɛ afii 70.”’+ 12  “‘Shi kɛ́ afii 70 lɛ shɛ lɛ,+ magbala Babilon maŋtsɛ lɛ kɛ nakai jeŋmaŋ lɛ toi yɛ amɛtɔmɔ lɛ hewɔ,’+ Yehowa kɛɛ, ‘ni mahã Kaldeabii lɛ ashikpɔŋ lɛ atsɔ shikpɔŋ ni akɛfeee nɔ ko kɛmiiya naanɔ.+ 13  Mahã wiemɔi fɛɛ ni miwie mishi nakai shikpɔŋ lɛ aba enɔ, nibii fɛɛ ni aŋma yɛ wolo nɛɛ mli ni Yeremia gba eshi jeŋmaji lɛ fɛɛ lɛ. 14  Ejaakɛ jeŋmaji babaoo kɛ maŋtsɛmɛi wuji+ baahã amɛsɔmɔ amɛ akɛ nyɔji,+ ni mawo amɛ nyɔmɔ yɛ amɛnifeemɔi lɛ kɛ amɛninenaa nitsumɔ lɛ fɛɛ naa.’”+ 15  Ejaakɛ nɔ ni Yehowa, Israel Nyɔŋmɔ lɛ kɛɛ mi nɛ: “Hemɔ kɔɔpoo ni mlifu wain yɔɔ mli lɛ yɛ midɛŋ, ni ohã jeŋmaji lɛ fɛɛ ni matsu bo amɛŋɔɔ lɛ anu. 16  Ni amɛbaanu ni amɛbaadidãa ni amɛbaafee amɛnii tamɔ sɛkɛyelɔi yɛ klante ni miitsu kɛmiiba amɛteŋ lɛ hewɔ.”+ 17  No hewɔ lɛ, mihe kɔɔpoo lɛ yɛ Yehowa dɛŋ, ni mihã jeŋmaji fɛɛ ni Yehowa etsu mi amɛŋɔɔ lɛ nu:+ 18  mije shishi kɛ Yerusalem kɛ Yuda maji lɛ,+ kɛ emaŋtsɛmɛi lɛ kɛ elumɛi lɛ, koni mahã amɛtsɔ amaŋfɔ, kɛ nɔ ko ni hãa mɔ he jɔ̃ɔ ehe, kɛ nɔ ko ni hãa mɔ boɔ tsia,* kɛ loomɔ,+ tamɔ bɔ ni eji ŋmɛnɛ gbi nɛɛ; 19  no sɛɛ lɛ, Ejipt maŋtsɛ Farao kɛ etsuji lɛ, kɛ elumɛi lɛ, kɛ emaŋbii lɛ fɛɛ,+ 20  kɛ futufutu gbɔmɛi ni yɔɔ amɛteŋ lɛ fɛɛ; kɛ Uz shikpɔŋ lɛ nɔ maŋtsɛmɛi lɛ fɛɛ; kɛ Filistibii+ lɛ ashikpɔŋ lɛ nɔ maŋtsɛmɛi lɛ fɛɛ, kɛ Ashkelon,+ kɛ Gaza, kɛ Ekron, kɛ Ashdodbii ni eshwɛ lɛ; 21  kɛ Edom,+ kɛ Moab,+ kɛ Amonbii+ lɛ; 22  kɛ Tiro maŋtsɛmɛi lɛ fɛɛ, kɛ Sidon maŋtsɛmɛi lɛ fɛɛ,+ kɛ ŋshɔkpɔ ni yɔɔ ŋshɔ lɛ mli lɛ nɔ maŋtsɛmɛi lɛ; 23  kɛ Dedan,+ kɛ Tema, kɛ Buz, kɛ mɛi fɛɛ ni shɛɔ amɛyitsei ahe lɛ;+ 24  Arabiabii lɛ amaŋtsɛmɛi lɛ fɛɛ,+ kɛ futufutu gbɔmɛi lɛ amaŋtsɛmɛi ni yɔɔ ŋa lɛ nɔ lɛ fɛɛ; 25  Zimri maŋtsɛmɛi lɛ fɛɛ, kɛ Elam+ maŋtsɛmɛi lɛ fɛɛ, kɛ Mediabii amaŋtsɛmɛi+ lɛ fɛɛ; 26  kɛ kooyigbɛ maŋtsɛmɛi lɛ fɛɛ, mɛi ni bɛŋkɛ kɛ mɛi ni yɔɔ shɔŋŋ lɛ fɛɛ, eko nyiɛ eko sɛɛ, kɛ shikpɔŋ lɛ nɔ maŋtsɛyelii krokomɛi fɛɛ ni yɔɔ shikpɔŋ lɛ hiɛ lɛ; ni amɛsɛɛ lɛ, Sheshak*+ maŋtsɛ lɛ baanu. 27  “Ni okɛɛ amɛ akɛ, ‘Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ: “Nyɛnua ni nyɛtɔrɔa, ni nyɛshwea ni nyɛgbea shi bɔ ni nyɛnyɛŋ shi nyɛte dɔŋŋ+ yɛ klante ni miitsu kɛmiiba nyɛteŋ lɛ hewɔ.”’ 28  Ni kɛ́ amɛheee kɔɔpoo lɛ yɛ odɛŋ amɛnu lɛ, kɛɛmɔ amɛ akɛ, ‘Nɔ ni Yehowa, taiatsɛ lɛ kɛɛ nɛ: “Bɔ fɛɛ bɔ ni fee lɛ, nyɛbaanu kɛ̃! 29  Ejaakɛ naa! kɛ́ mikɛ sane fɔŋ miiba maŋ ni migbɛ́i kã nɔ lɛ nɔ klɛŋklɛŋ lɛ,+ ani nyɛ lɛ, nyɛbaaye nyɛhe?”’+ “‘Nyɛyeŋ nyɛhe, ejaakɛ miitsɛ klante kɛmiiba mɛi ni yɔɔ shikpɔŋ lɛ nɔ lɛ fɛɛ anɔ,’ Yehowa, taiatsɛ lɛ kɛɛ. 30  “No hewɔ lɛ, gbaa wiemɔi nɛɛ fɛɛ otsɔɔ amɛ, ni okɛɛ amɛ akɛ,‘Yehowa baahũu kɛjɛ ŋwɛi,Ni ebaahã anu egbee kɛjɛ ehe krɔŋkrɔŋ ni ehiɔ lɛ. Ebaahũu waa ewo eshihilɛhe lɛ. Ebaabolɔ tamɔ mɛi ni ŋaa wain yɛ wainŋaa bu mli bolɔɔ lɛ,Ebaalá kunimyeli lala ewo mɛi ni yɔɔ shikpɔŋ lɛ nɔ lɛ fɛɛ.’ 31  ‘Gbɛɛmɔ ko baajije kɛya shikpɔŋ lɛ naagbeehei lɛ,Ejaakɛ Yehowa kɛ jeŋmaji lɛ baaye sane. Lɛ diɛŋtsɛ ebaakojo gbɔmɛi* fɛɛ.+ Ni ekɛ mɛi fɔji lɛ baahã klante,’ Yehowa kɛɛ. 32  Nɔ ni Yehowa, taiatsɛ lɛ, kɛɛ nɛ: ‘Naa! Sane fɔŋ jɛ jeŋmaŋ kome nɔ kɛmiiya jeŋmaŋ kroko nɔ,+Ni abaaŋmɛɛ kɔɔyɔɔ wulu ko ni naa wa he kɛjɛ hei ni yɔɔ shɔŋŋshɔŋŋ yɛ shikpɔŋ lɛ nɔ lɛ.+ 33  “‘Ni mɛi ni Yehowa baagbe yɛ nakai gbi lɛ nɔ lɛ baajwere shi kɛjɛ shikpɔŋ lɛ naagbeehe kome aahu kɛyashi shikpɔŋ lɛ naagbeehe kroko. Afóŋ amɛ, ni abuaŋ amɛnaa, ni afuŋ amɛ hu. Amɛbaatsɔ tamɔ kooloi afei yɛ shikpɔŋ lɛ nɔ.’ 34  Nyɛ tookwɛlɔi, nyɛwoa yara, ni nyɛboa waa! Nyɛ tooku lɛ ateŋ toi kpakpai lɛ, nyɛkokloa shi,Ejaakɛ be ni abaagbe nyɛ ni agbɛ nyɛ ashwã lɛ eshɛ,Ni nyɛbaatswa shi tamɔ gbɛ́ ni jara wa! 35  Tookwɛlɔi lɛ bɛ he ko ni amɛbaayaba abo yɛ,Ni tooku lɛ ateŋ toi kpakpai lɛ enaaa he ni amɛbaajo foi kɛya. 36  Nyɛboa toi! Tookwɛlɔi lɛ miibo waaNi tooku lɛ ateŋ toi kpakpai lɛ miifó waa,Ejaakɛ Yehowa miikpãtã amɛlɛɛhe lɛ hiɛ. 37  Ni ahã hei ni amɛyabumɔɔ shi dioo yɛ lɛ ejɔ diŋŋYɛ Yehowa mlifu ni naa wa lɛ hewɔ. 38  Eshi eshihilɛhe lɛ efɔ̃ shi tamɔ jatanuu kɛ ekuɛ he tsɔi,+Ejaakɛ amɛshikpɔŋ lɛ etsɔ nɔ ko ni hãa mɔ he jɔ̃ɔ eheYɛ klante ni naa wa lɛ hewɔKɛ emlifu ni naa wa lɛ hewɔ.”

Shishigbɛ Niŋmaa

Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
Loo “Nɔ ni gbalɔ Yeremia kɛɛ Yudabii lɛ fɛɛ kɛ mɛi fɛɛ ni yɔɔ Yerusalem.”
Hebri sht. ŋm., “miteɔ shi leebi maŋkpa ni miwieɔ.”
Hebri sht. ŋm., “miteɔ shi leebi maŋkpa ni miwieɔ.”
Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
Hebri sht. ŋm., “mɔ kpãa bɛlɛ.”
Hebri sht. ŋm., “mɔ kpãa bɛlɛ.”
Etamɔ nɔ ni eji gbɛ́i ni akɛtsɛɔ Babel (Babilon) koni mɛi akayoo sɛɛ akɛ Babilon he awieɔ lɛ.
Hebri sht. ŋm., “heloo.”