Yeremia 18:1-23
18 Wiemɔ ni jɛ Yehowa ŋɔɔ ba Yeremia ŋɔɔ nɛ:
2 “Tee shi ni okpeleke shi kɛya gbɛshɔ̃lɔ lɛ shĩa lɛ,+ ni mahã onu miwiemɔi lɛ yɛ jɛmɛ.”
3 No hewɔ lɛ, mikpeleke shi kɛtee gbɛshɔ̃lɔ lɛ shĩa lɛ, no mli lɛ, eeshɔ̃ nii yɛ nishɔ̃ɔ tɛi lɛ anɔ.
4 Shi gbɛ́ ni gbɛshɔ̃lɔ lɛ kɛ sũ shɔ̃ɔ lɛ fite yɛ edɛŋ. No hewɔ lɛ, gbɛshɔ̃lɔ lɛ kɛshɔ̃ gbɛ́ kroko, gbɛ́ kroko ni sa ehiɛ.*
5 Kɛkɛ ni Yehowa kɛɛ mi* akɛ:
6 “‘Nyɛ Israel shĩa, ani minyɛŋ mafee nyɛ tamɔ bɔ ni gbɛshɔ̃lɔ nɛɛ fee lɛ?’ Yehowa kɛɛ. ‘Naa! Nyɛ Israel shĩa, bɔ ni sũ lɛ yɔɔ yɛ gbɛshɔ̃lɔ lɛ dɛŋ lɛ, nakai nyɛyɔɔ yɛ midɛŋ.+
7 Be fɛɛ be ni mawie akɛ mafã jeŋmaŋ ko loo maŋtsɛyeli ko ni makumɔ lɛ ni makpãtã ehiɛ,+
8 ni nakai jeŋmaŋ lɛ kpa efɔŋ ni miwie mishi lɛ lɛ feemɔ lɛ, no lɛ, mi hu matsake mijwɛŋmɔ* yɛ sane fɔŋ ni mito miyiŋ akɛ mikɛbaaba enɔ lɛ he.+
9 Shi be fɛɛ be ni mawie akɛ matswa jeŋmaŋ ko loo maŋtsɛyeli ko mama shi, ni madu,
10 ni efee efɔŋ yɛ mihiɛ ni ebooo migbee toi lɛ, no lɛ, mi hu matsake mijwɛŋmɔ* yɛ ekpakpa ni mito miyiŋ akɛ mafee mahã lɛ lɛ he.’
11 “Agbɛnɛ, ofainɛ, kɛɛmɔ Yuda hii lɛ kɛ mɛi ni yɔɔ Yerusalem lɛ akɛ, ‘Nɔ ni Yehowa kɛɛ nɛ: “Naa, miisusu* sane fɔŋ ko ni mikɛbaaba nyɛnɔ lɛ he, ni miitsɔ̃ ŋaa mashi nyɛ. Nyɛfainɛ, nyɛkua nyɛsɛɛ kɛjea nyɛgbɛi fɔji lɛ anɔ, ni nyɛtsakea nyɛgbɛi kɛ nyɛnifeemɔi lɛ.”’”+
12 Shi amɛkɛɛ akɛ: “Dabi, wɔfeŋ kpɛ!”+ Ejaakɛ wɔbaanyiɛ wɔ diɛŋtsɛ wɔsusumɔi lɛ asɛɛ, ni wɔteŋ mɔ fɛɛ mɔ baafee nɔ ni etsui fɔŋ ni ebuuu nɔ ko lɛ tsirɛɔ lɛ akɛ efee lɛ.”+
13 No hewɔ lɛ, nɔ ni Yehowa kɛɛ nɛ:
“Nyɛfainɛ, nyɛbia yɛ jeŋmaji lɛ ateŋ nyɛhãa nyɛhe.
Namɔ enu nɔ ko ni tamɔ nɛkɛ pɛŋ?
Israel oblayoo fro lɛ efee nɔ ko ni hãa mɔ he jɔ̃ɔ ehe waa.+
14 Ani Lebanon snoo lɛ ni yɔɔ etɛsai lɛ anɔ lɛ sereɔ?
Aloo ani nui ni mli ejɔ ŋanii ni hoɔ kɛjɛɔ shɔŋŋ kɛbaa lɛ gbiɔ?
15 Shi mimaŋ lɛ hiɛ ekpa minɔ.+
Ejaakɛ amɛshãa afɔlei* amɛhãa nɔ ko ni he bɛ sɛɛnamɔ,+Ni amɛhãa mɛi tɛrɛɔ yɛ amɛgbɛi lɛ anɔ, blema nanegbɛi lɛ,+Koni amɛyanyiɛ gbɛi krokomɛi ni nɔ bɛ trotro ni asako nɔ* lɛ anɔ,
16 Koni amɛhã amɛshikpɔŋ lɛ atsɔ he ko ni hãa mɔ he jɔ̃ɔ ehe+Kɛ nɔ ko ni hãa mɛi boɔ tsia* be fɛɛ be.+
Mɔ fɛɛ mɔ ni tsɔɔ jɛmɛ kɛhoɔ lɛ baakwɛ ni ehe baajɔ̃ ehe ni ebaahoso eyitso.+
17 Magbɛ amɛ mashwã henyɛlɔ lɛ hiɛ tamɔ bɔ ni bokã kɔɔyɔɔ gbɛɔ jwɛi eshwãa lɛ.
Yɛ amɛmanehulu gbi lɛ nɔ lɛ, matsɔ misɛɛ mahã amɛ, jeee mihiɛ.”+
18 Ni amɛkɛɛ akɛ: “Nyɛbaa, nyɛhãa wɔtsɔa ŋaa wɔshia Yeremia,+ ejaakɛ mla* lɛ ebɔŋ wɔsɔfoi lɛ, ni ŋaawoo ebɔŋ hiɛshikalɔi lɛ, ni wiemɔ lɛ hu ebɔŋ gbalɔi lɛ. Nyɛbaa, nyɛhãa wɔwiea wɔshia lɛ,* ni wɔkaboa nɔ ni ewieɔ lɛ toi.”
19 Ao Yehowa, bo mi toi jogbaŋŋ,Ni obo nɔ ni mihenyɛlɔi lɛ kɛɔ lɛ toi.
20 Ani esa akɛ, akɛ efɔŋ ato ekpakpa najiaŋ?
Ejaakɛ amɛtsa bu amɛhã miwala.*+
Kaimɔ akɛ midamɔ ohiɛ miwie amɛhe ekpakpa,Koni ojie omlifu lɛ kɛje amɛnɔ.
21 No hewɔ lɛ, okɛ amɛbii* lɛ ahã hɔmɔ,Ni okɛ amɛ ahã klante hewalɛ lɛ.+
Amɛŋamɛi lɛ abii lɛ agboi ni amɛŋamɛi atsɔmɔ yei okulafoi hu.+
Gbele hela agbe amɛhii lɛ,Okɛ klante agbe amɛblahii lɛ yɛ ta mli.+
22 Hã anu yaafo yɛ amɛshĩai lɛ amliBe ni okɛ ojotswalɔi ata eba amɛnɔ trukaa lɛ.
Ejaakɛ amɛtsa bu koni amɛkɛdu miNi amɛtsɔ minaji hu tsɔnei.+
23 Shi bo Yehowa,Ole ŋai fɛɛ ni amɛtsɔ amɛshi mi koni amɛgbe mi lɛ jogbaŋŋ.+
Kaatsimɔ amɛtɔmɔ lɛ nɔ,Ni kaatsumɔ amɛhe esha lɛ kɛje ohiɛ.
Hã amɛtɛrɛ yɛ ohiɛ+Be ni ote shi owo amɛ yɛ omlifu lɛ mli lɛ.+
Shishigbɛ Niŋmaa
^ Hebri sht. ŋm., “bɔ ni sa gbɛshɔ̃lɔ lɛ hiɛ akɛ ebaafee.”
^ Loo “Kɛkɛ ni Yehowa wiemɔ ba miŋɔɔ.”
^ Loo “mashwa mihe.”
^ Loo “mashwa mihe.”
^ Hebri sht. ŋm., “miishɔ̃.”
^ Loo “agbako.”
^ Loo “lasu afɔlei.”
^ Hebri sht. ŋm., “mɛi kpãa bɛlɛ.”
^ Hebri sht. ŋm., “wɔkɛ lilɛi ayia lɛ.”
^ Loo “gbɛtsɔɔmɔ.”
^ Loo “misusuma.”
^ Hebri sht. ŋm., “amɛbihii.”
