Yakobo Wolo Lɛ 5:1-20

  • Abɔ niiatsɛmɛi kɔkɔ (1-6)

  • Nyɔŋmɔ jɔɔ mɛi ni kɛ tsuishitoo fiɔ shi lɛ (7-11)

  • Hã owiemɔ “hɛɛ” afee hɛɛ (12)

  • Hemɔkɛyeli sɔlemɔ woɔ yibii (13-18)

  • Ye obua eshafeelɔ ni eku esɛɛ (19, 20)

5  Agbɛnɛ, nyɛboa toi, nyɛ niiatsɛmɛi, nyɛfóa ni nyɛwoa yara yɛ haomɔi ni miiba nyɛnɔ lɛ hewɔ.+  Nyɛnii babaoo lɛ ekpɔtɔ, ni nyɛtadei lɛ hu, abɛi ni yeɔ mama eye.+  Nyɛshika tsuru kɛ nyɛjwiɛtɛi lɛ ebɔ ŋkanale aahu efite, ni amɛhe ŋkanale lɛ baaye odase ashi nyɛ, ni amɛbaaye nyɛheloo lɛ. Nibii ni nyɛbua naa nyɛto lɛ baatsɔmɔ tamɔ la yɛ naagbee gbii lɛ amli.+  Naa! Nitsulɔi ni kpa nyɛŋmɔji lɛ amli nii lɛ anyɔmɔwoo ni nyɛkɛhãaa amɛ lɛ miibolɔ, ni bolɔmɔi ni nikpalɔi lɛ bolɔɔ ni aye abua amɛ lɛ eyabote Yehowa,* taiatsɛ lɛ, toiiaŋ.+  Nyɛhi shi ogbɔjɔ ni nyɛŋmɛɛ nyɛhe nyɛhã heloo lɛ akɔnɔi lɛ yɛ shikpɔŋ lɛ nɔ. Nyɛhã nyɛtsuii eshwishwii yɛ gbee gbi lɛ nɔ.+  Nyɛbu jalɔ lɛ fɔ; ni nyɛgbe lɛ. Ani emli fuko nyɛ?  No hewɔ lɛ, nyɛmimɛi, nyɛtoa nyɛtsui shi kɛyashia Nuŋtsɔ lɛ baa be lɛ.*+ Naa! Okwaafonyo yaa nɔ emɛɔ shikpɔŋ lɛ nɔ yibii ni jara wa lɛ, ni etoɔ etsui shi yɛ he kɛyashiɔ be ni klɛŋklɛŋ nugbɔ lɛ kɛ sɛɛkpee nugbɔ* lɛ baabɔi nɛmɔ.+  Nyɛ hu nyɛtoa nyɛtsui shi;+ nyɛhãa nyɛtsuii afia shi shiŋŋ, ejaakɛ Nuŋtsɔ lɛ baa be lɛ* ebɛŋkɛ.+  Nyɛmimɛi, nyɛkawiea huhuuhu nyɛshia nyɛhe,* koni akakojo nyɛ.+ Naa! Kojolɔ lɛ damɔ shinai lɛ anaa. 10  Nyɛmimɛi, nyɛkasea bɔ ni gbalɔi ni wie yɛ Yehowa* gbɛ́i mli+ lɛ fi shi yɛ amanehulu mli+ kɛ bɔ ni amɛto amɛtsui shi lɛ.+ 11  Naa! Wɔbuɔ mɛi ni fiɔ shi lɛ akɛ amɛyɛ miishɛɛ.*+ Nyɛnu Hiob shifimɔ lɛ he,+ ni nyɛna bɔ ni Yehowa* hã enaagbee fee ehã,+ akɛ Yehowa* musuŋ tsɔɔ lɛ waa,* ni enaa mɔbɔ hu.+ 12  Nɔ ni fe fɛɛ lɛ, minyɛmimɛi, nyɛkpaa kitã ni nyɛkãa lɛ, nɔ ni akɛ ŋwɛi kãa jio, nɔ ni akɛ shikpɔŋ kãa jio, loo kitã kroko jio. Shi nyɛhãa nyɛwiemɔ “Hɛɛ” afea hɛɛ, ni “Dabi” afea dabi,+ koni nyɛkagbee kojomɔ mli. 13  Ani nyɛteŋ mɔ ko kɛ shihilɛ ni mli wa miikpe? Eya nɔ esɔle.+ Ani mɔ ko ená tsuijurɔ? Elá yijiemɔ lalai.+ 14  Ani nyɛteŋ mɔ ko bɛ hewalɛ?* Etsɛ asafoŋ onukpai+ lɛ kɛba eŋɔɔ, ni amɛsɔle amɛhã lɛ, ni amɛkpa lɛ mu+ yɛ Yehowa* gbɛ́i mli. 15  Ni sɔlemɔ ni ajɛɔ hemɔkɛyeli mli asɔleɔ lɛ baahã helatsɛ lɛ* aná hewalɛ, ni Yehowa* baawó enɔ. Agbɛnɛ hu, kɛ́ efee eshai lɛ, akɛbaake lɛ. 16  No hewɔ lɛ, nyɛjajea nyɛhe eshai faŋŋ+ nyɛtsɔa nyɛhe, ni nyɛsɔlea nyɛhãa nyɛhe, koni atsa nyɛ. Sɔlemɔ ni jalɔ sɔleɔ kɛkpaa fai kɛ hiɛdɔɔ lɛ yɛ hewalɛ waa ni ebaanyɛ eye ebua mɛi.*+ 17  Elia ji gbɔmɔ ni yɔɔ henumɔi tamɔ wɔ nɔŋŋ, shi be ni esɔle kɛ hiɛdɔɔ koni nugbɔ akanɛ lɛ, nugbɔ enɛɛɛ yɛ shikpɔŋ lɛ nɔ afii etɛ kɛ nyɔji ekpaa.+ 18  Ni no sɛɛ lɛ, esaa esɔle, ni nugbɔ jɛ ŋwɛi eshwie shi ni shikpɔŋ lɛ ba nii.+ 19  Minyɛmimɛi, kɛ́ mɔ ko hã nyɛteŋ mɔ ko du gbɛ kɛje anɔkwale lɛ he, ni mɔ kroko hã eku esɛɛ kɛba lɛ, 20  nyɛnáa nyɛlea akɛ mɔ fɛɛ mɔ ni hãa eshafeelɔ ko kuɔ esɛɛ kɛjeɔ egbɛ gbonyo ni ekɔ lɛ nɔ kɛbaa lɛ,+ ebaahere eshafeelɔ lɛ* yiwala kɛjɛ gbele mli, ni ebaaha eshai pii anɔ.+

Shishigbɛ Niŋmaa

Greek sht. ŋm., “be ni Nuŋtsɔ lɛ eba lɛ.”
Klɛŋklɛŋ nugbɔ lɛ jeɔ shishi aaafee October teŋgbɛ. Sɛɛkpee nugbɔ lɛ jeɔ shishi aaafee April teŋgbɛ.
Greek sht. ŋm., “be ni Nuŋtsɔ lɛ eba lɛ.”
Loo “nyɛkadɔmɔa ŋtsɔi nyɛwoa nyɛhe; nyɛkatɔkea nyɛwoa nyɛhe.” Greek sht. ŋm., “nyɛkaboa hũu.”
Loo “mɛi ni ajɔɔ amɛ.”
Loo “dɔɔ mɔ he waa.”
Ekã shi faŋŋ akɛ, enɛ kɔɔ wekukpaa ni yɔɔ mɔ ko kɛ Nyɔŋmɔ teŋ ni efite lɛ he.
Shishitsɔɔmɔi komɛi kɛɔ akɛ, “mɔ ni etɔ lɛ lɛ.”
Greek sht. ŋm., “yɛ hewalɛ waa kɛ́ eetsu nii.”
Loo “eshafeelɔ lɛ susuma.”