Akɛmaje Tito 2:1-15

  • Tsɔɔmɔ ni hãa gbekɛbii kɛ onukpai fɛɛ náa hewalɛ (1-15)

    • Kwa bu ni abuuu Nyɔŋmɔ lɛ (12)

    • Ohiɛ adɔ nitsumɔi kpakpai ahe (14)

2  Shi bo lɛ, yaa nɔ owie wiemɔi ni kɛ tsɔɔmɔ ni hãa mɔ náa hewalɛ*+ lɛ kpãa gbee.  Hii onukpai lɛ, amɛŋmɛ pɛpɛɛpɛ yɛ amɛnifeemɔi amli, amɛfee mɛi ni kɛ nibii shwɛɛɛ,* amɛjwɛŋ jogbaŋŋ, amɛhe awa amɛ yɛ hemɔkɛyeli, kɛ suɔmɔ, kɛ shifimɔ mli.  Nakai nɔŋŋ yei onukpai lɛ hu, amɛba amɛjeŋ akɛ Nyɔŋmɔ gbeyeishelɔi, amɛkawie mɛi ahe efɔŋ, amɛkahã dãanumɔ babaoo ye amɛ nyɔŋ, amɛfee mɛi ni tsɔɔ nii kpakpai,  koni amɛwo oblayei lɛ ŋaa* ni amɛsumɔ amɛwumɛi, ni amɛsumɔ amɛbii,  ni amɛjwɛŋ jogbaŋŋ, amɛhe atse, amɛtsu nii yɛ shĩa,* amɛfee ekpakpa, amɛba amɛhe shi amɛwo amɛ diɛŋtsɛ amɛwumɛi ashishi,+ koni akawie Nyɔŋmɔ wiemɔ lɛ he efɔŋ.  Oblahii hu nakai nɔŋŋ, yaa nɔ owie otsɔɔ amɛ koni amɛjwɛŋ jogbaŋŋ,+  ni yɛ gbɛ fɛɛ gbɛ nɔ lɛ, okɛ bo diɛŋtsɛ ohe afee nɔkwɛmɔnɔ ohã amɛ yɛ nitsumɔi kpakpai amli. Tsɔɔmɔ nii ni yɔɔ krɔŋŋ* ni okɛ nibii akafee shwɛmɔ,*+  ni owie wiemɔi ni wajeɔ mɔ* ni anáŋ he sane fɔŋ ko awie,+ koni shiteekɛwolɔi lɛ ahiɛ agboi, akɛni amɛbɛ nɔ ko gbonyo* ko ni amɛbaawie yɛ wɔhe lɛ hewɔ.+  Nyɔji lɛ, amɛbo amɛnuŋtsɔmɛi atoi yɛ nibii fɛɛ mli,+ amɛbɔ mɔdɛŋ amɛsa amɛhiɛ, ni amɛkajie sane naa, 10  amɛkaju amɛ,+ shi moŋ amɛhã ana akɛ abaanyɛ amu afɔ̃ amɛnɔ kwraa, koni amɛkɛwula Nyɔŋmɔ, wɔ-Yiwalaherelɔ lɛ tsɔɔmɔ lɛ yɛ gbɛ fɛɛ gbɛ nɔ.+ 11  Ejaakɛ ajie Nyɔŋmɔ dromɔ lɛ kpo, ni no ehã aahere gbɔmɛi srɔtoi fɛɛ yiwala.+ 12  No tsɔseɔ wɔ koni wɔtsi wɔhe kɛje bu ni abuuu Nyɔŋmɔ kɛ je lɛŋ akɔnɔi ahe,+ ni wɔkɛ hiɛshikamɔ kɛ jalɛ kɛ Nyɔŋmɔjamɔ ahi shi yɛ jeŋ ni yɔɔ amrɔ nɛɛ* mli,+ 13  be mli ni wɔmɛɔ hiɛnɔkamɔ ni hãa anáa miishɛɛ+ lɛ kɛ Nyɔŋmɔ kpeteŋkpele lɛ kpojiemɔ ni yɔɔ nyam lɛ kɛ Yesu Kristo, wɔ-Yiwalaherelɔ lɛ kpojiemɔ ni yɔɔ nyam lɛ, 14  Kristo ji mɔ ni kɛ ehe hã wɔ+ koni ekɛhã wɔye wɔhe*+ kɛjɛ mlatɔmɔi srɔtoi fɛɛ amli, ni efee gbɔmɛi ni ji lɛ diɛŋtsɛ enii ni eshwɛɛɛ he kwraa ni hiɛ dɔɔ nitsumɔi kpakpai ahe lɛ krɔŋkrɔŋ ehã ehe.+ 15  Yaa nɔ owie nibii nɛɛ, ni owie otsɔɔ mɛi,* ni ojaje mɛi akɛni oyɛ hegbɛ akɛ ofeɔ nakai lɛ hewɔ.+ Kaafee nɔ ko ni hãŋ abu bo.

Shishigbɛ Niŋmaa

Loo “ni tsaa mɔ; ni sɛɛnamɔ yɔɔ he.”
Loo “amɛfee mɛi ni bɔɔ amɛhe mɔdɛŋ.”
Loo “amɛhã oblayei lɛ ahiɛ aba amɛhe nɔ; amɛtsɔse oblayei lɛ.”
Loo “amɛkwɛ amɛshĩai.”
Shishitsɔɔmɔi komɛi kɛɔ akɛ, “Okɛ krɔŋŋfeemɔ atsɔɔ nii.”
Loo “ni okɛ mɔdɛŋbɔɔ afee nakai.”
Loo “ni tsaa mɔ; ni sɛɛnamɔ yɔɔ he.”
Loo “fɔŋ.”
Loo “yinɔ ni yɔɔ amrɔ nɛɛ; shihilɛ gbɛjianɔtoo ni yɔɔ amrɔ nɛɛ.” Kwɛmɔ Wiemɔi Titrii Amligbalamɔ lɛ.
Greek sht. ŋm., “ekɛkpɔ̃ wɔ.”
Loo “owo mɛi hewalɛ.”