Wolo Ni Akɛmaje Romabii Lɛ 4:1-25

  • Abu Abraham jalɔ yɛ hemɔkɛyeli hewɔ (1-12)

    • Abraham, mɛi ni yɔɔ hemɔkɛyeli lɛ atsɛ (11)

  • Nine shɛ shiwoo lɛ nɔ yɛ hemɔkɛyeli hewɔ (13-25)

4  Kɛ́ nakai ni lɛ, mɛni wɔbaakɛɛ akɛ Abraham, ni ji wɔtsɛ yɛ heloo gbɛfaŋ lɛ ná?  Akɛ nɔkwɛmɔnɔ lɛ, kɛ́ nitsumɔi anɔ atsɔ abu Abraham jalɔ lɛ, kulɛ eyɛ yiŋtoo hewɔ ni eeeshwã, shi enyɛŋ eshwã yɛ Nyɔŋmɔ hiɛ.  Shi te ŋmalɛ lɛ kɛɔ tɛŋŋ? “Abraham he Yehowa* nɔ eye, ni abu no jalɛ ahã lɛ.”+  Agbɛnɛ, mɔ ni tsuɔ nii lɛ, abuɔ enyɔmɔwoo lɛ akɛ nyɔmɔ ni ahiɛ lɛ,* shi jeee akɛ dromɔ nii.  Shi mɔ ni tsuuu nii, shi enáa hemɔkɛyeli yɛ mɔ ni buɔ eshafeelɔ jalɔ lɛ mli lɛ, abuɔ ehemɔkɛyeli lɛ akɛ jalɛ ahãa lɛ.+  Nakai nɔŋŋ David hu wie miishɛɛ ni gbɔmɔ náa kɛ́ Nyɔŋmɔ shi nitsumɔi asɛɛ ebu jalɛ ehã lɛ lɛ he akɛ:  “Mɛi ni akɛ amɛnifeemɔi ni mla eŋmɛɛɛ gbɛ lɛ eke amɛ, ni atsĩmɔ amɛhe eshai anɔ* lɛ yɛ miishɛɛ;  gbɔmɔ ni Yehowa* ebuuu ehe esha lɛ he akɔntaa lɛ yɛ miishɛɛ.”+  No hewɔ lɛ, ani mɛi ni afo amɛ ketia lɛ pɛ náa miishɛɛ nɛɛ, aloo mɛi ni afoko amɛ ketia lɛ hu náa?+ Ejaakɛ wɔkɛɔ akɛ: “Abu Abraham hemɔkɛyeli lɛ akɛ jalɛ ahã lɛ.”+ 10  No hewɔ lɛ, mɛɛ shihilɛ mli no mli lɛ eyɔɔ ni abu no jalɛ ahã lɛ lɛ? Be ni afo lɛ ketia lɛ, aloo be ni afoko lɛ ketia lɛ? Jeee be ni afo lɛ ketia lɛ, shi moŋ be ni afoko lɛ ketia lɛ. 11  Ni enine shɛ okadi ko nɔ+—no ji ketiafoo—akɛ niianaasɔomɔnɔ* kɛhã jalɔ ni abu lɛ yɛ he ni ehe eye lɛ hewɔ be ni afoko lɛ ketia lɛ, koni etsɔ mɛi fɛɛ ni heɔ amɛyeɔ be ni afoko amɛ ketia lɛ atsɛ,+ bɔ ni afee ni abu no jalɛ ahã amɛ hu; 12  ni agbɛnɛ hu, etsɔ seshibii ni afolɔ amɛ ketia lɛ atsɛ, mɛi ni jeee ketiafoo lɛ he kɛkɛ amɛkpɛtɛɔ, shi moŋ, amɛnyiɛɔ wɔtsɛ Abraham+ nanemaahei lɛ asɛɛ kpaakpa yɛ hemɔkɛyeli ni ená be ni afoko lɛ ketia lɛ naa lɛ. 13  Ejaakɛ jeee mla nɔ atsɔ awo Abraham loo eseshi* lɛ shi akɛ ebaaná jeŋ ko akɛ gboshinii lɛ,+ shi moŋ atsɔ jalɔ ni abu lɛ yɛ he ni ehe eye lɛ nɔ.+ 14  Ejaakɛ kɛ́ mɛi ni kpɛtɛɔ mla he lɛ ji niyelɔi lɛ, belɛ sɛɛnamɔ ko bɛ hemɔkɛyeli he, ni shiwoo ko bɛ dɔŋŋ. 15  Yɛ anɔkwale mli lɛ, Mla lɛ tsɛɔ mlifu kɛbaa,+ shi he ni mla bɛ lɛ, mlatɔmɔ ko hu bɛ jɛmɛ.+ 16  No hewɔ ni atsɔɔ hemɔkɛyeli nɔ lɛ, koni efee dromɔ naa,+ bɔ ni afee ni shiwoo lɛ ama shi shiŋŋ ahã eseshi* lɛ fɛɛ,+ jeee mɛi ni kpɛtɛɔ Mla lɛ he lɛ pɛ, shi moŋ mɛi ni kpɛtɛɔ Abraham ni ji wɔ fɛɛ wɔtsɛ lɛ hemɔkɛyeli lɛ he lɛ hu.+ 17  (Nɛkɛ pɛpɛɛpɛ ji bɔ ni aŋma lɛ, akɛ: “Mikɛ bo efee jeŋmaji pii atsɛ.”)+ Enɛ ba yɛ Nyɔŋmɔ hiɛ, mɔ ni ehe enɔ eye, ni hãa gbohii baa wala mli, ni tsɛɔ nibii ni bɛ lɛ, tamɔ nɔ ni amɛyɛ lɛ.* 18  Eyɛ mli akɛ hiɛnɔkamɔ bɛ moŋ, shi ená hiɛnɔkamɔ ni ehe eye hu akɛ ebaatsɔ jeŋmaji pii atsɛ yɛ nɔ ni awie lɛ naa, akɛ: “Nakai oseshi* lɛ baatamɔ.”+ 19  Ni eyɛ mli akɛ ehemɔkɛyeli lɛ gbɔjɔɔɔ moŋ, shi ejwɛŋ gbo ni lɛ diɛŋtsɛ egbɔmɔtso lɛ egbo momo (akɛni eye aaafee afii 100 lɛ),+ kɛ agbɛnɛ, bɔ ni Sara musu egbo* lɛ hu he.+ 20  Shi Nyɔŋmɔ shiwoo lɛ hewɔ lɛ, eyiŋ efeee lɛ kɔshikɔshi oookɛɛ ebɛ hemɔkɛyeli; moŋ lɛ, ehemɔkɛyeli lɛ hã ená hewalɛ, ni ekɛwo Nyɔŋmɔ hiɛ nyam 21  ni ená nɔmimaa kwraa akɛ nɔ ni Nyɔŋmɔ ewo he shi lɛ, ebaanyɛ efee hu.+ 22  No hewɔ lɛ, “abu no jalɛ ahã lɛ.”+ 23  Shi jeee lɛ pɛ ehewɔ aŋma wiemɔi ni ji, ‘abu no ahã lɛ’ lɛ,+ 24  shi moŋ wɔ mɛi ni abaabu no ahã wɔ lɛ hu ahewɔ, ejaakɛ wɔheɔ mɔ ni tee wɔ-Nuŋtsɔ Yesu shi kɛjɛ gbohii ateŋ lɛ wɔyeɔ.+ 25  Akɛ lɛ hã yɛ wɔtɔmɔi lɛ ahewɔ,+ ni atee lɛ shi yɛ jalɔi ni abaabu wɔ lɛ hewɔ.+

Shishigbɛ Niŋmaa

Loo “akɛ egbɛnaa nii.”
Loo “ni akɛ amɛhe eshai eke amɛ.”
Loo “nɔmimaa.”
Greek sht. ŋm., “edumɔwu.”
Greek sht. ŋm., “edumɔwu.”
Shishitsɔɔmɔi komɛi kɛɔ akɛ, “ni tsɛɔ nɔ ni bɛ shihilɛ mli lɛ kɛbaa shihilɛ mli lɛ.”
Greek sht. ŋm., “odumɔwu.”
Loo “fɔ ni Sara fɔɔɔ.”